“Meei 1–7. Ruka 12–17; Ioane 11: “Kimwareirei ma Ngai; bwa I a Tia ni Kunea Au Tiiibu Are Bua Ngkoa,’” Nakomai, Iriirai–Ibukiia Aomata n Tatabemaniia ao Utu: Te O Tetemanti 2023 (2022)
“Meei 1–7. Ruka 12–17; Ioane 11,” Nakomai, Iriirai—Ibukiia Aomata n Tatabemaniia ao Utu: 2023
Te Nati ae Bakatae, iroun Liz Lemon Swindle
Meei 1–7
Ruka 12–17; Ioane 11
“Kimwareirei ma Ngai; bwa I Tia ni Kunea Au Tiiibu Are Bua”
Ngkana ko wareka Ruka 12–17 ao Ioane 11, tataromwaaka ni ukoria bwa tera ae tangiria Tamara are i Karawa bwa ko na ataia ao ni karaoia. Am kamatebwai ni mwakoro aikai e na kona ni kauka nanom nakon rongorongo ake a bon nanonaki ibukim.
Korei Am Namakin
N aron waaki aika a tia n riiriki, 99 man te 100 a na taraaki n rang tamaroa—ma tiaki ngkana te mwaiti anne e tei ibukin natin te Atua aika tangiraki (taraa Reirei ma Berita aika Tabu 18:10). N aron anne, ngkana temanna ae bua e kainanoa kamauana, , te kakae ni katawe “ni karokoa [ti] kunea” (Luke 15:4), n aron te Tia Kamaiu ae reirei n te kaikonaki ibukin te tiibu ae bua. Ngkanne te kukurei e kona ni moanaki “I taku nakoimi ba ai aron naba karawa, ba e na maiti riki te kimwareirei iai i bukin te aomata ae buakaka ae ti temanna ae raira nanona, nakon te kimwareirei i bukiia aomata aika raoiroi aika ruangaun ma ruaman, aika akea bureia aika aki kainanoa te raira n nano.” (Ruka 15:7). Ngkana e taraa n aki boraoi anne, e na ibuobuoki uringan are, ni koauana, bon akea ae “aki kainanoa te rairannano,” Ti kainanoa kamaiura ni kabane. Ao ngaira ni kabane ti na kona n ira buakon te mwakuri ni kamaiu, ti bane ni kimwareirei ibukia ni kabane ake a kamaiuaki (taraa Reirei ao Berita aika Tabu 18:15–16).
Iango ibukin te Kamatebwai i bon Iroum ni Koroboki aika Tabu
I kakabwaiaki ngkai I katuka nanou iaon bwaai ae akea tokiia.
Bukin tera te Atua e taekina “Ngkoe ae ro nanom” nakon te mwaane ae mwamwakuri, ae kaubwai are e a tia ni katea nen ana amwarake ni kaaki iai ma uanikai man uaan ana mwakuri? (taraa Ruka 12:16–21). Inanon mwakoro aikai n Ruka, te Tia Kamaiu e reirei tabeua kaikonaki ake a konaa ni buokiira n tabekirake ara taratara n aonaaba nakon ae akea tokina. Tabeua kaikonaki aikai a karinanaki ikai. Kona kanga ni kabwarabwarai rongorongon kaikonaki n tatabeua? Tera am iango bwa tera ae tuangko te Uea?
-
Te kaubwai ae ro nanona (Ruka 12:13–21)
-
Te amwarake ae abwabwaki (Ruka 14:12–24)
-
Te nati ae bua (Ruka 15:11–32)
-
Te mataniwi ae aki kakaonimaki (Ruka 16:1–12)
-
Te kaubwai ao Rataro (Ruka 16:19–31)
Taraa naba Mataio 6:19–34; 2 Nibwaai 9:30; Reirei ao Berita aika Tabu 25:10.
Tamara are i Karawa e kimwareirei ngkana koraki ake a bua a manga kuneaki.
Ngkana ko wareka ana kaikonaki E reireiia Iesu n Luke 15, tera ae ko reiakinna n taekan ana namakin Tamara are i Karawa iaoia koraki ake a bure ke a bon “bua”? E kanga aron ana namakin te tia kairiiri ae iai te maiu n tamnei irouna—ke temanna mairoura—ibukiia nakanne? Iangoia bwa a kanga Baritaio ao taan koroboki ni kona ni kaekai titiraki aikai (taraa Ruka 15:1–2). Ana kaeka Iesu a kona ni kuneaki inanon kaikonaki aika teniua n Ruka 15. Ngkai ko wareware, iangoa taekan Iesu bwa tera ae reireinia Baritaio ao taan koroboki man kaikonaki aikai.
Ko kona naba n karinanii aika ti te arona iai kaikonaki aikai ao kakaokoroia. Te katooto, ko kona ni kinaa bwa tera ae bua ni kaikonaki n tatabeua ao bukin tera a bua, e kanga ni kuneaki, ao a kanga aroia aomata ngkana e kuneaki. Tera taian rongorongo iroun Iesu ibukiia koraki ake a “bua”—n reitaki ma koraki ake a taku bwa aki bua? Tera taian rongorongo are iroun Iesu ibukiia aomata ake a ukoukoriia koraki ake a bua?
Taraa naba Reirei ao Berita aika Tabu 18:10–16; Jeffrey R. Holland, “The Other Prodigal,” Ensign, Meei 2002, 62–64.
Te Maibi n Tirewa ae Bua, iroun James Tissot
Tera ae reirei iai Kristo inanon te kaikonaki iroun te mataniwi ae aki kakaonimaki?
Unimwaane James E Talmage e kabwarabwa teuana te reirei are ti kona n reiakinna man te kaikonaki: “Bekutata; ibukin te bong are ko na kabonganai kaubwain te aba iai ike a waekoa ni kai mauna. Karekea naba reiakinakim irouia taan aki kokoaua ao aika a buakaka; ngkana a taratara raoi ibukin taai aika ana roko bon ibukiia, ana mwaitira riki are ko, na kakoaua n te maeu ae akea tokina rimwi , katauraoi ibukin anne! Ngkana ko tuai n reiakina te wanawana ao te taratara raoi ni kabonganaan ‘te kaubwai ae mwamwana te aba,’ ko na kanga n onimakinaki ma kaubwai ake aki totoki?” (Iesu te Kristo [1916], 464). Tera tabeua reirei ake ko kunei inanon te kaikonaki aei?
Kakaitau ibukin kakabwaiakiu a na uotai ni kaaniai nakon te Atua.
Ngkana ngkoe temanna mai buakoia rebera ake tengaun, n ami iango ko na okirikaaki ni karabwa te Tia Kamaiu? Tera reitan ana kakabwaia te rebera are e karekea ibukina bwa e anga ana karabwarabwa?
Ko kona naba n iangoa ana taeka te Tia Kamaiu, “Am onimaki e a tia ni kamaiuko” (kibu 19). N am kantaninga, e kanga te kakaitau ao te onimaki n irekereke? A kanga ni buokiira bwa ti na kamaiuaki? Te witeo “Beretitenti Russell M. Nelson on the Healing Power of Gratitude” (ChurchofJesusChrist.org) e kona ni buokiko n iangoi taian titiraki aikai.
Taraa naba Dale G. Renlund, “Consider the Goodness and Greatness of God,” Riaona, Meei 2020, 41–44.
Iesu Kristo bon te Te Mangauti ao te Maiu.
Te kakai ni kautan Rataro man te mate e bon te kakoaua ae korakora ao ni kanganga kakoauaana bwa Iesu bon Natin te Atua ni koaua ao te Meetia are e beritanaki. Tera taeka, kibuntaeka, ke kabwabwaraana n Ioane 11:1–46 ae kakorakora am onimaki bwa Iesu Kristo bon “te mangauti, ao te maiu”? Tera nanona iroum bwa Iesu bon te maungauti ao te maiu?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Ruka 15:1–10.Tera ootaia am utu ao aia namakin ngkana e bua aia bwai - ke a bua? Marooroakinan taekan aia taneiai e kona ni moana te marooro iaon taian kaikonaki iaon te tiibu are bua ao te mwane ae bua. Ke ko kona ni karaoia bwa te takakaro n te aro are temanna e karabaa ao tabeman kaain te utu a na kataia ni kakaea neienne ke teuanne. E na kangaa te waaki ni kakukurei aei ni buokiira ni kaotaira iaon taian kaikonaki aikai?
-
Ruka 15:11–32.Ti na kanga n riki n ai aron te karo inanon te karaki aei ngkana iai aika bua ake ti tangiriia? Tera ae ti kona n reiakinna man ana taneiai te nati are ikawai are e kona ni buokiira n riki n Ai aron Kristo? N aanga raa are te karo inanon te kaikonaki aei kanga ai aron Tamara are i Karawa?
-
Ruka 17:11–19.Ni buokiia kain te utu bwa a na katotonga rongorongoia rebera ake tengaun, ko kona ni kaoiia ni katuki beeba ni karaba ibukin kakaitau ibukin temanna ma temanna. Kam kona naba n anene n ikotaki “Wareki am Bwai” (Anene n Taromauri, nambwa 241), ao wareki kakabwaia ake a tia ni karekei am utu.
-
Ioane 11:1–46.A kona kaain te utu ni mataku n te witeo “E kautaki Rataro man te Mate” (ChurchofJesusChrist.org) ao n tibwauai aia koaua iroun Iesu Kristo.
Ibukin iango rki tabeua n te angareirei ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Anene ae rineaki: “Dear to the Heart of the Shepherd,” Anene n Taromauri, nambwa. 221.
Kanakoraoan Ara Anga reirei
Kabonganai karaki ao katooto n reirei taekan te euangkerio. E aki toki n reireiTia Kamaiu taekan reirein te euangkerio ma ni kabongankin karaki ao taeka ni kaikonaki. Iangoi taian katooto ao karaki man oin maium are e kona ni karaoa reirein te euangkerio n taraa n ibuobuoki ibukiia am utu (taraa Reirei n Ana kawai te Tia Kamaiu, 22).
A Ngaa Ake Ruaman, iroun Liz Lemon