“ວັນທີ 5–11 ເດືອນມິຖຸນາ. ໂຢຮັນ 14–17: ‘ຈົ່ງຕັ້ງຢູ່ໃນຄວາມຮັກຂອງເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 5–11 ເດືອນມິຖຸນາ. ໂຢຮັນ 14–17,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ຄາບເຂົ້າເທື່ອສຸດທ້າຍ

The Last Supper [ຄາບເຂົ້າເທື່ອສຸດທ້າຍ], ໂດຍ ວິວລຽມ ເຮັນຣີ ມາເກັດສັນ

ວັນທີ 5–11 ເດືອນມິຖຸນາ

ໂຢຮັນ 14–17

“ຈົ່ງຕັ້ງຢູ່ໃນຄວາມຮັກຂອງເຮົາ”

ຂະນະທີ່ທ່ານອ່ານຄຳສອນຂອງພຣະຜູ້ຊ່ວຍໃຫ້ລອດໃນ ໂຢຮັນ 14–17, ພຣະວິນຍານບໍລິສຸດຈະຊ່ວຍທ່ານໃຫ້ພົບເຫັນຂ່າວສານສຳລັບທ່ານ. ບັນທຶກຄວາມປະທັບໃຈທີ່ທ່ານໄດ້ຮັບ.

ບັນທຶກຄວາມປະທັບໃຈຂອງທ່ານ

ທຸກວັນນີ້ ເຮົາເອີ້ນມັນວ່າ “ຄາບເຂົ້າເທື່ອສຸດທ້າຍ,” ແຕ່ເຮົາບໍ່ຮູ້ຖ້າຫາກວ່າພວກສາວົກຂອງພຣະເຢຊູຮັບຮູ້ຢ່າງເຕັມທີ່, ເມື່ອພວກເພິ່ນເຕົ້າໂຮມກັນລະຫວ່າງເທດສະການປັດສະຄາປະຈຳປີ, ວ່າມັນຈະເປັນອາຫານຄາບສຸດທ້າຍກັບພຣະອາຈານຂອງພວກເພິ່ນ ກ່ອນການສິ້ນພຣະຊົນຂອງພຣະອົງ. ເຖິງຢ່າງໃດກໍຕາມ, ພຣະເຢຊູ, “ຮູ້ດີວ່າ ເວລາທີ່ພຣະອົງຈະຈາກໂລກນີ້ ກໍມາເຖິງແລ້ວ” (ໂຢຮັນ 13:1). ບໍ່ດົນພຣະອົງກໍຈະໄດ້ປະເຊີນກັບການຮັບທຸກທໍລະມານທີ່ເຄັດເຊມາເນ, ຈະຖືກທໍລະຍົດ ແລະ ຖືກປະຕິເສດໂດຍໝູ່ເພື່ອນໃກ້ຊິດທີ່ສຸດຂອງພຣະອົງ, ແລະ ປະສົບກັບການຕາຍທີ່ທໍລະມານຢູ່ເທິງໄມ້ກາງແຂນ. ເຖິງແມ່ນວ່າສິ່ງທັງໝົດນີ້ກຳລັງຈະເກີດຂຶ້ນກັບພຣະອົງ, ແຕ່ພຣະເຢຊູບໍ່ໄດ້ໃສ່ໃຈຕົວເອງ ແຕ່ແມ່ນຢູ່ທີ່ສານຸສິດຂອງພຣະອົງ. ເຂົາເຈົ້າຈະຕ້ອງຮູ້ຫຍັງແດ່ໃນຫລາຍມື້ ແລະ ຫລາຍປີຂ້າງໜ້າ? ຄຳສອນທີ່ອ່ອນໂຍນຂອງພຣະເຢຊູໃນ ໂຢຮັນ 14–17 ເປີດເຜີຍຄວາມຮູ້ສຶກຂອງພຣະອົງກ່ຽວກັບສານຸສິດຂອງພຣະອົງ, ໃນເວລານັ້ນ ແລະ ໃນເວລານີ້. ໃນບັນດາຄວາມຈິງທີ່ປອບໂຍນຫລາຍຢ່າງທີ່ພຣະອົງໄດ້ແບ່ງປັນນັ້ນ ແມ່ນ, ໃນຄວາມໝາຍດຽວ, ພຣະອົງຈະບໍ່ປະຖິ້ມເຮົາໄປ. “ຖ້າພວກເຈົ້າເຊື່ອຟັງຂໍ້ຄຳສັ່ງຂອງເຮົາ,” ພຣະອົງສັນຍາ, “ພວກເຈົ້າກໍຈະຕັ້ງຢູ່ໃນຄວາມຮັກຂອງເຮົາ” (ໂຢຮັນ 15:10).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂຢຮັນ 14–15

ເຮົາສະແດງຄວາມຮັກຂອງເຮົາຕໍ່ພຣະເຢຊູຄຣິດໂດຍການຮັກສາພຣະບັນຍັດຂອງພຣະອົງ.

ຂະນະທີ່ທ່ານອ່ານ ໂຢຮັນ 14–15, ທ່ານສາມາດບັນທຶກ ຫລື ໝາຍແຕ່ລະບ່ອນ ທີ່ໃຊ້ຄຳວ່າ ຮັກ. ທ່ານອາດສັງເກດເຫັນຄຳວ່າ ຂໍ້ຄຳສັ່ງ ຖືກກ່າວເລື້ອຍໆ ທີ່ກ່ຽວພັນກັບຄຳວ່າ ຮັກ ຢູ່ໃນບົດເຫລົ່ານີ້. ທ່ານຮຽນຮູ້ຫຍັງແດ່ກ່ຽວກັບຄວາມສຳພັນລະຫວ່າງຄວາມຮັກ ແລະ ຂໍ້ຄຳສັ່ງຈາກຄຳສອນຂອງພຣະຜູ້ຊ່ວຍໃຫ້ລອດ? ມີຄຳ ແລະ ວະລີອື່ນໃດອີກແດ່ທີ່ກ່ຽວຂ້ອງກັບຄຳວ່າ ຮັກ ຢູ່ໃນບົດເຫລົ່ານີ້?

ໃຫ້ໄຕ່ຕອງວິທີທີ່ຄວາມຮັກຂອງພຣະຜູ້ຊ່ວຍໃຫ້ລອດມີອິດທິພົນຕໍ່ທ່ານແນວໃດ.

ເບິ່ງ ໂຢຮັນ 13:34–35; D. Todd Christofferson, “Abide in My Love,” Liahona, Nov. 2016, 48–51 ນຳອີກ.

ຮູບພາບ

ພຣະເຢຊູກຳລັງກ່າວກັບພວກສາວົກ

The Last Supper [ຄາບເຂົ້າເທື່ອສຸດທ້າຍ], ໂດຍ ຄະລາກ ແຄວລີ ພຣາຍສ໌

ໂຢຮັນ 14–16

ພຣະວິນຍານບໍລິສຸດຊ່ວຍເຮົາໃຫ້ບັນລຸຈຸດປະສົງຂອງເຮົາ ໃນຖານະເປັນສານຸສິດຂອງພຣະເຢຊູຄຣິດ.

ມັນຄົງເປັນສິ່ງເຈັບປວດໃຈຫລາຍສຳລັບພວກສາວົກ ທີ່ໄດ້ຍິນວ່າ ເວລາຂອງພຣະຜູ້ຊ່ວຍໃຫ້ລອດໃກ້ຈະຈົບລົງແລ້ວ. ພວກເພິ່ນອາດເປັນຫ່ວງກ່ຽວກັບວ່າ ພວກເພິ່ນຊິຢູ່ນຳກັນໄປຢ່າງຖືກຕ້ອງປອງດອງປາດສະຈາກພຣະອົງໄດ້ແນວໃດ. ຂະນະທີ່ທ່ານອ່ານ ໂຢຮັນ 14–16, ໃຫ້ຊອກຫາສິ່ງທີ່ພຣະຜູ້ຊ່ວຍໃຫ້ລອດໄດ້ກ່າວ ເພື່ອໃຫ້ພວກເພິ່ນໝັ້ນໃຈ. ໂດຍສະເພາະແລ້ວ, ໃຫ້ສັງເກດເບິ່ງສິ່ງທີ່ພຣະອົງໄດ້ສິດສອນພວກເພິ່ນກ່ຽວກັບພຣະວິນຍານບໍລິສຸດ. ທ່ານຮຽນຮູ້ຫຍັງແດ່ກ່ຽວກັບພຣະວິນຍານບໍລິສຸດ ຈາກພຣະຄຳຂອງພຣະຜູ້ຊ່ວຍໃຫ້ລອດໃນຂໍ້ດັ່ງຕໍ່ໄປນີ້?

ເປັນຫຍັງພວກສາວົກຈຶ່ງຕ້ອງການຄວາມຊ່ວຍເຫລືອແບບນີ້ ຈາກພຣະວິນຍານບໍລິສຸດ? ພຣະວິນຍານບໍລິສຸດໄດ້ບັນລຸບົດບາດເຫລົ່ານີ້ເພື່ອທ່ານແນວໃດ? ໃຫ້ພິຈາລະນາສິ່ງທີ່ທ່ານສາມາດເຮັດໄດ້ ເພື່ອວ່າອິດທິພົນຂອງພຣະອົງຈະເຂັ້ມແຂງຫລາຍຂຶ້ນໃນຊີວິດຂອງທ່ານ.

ເບິ່ງ 3 ນີໄຟ 19:9; 27:20; ຄຳສອນ ແລະ ພັນທະສັນຍາ 11:12–14; ໂມເຊ 6:61; Michelle D. Craig, “Spiritual Capacity,” Liahona, Nov. 2019, 19–21 ນຳອີກ.

ໂຢຮັນ 15:1–8

ເມື່ອເຮົາຕັ້ງຢູ່ໃນພຣະຄຣິດ, ເຮົາຈະນຳຜົນດີມາ.

ທ່ານຄິດວ່າການ “ຕັ້ງຢູ່ໃນ [ພຣະຄຣິດ]” ໝາຍຄວາມວ່າແນວໃດ? (ໂຢຮັນ 15:4). ແມ່ນຫຍັງຄື “ຜົນ” ຂອງທ່ານ ທີ່ສະແດງວ່າ ທ່ານຍັງຕິດຢູ່ໃນເຄືອ, ຊຶ່ງເປັນຕົວແທນໃຫ້ກັບພຣະເຢຊູຄຣິດ?

ໂຢຮັນ 17

ພຣະເຢຊູຄຣິດໄດ້ອ້ອນວອນເພື່ອພວກສາວົກຂອງພຣະອົງ.

ພຣະຄຳຂອງພຣະເຢຊູທີ່ບັນທຶກຢູ່ໃນ ໂຢຮັນ 17 ເປັນທີ່ຮູ້ຈັກກັນວ່າ ຄຳອະທິຖານອ້ອນວອນ. ໃນຄຳອະທິຖານ, ພຣະເຢຊູໄດ້ອະທິຖານເພື່ອອັກຄະສາວົກຂອງພຣະອົງ ແລະ “ຄົນທັງຫລາຍທີ່ວາງໃຈເຊື່ອໃນ [ພຣະອົງ] ເພາະຖ້ອຍຄຳຂອງພວກເຂົາ” (ໂຢຮັນ 17:20). ນັ້ນໝາຍຄວາມວ່າ ພຣະອົງໄດ້ອະທິຖານເພື່ອທ່ານ. ພຣະເຢຊູໄດ້ຂໍຮ້ອງສິ່ງໃດຈາກພຣະບິດາຂອງພຣະອົງແທນທ່ານ ແລະ ແທນຄົນອື່ນໆທຸກຄົນທີ່ເຊື່ອ? ສິ່ງນັ້ນສິດສອນທ່ານຫຍັງແດ່ກ່ຽວກັບຄວາມຮູ້ສຶກຂອງພຣະອົງທີ່ມີຕໍ່ທ່ານ?

ຄຳອະທິຖານນີ້ກໍສິດສອນເຖິງຄວາມຈິງທີ່ເລິກເຊິ່ງ ແລະ ນິລັນດອນນຳອີກ. ຄວາມຈິງຢ່າງໃດແດ່ທີ່ທ່ານພົບເຫັນ? ຂະນະທີ່ທ່ານອ່ານບົດນີ້, ໃຫ້ຄິດທີ່ຈະບັນທຶກສິ່ງທີ່ທ່ານຮຽນຮູ້ກ່ຽວກັບສິ່ງດັ່ງຕໍ່ໄປນີ້:

ການອະທິຖານ
ຄວາມສຳພັນຂອງພຣະຜູ້ຊ່ວຍໃຫ້ລອດກັບພຣະບິດາຂອງພຣະອົງ
ຄວາມສຳພັນຂອງພຣະຜູ້ຊ່ວຍໃຫ້ລອດກັບສານຸສິດຂອງພຣະອົງ
ສານຸສິດຈະຕ້ອງແຕກຕ່າງຈາກໂລກນີ້ແນວໃດ
ຄວາມຈິງຢ່າງອື່ນໆທີ່ໂດດເດັ່ນຕໍ່ທ່ານ

ໂຢຮັນ 17:11, 21–23

ພຣະບິດາເທິງສະຫວັນ ແລະ ພຣະເຢຊູຄຣິດເປັນອັນໜຶ່ງອັນດຽວກັນຢ່າງບໍລິບູນ.

ໃນຄຳອະທິຖານຂອງພຣະອົງໃນ ໂຢຮັນ 17, ພຣະເຢຊູໄດ້ເນັ້ນຄວາມເປັນອັນໜຶ່ງອັນດຽວກັນຂອງພຣະອົງກັບພຣະບິດາ. ໃນທາງໃດແດ່ທີ່ພຣະບິດາ ແລະ ພຣະບຸດເປັນ “ໜຶ່ງດຽວ”? (ໂຢຮັນ 17:11, 21–23). ໃຫ້ສັງເກດເບິ່ງວ່າ ພຣະຜູ້ຊ່ວຍໃຫ້ລອດໄດ້ອະທິຖານວ່າ ສານຸສິດຂອງພຣະອົງຈະເປັນອັນໜຶ່ງອັນດຽວກັນ “ເໝືອນດັ່ງ”—ຫລື ໃນທາງດຽວກັນກັບທີ່—ພຣະອົງ ແລະ ພຣະບິດາຂອງພຣະອົງໄດ້ເປັນອັນໜຶ່ງອັນດຽວກັນ (ໂຢຮັນ 17:22). ສິ່ງນັ້ນໝາຍຄວາມວ່າແນວໃດຕໍ່ທ່ານ? ໃຫ້ຄິດກ່ຽວກັບຄວາມສຳພັນຂອງທ່ານ—ຍົກຕົວຢ່າງ, ກັບຄູ່ຄອງຂອງທ່ານ ຫລື ກັບສະມາຊິກໃນຄອບຄົວຄົນອື່ນໆ, ກັບສະມາຊິກໃນຫວອດ, ແລະ ກັບໝູ່ເພື່ອນຊາວຄຣິດ. ທ່ານຈະມຸ່ງໝັ້ນເພື່ອຈະໄດ້ເປັນອັນໜຶ່ງອັນດຽວກັນ ເໝືອນດັ່ງພຣະເຢຊູກັບພຣະບິດາໄດ້ແນວໃດ?

ເບິ່ງ Quentin L. Cook, “Hearts Knit in Righteousness and Unity,” Liahona, Nov. 2020, 18–22; Sharon Eubank, “By Union of Feeling We Obtain Power with God,” Liahona, Nov. 2020, 55–57 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ໂຢຮັນ 14:5–6.ສະມາຊິກໃນຄອບຄົວອາດມັກປ່ຽນຜຽນກັນຍ່າງນຳໜ້າຄອບຄົວໃນເສັ້ນທາງ. ພຣະເຢຊູເປັນ “ທາງນັ້ນ” ແນວໃດ? ພຣະອົງນຳພາເຮົາແນວໃດ?

ໂຢຮັນ 14:26–27.ສັນຕິສຸກຂອງພຣະເຢຊູແຕກຕ່າງກັບສັນຕິສຸກ “ທີ່ໂລກໃຫ້” ແນວໃດ? ສະມາຊິກໃນຄອບຄົວສາມາດແບ່ງປັນວິທີທີ່ເຂົາເຈົ້າພົບສັນຕິສຸກ ແລະ ການປອບໂຍນຜ່ານທາງພຣະວິນຍານບໍລິສຸດ.

ໂຢຮັນ 15:1–8.ມັນອາດເປັນເລື່ອງສະໜຸກສະໜານທີ່ຈະອ່ານຂໍ້ເຫລົ່ານີ້ຢູ່ຂ້າງນອກ ໃກ້ເຄືອ, ໃກ້ຕົ້ນໄມ້, ຫລື ໃກ້ພືດພັນ. ຈະມີຫຍັງເກີດຂຶ້ນ ຖ້າຫາກງ່າຖືກຕັດອອກຈາກຕົ້ນຂອງມັນ? ພວກທ່ານສາມາດເວົ້າລົມກັນກ່ຽວກັບວິທີທີ່ພວກທ່ານເປັນເໝືອນດັ່ງງ່າໄມ້ ແລະ ການ “ຕັ້ງຢູ່” ໃນພຣະຜູ້ຊ່ວຍໃຫ້ລອດ ແລະ “ເກີດຜົນ” ໝາຍຄວາມວ່າແນວໃດ.

ໂຢຮັນ 15:17–27; 16:1–7.ທ່ານຄິດວ່າເປັນຫຍັງພຣະເຢຊູຄຣິດຈຶ່ງເຕືອນສານຸສິດຂອງພຣະອົງເຖິງການຂົ່ມເຫັງ? ສານຸສິດຂອງພຣະຄຣິດຖືກຂົ່ມເຫັງໃນທຸກວັນນີ້ແນວໃດ? ຄຳແນະນຳຂອງພຣະຜູ້ຊ່ວຍໃຫ້ລອດຢູ່ໃນຂໍ້ເຫລົ່ານີ້ ສາມາດຊ່ວຍເຮົາໃນເວລາທີ່ເຮົາຖືກຂົ່ມເຫັງໄດ້ແນວໃດ?

ໂຢຮັນ 16:33.ພຣະເຢຊູຄຣິດເອົາຊະນະໂລກໄດ້ແນວໃດ? ການຊົດໃຊ້ຂອງພຣະອົງໄດ້ນຳສັນຕິສຸກ ແລະ ຄວາມເບີກບານມາໃຫ້ແນວໃດ? (ເບິ່ງ ຄຳສອນ ແລະ ພັນທະສັນຍາ 68:6 ນຳອີກ).

ໂຢຮັນ 17:21–23.ແມ່ນຫຍັງຈະຊ່ວຍຄອບຄົວຂອງທ່ານໃຫ້ຮຽນຮູ້ວິທີທີ່ຈະເປັນອັນໜຶ່ງອັນດຽວກັນຫລາຍຂຶ້ນ ເໝືອນດັ່ງພຣະເຢຊູຄຣິດ ແລະ ພຣະບິດາເທິງສະຫວັນ? ບາງທີພວກທ່ານສາມາດເວົ້າລົມກັນກ່ຽວກັບທີມຫລິ້ນກິລາທີ່ພວກທ່ານມັກ ແລະ ກ່ຽວກັບວິທີທີ່ເຂົາເຈົ້າຊ່ວຍກັນເພື່ອບັນລຸເປົ້າໝາຍດຽວກັນ. ຫລື ພວກທ່ານສາມາດຟັງເພງຂອງກຸ່ມນັກຮ້ອງປະສານສຽງ ຫລື ສຽງເສບມະໂຫຣີ ແລະ ສົນທະນາເຖິງວິທີທີ່ເຂົາເຈົ້າເປັນອັນໜຶ່ງອັນດຽວກັນໃນການສ້າງດົນຕີໃຫ້ມ່ວນອອນຊອນແນວໃດ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30.

ການປັບປຸງການສິດສອນຂອງເຮົາ

ໃຊ້ສິ່ງບັນທຶກສຽງ. ຂະນະທີ່ທ່ານສິດສອນພຣະຄຳພີໃຫ້ຄອບຄົວຂອງທ່ານ, ໃຫ້ຄິດທີ່ຈະຟັງການອ່ານພຣະຄຳພີ, ຢູ່ໃນ ChurchofJesusChrist.org ຫລື ໃນແອັບຫ້ອງສະໝຸດພຣະກິດຕິຄຸນ. ການຟັງ ໂຢຮັນ 14–17 ສາມາດເປັນພະລັງຢ່າງໃດໜຶ່ງໂດຍສະເພາະ ຍ້ອນວ່າບົດເຫລົ່ານີ້ບັນຈຸພຣະຄຳຂອງພຣະຜູ້ຊ່ວຍໃຫ້ລອດຢ່າງຫລວງຫລາຍ.