Te tamā’ara’a hope’a

In Remembrance of Me [’Ei ha’amana’ora’a iā’u], nā Walter Rane

29 nō Mē–4 nō Tiunu

Mataio 26 ; Mareko 14 ; Ioane 13

« ’Ei ha’amana’ora’a »

’A tai’o ai ’outou i te Mataio 26 ; te Mareko 14 ; ’e te Ioane 13, ’a ha’apa’o maita’i na i te mau mana’o e tae mai, terā iho ā rā e fa’ahōhonu i tō ’outou fa’aro’o ia Iesu Mesia, nā reira ato’a tā ’outou pūpūra’a ia ’outou i iāna ra.

Pāpa’i i te mau mana’o e tae mai

Te mahana hou tōna pohera’a, ’ua hōro’a Iesu i tāna mau pipi i te hō’ē mea e fa’aha’amana’o iāna. « ’Ua rave ihora [’oia] i te pāne, e oti a’era i te ha’amaita’i i te Atua vāvahi ihora, tu’u atu ra i te mau pipi ra, nā ’ō atu ra, ’A rave, ’a ’amu ; ’o ta’u tino teie. ’Ua rave ihora ho’i ’oia i te ’āu’a, ha’amaita’i atu ra i te Atua, tu’u atu ra ia rātou ra, nā ’ō atu ra, ’A inu ’outou ato’a ; ’O tō’u ïa toto » (Mataio 26:26–28).

’A 2 000 matahiti te reira i te tupura’a, i te hō’ē vāhi e’ita roa atu te rahira’a o tātou e ’ite, nā roto i te hō’ē reo e mea iti o tātou tē ta’a atu. I teienei rā, i te mau sābati ato’a i tō tātou iho mau vāhi putuputura’a, tē ravehia nei tāna i rave na e te feiā e mau nei i te autahu’ara’a ’e tei ha’amanahia nō te rave i te reira nā roto i te i’oa o Iesu Mesia. E rave rātou i te pāne ’e te pape, e ha’amaita’i rātou i te reira ’e e hōro’a rātou ia tātou tāta’itahi, tāna mau pipi. E ’ohipa ’ōhie roa—e aha pa’i te mea ’ōhie atu ā ’e te mea niu atu ā i te ’amura’a i te pāne ’e te inura’a i te pape ? E pāne mo’a rā nō tātou ’e te pape mo’a ato’a ho’i nō te mea tē fa’aha’amana’o nei te reira ia tātou iāna. E rāve’a te reira nō te parau ē, « E’ita roa atu ’oia e mo’e iā’u »—e ’ere noa ho’i, « E’ita roa atu e mo’e iā’u tā’u i tai’o nō ni’a i tāna mau ha’api’ira’a ’e tōna orara’a. » ’Aita, tē parau nei tātou ē : « E’ita roa atu e mo’e iā’u tāna i rave nō’u. » « E’ita roa atu e mo’e iā’u tōna fa’aorara’a mai iā’u i te ti’aorora’a atu vau nō te tauturu. » ’E « E’ita roa atu e mo’e iā’u tāna pūpūra’a iāna nō’u ’e tā’u pūpūra’a iā’u nōna—te fafaura’a tā māua i rave. »

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Mataio 26:6–13 ; Mareko 14:3–9

« ’Ua fa’atāvai ātea noa ’oia i tā’u tino nō tō’u tanura’a ra. »

Nā roto i tāna ’ohipa ha’eha’a ’e te ha’amori, ’ua fa’a’ite te vahine i fa’ahitihia i roto i teie nau ’īrava ē, ’ua ’ite ’oia ’o vai ’o Iesu ’e e aha te ’ohipa tāna e rave (hi’o Mataio 26:12). I tō ’oe mana’o, nō te aha e aura’a rahi tāna i rave nō te Fa’aora ? (hi’o ’īrava 13). E aha tā ’oe e fa’ahiahia nei i te vahine ’e tōna fa’aro’o ? ’A feruri nāhea ’oe e pe’e ai i tōna hi’ora’a.

Hi’o ato’a Ioane 12:1–8.

Mataio 26:20–22 ; Mareko 14:17–19

« E te Fatu, ’o vau ānei ? »

E aha te ha’api’ira’a tā ’oe e ’apo nei nō ni’a i te mau pipi i tā rātou uira’a i te Fatu i roto i teie mau ’īrava ? I tō ’oe mana’o, nō te aha rātou i ui ai i terā uira’a ? E feruri na ’o ’outou terā e ui ra i te Fatu : « ’O vau ānei ? »

Hi’o ato’a Dieter F. Uchtdorf, « E te Fatu, ’o vau ānei ? », Liahona, Nov. 2014, 56–59.

Mataio 26:26–29 ; Mareko 14:22–25

E rāve’a au te ’ōro’a mo’a nō te ha’amana’o i te Fa’aora.

I tō te Fa’aora hōro’a-mātāmua-ra’a i te ’ōro’a mo’a i tāna mau pipi, i tō ’oe mana’o, e aha tā rātou i feruri, e aha tō rātou mau mana’o ? ’A feruri i te reira ’a tai’o ai ’oe i te ’ohipa i tupu nō rātou i roto i te Mataio 26:26–29 ’e te Mareko 14:22–25. I tō ’oe mana’o, nō te aha Iesu i mā’iti ai i teie rāve’a nō te ha’amana’o tātou iāna ? E nehenehe ato’a ’oe e feruri i te mau ’ohipa i tupu nō ’oe i te taime nō te ’ōro’a mo’a. Tē vai ra anei hō’ē mea tā ’oe e nehenehe e rave nō te fa’ariro i te reira ’ei ’ohipa mo’a a’e ’e te aura’a rahi a’e ?

’Ia oti te tai’ora’a ’e te ferurira’a i teie mau ’īrava, e nehenehe e pāpa’i i te tahi mau mea tei fa’auruhia mai ia ’oe e ha’amana’o nō ni’a i te Fa’aora. E nehenehe ’oe e hi’o i te reira ’ia rave ’oe i te ’ōro’a. E nehenehe ato’a e hi’o i te reira i te tahi atu taime, ’ei rāve’a nō te « ha’amana’o ā iāna ē a muri noa atu » (Moroni 4:3).

Hi’o ato’a Luka 22:7–39 ; 3 Nephi 18:1–13 ; Te Ha’api’ira’a Tumu ’e te mau Fafaura’a 20:76–79 ; « Always Remember Him [Ha’amana’o noa iāna] » (video), ChurchofJesusChrist.org.

Ioane 13:1–17

’O te Fa’aora tō tātou hi’ora’a maita’i nō te tāvini-ha’eha’a-ra’a ia vetahi ’ē.

I te tau o Iesu, ’ua riro te horoira’a i te ’āvae o te tahi atu ta’ata ’ei ohipa nā te mau tāvini, e ’ere nā te feiā fa’atere. ’Ua hina’aro rā Iesu i tāna mau pipi ’ia taui i tō rātou ferurira’a i te aura’a nō te fa’atere ’e nō te tāvini. E aha te mau poro’i tā ’oe e ite ra i roto i te mau parau ’e te mau ’ohipa a te Fa’aora i roto i te Ioane 13:1–17 ? I roto i tā ’oe ta’ere, e ’ere paha ïa te horoira’a i te ’āvae o te tahi atu ta’ata i te peu mātauhia nō te tāvini. ’A feruri ïa i te mea tā ’oe e nehenehe e rave nō te pe’e i te hi’ora’a o te Fa’aora nō te tāvinira’a i te ta’ata ma te ha’eha’a.

E mea maita’i ato’a paha ’ia hi’o mai i te mau mea tā Iesu i ’ite ’e i putapū i teie taime mo’a ’e tāna mau ’āpōsetolo (hi’o te mau ’īrava 1 ’e te 3). E aha tā teie mau mea e ha’amāramarama nei ia ’oe nō ni’a i te Fa’aora ?

Hi’o ato’a Luka 22:24–27.

Ioane 13:34–35

Tō’u here nō te ta’ata e tāpa’o ïa ē, e pipi mau vau nā Iesu Mesia.

Nā mua atu, i hōro’a na Iesu i te fa’auera’a « e aroha atu ’oe i tō ta’ata tupu, mai tō aroha ia ’oe iho na » (Mataio 22:39). I teienei ’ua hōro’a mai ’oia i te « parau ’āpī. » I tō ’oe mana’o, e aha te aura’a ’ia here ia vetahi ’ē mai tā Iesu i here ia ’oe ? (hi’o Ioane 13:34).

E nehenehe ato’a ’oe e feruri e nāhea vetahi ’ē e ’ite ai e pipi ’oe nā Iesu Mesia. Nāhea ’oe e ha’apāpū ai ē, ’o te here te fa’a’itera’a rahi nō tō ’oe ti’ara’a ’ei keresetiano ?

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 26:26–29 ; Mareko 14:22–25.E aha te huru te taime nō te ’ōro’a mo’a nō tō ’outou ’utuāfare, i te hepetoma tāta’itahi ? E nehenehe te tai’ora’a i te parau nō te ’ōro’a mo’a mātāmua e fa’auru i te hō’ē paraparaura’a nō ni’a i te faufa’a rahi o te reira ’e te mau rāve’a a te mau melo o te ’utuāfare nō te ha’amaita’i atu ā i te reira. E nehenehe e fa’a’ite i te hōho’a ra Passing the Sacrament [te ’ōperera’a ’ōro’a] (Buka hōho’a nō te ’evanelia, N°108) ma te hōro’a i te mana’o nō te mea e nehenehe e rave nā mua a’e, i roto ’e i muri a’e i te ’ōro’a mo’a.

vahine e rave ra i te ’ōro’a mo’a

E tauturu te ’ōro’a mo’a ia tātou ’ia ha’amana’o ia Iesu Mesia.

Mataio 26:30.E nehenehe e hīmene i te hō’ē hīmene mai tā Iesu i rave ’e tāna mau ’āpōsetolo—pēnei a’e te hō’ē hīmene ōro’a. E aha ra ïa ha’amaita’ira’a nō Iesu ’e tāna mau ’āpōsetolo te hīmenera’a i te hō’ē hīmene i taua taime ra ? E aha ra ïa ha’amaita’ira’a nō tātou te mau hīmene ?

Ioane 13:1–17.E hina’aro paha ’outou e fa’a’ite i te ’utuāfare, i te hōho’a i te hope’a o teie arata’i ha’api’ira’a ’a tai’o noa ai i teie mau ’īrava. E aha te mau parau mau tā te Fa’aora i ha’api’i nā roto i tāna mau ohipa ? E aha te mau mea ri’i i roto i te hōho’a e tauturu nei ia tātou ’ia māramarama i teie mau parau ? E nehenehe paha ïa te mau melo o te ’utuāfare ’ia parau mai ’ua nāhea te orara’a i teie mau parau mau i hōro’a i te ’oa’oa ia rātou (hi’o Ioane 13:17).

Ioane 13:34–35.’Ia oti te tai’ora’a i teie mau ’īrava, e nehenehe ’outou e paraparau tē nāhea ra vetahi ’ē i te ’ite ē e pipi ’outou nā Iesu Mesia. Mai te aha te huru te Fa’aora e hina’aro nei ’ia ’itehia mai tōna feiā ’āpe’e ? E nehenehe ’outou e ani i te mau melo o te ’utuāfare ’ia paraparau mai nō ni’a i te mau ta’ata ē, ’o tō rātou here nō te ta’ata e fa’a’ite nei ē e pipi mau rātou nā Iesu Mesia. E nehenehe ato’a ’outou e ’āparau i te mau rāve’a nō te ’utuāfare ’ia fa’a’ite rahi atu ā i te here i te ta’ata.

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ’A here ’outou mai tā’u i here », Te mau hīmene, 190.

Ha’amaita’i i tā’u iho tuatāpapara’a pāpa’ira’a mo’a

E feruri. E aura’a pae vārua tō te mau pāpa’ira’a mo’a e’ita tātou e ’apo mai mai te mea e tai’o noa tātou i te reira mai te tahi atu mau tai’ora’a. ’Eiaha e rū nō te fa’aoti i te hō’ē pene. ’A rave i te taime nō te feruri hōhonu nō ni’a i te mea tā ’outou e tai’o ra.

Iesu e horoi ra i te ’āvae o te mau pipi

Greatest in the Kingdom [Te rahi i te bāsileia], nā J. Kirk Richards