“ວັນທີ 19–25 ເດືອນມິຖຸນາ. ມັດທາຍ 27; ມາຣະໂກ 15; ລູກາ 23; ໂຢຮັນ 19: ‘ສຳເລັດແລ້ວ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 19–25 ເດືອນມິຖຸນາ. ມັດທາຍ 27; ມາຣະໂກ 15; ລູກາ 23; ໂຢຮັນ 19,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

Ecce Homo [ເບິ່ງຊາຍຄົນນີ້ແມ], ໂດຍ ອານໂຕນິໂອ ຊີເຊຣີ

ວັນທີ 19–25 ເດືອນມິຖຸນາ

ມັດທາຍ 27; ມາຣະໂກ 15; ລູກາ 23; ໂຢຮັນ 19

“ສຳເລັດແລ້ວ”

ມັດທາຍ 27; ມາຣະໂກ 15; ລູກາ 23; ແລະ ໂຢຮັນ 19 ບັນຈຸຄຳບັນຍາຍກ່ຽວກັບຊົ່ວໂມງສຸດທ້າຍໃນພຣະຊົນຊີບມະຕະຂອງພຣະຜູ້ຊ່ວຍໃຫ້ລອດ. ໃຫ້ສະແຫວງຫາທີ່ຈະຮູ້ສຶກເຖິງຄວາມຮັກຂອງພຣະອົງສຳລັບທ່ານ ຂະນະທີ່ທ່ານສຶກສາກ່ຽວກັບການເສຍສະລະ ແລະ ການສິ້ນພຣະຊົນຂອງພຣະອົງ.

ບັນທຶກຄວາມປະທັບໃຈຂອງທ່ານ

ໃນທຸກພຣະຄຳ ແລະ ການກະທຳ, ພຣະເຢຊູຄຣິດໄດ້ເປັນຕົວຢ່າງເຖິງຄວາມຮັກອັນບໍລິສຸດ—ສິ່ງທີ່ອັກຄະສາວົກໂປໂລເອີ້ນວ່າ ຄວາມໃຈບຸນ (ເບິ່ງ 1 ໂກຣິນໂທ 13). ບໍ່ມີໃນເວລາໃດທີ່ສິ່ງນີ້ເປັນຫລັກຖານຢ່າງແຈ່ມແຈ້ງຫລາຍໄປກວ່າຊົ່ວໂມງສຸດທ້າຍຂອງພຣະຊົນຊີບມະຕະຂອງພຣະຜູ້ຊ່ວຍໃຫ້ລອດ. ຄວາມງຽບຢ່າງສະຫງ່າຜ່າເຜີຍຂອງພຣະອົງ ໃນການປະເຊີນກັບຂໍ້ກ່າວຫາເທັດ ສະແດງໃຫ້ເຫັນວ່າພຣະອົງ “ບໍ່ມີໃຈຮ້າຍງ່າຍ” (1 ໂກຣິນໂທ 13:5). ຄວາມເຕັມພຣະໄທຂອງພຣະອົງ ໃນການຍິນຍອມໃຫ້ຂ້ຽນຕີ, ເຍາະເຍີ້ຍ, ແລະ ຄຶງ—ຂະນະທີ່ຢັບຢັ້ງອຳນາດຂອງພຣະອົງເພື່ອໃຫ້ການທໍລະມານພຣະອົງສຳເລັດ—ສະແດງໃຫ້ເຫັນວ່າ ພຣະອົງ “ອົດທົນດົນນານ” ແລະ “ສູ້ທົນທຸກສິ່ງ” (1 ໂກຣິນໂທ 13:4, 7). ຄວາມເຫັນອົກເຫັນໃຈຂອງພຣະອົງຕໍ່ມານດາຂອງພຣະອົງ ແລະ ຕໍ່ຜູ້ທີ່ຄຶງພຣະອົງ—ແມ່ນແຕ່ລະຫວ່າງການທົນທຸກທໍລະມານທີ່ຫາອັນປຽບບໍ່ໄດ້ຂອງພຣະອົງເອງ—ໄດ້ເປີດເຜີຍວ່າ ພຣະອົງ “ບໍ່ຄິດເຫັນປະໂຫຍດສ່ວນຕົວ [ຂອງພຣະອົງ] ເອງ” (1 ໂກຣິນໂທ 13:5). ໃນຊ່ວງນາທີສຸດທ້າຍຢູ່ເທິງໂລກ, ພຣະເຢຊູໄດ້ເຮັດສິ່ງທີ່ພຣະອົງໄດ້ເຮັດຕະຫລອດຊົ່ວການປະຕິບັດສາດສະໜາກິດໃນຊ່ວງມະຕະຂອງພຣະອົງ—ສິດສອນເຮົາໂດຍການສະແດງແກ່ເຮົາ. ແນ່ນອນ, ຄວາມໃຈບຸນຄື “ຄວາມຮັກອັນບໍລິສຸດຂອງພຣະຄຣິດ” (ໂມໂຣໄນ 7:47).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມັດທາຍ 27; ມາຣະໂກ 15; ລູກາ 23; ໂຢຮັນ 19

ຄວາມເຕັມພຣະໄທຂອງພຣະເຢຊູຄຣິດທີ່ຈະທົນທຸກທໍລະມານ ສະແດງເຖິງຄວາມຮັກຂອງພຣະອົງຕໍ່ພຣະບິດາ ແລະ ຕໍ່ເຮົາທຸກຄົນ.

ເຖິງແມ່ນວ່າພຣະຜູ້ຊ່ວຍໃຫ້ລອດມີອຳນາດທີ່ຈະເອີ້ນໃຫ້ “[ເຫລົ່າທູດ] ຫລາຍກວ່າສິບສອງກອງທັບ” ລົງມາ (ມັດທາຍ 26:53), ແຕ່ພຣະອົງໄດ້ອາສາສະໝັກເລືອກທີ່ຈະອົດທົນກັບການທົດລອງທີ່ບໍ່ຍຸດຕິທຳ, ການເຍາະເຍີ້ຍທີ່ໂຫດຮ້າຍ, ແລະ ຄວາມເຈັບປວດທາງຮ່າງກາຍທີ່ເກີນກວ່າຈະຄິດໄດ້. ເປັນຫຍັງພຣະອົງຈຶ່ງເຮັດ? “ເພາະຄວາມກະລຸນາຮັກຫອມຂອງພຣະອົງ,” ນີໄຟໄດ້ເປັນພະຍານ, “ແລະ ຄວາມອົດກັ້ນທີ່ພຣະອົງມີຕໍ່ລູກຫລານມະນຸດ” (1 ນີໄຟ 19:9).

ພຣະຄຣິດກຳລັງແບກໄມ້ກາງແຂນ — “ພຣະອົງແບກໄມ້ກາງແຂນຂອງພຣະອົງອອກໄປໃນບ່ອນທີ່ຊື່ວ່າ ກະໂຫລກຫົວ” (ໂຢຮັນ 19:17).

ທ່ານສາມາດເລີ່ມຕົ້ນສຶກສາຊົ່ວໂມງສຸດທ້າຍຂອງພຣະຜູ້ຊ່ວຍໃຫ້ລອດ ໂດຍການອ່ານ 1 ນີໄຟ 19:9. ຢູ່ບ່ອນໃດໃນ ມັດທາຍ 27; ມາຣະໂກ 15; ລູກາ 23; ແລະ ໂຢຮັນ 19 ທີ່ທ່ານພົບເຫັນຕົວຢ່າງຂອງແຕ່ລະຢ່າງທີ່ນີໄຟໄດ້ກ່າວວ່າ ພຣະເຢຊູຈະທຸກທໍລະມານ?

“[ພວກເຂົາ] ຕັດສິນພຣະອົງວ່າບໍ່ມີຄ່າ”
“ພວກເຂົາຂ້ຽນພຣະອົງ”
“ພວກເຂົາຕີພຣະອົງ”
“ພວກເຂົາຖົ່ມນ້ຳລາຍໃສ່ພຣະອົງ”

ພຣະຄຳພີຂໍ້ໃດທີ່ຊ່ວຍທ່ານໃຫ້ຮູ້ສຶກເຖິງ “ຄວາມກະລຸນາຮັກຫອມ” ຂອງພຣະຜູ້ຊ່ວຍໃຫ້ລອດຕໍ່ທ່ານ? ແນວຄິດ ແລະ ຄວາມຮູ້ສຶກອື່ນໃດແດ່ທີ່ທ່ານມີ ຂະນະທີ່ທ່ານອ່ານເລື່ອງລາວເຫລົ່ານີ້? ໃຫ້ຄິດທີ່ຈະຂຽນມັນລົງໄວ້ ແລະ ແບ່ງປັນມັນກັບບາງຄົນ.

ເບິ່ງ “Jesus Is Condemned before Pilate” ແລະ “Jesus Is Scourged and Crucified” (ວິດີໂອ), ChurchofJesusChrist.org ນຳອີກ.

ມັດທາຍ 27:27–49, 54; ມາຣະໂກ 15:16–32; ລູກາ 23:11, 35–39; ໂຢຮັນ 19:1–5

ການເຍາະເຍີ້ຍບໍ່ສາມາດປ່ຽນຄວາມຈິງ.

ຂະນະທີ່ພຣະເຢຊູໄດ້ອົດທົນກັບການເຍາະເຍີ້ຍຕະຫລອດການປະຕິບັດສາດສະໜາກິດຂອງພຣະອົງ, ມັນໄດ້ເລີ່ມໜັກຂຶ້ນລະຫວ່າງການຂ້ຽນຕີພຣະອົງ ແລະ ການຄຶງພຣະອົງ. ແຕ່ການເຍາະເຍີ້ຍບໍ່ສາມາດປ່ຽນຄວາມຈິງທີ່ວ່າ: ພຣະເຢຊູເປັນພຣະບຸດຂອງພຣະເຈົ້າ. ຂະນະທີ່ທ່ານອ່ານກ່ຽວກັບຄວາມອັບອາຍທີ່ພຣະເຢຊູໄດ້ທົນຕໍ່, ໃຫ້ຄິດກ່ຽວກັບການຕໍ່ຕ້ານ ແລະ ການເຍາະເຍີ້ຍທີ່ວຽກງານຂອງພຣະອົງປະເຊີນໃນທຸກວັນນີ້. ຄວາມຮູ້ຢ່າງໃດແດ່ທີ່ທ່ານໄດ້ຮັບກ່ຽວກັບການທົນກັບການຕໍ່ຕ້ານ? ແມ່ນຫຍັງທີ່ປະທັບໃຈທ່ານກ່ຽວກັບຄຳເວົ້າຂອງພວກທະຫານໃນ ມັດທາຍ 27:54?

ມັດທາຍ 27:46; ມາຣະໂກ 15:34

ພຣະເຢຊູຄຣິດໄດ້ທົນທຸກທໍລະມານຄົນດຽວ ເພື່ອວ່າເຮົາຈະບໍ່ຈຳເປັນຕ້ອງທົນທຸກທໍລະມານ.

ໃນຊ່ວງເວລາທີ່ສາຫັດທີ່ສຸດຢູ່ເທິງໄມ້ກາງແຂນນັ້ນ, ພຣະເຢຊູ, ຜູ້ທີ່ໄດ້ເພິ່ງອາໄສພຣະບິດາເທິງສະຫວັນຂອງພຣະອົງມາຕະຫລອດ, ທັນໃດນັ້ນ ກໍໄດ້ຮູ້ສຶກວ່າຖືກປະຖິ້ມ. ການອ່ານກ່ຽວກັບສິ່ງນີ້ອາດເຮັດໃຫ້ທ່ານຄິດກ່ຽວກັບເວລາທີ່ທ່ານຮູ້ສຶກຢູ່ຫ່າງໄກຈາກພຣະເຈົ້າ. ທ່ານສາມາດໄຕ່ຕອງວິທີທີ່ການເສຍສະລະຂອງພຣະອົງຢູ່ເທິງໄມ້ກາງແຂນ ເຮັດໃຫ້ເປັນໄປໄດ້ສຳລັບທ່ານເພື່ອເອົາຊະນະການຢູ່ຫ່າງໄກນັ້ນແນວໃດ. ດັ່ງທີ່ແອວເດີ ແຈັບຟະຣີ ອາ ຮໍແລນ ໄດ້ເປັນພະຍານວ່າ, “ຍ້ອນວ່າພຣະເຢຊູເຄີຍເດີນຕາມທາງອັນຍາວໄກດ້ວຍຄວາມໂດດດ່ຽວ, ເຮົາ ບໍ່ຕ້ອງເຮັດຕາມນັ້ນ. … ການປະກາດຈາກຈອມພູກະໂຫລກຫົວ ເປັນຄວາມຈິງທີ່ວ່າ ເຮົາຈະບໍ່ຖືກປະຖິ້ມໃຫ້ຢູ່ຄົນດຽວ ຫລື ຂາດຄວາມຊ່ວຍເຫລືອເລີຍ, ເຖິງແມ່ນວ່າບາງເທື່ອເຮົາອາດຮູ້ສຶກໂດດດ່ຽວ” (“None Were with Him,” Liahona, May 2009, 88). ໃຫ້ພິຈາລະນາວິທີທີ່ພຣະຜູ້ຊ່ວຍໃຫ້ລອດສາມາດຊ່ວຍທ່ານໃຫ້ເອົາຊະນະຄວາມໂດດດ່ຽວແນວໃດ ຂະນະທີ່ທ່ານອ່ານຂ່າວສານທີ່ເຫລືອຢູ່ຂອງແອວເດີ ຮໍແລນ.

ລູກາ 23:34

ພຣະຜູ້ຊ່ວຍໃຫ້ລອດເປັນຕົວຢ່າງຂອງເຮົາເລື່ອງການໃຫ້ອະໄພ.

ທ່ານຮູ້ສຶກແນວໃດເມື່ອທ່ານອ່ານພຣະຄຳຂອງພຣະຜູ້ຊ່ວຍໃຫ້ລອດໃນ ລູກາ 23:34? (ເບິ່ງ ຂໍ້ມູນທີ່ໃຫ້ໄວ້ຈາກການແປຂອງໂຈເຊັບ ສະມິດ ໃນ ໝາຍເຫດຢູ່ທາງລຸ່ມໜ້າປຶ້ມ ຄ). ໃນການກ່າວເຖິງພຣະຄຳຂອງພຣະຜູ້ຊ່ວຍໃຫ້ລອດ, ປະທານເຮັນຣີ ບີ ໄອຣິງ ໄດ້ສິດສອນວ່າ: “ເຮົາຈະຕ້ອງໃຫ້ອະໄພ ແລະ ບໍ່ມີເຈດຕະນາຮ້າຍຕໍ່ຜູ້ທີ່ເຮັດຜິດໃຈເຮົາ. ພຣະຜູ້ຊ່ວຍໃຫ້ລອດໄດ້ເຮັດເປັນຕົວຢ່າງຈາກໄມ້ກາງແຂນ. … ເຮົາບໍ່ຮູ້ຫົວໃຈຂອງຜູ້ທີ່ເຮັດຜິດໃຈເຮົາ” (“That We May Be One,” Ensign, May 1998, 68). ຂໍ້ນີ້ສາມາດຊ່ວຍທ່ານແນວໃດ ຖ້າຫາກທ່ານມີບັນຫາໃນການໃຫ້ອະໄພບາງຄົນ?

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 27; ມາຣະໂກ 15; ລູກາ 23; ໂຢຮັນ 19.ເພື່ອຊ່ວຍຄອບຄົວຂອງທ່ານໃຫ້ຮຽນຮູ້ກ່ຽວກັບເຫດການທີ່ບັນຍາຍຢູ່ໃນບົດເຫລົ່ານີ້, ທ່ານສາມາດແບ່ງປັນ “ບົດທີ 52: ພຣະເຢຊູຖືກຕັດສິນ” ແລະ “ບົດທີ 53: ພຣະເຢຊູຖືກຄຶງ” (ໃນ ເລື່ອງພຣະຄຳພີໃໝ່, 133–38, ຫລື ເບິ່ງວິດີໂອທີ່ກ່ຽວຂ້ອງ ຢູ່ທີ່ ChurchofJesusChrist.org) ກັບເຂົາເຈົ້າ. ຫລື ພວກທ່ານສາມາດເບິ່ງວິດີໂອທີ່ກ່ຽວກັບເຫດການເຫລົ່ານີ້ນຳກັນ: “Jesus Is Condemned before Pilate” ແລະ “Jesus Is Scourged and Crucified” (ChurchofJesusChrist.org). ທ່ານສາມາດເຊື້ອເຊີນເດັກນ້ອຍໃຫ້ເລົ່າເລື່ອງໃນຖ້ອຍຄຳຂອງພວກເຂົາເອງ. ສະມາຊິກໃນຄອບຄົວສາມາດແບ່ງປັນວິທີທີ່ເຂົາເຈົ້າຮູ້ສຶກຕໍ່ພຣະຜູ້ຊ່ວຍໃຫ້ລອດ ຍ້ອນສິ່ງທີ່ພຣະອົງໄດ້ທົນທຸກທໍລະມານເພື່ອເຮົາ.

ມັດທາຍ 27:11–26; ມາຣະໂກ 15:1–15; ລູກາ 23:12–25; ໂຢຮັນ 19:1–16.ເປັນຫຍັງປີລາດຈຶ່ງສົ່ງພຣະເຢຊູໄປໃຫ້ຄຶງ, ເຖິງແມ່ນວ່າເພິ່ນຮູ້ວ່າພຣະເຢຊູບໍ່ມີຄວາມຜິດ? ບົດຮຽນຢ່າງໃດແດ່ທີ່ເຮົາຮຽນຮູ້ຈາກປະສົບການຂອງປີລາດ ກ່ຽວກັບການຢືນຢັດຢູ່ກັບສິ່ງທີ່ເຮົາຮູ້ວ່າຖືກຕ້ອງ? ມັນອາດຊ່ວຍຄອບຄົວຂອງທ່ານໄດ້ ທີ່ຈະຫລິ້ນລະຄອນກ້ອມ ທີ່ຊ່ວຍເຂົາເຈົ້າໃຫ້ຮຽນວິທີຢືນຢັດຢູ່ກັບສິ່ງທີ່ຖືກຕ້ອງ.

ມັດທາຍ 27:46; ລູກາ 23:34, 43, 46; ໂຢຮັນ 19:26–28, 30.ບາງທີທ່ານສາມາດມອບໝາຍສະມາຊິກໃນຄອບຄົວແຕ່ລະຄົນໃຫ້ອ່ານຂໍ້ຄວາມໜຶ່ງ ຫລື ຫລາຍກວ່ານັ້ນທີ່ພຣະຜູ້ຊ່ວຍໃຫ້ລອດໄດ້ກ່າວຢູ່ເທິງໄມ້ກາງແຂນ, ຊຶ່ງມີຢູ່ໃນຂໍ້ເຫລົ່ານີ້. ຂໍໃຫ້ເຂົາເຈົ້າແບ່ງປັນສິ່ງທີ່ເຂົາເຈົ້າໄດ້ຮຽນຮູ້ຈາກຂໍ້ຄວາມເຫລົ່ານີ້ກ່ຽວກັບພຣະຜູ້ຊ່ວຍໃຫ້ລອດ ແລະ ພາລະກິດຂອງພຣະອົງ.

ມາຣະໂກ 15:39.ການອ່ານກ່ຽວກັບການຄຶງ ເພີ່ມຄວາມເຂັ້ມແຂງໃຫ້ປະຈັກພະຍານຂອງທ່ານແນວໃດ ວ່າພຣະເຢຊູເປັນ “ພຣະບຸດຂອງພຣະເຈົ້າ”?

ໂຢຮັນ 19:25–27.ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບວິທີທີ່ເຮົາສາມາດຮັກ ແລະ ສະໜັບສະໜູນສະມາຊິກໃນຄອບຄົວ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary,

ເພງສວດແນະນຳ: “ເບິ່ງເຖີດພຣະຜູ້ໄຖ່ຍິ່ງໃຫຍ່ມ້ວຍ,” ເພງສວດ ແລະ ເພງຂອງເດັກນ້ອຍ, 16.

ການປັບປຸງການສິດສອນຂອງເຮົາ

ເອົາແບບຢ່າງຊີວິດຂອງພຣະຜູ້ຊ່ວຍໃຫ້ລອດ. “ມັນເປັນປະໂຫຍດທີ່ຈະສຶກສາວິທີທີ່ພຣະຜູ້ຊ່ວຍໃຫ້ລອດໄດ້ສິດສອນ—ເຊັ່ນແບບແຜນທີ່ພຣະອົງໄດ້ໃຊ້ ແລະ ສິ່ງທີ່ພຣະອົງໄດ້ກ່າວ. ແຕ່ອຳນາດຂອງພຣະຜູ້ຊ່ວຍໃຫ້ລອດ ທີ່ຈະສິດສອນ ແລະ ເຊີດຊູຄົນອື່ນ ແມ່ນມາຈາກວິທີທີ່ພຣະອົງດຳລົງຊີວິດ ແລະ ບຸກຄົນທີ່ພຣະອົງເປັນ. ເມື່ອທ່ານພາກພຽນພະຍາຍາມທີ່ຈະ ດຳລົງຊີວິດ ເໝືອນຢ່າງພຣະເຢຊູຄຣິດຫລາຍເທົ່າໃດ, ທ່ານຍິ່ງຈະສາມາດ ສິດສອນ ເໝືອນຢ່າງພຣະອົງຫລາຍຂຶ້ນເທົ່ານັ້ນ” (Teaching in the Savior’s Way, 13).

Christ on the Cross [ພຣະຄຣິດຢູ່ເທິງໄມ້ກາງແຂນ], ໂດຍ ຄາລ ເຮັນຣິກ ບະລ໊ອກ