“ວັນທີ 12–18 ເດືອນມິຖຸນາ. ລູກາ 22; ໂຢຮັນ 18: ‘ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເທີ້ນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 12–18 ເດືອນມິຖຸນາ. ລູກາ 22; ໂຢຮັນ 18,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
Gethsemane Grove [ສວນເຄັດເຊມາເນ], ໂດຍ ແດເຣັກ ແຮກສະເຕດ
ວັນທີ 12–18 ເດືອນມິຖຸນາ
ລູກາ 22; ໂຢຮັນ 18
“ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເທີ້ນ”
ໃຫ້ໃຊ້ເວລາເພື່ອອ່ານ ລູກາ 22 ແລະ ໂຢຮັນ 18 ໃນອາທິດນີ້. ໃຫ້ໄຕ່ຕອງ ແລະ ອະທິຖານກ່ຽວກັບສິ່ງທີ່ທ່ານໄດ້ອ່ານ. ການເຮັດສິ່ງນີ້ສາມາດເປີດໂອກາດໃຫ້ພຣະວິນຍານເປັນພະຍານຕໍ່ໃຈຂອງທ່ານວ່າ ພຣະຄຳພີເປັນຄວາມຈິງ.
ບັນທຶກຄວາມປະທັບໃຈຂອງທ່ານ
ມີພຽງສາມຄົນເທົ່ານັ້ນທີ່ໄດ້ເປັນພະຍານເຖິງການຮັບທຸກທໍລະມານຂອງພຣະເຢຊູຄຣິດ ໃນສວນເຄັດເຊມາເນ—ແລະ ພວກເພິ່ນກໍໄດ້ເຊືອບຫລັບໄປໃນເວລາສ່ວນຫລາຍ. ໃນສວນນັ້ນ ແລະ ຕໍ່ມາຢູ່ເທິງໄມ້ກາງແຂນ, ພຣະເຢຊູໄດ້ຮັບເອົາບາບ, ຄວາມເຈັບປວດ, ແລະ ຄວາມທຸກທໍລະມານຂອງທຸກຄົນຜູ້ທີ່ເຄີຍມີຊີວິດ, ເຖິງແມ່ນວ່າ ເກືອບທຸກຄົນທີ່ມີຊີວິດຢູ່ໃນເວລານັ້ນ ບໍ່ຮູ້ວ່າແມ່ນຫຍັງກຳລັງເກີດຂຶ້ນ. ເຫດການທີ່ສຳຄັນທີ່ສຸດຂອງນິລັນດອນມັກຈະຜ່ານໄປໂດຍທີ່ບໍ່ມີການສົນໃຈຂອງຊາວໂລກຫລາຍ. ແຕ່ພຣະເຈົ້າອົງເປັນພຣະບິດາຮູ້. ພຣະອົງໄດ້ຍິນຄຳອ້ອນວອນຂອງພຣະບຸດທີ່ຊື່ສັດຂອງພຣະອົງວ່າ: “ພຣະບິດາເຈົ້າເອີຍ, ຖ້າເປັນຄວາມປະສົງຂອງພຣະອົງແລ້ວ, ຂໍໃຫ້ຈອກແຫ່ງຄວາມທົນທຸກທໍລະມານນີ້ ເລື່ອນໄປຈາກລູກທ້ອນ: ແຕ່ຢ່າງໃດກໍຕາມ ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເທີ້ນ. ແລ້ວມີ [ທູດອົງໜຶ່ງ] ຈາກສະຫວັນມາປະກົດແກ່ພຣະອົງ ຊູກຳລັງພຣະອົງຂຶ້ນ” (ລູກາ 22:42–43). ເຖິງແມ່ນວ່າເຮົາບໍ່ໄດ້ເປັນພະຍານໃນການກະທຳທີ່ບໍ່ເຫັນແກ່ຕົວ ແລະ ການຍິນຍອມນີ້, ແຕ່ເຮົາ ເປັນ ພະຍານເຖິງການຊົດໃຊ້ຂອງພຣະເຢຊູຄຣິດ. ທຸກຄັ້ງທີ່ເຮົາກັບໃຈ ແລະ ຮັບເອົາການໃຫ້ອະໄພຈາກບາບຂອງເຮົາ, ທຸກຄັ້ງທີ່ເຮົາຮູ້ສຶກເຖິງພະລັງທີ່ຊູແຮງຂອງພຣະຜູ້ຊ່ວຍໃຫ້ລອດ, ເຮົາສາມາດເປັນພະຍານເຖິງຄວາມເປັນຈິງຂອງສິ່ງທີ່ໄດ້ເກີດຂຶ້ນໃນສວນເຄັດເຊມາເນ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ລູກາ 22:31–34, 54–62; ໂຢຮັນ 18:17–27
ການປ່ຽນໃຈເຫລື້ອມໃສເປັນຂະບວນການຕໍ່ເນື່ອງ.
ໃຫ້ຄິດກ່ຽວກັບປະສົບການທີ່ເປໂຕໄດ້ມີກັບພຣະຜູ້ຊ່ວຍໃຫ້ລອດ—ການມະຫັດສະຈັນທີ່ເພິ່ນໄດ້ເປັນພະຍານ ແລະ ຄຳສອນທີ່ເພິ່ນໄດ້ຮຽນຮູ້. ແລ້ວເປັນຫຍັງພຣະຜູ້ຊ່ວຍໃຫ້ລອດຈຶ່ງກ່າວກັບເປໂຕວ່າ, “ເມື່ອ ເຈົ້າກັບຄືນມາຫາເຮົາແລ້ວ, ເຈົ້າຕ້ອງຊູແຮງບັນດາພີ່ນ້ອງຂອງເຈົ້າໄວ້”? (ລູກາ 22:32; ເນັ້ນຄຳເນີ້ງ). ຂະນະທີ່ທ່ານໄຕ່ຕອງສິ່ງນີ້, ມັນອາດເປັນປະໂຫຍດທີ່ຈະພິຈາລະນາສິ່ງທີ່ແອວເດີ ເດວິດ ເອ ແບ໊ດນາ ໄດ້ສິດສອນກ່ຽວກັບຄວາມແຕກຕ່າງລະຫວ່າງການມີປະຈັກພະຍານ ແລະ ການປ່ຽນໃຈເຫລື້ອມໃສຢ່າງແທ້ຈິງ (ເບິ່ງ “Converted unto the Lord,” Liahona, Nov. 2012, 106–9).
ຂະນະທີ່ທ່ານອ່ານກ່ຽວກັບປະສົບການຂອງເປໂຕໃນ ລູກາ 22:31–34, 54–62 (ເບິ່ງ ໂຢຮັນ 18:17–27 ນຳອີກ), ໃຫ້ຄິດກ່ຽວກັບການປ່ຽນໃຈເຫລື້ອມໃສຂອງທ່ານເອງ. ທ່ານເຄີຍຮູ້ສຶກມຸ່ງໝັ້ນຢ່າງເຕັມທີ່ບໍ, ເໝືອນດັ່ງເປໂຕ, ຈົນວ່າທ່ານ “ພ້ອມແລ້ວທີ່ຈະໄປກັບ [ພຣະຜູ້ຊ່ວຍໃຫ້ລອດ], ເຖິງຈະຕ້ອງຖືກຄຸກ, ຫລື ຕ້ອງຕາຍກໍຕາມ”? (ລູກາ 22:33). ເປັນຫຍັງຄວາມຮູ້ສຶກເຊັ່ນນັ້ນ ຈຶ່ງຈືດຈາງໄປໃນບາງຄັ້ງ? ມັນມີໂອກາດໃນແຕ່ລະວັນທີ່ຈະປະຕິເສດ ຫລື ເປັນພະຍານເຖິງພຣະຜູ້ຊ່ວຍໃຫ້ລອດ; ທ່ານຈະເຮັດຢ່າງໃດຈຶ່ງຈະໄດ້ເປັນພະຍານເຖິງພຣະອົງໃນແຕ່ລະວັນ? ມີບົດຮຽນຢ່າງໃດແດ່ທີ່ທ່ານໄດ້ຮຽນຮູ້ຈາກປະສົບການຂອງເປໂຕ?
ຂະນະທີ່ທ່ານສືບຕໍ່ອ່ານພຣະຄຳພີໃໝ່, ໃຫ້ຊອກຫາຫລັກຖານຂອງການປ່ຽນໃຈເຫລື້ອມໃສອັນຕໍ່ເນື່ອງຂອງເປໂຕ. ພ້ອມນີ້ ກໍໃຫ້ສັງເກດເບິ່ງວິທີທີ່ເພິ່ນໄດ້ຮັບເອົາຄຳສັ່ງຂອງພຣະຜູ້ເປັນເຈົ້າ ເພື່ອໃຫ້ “ຊູແຮງບັນດາພີ່ນ້ອງຂອງເຈົ້າໄວ້” (ລູກາ 22:32; ເບິ່ງ ກິດຈະການ 3–4).
ເບິ່ງ ມາຣະໂກ 14:27–31 ນຳອີກ.
ພຣະຜູ້ຊ່ວຍໃຫ້ລອດໄດ້ຮັບທຸກທໍລະມານເພື່ອເຮົາໃນເຄັດເຊມາເນ.
ປະທານຣະໂຊ ເອັມ ແນວສັນ ໄດ້ເຊື້ອເຊີນເຮົາໃຫ້ “ໃຊ້ເວລາໃນການຮຽນຮູ້ກ່ຽວກັບພຣະຜູ້ຊ່ວຍໃຫ້ລອດ ແລະ ການເສຍສະລະຊົດໃຊ້ຂອງພຣະອົງ” (“Drawing the Power of Jesus Christ into Our Lives,” Liahona, May 2017, 40).
ໃຫ້ພິຈາລະນາວິທີທີ່ທ່ານຈະເຮັດ ເພື່ອຮັບເອົາຄຳເຊື້ອເຊີນຂອງປະທານແນວສັນ. ທ່ານສາມາດເລີ່ມຕົ້ນໂດຍການໄຕ່ຕອງດ້ວຍການອະທິຖານ ກ່ຽວກັບການຮັບທຸກທໍລະມານຂອງພຣະຜູ້ຊ່ວຍໃຫ້ລອດໃນເຄັດເຊມາເນ, ດັ່ງທີ່ບັນຍາຍຢູ່ໃນຂໍ້ເຫລົ່ານີ້, ແລະ ໃຫ້ຂຽນຄວາມປະທັບໃຈ ແລະ ຄຳຖາມທີ່ມາສູ່ຈິດໃຈ.
ສຳລັບການສຶກສາທີ່ເລິກເຊິ່ງກວ່າກ່ຽວກັບພຣະຜູ້ຊ່ວຍໃຫ້ລອດ ແລະ ການຊົດໃຊ້ຂອງພຣະອົງ, ໃຫ້ພະຍາຍາມຄົ້ນຄວ້າຂໍ້ພຣະຄຳພີອື່ນໆສຳລັບຄຳຕອບຕໍ່ຄຳຖາມ ເຊັ່ນດັ່ງຕໍ່ໄປນີ້:
-
ເປັນຫຍັງການຊົດໃຊ້ຂອງພຣະຜູ້ຊ່ວຍໃຫ້ລອດຈຶ່ງຈຳເປັນ? (ເບິ່ງ 2 ນີໄຟ 2:5–10, 17–26; 9:5–26; ແອວມາ 34:8–16; 42:9–26.)
-
ພຣະຜູ້ຊ່ວຍໃຫ້ລອດໄດ້ປະເຊີນກັບສິ່ງໃດແດ່ຂະນະທີ່ພຣະອົງຮັບທຸກທໍລະມານ? (ເບິ່ງ ເອຊາຢາ 53:3–5; ໂມໄຊຢາ 3:7; ແອວມາ 7:11–13; ຄຳສອນ ແລະ ພັນທະສັນຍາ 19:16–19.)
-
ການຮັບທຸກທໍລະມານຂອງພຣະຄຣິດມີຜົນກະທົບຕໍ່ຊີວິດຂອງເຮົາແນວໃດ? (ເບິ່ງ ໂຢຮັນ 10:10–11; ເຮັບເຣີ 4:14–16; 1 ໂຢຮັນ 1:7; ແອວມາ 34:31; ໂມໂຣໄນ 10:32–33; Dallin H. Oaks, “Strengthened by the Atonement of Jesus Christ,” Liahona, Nov. 2015, 61–64.)
-
ຄຳຖາມຢ່າງອື່ນໆທີ່ເຮົາມີ:
ເມື່ອທ່ານຮຽນຮູ້ກ່ຽວກັບສິ່ງທີ່ໄດ້ເກີດຂຶ້ນໃນເຄັດເຊມາເນ, ມັນອາດເປັນສິ່ງທີ່ໜ້າສົນໃຈທີ່ຈະຮູ້ວ່າ ເຄັດເຊມາເນ ແມ່ນສວນຕົ້ນໝາກກອກເທດ ແລະ ມີເຄື່ອງກົດໝາກກອກເທດຢູ່ທີ່ນັ້ນນຳອີກ, ຊຶ່ງໃຊ້ບົດໝາກກອກເທດ ແລະ ກັ່ນເອົານ້ຳມັນ ເພື່ອໃຊ້ເປັນເຊື້ອເພີງ ແລະ ເປັນອາຫານ ທັງໃຊ້ໃນການປິ່ນປົວນຳອີກ (ເບິ່ງ ລູກາ 10:34). ຂັ້ນຕອນຂອງການກັ່ນເອົານ້ຳມັນໝາກກອກເທດ ເປັນສັນຍາລັກເຖິງສິ່ງທີ່ພຣະຜູ້ຊ່ວຍໃຫ້ລອດໄດ້ເຮັດເພື່ອເຮົາໃນເຄັດເຊມາເນແນວໃດ? ສຳລັບແນວຄິດບາງຢ່າງ, ໃຫ້ເບິ່ງຂ່າວສານຂອງແອວເດີ ດີ ທອດ ຄຣິສໂຕເຟີສັນ “Abide in My Love” (Liahona, Nov. 2016, 50–51).
ເບິ່ງ ມັດທາຍ 26:36–46; ມາຣະໂກ 14:32–42 ນຳອີກ.
“ອານາຈັກ [ພຣະຜູ້ຊ່ວຍໃຫ້ລອດ] ບໍ່ເປັນຂອງໂລກນີ້.”
ຜູ້ນຳຝ່າຍການເມືອງຄົນໜຶ່ງ, ຊື່ວ່າ ປົນອີໂອ ປີລາດ ຮູ້ຈັກອຳນາດ ແລະ ອານາຈັກຂອງໂລກນີ້ເປັນຢ່າງດີ. ແຕ່ພຣະເຢຊູໄດ້ກ່າວເຖິງອານາຈັກທີ່ແຕກຕ່າງຫລາຍກວ່ານັ້ນອີກ. ໃນການຫວນຄິດເຖິງສິ່ງທີ່ທ່ານໄດ້ອ່ານມາກ່ຽວກັບພຣະຊົນຊີບຂອງພຣະຜູ້ຊ່ວຍໃຫ້ລອດ, ມີຫລັກຖານຢ່າງໃດແດ່ທີ່ທ່ານເຫັນວ່າ “ອານາຈັກ [ຂອງພຣະອົງ] ບໍ່ເປັນຂອງໂລກນີ້”? (ໂຢຮັນ 18:36). ເປັນຫຍັງມັນຈຶ່ງສຳຄັນສຳລັບທ່ານທີ່ຈະຮູ້ສິ່ງນີ້? ມີສິ່ງໃດອີກທີ່ໂດດເດັ່ນຕໍ່ທ່ານກ່ຽວກັບພຣະຄຳຂອງພຣະເຢຊູຕໍ່ປີລາດ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ລູກາ 22:31–32.ເປໂຕຄົງຮູ້ສຶກແນວໃດ ເມື່ອຮູ້ວ່າພຣະເຢຊູໄດ້ອະທິຖານເພື່ອເພິ່ນ ແລະ ສັດທາຂອງເພິ່ນ? ເຮົາສາມາດອະທິຖານເພື່ອໃຜ, “ເພື່ອ [ສັດທາຂອງພວກເຂົາ] ຈະບໍ່ຂາດໄປ”? (ຂໍ້ທີ 32).
-
ລູກາ 22:39–46.ການຮຽນຮູ້ກ່ຽວກັບການຮັບທຸກທໍລະມານຂອງພຣະຜູ້ຊ່ວຍໃຫ້ລອດໃນເຄັດເຊມາເນ ສາມາດເປັນປະສົບການທີ່ສັກສິດສຳລັບຄອບຄົວຂອງທ່ານໄດ້. ໃຫ້ພິຈາລະນາສິ່ງທີ່ພວກທ່ານສາມາດເຮັດ ເພື່ອສ້າງຄວາມຮູ້ສຶກຄາລະວະ ແລະ ການນະມັດສະການ ຂະນະທີ່ພວກທ່ານສຶກສາ ລູກາ 22:39–46. ພວກທ່ານສາມາດຟັງເພງ ຫລື ຮ້ອງເພງສວດ ຫລື ເພງຂອງເດັກນ້ອຍທີ່ພວກທ່ານມັກນຳກັນ ກ່ຽວກັບພຣະຜູ້ຊ່ວຍໃຫ້ລອດ. ພວກທ່ານສາມາດເບິ່ງຮູບພາບທີ່ກ່ຽວພັນ ຫລື ເບິ່ງວິດີໂອ “The Savior Suffers in Gethsemane” (ChurchofJesusChrist.org). ຂະນະທີ່ທ່ານອ່ານຂໍ້ເຫລົ່ານີ້, ສະມາຊິກໃນຄອບຄົວສາມາດແບ່ງປັນຂໍ້ພຣະຄຳພີທີ່ມີຄວາມໝາຍຕໍ່ເຂົາເຈົ້າໂດຍສະເພາະ—ບາງທີ ແບ່ງປັນຂໍ້ພຣະຄຳພີທີ່ຊ່ວຍເຂົາເຈົ້າໃຫ້ຮູ້ສຶກເຖິງຄວາມຮັກຂອງພຣະຜູ້ຊ່ວຍໃຫ້ລອດ (ເບິ່ງ ມັດທາຍ 26:36–46; ມາຣະໂກ 14:32–42 ນຳອີກ). ທ່ານກໍສາມາດເຊື້ອເຊີນເຂົາເຈົ້າໃຫ້ແບ່ງປັນປະຈັກພະຍານຂອງເຂົາເຈົ້າເຖິງພຣະເຢຊູຄຣິດ ແລະ ເຖິງການຊົດໃຊ້ຂອງພຣະອົງນຳອີກ.
-
ລູກາ 22:42.ສະມາຊິກໃນຄອບຄົວສາມາດແບ່ງປັນປະສົບການ ເມື່ອເຂົາເຈົ້າຮຽນຮູ້ທີ່ຈະກ່າວວ່າ, “ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເທີ້ນ.”
-
ລູກາ 22:50–51; ໂຢຮັນ 18:10–11.ເຮົາຮຽນຮູ້ຫຍັງແດ່ກ່ຽວກັບພຣະເຢຊູຈາກຂໍ້ເຫລົ່ານີ້?
Suffer Ye Thus Far [ເຊົາແມ ພໍແລ້ວ], ໂດຍ ວາວເຕີ ເຣນ
-
ໂຢຮັນ 18:37–38.ເຮົາຈະຕອບຄຳຖາມຂອງປີລາດແນວໃດ ທີ່ວ່າ “ຄວາມຈິງນັ້ນແມ່ນຫຍັງ?” (ຂໍ້ທີ 38). ສຳລັບແນວຄິດບາງຢ່າງ, ເບິ່ງ ໂຢຮັນ 8:32; ຄຳສອນ ແລະ ພັນທະສັນຍາ 84:45; 93:23–28; ແລະ “ບອກມາ ສັດຈະຄືຫຍັງ?,” ເພງສວດ ແລະ ເພງຂອງເດັກນ້ອຍ, 34.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ຂ້າເຝົ້າພິສະຫວົງ,” ເພງສວດ ແລະ ເພງຂອງເດັກນ້ອຍ, 24.
ການປັບປຸງການສຶກສາສ່ວນຕົວ
ສຶກສາຖ້ອຍຄຳຂອງສາດສະດາ ແລະ ອັກຄະສາວົກຂອງຍຸກສຸດທ້າຍ. ອ່ານສິ່ງທີ່ສາດສະດາ ແລະ ອັກຄະສາວົກຂອງຍຸກສຸດທ້າຍ ໄດ້ສິດສອນກ່ຽວກັບຄວາມຈິງທີ່ພົບເຫັນຢູ່ໃນພຣະຄຳພີ. ຍົກຕົວຢ່າງ, ໃນວາລະສານ Liahona, ສະບັບລ່າສຸດກ່ຽວກັບກອງປະຊຸມໃຫຍ່ສາມັນ, ທ່ານສາມາດຊອກຫາຄຳວ່າ “Atonement” ຢູ່ໃນດັດຊະນີຫົວຂໍ້ (ເບິ່ງ Teaching in the Savior’s Way, 21).
Not My Will, But Thine [ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເທີ້ນ], ໂດຍ ວາວເຕີ ເຣນ