em̧m̧aan eo ej atbo̧kwij ļaddik eo nejin

Nejin eo Ejerwaan, jān Liz Lemon Swindle

Māe 1–7

Luk 12–17; Jon 11

“Koṃwin Lañlōñ Ippa; Bwe I Ar Lo Sip eo Aō E Kar Jako”

Ilo am̧ riiti Luk 12–17 im Jon 11, likkuun jar n̄an kappukot ta eo Jemedwōj Ilan̄ ekōņaan bwe kwon jeļā im kōm̧m̧ane. Ekkatak eo am̧ kōn jepta kein remaron̄ kōpeļļo̧k būruom̧ n̄an enaan ko n̄an kwe wōt.

Je En̄jake ko Rej Im̧we Eok

Ilo eiten aolep jekjek ko, 99 jān 100 maron̄ loe bwe eļap an em̧m̧an—ak ejjab n̄e nōm̧ba ko rej jutak kōn ajri ro rejitōnbōro nejin Anij (lale Katak im Bujen Ko 18:10). Ilo jekjek eo, em̧ool juon jetōb elikkuun aurōk n̄an kappukote “n̄an tōr eo [jenaaj] lo e” (Luk 15:4), āinwōt an Rilo̧mo̧o̧r katakin ilo waanjon̄ak in kōn sip eo ejebābwe. Innem lan̄lōn̄ eo emaron̄ ijjinoe, n̄an “lañlōñ i lañ kōn juon ri jerọwiwi eo ej ukeḷọk ippān, eḷap jān kōn ruwatimjuonñoul im ruwatimjuon ro rū wānōk, im ejjeḷọk aer aikuj in ukeḷọk” (Luk 15:7). Eļan̄n̄e loe bwe ejjab jim̧we, ejipan̄ n̄an keememej bwe, ilo m̧ool, ejjeļo̧k eņ “ejjeḷọk aer aikuj in ukeḷọk.” Aolepād jej aikuj lo̧mo̧o̧r. Im kōj aolep jemaron̄ bōk koņaad ilo lo̧mo̧o̧ren, m̧ōņōņō ippān doon kōn juon armej kar lo̧mo̧o̧ren (lale Katak im Bujen Ko 18:15–16).

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

Luk 12; 14–16

Ij jeram̧m̧an ilo aō likūt būruwō ilo men ko rej n̄an indeeo.

Etke Anij emaron̄ kar ba “‘Kwō bwebwe” n̄an juon em̧m̧aan eo em̧weie eo ekar kalōk m̧ōn kakkoņ m̧ōn̄ā ko reļļap im kobraki kōn leen jerbal ko an? (lale Luk 12:16–21). Ilo jepta kein ilo Luk, Rilo̧mo̧o̧r ej katakin eļōn̄ būrabōḷ ko me remaron̄ jipan̄ kōj ļōn̄aj loļo̧kijeņ ko ad ilōn̄inļo̧k men ko an laļ in n̄an eo indeeo. Jet iaan būrabōḷ kein rej elaajrak ijin. Ekōjkan am̧ maron̄ kōmeļeļeik ilo tukadu in enaan eo ilo kajjojo? Ta eo kwoj ļōmņak Irooj ej ba n̄an eok?

• Em̧m̧aan eo em̧weie ebwebwe (Luk 12:13–21)

• Kejota eo āļiktata (Luk 14:12–24)

• Nejin eo ejōrwaan (Luk 15:11–32)

• Ri aiinin m̧ūri eo ejjab m̧ool (Luk 16:1–12)

• Em̧m̧aan eo em̧weie im Lazarus (Luk 16:19–31)

Bar lale Matu 6:19–34; 2 Nipai 9:30; Katak im Bujen Ko 25:10.

Luk 15

Jemedwōj Ilan̄ ej lan̄lōn̄ n̄e ro rekar jako rej bar loe.

Ilo am̧ riiti būrabōḷ Luk 15, ta eo kwoj ekkatak kōn wāween an Jemedwōj Ilan̄ en̄jake kōn ro rekar jerawiwi ak ilo bar juon wāween “jako”? Ekōjkan an juon ritōl ilo jetōb—ak jabdewōt iaad—en̄jake kōn er? Ļōmņak kōn wāween an Parisi ro im skraib ro naaj kar uaake kajjitōk kein (lale Luk 15:1–2). Uaak eo an Jisōs maron̄ loe ilo būrabōḷ eo ilo Luk 15. Ilo am̧ riit, ļōmņak kōn ta eo Jisōs ekar katakin skraib ro im Parisi ro kōn būrabōḷ kein.

Komaron̄ barāinwōt ļōmņak n̄an kōm̧m̧ane juon laajrak in ejjeļo̧k oktak ko im oktak ko ikōtaan būrabōḷ kein. N̄an waanjon̄ak, komaron̄ lale ta eo ekar jako ilo kajjojo iaan būrabōḷ kein im etke ekar jako, wāween kar loe, im wāween an kar armej en̄jake ke rekar loe. Ta enaan ko an Jisōs n̄an ro rej “jako”—ekoba ro rej ļōmņak rejjab jako? Ta enaan ko ekar wōr Ippān n̄an armej ro rej kappukot ro rejako?

Bar lale Katak im Bujen Ko 18:10–16; Jeffrey R. Holland, “The Other Prodigal,” Ensign, Māe 2002, 62–64.

kōrā eo ej kappok jāān kōba

The Lost Piece of Silver, jān James Tissot

Luk 16:1–12

Ta eo Kraist ej katakin ilo būrabōḷ eo kōn ri aiinin m̧ūri eo ejjab m̧ool?

Elder James E. Talmage ekar kōmeļeļeik juon katak kōn wāween ad maron̄ ekkatak jān būrabōļ eo: “Kom̧win tiljek; bwe ilo raan eo komaron̄ kōjerbal m̧weie ko am̧ ilo laļ in ejjab to enaaj jem̧ļo̧k. Bōk juon katak jān men̄e juon eo eriab im enana; eļan̄n̄e rej tiljek ilo aer leļo̧k n̄an ilju im jakļaj eo wōt rej ļōmņake, eo jon̄an an ļapļo̧k am̧ aikuj, eo ej tōmak ilo juon ilju im jakļaj indeeo, kōn menin leļo̧k! Eļan̄n̄e kojjan̄in kar ekkatak māletlet im tiljek ilo kōjerbal ‘ṃweiuk ko an laḷ in,‘ ekōjkan naaj lōke eok kōn eļapļo̧k ṃweiuk ko eto aer pād?” (Jesus the Christ [1916], 464). Ta katak ko jet komaron̄ loe ilo būrabōḷ in?

Luk 17:11–19

Kam̧m̧oolol kōn kōjeram̧m̧an ko enaaj kepaakļo̧k eō n̄an Anij.

Eļan̄n̄e kon kar juon iaan rilepa ro jon̄oul, kwoj ke ļōmņak kon kar jepļaakļo̧k im kam̧m̧oolol Rilo̧mo̧o̧r? Ta kakkobaba in kōjeram̧m̧an ko rilepa eo eļap kam̧m̧oolol ippān ekar bōke kōnke ekar leļo̧k kam̧m̧oolol?

Komaron̄ barāinwōt kejo̧kļo̧kijeņ kōn naan kein an Rilo̧mo̧o̧r, “Kwōn jerkak im ilọk: aṃ tōmak ear lọmọọrōṃ” (eoon 19). Ilo jeļā eo am̧ make, ekōjkan an kam̧m̧oolol im tōmāk ippān doon? Ekōjkan aer jim̧ōr lo̧mo̧o̧ren kōj? Bitio eo “President Russell M. Nelson on the Healing Power of Gratitude” (ChurchofJesusChrist.org) emaron̄ jipan̄ eok kejo̧kļo̧kijeņ kōn kajjitōk kein.

Bar lale Dale G. Renlund, “Ļōmņak kōn Em̧m̧an im Meanwōd an Anij,” Liaona, Māe 2020, 41–44.

Jon 11:1–46

Jisōs Kraist ej Jerkakpeje eo im Mour eo

Kabwilōn̄lōn̄ eo ilo kōjerkak Lazarus jān mej ekar juon naan in kam̧ool ekajoor im ben kariab e bwe Jisōs ekar likkuun m̧oolin Nejin Anij im Messaia eo kallim̧ūr kake. Naan ko, eoon ko, ak meļeļe ko ilo Jon 11:1–46 ej kōkajoorļo̧k tōmak eo am̧ bwe Jisōs Kraist ej “jerkakpeje eo, im mour eo”? Ta meļeļein n̄an eok bwe Jisōs ej “jerkakpeje eo, im mour eo”?

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Luk 15:1–10.Ro uwaan baam̧le eo am̧ rej ke meļeļe kōn ta en̄jake eo n̄e ej jako juon men jān er—ak n̄an jako? Ekōnono kōn en̄jake ko aer emaron̄ ijjino juon ekōnono kōn būrabōḷ ko kōn sip eo ejābwābwe im kōba eo ejako. Ak komaron̄ ikkure juon ikkure ilo ie juon armej ej kitileekek im ro jet uwaan baam̧le eo rej kajjeon̄ pukote. Ekōjkan an m̧akūtkūt in jipan̄ kōj meļeļe būrabōḷ kein?

Luk 15:11–32.Ekōj ad maron̄ āinwōt ein jemān ilo bwebwenato in n̄e ewōr ro jej iakwe er rejako? Ta eo jemaron̄ ekkatak jān ļaddik en̄jake eo an ļaddik eo errūto me emaron̄ jipan̄ kōj erom̧ eļapļo̧k āinwōt Kraist? Ilo jekjek ta ko ein jemān ilo būrabōḷ in ej āinwōt Jemedwōj Ilan̄?

Luk 17:11 –19N̄an jipan̄ ro uwaan baam̧le eo am̧ mour kōn bwebwenato in rilepa ro jon̄oul, komaron̄ kajjitōk ippāer n̄an likūt leta in kam̧m̧oolol ko n̄an doon ilo ittiņo. Komaron̄ barāinwōt al ippān doon “Ne KwojIonBuktak Ko An Mour In” (Al ko Al in Ajri, nō. 6) im bwini kōjeram̧m̧an ko em̧ōj an baam̧le eo am̧ bōki.

Jon 11:1–46.Ro uwaan baam̧le eo am̧ remaron̄ alooje bitio eo “Lazarus Is Raised from the Dead” (ChurchofJesusChrist.org) im kwaļo̧k aer naan in kam̧ool kōn Jisōs Kraist.

N̄an elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere

Al eo elmakote: “Dear to the Heart of the Shepherd,” Hymns, no. 221.

Kōkōm̧anm̧anļo̧k Ad Katakin

Kōjerbal bwebwenato ko im waanjon̄ak ko n̄an katakin pedped ko an gospel. Rilo̧mo̧or eo emakijkij an kōn katakin pedped ko an gospel eo jān kōjerbal bwebwenato ko im būrabōļ ko. Ļōmņak kōn waanjon̄ak ko im bwebwenato ko jān mour eo am̧ make me emaron̄ kōm̧m̧an bwe juon pedped an gospel eo en erom̧ kalimomo n̄an baam̧le eo am̧ lae Teaching in the Savior’s Way, 22).

em̧m̧aan eo ej bukwelōlō in kam̧m̧oolol im̧aan mejān Jisōs

Ewi ko Ratimjuon, jān Liz Lemon Swindle