“ວັນທີ 22–28 ເດືອນພຶດສະພາ. ໂຈເຊັບ ສະມິດ—ມັດທາຍ 1; ມັດທາຍ 24–25; ມາຣະໂກ 12–13; ລູກາ 21: ‘ເມື່ອບຸດມະນຸດສະເດັດມາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 22–28 ເດືອນພຶດສະພາ. ໂຈເຊັບ ສະມິດ—ມັດທາຍ 1; ມັດທາຍ 24–25; ມາຣະໂກ 12–13; ລູກາ 21,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
The Second Coming [ການສະເດັດມາຄັ້ງທີສອງ], ໂດຍ ແຮຣີ ແອນເດີສັນ
ວັນທີ 22–28 ເດືອນພຶດສະພາ
ໂຈເຊັບ ສະມິດ—ມັດທາຍ 1; ມັດທາຍ 24–25; ມາຣະໂກ 12–13; ລູກາ 21
“ເມື່ອບຸດມະນຸດສະເດັດມາ”
ຂະນະທີ່ທ່ານອ່ານ ໂຈເຊັບ ສະມິດ—ມັດທາຍ 1; ມັດທາຍ 24–25; ມາຣະໂກ 12–13; ແລະ ລູກາ 21, ທ່ານອາດຖາມວ່າ, “ບົດເຫລົ່ານີ້ມີຂ່າວສານຫຍັງແດ່ສຳລັບເຮົາ? ສຳລັບຄອບຄົວຂອງເຮົາ? ແລະ ສຳລັບການເອີ້ນຂອງເຮົາ?”
ບັນທຶກຄວາມປະທັບໃຈຂອງທ່ານ
ສານຸສິດຂອງພຣະເຢຊູຄົງພົບວ່າ ຄຳທຳນາຍຂອງພຣະອົງເລີ່ມຕົ້ນຈາກ: ພຣະວິຫານທີ່ຍິ່ງໃຫຍ່ຂອງເຢຣູຊາເລັມ, ສູນວັດທະນະທຳ ແລະ ທາງວິນຍານຂອງຊາວຢິວ, ຈະຖືກທຳລາຍຈົນໝົດສິ້ນວ່າ “ຫີນທຸກໆກ້ອນທີ່ຢອງທັບກັນຢູ່ນີ້ ຈະຖືກທຳລາຍລົງຈົນບໍ່ເຫລືອຈັກກ້ອນ.” ຕາມທຳມະຊາດແລ້ວ ສານຸສິດຢາກຮູ້ຕື່ມອີກ. ເຂົາເຈົ້າໄດ້ຖາມວ່າ ເຫດການທັງໝົດນີ້ຈະເກີດຂຶ້ນເມື່ອໃດ? ແລະ ເຂົາເຈົ້າກໍໄດ້ຖາມວ່າ ສິ່ງໃດເປັນໝາຍສຳຄັນວ່າ ແມ່ນເວລາມາປະກົດຂອງພຣະອົງ. (ໂຈເຊັບ ສະມິດ—ມັດທາຍ 1:2–4). ຄຳຕອບຂອງພຣະຜູ້ຊ່ວຍໃຫ້ລອດໄດ້ເປີດເຜີຍວ່າ ການທຳລາຍທີ່ຍິ່ງໃຫຍ່ກຳລັງຈະມາເຖິງເຢຣູຊາເລັມ—ຄຳທຳນາຍທີ່ເກີດເປັນຈິງໃນ ຄ.ສ. 70—ເປັນເຫດການເລັກນ້ອຍເມື່ອປຽບທຽບໃສ່ກັບການສະເດັດມາຂອງພຣະອົງໃນຍຸກສຸດທ້າຍ. ສິ່ງຕ່າງໆແມ່ນແຕ່ທີ່ເບິ່ງຄືວ່າໝັ້ນຄົງຫລາຍກວ່າພຣະວິຫານໃນເຢຣູຊາເລັມ ຈະພິສູດວ່າເປັນພຽງຊົ່ວຄາວ—ດວງຕາເວັນ, ດວງເດືອນ, ດວງດາວ, ປະຊາຊາດ, ແລະ ທະເລ. ແມ່ນແຕ່ “ອຳນາດຂອງທ້ອງຟ້າສະຫວັນຈະສັ່ນສະທ້ານຫວັ່ນໄຫວ” (ໂຈເຊັບ ສະມິດ—ມັດທາຍ 1:33). ຖ້າຫາກເຮົາຮູ້ຈັກທາງວິນຍານ, ຄວາມວຸ້ນວາຍນີ້ສາມາດສິດສອນເຮົາໃຫ້ເຊື່ອໝັ້ນໃນບາງສິ່ງທີ່ໝັ້ນຄົງແທ້ໆ. ດັ່ງທີ່ພຣະເຢຊູໄດ້ສັນຍາວ່າ, “ຟ້າສະຫວັນ ແລະ ແຜ່ນດິນໂລກຈະສູນສິ້ນໄປ; ແຕ່ຄຳຂອງເຮົາຈະບໍ່ສູນສິ້ນໄປ. … ແລະ ຜູ້ໃດກໍຕາມທີ່ສະສົມຖ້ອຍຄຳຂອງເຮົາ, ຈະບໍ່ຖືກຫລອກລວງ (ໂຈເຊັບ ສະມິດ—ມັດທາຍ 1:35, 37).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ໂຈເຊັບ ສະມິດ—ມັດທາຍຄືຫຍັງ?
ໂຈເຊັບ ສະມິດ—ມັດທາຍ, ບັນຈຸຢູ່ໃນພຣະຄຳພີໄຂ່ມຸກອັນລ້ຳຄ່າ, ແມ່ນການແປຂອງໂຈເຊັບ ສະມິດ ສ່ວນສຸດທ້າຍຂອງ ມັດທາຍ 23 ແລະ ທັງໝົດຂອງ ມັດທາຍ 24. ການແກ້ໄຂຄືນໃໝ່ທີ່ດົນໃຈຂອງໂຈເຊັບ ສະມິດ ໄດ້ຟື້ນຟູຄວາມຈິງທີ່ມີຄ່າ ຊຶ່ງໄດ້ສູນເສຍໄປ. ຂໍ້ທີ 12–21 ກ່າວເຖິງການທຳລາຍຂອງເຢຣູຊາເລັມໃນສະໄໝບູຮານ; ຂໍ້ທີ 21–55 ບັນຈຸຄຳທຳນາຍກ່ຽວກັບຍຸກສຸດທ້າຍ.
ໂຈເຊັບ ສະມິດ—ມັດທາຍ 1:21–37; ມາຣະໂກ 13:21–37; ລູກາ 21:25–38
ຄຳທຳນາຍກ່ຽວກັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ ສາມາດຊ່ວຍເຮົາໃຫ້ປະເຊີນກັບອະນາຄົດດ້ວຍສັດທາ.
ມັນເປັນເລື່ອງທີ່ບໍ່ສະບາຍໃຈທີ່ຈະອ່ານກ່ຽວກັບເຫດການທີ່ນຳໄປສູ່ການສະເດັດມາຄັ້ງທີສອງຂອງພຣະເຢຊູຄຣິດ. ແຕ່ເມື່ອພຣະເຢຊູໄດ້ທຳນາຍເຖິງເຫດການເຫລົ່ານີ້, ພຣະອົງໄດ້ບອກສານຸສິດຂອງພຣະອົງວ່າ “ບໍ່ [ຕ້ອງ] ຫຍຸ້ງຍາກໃຈ” (ໂຈເຊັບ ສະມິດ—ມັດທາຍ 1:23). ທ່ານຈະ “ບໍ່ຫຍຸ້ງຍາກໃຈ” ໄດ້ແນວໃດ ເມື່ອທ່ານໄດ້ຍິນກ່ຽວກັບແຜ່ນດິນໄຫວ, ສົງຄາມ, ການຫລອກລວງ, ແລະ ຄວາມອຶດຢາກ? ໃຫ້ຄິດກ່ຽວກັບຄຳຖາມນີ້ ຂະນະທີ່ທ່ານອ່ານຂໍ້ເຫລົ່ານີ້. ໃຫ້ໝາຍ ຫລື ບັນທຶກຄຳແນະນຳທີ່ໝັ້ນໃຈໃດໆ ທີ່ທ່ານພົບເຫັນ.
ເບິ່ງ Gospel Topics, “Second Coming of Jesus Christ,” topics.ChurchofJesusChrist.org ນຳອີກ.
ໂຈເຊັບ ສະມິດ—ມັດທາຍ 1:26–27, 38–55; ມັດທາຍ 25:1–13; ລູກາ 21:29–36
ເຮົາຕ້ອງກຽມພ້ອມສະເໝີສຳລັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ.
ພຣະເຈົ້າຍັງບໍ່ໄດ້ເປີດເຜີຍ “ວັນ ຫລື ໂມງ [ທີ່ບຸດມະນຸດຈະສະເດັດມາ]” (ມັດທາຍ 25:13). ແຕ່ພຣະອົງບໍ່ປະສົງທີ່ຈະໃຫ້ວັນນັ້ນເກີດຂຶ້ນກັບເຮົາ “ຢ່າງບໍ່ຄາດຄິດ” (ລູກາ 21:34), ສະນັ້ນ ພຣະອົງຈຶ່ງໄດ້ໃຫ້ຄຳແນະນຳແກ່ເຮົາກ່ຽວກັບການກຽມພ້ອມ.
ຂະນະທີ່ທ່ານອ່ານຂໍ້ເຫລົ່ານີ້, ໃຫ້ຊອກຫາຄຳອຸປະມາ ແລະ ຄຳປຽບທຽບອື່ນໆ ທີ່ພຣະຜູ້ຊ່ວຍໃຫ້ລອດໄດ້ໃຊ້ ເພື່ອສິດສອນເຮົາໃຫ້ກຽມພ້ອມສະເໝີສຳລັບການສະເດັດມາຄັ້ງທີສອງຂອງພຣະອົງ. ທ່ານຮຽນຮູ້ຫຍັງແດ່ຈາກສິ່ງເຫລົ່ານັ້ນ? ທ່ານຖືກດົນໃຈໃຫ້ເຮັດຫຍັງ?
ທ່ານກໍຄວນພິຈາລະນານຳອີກວ່າ ພຣະຜູ້ຊ່ວຍໃຫ້ລອດປະສົງໃຫ້ທ່ານກຽມພ້ອມໂລກສຳລັບການສະເດັດມາຄັ້ງທີສອງຂອງພຣະອົງແນວໃດ. ທ່ານຮູ້ສຶກວ່າ ມັນໝາຍຄວາມວ່າແນວໃດທີ່ຈະກຽມພ້ອມເພື່ອຕ້ອນຮັບພຣະຜູ້ຊ່ວຍໃຫ້ລອດ ເມື່ອພຣະອົງສະເດັດມາ? ຂ່າວສານຂອງແອວເດີ ດີ ທອດ ຄຣິສໂຕເຟີສັນ “Preparing for the Lord’s Return” (Liahona, May 2019, 81–84) ສາມາດຊ່ວຍທ່ານໃຫ້ໄຕ່ຕອງກ່ຽວກັບເລື່ອງນີ້ໄດ້.
ເບິ່ງ Russell M. Nelson, “Embrace the Future with Faith,” Liahona, Nov. 2020, 73–76 ນຳອີກ.
ພຣະບິດາເທິງສະຫວັນຄາດຫວັງໃຫ້ເຮົາໃຊ້ຂອງປະທານຂອງພຣະອົງຢ່າງສະຫລາດ.
ໃນຄຳອຸປະມາຂອງພຣະຜູ້ຊ່ວຍໃຫ້ລອດ, “ຕາລັນຕົນ” ໝາຍເຖິງເງິນ. ແຕ່ຄຳອຸປະມາເລື່ອງຕາລັນຕົນ ສາມາດກະຕຸ້ນເຮົາໃຫ້ໄຕ່ຕອງກ່ຽວກັບວິທີທີ່ເຮົາໃຊ້ພອນຂອງເຮົາ, ບໍ່ແມ່ນກ່ຽວກັບເງິນເທົ່ານັ້ນ. ຫລັງຈາກໄດ້ອ່ານຄຳອຸປະມານີ້ແລ້ວ, ທ່ານສາມາດຂຽນພອນຕ່າງໆ ແລະ ໜ້າທີ່ຮັບຜິດຊອບ ອັນທີ່ພຣະບິດາເທິງສະຫວັນໄດ້ມອບໝາຍໃຫ້ທ່ານລົງໄວ້. ພຣະອົງຄາດໝາຍໃຫ້ທ່ານເຮັດຫຍັງກັບພອນເຫລົ່ານີ້? ທ່ານຈະໃຊ້ຂອງປະທານເຫລົ່ານີ້ຢ່າງສະຫລາດກວ່າເກົ່າໄດ້ແນວໃດ?
ເມື່ອເຮົາຮັບໃຊ້ຄົນອື່ນ, ເຮົາກໍຮັບໃຊ້ພຣະເຈົ້າ.
ຖ້າຫາກທ່ານສົງໄສວ່າ ພຣະຜູ້ເປັນເຈົ້າຈະພິພາກສາຊີວິດຂອງທ່ານແນວໃດ, ໃຫ້ອ່ານຄຳອຸປະມາເລື່ອງຝູງແກະ ແລະ ຝູງແບ້. ທ່ານຄິດວ່າການດູແລຄົນຍາກຈົນຈະຊ່ວຍກະກຽມທ່ານເພື່ອ “ຮັບເອົາອານາຈັກ” ຂອງພຣະເຈົ້າແນວໃດ?
ຄຳອຸປະມານີ້ຄ້າຍຄືກັນກັບຄຳອຸປະມາສອງເລື່ອງອື່ນໃນ ມັດທາຍ 25 ແນວໃດ? ຂ່າວສານໃດແດ່ທີ່ຄ້າຍຄືກັນໃນຄຳອຸປະມາເຫລົ່ານີ້?
ເບິ່ງ ໂມໄຊຢາ 2:17; 5:13 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ໂຈເຊັບ ສະມິດ—ມັດທາຍ.ເພື່ອຊ່ວຍຄອບຄົວຂອງທ່ານໃຫ້ຄົ້ນຄວ້າບົດນີ້, ໃຫ້ເຊື້ອເຊີນເຂົາເຈົ້າໃຫ້ຊອກຫາຄຳສອນຂອງພຣະຜູ້ຊ່ວຍໃຫ້ລອດກ່ຽວກັບວິທີທີ່ເຮົາສາມາດກຽມພ້ອມສຳລັບການສະເດັດມາຄັ້ງທີສອງຂອງພຣະອົງ (ເບິ່ງ, ສຳລັບຕົວຢ່າງ, ຂໍ້ທີ 5–13, 42–46). ເຮົາຈະເຮັດຫຍັງໄດ້ແດ່ເພື່ອເຮັດຕາມຄຳແນະນຳນີ້? ຄອບຄົວຂອງທ່ານອາດມັກຮ້ອງເພງ “ເຮົາຮູ້ພຣະຜູ້ໄຖ່ຊົງພຣະຊົນ” (ເພງສວດ ແລະ ເພງຂອງເດັກນ້ອຍ, 42) ແລະ ແຕ້ມຮູບທີ່ເຂົາເຈົ້າຈິນຕະນາການກ່ຽວກັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ ວ່າຈະເປັນແນວໃດ.
-
ໂຈເຊັບ ສະມິດ—ມັດທາຍ 1:22, 37.ການສະສົມພຣະຄຳຂອງພຣະເຈົ້າໝາຍຄວາມວ່າແນວໃດ? ເຮົາຈະເຮັດສິ່ງນີ້ເປັນສ່ວນຕົວ ແລະ ເປັນຄອບຄົວໄດ້ແນວໃດ? ການເຮັດແນວນັ້ນຈະຊ່ວຍເຮົາຫລີກລ້ຽງຈາກການຖືກຫລອກລວງແນວໃດ?
-
ມັດທາຍ 25:1–13.ທ່ານສາມາດໃຊ້ຮູບພາບກ່ຽວກັບຍິງສາວບໍລິສຸດສິບຄົນ ຢູ່ໃນໂຄງຮ່າງນີ້ ເພື່ອສົນທະນາ ມັດທາຍ 25:1–13. ເຮົາເຫັນລາຍລະອຽດອັນໃດແດ່ຢູ່ໃນຮູບ ທີ່ອະທິບາຍໄວ້ໃນຂໍ້ເຫລົ່ານີ້?
ພວກທ່ານສາມາດຕັດເຈ້ຍເປັນຮູບນ້ຳມັນຍ້ອຍ ແລະ ເຊື່ອງເຈ້ຍເຫລົ່ານັ້ນໄວ້ຕາມເຮືອນ. ພວກທ່ານສາມາດຕິດເຈ້ຍຮູບນ້ຳມັນຍ້ອຍໃສ່ບາງສິ່ງ ເຊັ່ນພຣະຄຳພີ ຫລື ຮູບພຣະວິຫານ. ເມື່ອສະມາຊິກໃນຄອບຄົວພົບເຫັນເຈ້ຍຮູບນ້ຳມັນຍ້ອຍເຫລົ່ານັ້ນ, ພວກທ່ານສາມາດສົນທະນາກັນ ເຖິງວິທີທີ່ສິ່ງເຫລົ່ານີ້ ຊ່ວຍເຮົາກຽມພ້ອມສຳລັບການສະເດັດມາຄັ້ງທີສອງແນວໃດ.
-
ມາຣະໂກ 12:38–44; ລູກາ 21:1–4.ຂໍ້ເຫລົ່ານີ້ສິດສອນຫຍັງແດ່ກ່ຽວກັບວິທີທີ່ພຣະຜູ້ຊ່ວຍໃຫ້ລອດເບິ່ງການຖວາຍຂອງເຮົາ? ສະແດງວິທີຈ່າຍເງິນສ່ວນສິບ ແລະ ຈ່າຍເງິນບໍລິຈາກການຖືສິນອົດເຂົ້າແດ່ພຣະຜູ້ເປັນເຈົ້າ ກັບຄອບຄົວຂອງທ່ານ. ການຖວາຍເຫລົ່ານີ້ຊ່ວຍສ້າງອານາຈັກຂອງພຣະເຈົ້າແນວໃດ? ມີວິທີໃດແດ່ທີ່ເຮົາສາມາດຖວາຍ “ທຸກສິ່ງທີ່ [ເຮົາມີ]” ແດ່ພຣະຜູ້ເປັນເຈົ້າ? (ມາຣະໂກ 12:44).
Widow’s Mite [ເງິນຂອງແມ່ໝ້າຍ], ໂດຍ ແຊນດຣາ ແຣສຕ໌
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.
ການປັບປຸງການສຶກສາສ່ວນຕົວ
ກະກຽມສິ່ງທີ່ຢູ່ອ້ອມຮອບ. “ສິ່ງທີ່ຢູ່ອ້ອມຮອບເຮົາສາມາດເປັນຜົນກະທົບທີ່ມີພະລັງຕໍ່ຄວາມສາມາດຂອງເຮົາທີ່ຈະຮຽນຮູ້ ແລະ ຕໍ່ຄວາມຮູ້ສຶກຂອງເຮົາເຖິງຄວາມຈິງໄດ້” (Teaching in the Savior’s Way, 15). ໃຫ້ພະຍາຍາມຊອກຫາສະຖານທີ່ສຶກສາພຣະຄຳພີ ບ່ອນທີ່ຈະເຊື້ອເຊີນອິດທິພົນຂອງພຣະວິນຍານບໍລິສຸດໃຫ້ມາສະຖິດຢູ່ນຳ. ເພງ ແລະ ຮູບພາບທີ່ເຊີດຊູໃຈ ກໍສາມາດເຊື້ອເຊີນພຣະວິນຍານໃຫ້ມາສະຖິດຢູ່ນຳໄດ້ຄືກັນ.
Five of Them Were Wise [ຫ້າຄົນໃນພວກເຂົາເປັນຄົນສະຫລາດ], ໂດຍ ວາວເຕີ ເຣນ