« 5–11 nō Tiunu. Ioane 14–17 : ‘’Ia vai-here-hia atu ā ’outou e au’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2023 (2022)
« 5–11 nō Tiunu. Ioane 14–17 », Mai, pe’e mai—nō te ta’ata hō’ē ’e te ’utuāfare : 2023
The Last Supper [Te tāmā’ara’a hope’a], nā William Henry Margetson
5–11 nō Tiunu
Ioane 14–17
« ’Ia vai-here-hia atu ā ’outou e au »
’Ia tai’o ’outou i te mau ha’api’ira’a a te Fa’aora i roto i te Ioane 14–17, e tauturu te Vārua Maita’i ia ’outou ’ia ’ite mai i te mau poro’i nō ’outou. Tāpa’o i te mau mana’o tā ’outou e fāri’i.
Pāpa’i i te mau mana’o e tae mai
I teie mahana tē parau nei tātou i te reira « Te tāmā’ara’a hope’a », ’aita rā tātou i ’ite ē, ’ua pāpū roa ānei i te mau pipi a Iesu ē, i te taime ’ua putuputu rātou nō te ’ōro’a nō te Pāsa a te ’āti Iuda, ’o te tāmā’ara’a hope’a ïa ’e tō rātou Fatu hou ’oia ’a pohe ai. ’Ua ’ite rā Iesu ē, « ’ua tae i tōna hora » (Ioane 13:1). Fātata roa ’oia i te fa’aruru i te mamae i Getesemane, ’e tōna ho’ora’ahia ’e tōna mata-’ē-ra’a-hia e tōna mau hoa rahi, nā reira ato’a tōna pohe umunaro i ni’a i te satauro. Noa atu rā teie mau mea i mua iāna, ’aita te mana’o o Iesu i rōtahi i ni’a iāna, i ni’a rā i tāna mau pipi. E aha tē tītauhia ia rātou ’ia ’ite i te mau mahana ’e te mau matahiti e haere mai ra ? Tē fa’a’ite nei te mau ha’api’ira’a iti a Iesu i roto i te Ioane 14–17 i tōna mana’o nō ni’a i tāna mau pipi, i taua taime ra ’e i teienei ato’a. I roto i te mau parau mau tāmāhanahana e rave rahi tāna i fa’a’ite, ’o te ha’apāpūra’a ïa ē, e nehenehe e parau ē, e’ita roa atu ’oia e fa’aru’e ia tātou. « I haʼapa’o ʼoutou i tā’u ra parau, ʼe vai herehia atu ā ’outou e au » (Ioane 15:10).
Mau mana’o nō tā’u iho tuatāpapara’a pāpa’ira’a mo’a
E fa’a’ite au i tō’u here ia Iesu Mesia nā roto i te ha’apa’ora’a i tāna mau fa’auera’a.
’Ia tai’o ’oe i te Ioane 14–15, e nehenehe tā ’oe e tāpa’o ’aore rā e fa’a’ū i te mau taime ato’a e fa’a’ohipahia te ta’o here (’aore rā aroha). E ’ite paha ’oe i te ta’o fa’auera’a i te fa’ahiti-pinepine-hia i pīha’i iho i te ta’o here (’aore rā aroha) i roto i teie mau pene. E aha te ha’api’ira’a tā ’oe e ’apo nei nō ni’a i te tū’atira’a te here i te mau fa’auera’a, i roto i te mau ha’api’ira’a a te Fa’aora ? E aha te tahi atu mau ta’o ’e mau parau tā ’oe e ’ite ra ’ua tū’ati i te here (’aore rā aroha) i roto i teie mau pene ?
’A feruri ’ua nāhea te here o te Fa’aora i te fa’aurura’a ia ’oe.
Hi’o ato’a Ioane 13:34–35 ; D. Todd Christofferson, « E vai-here-hia atu ā ʼoutou e au », Liahona, Nov. 2016, 48–51.
The Last Supper [Te tāmā’ara’a hope’a], nā Clark Kelley Price
Tē tauturu nei te Vārua Maita’i iā’u ’ia rave i tā’u fā ’ei pipi nā Iesu Mesia.
E mea pāpū ē, ’ua māuiui roa te mau pipi i te fa’aro’ora’a ē, fātata roa tō rātou taime i pīha’i iho i te Fa’aora i te hope. ’Ua tupu ato’a paha tō rātou pe’ape’a e nāhea rātou ’aita ana’e ’oia. ’A tai’o ai ’outou i te Ioane 14–16, ’a ’imi e aha tā te Fa’aora i parau nō te tāmarū ia rātou. ’A hi’o ta’a ’ē i te mea tāna i ha’api’i ia rātou nō ni’a i te Vārua Maita’i. E aha te ha’api’ira’a tā ’oe e ’apo nei nō ni’a i te Vārua Maita’i i roto i te mau parau a te Fa’aora, i roto i te mau ’īrava i muri nei ?
Nō te aha i tītauhia ai i te mau pipi teie huru tauturu nō ’ō mai i te Vārua Maita’i ? ’Ua nāhea te Vārua Maita’i i te ravera’a i teie ’ohipa i roto i tō ’oe orara’a ? ’A feruri e aha tā ’oe e nehenehe e rave ’ia pūai atu ā tāna fa’aurura’a i roto i tō ’oe orara’a.
Hi’o ato’a 3 Nephi 19:9 ; 27:20 ; Te Ha’api’ira’a Tumu ’e te mau Fafaura’a 11:12–14 ; Mose 6:61 ; Michelle D. Craig, « Te ’aravihi pae vārua », Liahona, Nov. 2019, 19–21.
’Ia ’ati au i te Mesia, e fa’ahotu vau i te hotu maita’i.
I tō ’oe mana’o, e aha te aura’a e « ’ati mai [i te Mesia] » ? (Ioane 15:4). E aha te « hotu » nā ’oe ’o tē fa’a’ite nei ē, ’ua ’ati ’oe i te vine, ’oia ho’i te fa’ahōho’ara’a nō Iesu Mesia ?
Tē ti’a ārai nei Iesu Mesia nō tāna mau pipi.
’Ua mātauhia i te pi’ihia te mau parau a Iesu i roto i te Ioane 17 te pure ti’a ārai. I roto i te reira, tē pure nei Iesu nō tāna mau ’āpōsetolo ’e nō « te feiā ato’a […] e fa’aro’o mai [iāna] i tā rātou ra ha’api’ira’a » (Ioane 17:20). Te aura’a ra, tē pure ra ’oia nō ’oe. E aha tā Iesu i ani i tōna Metua nō ’oe ’e nō te tahi atu feiā fa’aro’o ? E aha tā te reira e ha’api’i nei ia ’oe nō ni’a i tōna mana’o nō ni’a ia ’oe ?
Tē ha’api’i ato’a nei teie pure i te tahi mau parau mau hōhonu ’e te mure ’ore. E aha te mau parau mau tā ’oe e ’ite ra ? ’A tai’o ai ’oe i teie pene, e nehenehe e pāpa’i i te ha’api’ira’a tā ’oe e ’apo nei nō ni’a i teie mau mea i muri nei :
-
Te pure
-
Te tā’amura’a o Iesu Mesia i tōna Metua
-
Te tā’amura’a o Iesu Mesia i tāna mau pipi
-
E aha te mea e ta’a ’ē ai te mau pipi i tō te ao nei
-
Te tahi atu mau parau mau tā ’oe i tāpe’a mai
’Ua tāhō’ē maita’i roa te Metua i te ao ra ’e Iesu Mesia.
I roto i tāna pure i roto i te Ioane 17, ’ua tūra’i Iesu i te parau nō tōna hō’ēra’a ’e te Metua. Mai te aha pa’i te Metua ’e te Tamaiti e « hō’ē » nei ? (Ioane 17:11, 21–23). ’A hi’o ato’a ē ’ua pure te Fa’aora ’ia hō’ē tāna mau pipi « mai »—’aore rā mai te huru—iāna ’e tōna Metua (Ioane 17:22). E aha te aura’a nō te reira nō ’oe ? ’A feruri i tō ’outou mau tā’amura’a—’ei hi’ora’a, te tā’amura’a i te hoa fa’aipoipo ’aore rā i te tahi atu mau melo o te ’utuāfare, i te mau melo o te pāroita, ’e i te mau hoa Keresetiano. Nāhea ’oe e ’ohipa ai nō te tāpae i te huru hō’ēra’a tā Iesu ’e te Metua ?
Hi’o ato’a Quentin L. Cook, « Ma te ’ā’au au-tahi-māite-hia i te parauti’a ’e te tāhō’ē », Liahona, Nov. 2020, 18–22; Sharon Eubank, « Nā roto i te hō’ēra’a o te ’ā’au e noa’a mai ai te mana i te Atua », Liahona, Nov. 2020, 55–57.
Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare
-
Ioane 14:5–6.E au paha te mau melo o te ’utuāfare i te fa’a’ohu nō te arata’ira’a i te ’utuāfare nā ni’a i te hō’ē ē’a. Mai te aha te huru ’o Iesu « te ’ē’a » ? I hea ’oia e arata’i ai ia tātou ?
-
Ioane 14:26–27.E aha te ta’a-ē-ra’a i roto i te hau a Iesu ’e tā « tō te ao nei hōro’a » ? E nehenehe te mau melo o te ’utuāfare e fa’a’ite mai i te mau rāve’a ’ua ’itehia mai ia rātou te hau ’e te tāmāhanahana nā roto i te Vārua.
-
Ioane 15:1–8.Pēnei a’e e mea au ’ia tai’o i teie mau ’īrava i rāpae i te fare, i pīha’i iho i te hō’ē vine, te hō’ē tumu rā’au ’aore rā te tahi rā’au tupu. E aha tē tupu i ni’a i te hō’ē ’āma’a ’ia ’īriti-ana’e-hia mai te reira mai ni’a mai i te tumu ? E nehenehe ’outou e paraparau nō ni’a i te rirora’a mai te ’āma’a te huru, ’e nō ni’a i te aura’a e « ’ati » i te Fa’aora ’e « ’ia rahi tō ’outou hotu. »
-
Ioane 15:17–27 ; 16:1–7.I tō ’outou mana’o, nō te aha Iesu Mesia i fa’aara ai i tāna mau pipi nō ni’a i te mau hāmani-’ino-ra’a ? E aha te mau hāmani-’ino-ra’a i ni’a i te mau pipi a te Mesia i teie mahana ? Nāhea te parau a’o a te Fa’aora i roto i teie mau ’īrava e nehenehe ai e tauturu ia tātou i mua i te hāmani-’ino-ra’a ?
-
Ioane 16:33.’Ua nāhea te Mesia i te upo’oti’ara’a i ni’a i te ao ? ’Ua nāhea tāna tāra’ehara i te hōpoira’a mai ia tātou i te hau ’e te ’oa’oa rahi ? (hi’o ato’a Te Ha’api’ira’a Tumu ’e te mau Fafaura’a 68:6).
-
Ioane 17:21–23.E aha te mea e tauturu i tō ’outou ’utuāfare ’ia ha’api’i i te fa’arahi-atu-ā-ra’a i te tāhō’ē mai ia Iesu Mesia ’e te Metua i te ao ra ? E nehenehe e paraparau nō ni’a i te hō’ē pupu tū’aro tei au-roa-hia ’e nō ni’a i te huru rātou e fa’aitoito nei ’ia tāpae i te hō’ē fā ’āmui. ’Aita rā e nehenehe e fa’aro’o i te hō’ē pupu hīmene ’aore rā te hō’ē pupu ’upa’upa ’a ’āparau atu ai e nāhea te mau ta’ata i roto i te pupu ’upa’upa e tāhō’ē nei ’ei pehe nehenehe.
Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Hīmene tei mana’ohia : « Le Saint-Esprit », Chants pour les enfants, 56.
Ha’amaita’i i tā tātou ha’api’ira’a
Fa’a’ohipa i te haruharura’a fa’aro’o. ’A ha’api’i noa ai ’outou i tō ’outou ’utuāfare nō ni’a i te mau pāpa’ira’a mo’a, e nehenehe e fa’aro’o i te mau pāpa’ira’a mo’a, tei ni’a ia ChurchofJesusChrist.org ’e ’aore rā, te fa’aaura’a rorouira Vaira’a buka ’evanelia. E nehenehe te fa’aro’ora’a i te Ioane 14–17 i te ’ohipa fa’ahiahia mau i te mea ē, e rave rahi parau a te Fa’aora i roto i terā mau pene.
’Ua ha’api’i Iesu : « ’O vau te vine, ’o ’outou te ’āma’a » (Ioane 15:5).