“ວັນທີ 26 ເດືອນມິຖຸນາ–ວັນທີ 2 ເດືອນກໍລະກົດ. ມັດທາຍ 28; ມາຣະໂກ 16; ລູກາ 24; ໂຢຮັນ 20–21: ‘ພຣະອົງຊົງຟື້ນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 26 ເດືອນມິຖຸນາ–ວັນທີ 2 ເດືອນກໍລະກົດ. ມັດທາຍ 28; ມາຣະໂກ 16; ລູກາ 24; ໂຢຮັນ 20–21,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
Feed My Sheep [ຈົ່ງລ້ຽງແກະຂອງເຮົາເດີ], ໂດຍ ຄະມຽວ ຄໍຣີ
ວັນທີ 26 ເດືອນມິຖຸນາ–ວັນທີ 2 ເດືອນກໍລະກົດ
ມັດທາຍ 28; ມາຣະໂກ 16; ລູກາ 24; ໂຢຮັນ 20–21
“ພຣະອົງຊົງຟື້ນ”
ໃຫ້ອ່ານ ມັດທາຍ 28; ມາຣະໂກ 16; ລູກາ 24; ແລະ ໂຢຮັນ 20–21, ດ້ວຍການອະທິຖານ, ໂດຍການສະທ້ອນຄິດກ່ຽວກັບຄວາມຊື່ນຊົມທີ່ທ່ານມີ ຍ້ອນການຟື້ນຄືນພຣະຊົນຂອງພຣະຄຣິດ. ໃຜຈະໄດ້ຮັບພອນໂດຍການໄດ້ຍິນປະຈັກພະຍານຂອງທ່ານເຖິງເຫດການນີ້?
ບັນທຶກຄວາມປະທັບໃຈຂອງທ່ານ
ຕໍ່ຜູ້ສັງເກດການຫລາຍຄົນ, ການສິ້ນພຣະຊົນຂອງພຣະເຢຊູແຫ່ງນາຊາເຣັດ ອາດເບິ່ງຄືວ່າເປັນສິ່ງກົງກັນຂ້າມກັບພຣະຊົນຊີບທີ່ໜ້າອັດສະຈັນໃຈ. ບໍ່ແມ່ນຊາຍຄົນນີ້ບໍທີ່ໄດ້ນຳລາຊາໂຣໃຫ້ເປັນຄືນມາຈາກຕາຍ? ບໍ່ແມ່ນເພິ່ນຜູ້ນີ້ບໍ ທີ່ໄດ້ປະເຊີນໜ້າກັບການຂົ່ມຂູ່ຂອງພວກຟາຣີຊາຍເທື່ອແລ້ວເທື່ອອີກ? ພຣະອົງໄດ້ສະແດງລິດອຳນາດ ໂດຍການປິ່ນປົວຄົນຕາບອດ, ຄົນຂີ້ທູດ, ແລະ ຄົນເປ້ຍລ່ອຍ. ລົມ ແລະ ນ້ຳທະເລໄດ້ເຊື່ອຟັງພຣະອົງ. ແຕ່ມາບັດນີ້ ພຣະອົງ, ຊຶ່ງຂະນະຖືກຄຶງຢູ່ເທິງໄມ້ກາງແຂນ, ໄດ້ປະກາດວ່າ, “ສຳເລັດແລ້ວ” (ໂຢຮັນ 19:30). ອາດມີຄວາມແປກໃຈຈາກໃຈຈິງໃນຄຳເວົ້າເຍາະເຍີ້ຍທີ່ວ່າ “ລາວຊ່ວຍຄົນອື່ນໄດ້; ແຕ່ລາວຊ່ວຍຕົນເອງບໍ່ໄດ້” (ມັດທາຍ 27:42). ແຕ່ເຮົາຮູ້ວ່າ ການສິ້ນພຣະຊົນຂອງພຣະເຢຊູ ບໍ່ໄດ້ເປັນທີ່ສຸດຂອງເລື່ອງນີ້. ເຮົາຮູ້ວ່າຄວາມມິດງຽບຂອງຫລຸມສົບ ແມ່ນເປັນພຽງຊົ່ວຄາວເທົ່ານັ້ນ ແລະ ວ່າວຽກງານຊ່ວຍໃຫ້ລອດຂອງພຣະຄຣິດຫາກໍເລີ່ມຕົ້ນ. ທຸກວັນນີ້ພຣະອົງບໍ່ໄດ້ “ເປັນຢູ່ໃນໝູ່ຄົນຕາຍ” ແຕ່ຢູ່ໃນໝູ່ຄົນເປັນ (ລູກາ 24:5). ຄຳສອນຂອງພຣະອົງບໍ່ໄດ້ມິດງຽບຢູ່, ເພາະສານຸສິດທີ່ຈົງຮັກພັກດີຂອງພຣະອົງໄດ້ສັ່ງສອນພຣະກິດຕິຄຸນໃນ “ທຸກຊາດ,” ໄວ້ວາງໃຈໃນຄຳສັນຍາຂອງພຣະອົງ ວ່າພຣະອົງຈະ “ຢູ່ກັບ [ພວກເຂົາ] ທຸກໆວັນ, ຈົນສິ້ນໂລກ” (ມັດທາຍ 28:19–20).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ມັດທາຍ 28; ມາຣະໂກ 16; ລູກາ 24; ໂຢຮັນ 20
ພຣະເຢຊູຄຣິດໄດ້ຟື້ນຄືນພຣະຊົນແລ້ວ.
ຢູ່ໃນຂໍ້ພຣະຄຳພີເຫລົ່ານີ້, ທ່ານຈະອ່ານກ່ຽວກັບໜຶ່ງໃນເຫດການທີ່ສຳຄັນທີ່ສຸດໃນປະຫວັດສາດຂອງມະນຸດຊາດ: ການຟື້ນຄືນພຣະຊົນຂອງພຣະເຢຊູຄຣິດ. ຂະນະທີ່ທ່ານອ່ານ, ໃຫ້ປຽບທຽບຕົວທ່ານເອງໃສ່ກັບຜູ້ຄົນທີ່ເປັນພະຍານເຖິງເຫດການທີ່ເກີດຂຶ້ນລະຫວ່າງການຟື້ນຄືນພຣະຊົນ. ທ່ານຮຽນຮູ້ຫຍັງແດ່ຈາກປະສົບການຂອງພວກເຂົາ?
ທ່ານ ຮູ້ສຶກແນວໃດຂະນະທີ່ທ່ານອ່ານກ່ຽວກັບການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ? ໃຫ້ພິຈາລະນາວິທີທີ່ມັນມີຜົນກະທົບຕໍ່ທ່ານ—ຕໍ່ທັດສະນະຊີວິດຂອງທ່ານ, ຕໍ່ຄວາມສຳພັນຂອງທ່ານ, ຕໍ່ສັດທາຂອງທ່ານໃນພຣະຄຣິດ, ແລະ ຕໍ່ສັດທາຂອງທ່ານໃນຄວາມຈິງອື່ນໆກ່ຽວກັບພຣະກິດຕິຄຸນແນວໃດ.
ເບິ່ງ Bible Dictionary, “Resurrection”; Gospel Topics, “Resurrection,” topics.ChurchofJesusChrist.org ນຳອີກ.
ເຮົາສາມາດເຊື້ອເຊີນພຣະຜູ້ຊ່ວຍໃຫ້ລອດໃຫ້ “ຕັ້ງຢູ່ນຳ [ເຮົາ].”
ຂະນະທີ່ທ່ານອ່ານກ່ຽວກັບປະສົບການຂອງສານຸສິດສອງຄົນ ຜູ້ໄດ້ພົບເຫັນພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນແລ້ວ, ໃຫ້ຊອກຫາສິ່ງທີ່ຄ້າຍຄືກັນກັບປະສົບການຂອງທ່ານ ໃນຖານະຜູ້ຕິດຕາມຂອງພຣະຄຣິດ. ທ່ານຈະສາມາດຍ່າງໄປກັບພຣະອົງໃນທຸກວັນນີ້ ແລະ ເຊື້ອເຊີນພຣະອົງໃຫ້ “ຢູ່ກັບ” ທ່ານຕື່ມອີກຈັກໜ່ອຍໄດ້ແນວໃດ? (ລູກາ 24:29). ທ່ານຈະຮູ້ຈັກການປະທັບຢູ່ຂອງພຣະອົງໃນຊີວິດຂອງທ່ານແນວໃດ? ພຣະວິນຍານບໍລິສຸດໄດ້ເປັນພະຍານເຖິງຄວາມເປັນພຣະເຈົ້າຂອງພຣະເຢຊູຄຣິດຕໍ່ທ່ານໃນທາງໃດແດ່?
ເບິ່ງ “ເຮົາຮູ້ພຣະຜູ້ໄຖ່ຊົງພຣະຊົນ,” “ພຣະຄຣິດເຈົ້າຄືນຊີບວັນນີ້,” ເພງສວດ ແລະ ເພງຂອງເດັກນ້ອຍ, 42, 58.
ການຟື້ນຄືນຊີວິດແມ່ນການເຂົ້າຫາກັນຢ່າງຖາວອນຂອງວິນຍານ ແລະ ຮ່າງກາຍ.
ເລື່ອງລາວກ່ຽວກັບການຟື້ນຄືນພຣະຊົນຂອງພຣະເຢຊູຄຣິດ ສາມາດຊ່ວຍທ່ານໃຫ້ເຂົ້າໃຈວ່າ ການຟື້ນຄືນຊີວິດໝາຍຄວາມວ່າແນວໃດ. ຍົກຕົວຢ່າງ, ທ່ານພົບເຫັນຄວາມຈິງຢ່າງໃດແດ່ໃນ ລູກາ 24:36–43 ແລະ ໂຢຮັນ 20 ກ່ຽວກັບຮ່າງກາຍທີ່ຟື້ນຄືນຊີວິດແລ້ວ? ທ່ານກໍສາມາດຄົ້ນຄວ້າຂໍ້ພຣະຄຳພີຂໍ້ອື່ນໆນຳອີກ ກ່ຽວກັບການຟື້ນຄືນຊີວິດ, ດັ່ງເຊັ່ນ 1 ໂກຣິນໂທ 15:35–44; ຟີລິບປອຍ 3:20–21; 3 ນີໄຟ 11:13–15; ຄຳສອນ ແລະ ພັນທະສັນຍາ 88:27–31; 110:2–3; 130:1, 22.
“ຜູ້ທີ່ບໍ່ໄດ້ເຫັນເຮົາ ແຕ່ໄດ້ເຊື່ອກໍເປັນສຸກ.”
ບາງຄົນຈະຮູ້ສຶກຄືກັນກັບໂທມາ, ຜູ້ໄດ້ເວົ້າວ່າ, “ຂ້ອຍຈະບໍ່ເຊື່ອ ຖ້າຂ້ອຍບໍ່ເຫັນ” (ໂຢຮັນ 20:25). ໃນຄວາມຄິດຄວາມເຫັນຂອງທ່ານ, ເປັນຫຍັງການເຊື່ອໂດຍທີ່ບໍ່ເຫັນກ່ອນ ສາມາດເປັນພອນໄດ້ແນວໃດ? (ເບິ່ງ ໂຢຮັນ 20:29). ໃຫ້ໄຕ່ຕອງວິທີທີ່ທ່ານໄດ້ຮັບພອນສຳລັບການເຊື່ອໃນສິ່ງທີ່ທ່ານບໍ່ສາມາດຫລຽວເຫັນ. ແມ່ນຫຍັງທີ່ຊ່ວຍທ່ານໃຫ້ມີສັດທາໃນພຣະຜູ້ຊ່ວຍໃຫ້ລອດ ເຖິງແມ່ນວ່າທ່ານບໍ່ສາມາດຫລຽວເຫັນພຣະອົງກໍຕາມ? ທ່ານຈະສາມາດສືບຕໍ່ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນ “ສິ່ງທີ່ຍັງບໍ່ທັນເຫັນ, ຊຶ່ງເປັນຄວາມຈິງ” ໄດ້ແນວໃດ? (ເບິ່ງ ແອວມາ 32:16–21; ອີເທີ 12:6). ໃຫ້ຄິດທີ່ຈະບັນທຶກສິ່ງທີ່ຊ່ວຍທ່ານໃຫ້ເຊື່ອໃນພຣະເຢຊູຄຣິດໄວ້ໃນປຶ້ມບັນທຶກສ່ວນຕົວ, ຫລື ແບ່ງປັນມັນກັບບາງຄົນທີ່ທ່ານຮູ້ຈັກ.
ພຣະຜູ້ຊ່ວຍໃຫ້ລອດເຊື້ອເຊີນເຮົາໃຫ້ລ້ຽງແກະຂອງພຣະອົງ.
ມັນອາດເປັນສິ່ງທີ່ໜ້າສົນໃຈທີ່ຈະປຽບທຽບການປະຕິສຳພັນຂອງພຣະຜູ້ຊ່ວຍໃຫ້ລອດກັບພວກສາວົກຂອງພຣະອົງໃນ ໂຢຮັນ 21 ໃສ່ກັບເທື່ອທຳອິດທີ່ພຣະອົງໄດ້ບັນຊາພວກເພິ່ນໃຫ້ໂຍນແຫຂອງພວກເພິ່ນລົງ, ຊຶ່ງບັນທຶກຢູ່ໃນ ລູກາ 5:1–11. ທ່ານພົບເຫັນຄວາມຄ້າຍຄືກັນ ແລະ ຄວາມແຕກຕ່າງກັນແນວໃດແດ່? ທ່ານພົບເຫັນຄວາມຮູ້ຢ່າງໃດແດ່ກ່ຽວກັບການເປັນສານຸສິດ?
ໃຫ້ພິຈາລະນາວ່າພຣະຄຳຂອງພຣະຜູ້ຊ່ວຍໃຫ້ລອດຕໍ່ເປໂຕໃນ ໂຢຮັນ 21:15–17 ອາດກ່ຽວພັນກັບທ່ານແນວໃດ. ມີສິ່ງໃດບໍທີ່ຢັບຢັ້ງທ່ານຈາກການປະຕິບັດສາດສະໜາກິດຕໍ່ແກະຂອງພຣະຜູ້ເປັນເຈົ້າ? ທ່ານຈະຕອບວ່າແນວໃດ ຖ້າຫາກພຣະຜູ້ເປັນເຈົ້າຖາມທ່ານວ່າ, “ເຈົ້າຮັກເຮົາບໍ?” ໃຫ້ໄຕ່ຕອງວິທີທີ່ທ່ານສາມາດສະແດງຄວາມຮັກຂອງທ່ານຕໍ່ພຣະຜູ້ເປັນເຈົ້າ.
ເບິ່ງ 1 ເປໂຕ 5:2–4, 8; Jeffrey R. Holland, “The First Great Commandment,” Liahona, Nov. 2012, 83–85 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ລູກາ 24:5–6.ປະທານທອມມັສ ແອັສ ມອນສັນ ໄດ້ກ່າວເຖິງ ລູກາ 24:5–6 ວ່າ, “ບໍ່ມີຄຳໃດໃນພຣະຄຳພີຂອງຊາວຄຣິດທີ່ມີຄວາມໝາຍຫລາຍໄປກວ່ານີ້ຕໍ່ຂ້າພະເຈົ້າ” (“He Is Risen!,” Liahona, May 2010, 89). ຖ້ອຍຄຳເຫລົ່ານີ້ມີຄວາມໝາຍແນວໃດຕໍ່ທ່ານ ແລະ ຕໍ່ຄອບຄົວຂອງທ່ານ?
-
ມັດທາຍ 28; ມາຣະໂກ 16; ລູກາ 24; ໂຢຮັນ 20–21.ຂະນະທີ່ຄອບຄົວຂອງທ່ານອ່ານບົດເຫລົ່ານີ້, ໃຫ້ສັງເກດເບິ່ງຜູ້ຄົນທີ່ໄດ້ປະຕິສຳພັນກັບພຣະເຢຊູໃນແຕ່ລະເລື່ອງ. ຍົກຕົວຢ່າງ, ແມ່ນຫຍັງທີ່ປະທັບໃຈທ່ານກ່ຽວກັບຜູ້ຄົນທີ່ໄດ້ໄປຢ້ຽມຢາມພຣະຜູ້ຊ່ວຍໃຫ້ລອດຢູ່ທີ່ອຸບມຸງ? ທ່ານຮຽນຮູ້ຫຍັງແດ່ຈາກຖ້ອຍຄຳ ຫລື ການກະທຳຂອງອັກຄະສາວົກ ຫລື ຈາກສານຸສິດຢູ່ໃນເສັ້ນທາງໄປເມືອງເອມາອູດ?
ໃຫ້ຄິດທີ່ຈະຮ້ອງເພງ “ພຣະອົງຊົງຟື້ນ!” ນຳກັນ (ເພງສວດ ແລະ ເພງຂອງເດັກນ້ອຍ, 60). ໃຫ້ເວົ້າລົມກັນກ່ຽວກັບບາງຄົນທີ່ຄອບຄົວຂອງທ່ານຮູ້ຈັກ ຜູ້ໄດ້ເສຍຊີວິດແລ້ວ, ແລະ ສົນທະນາເຖິງວິທີທີ່ຄວາມຈິງຢູ່ໃນເພງນີ້ນຳການປອບໂຍນມາໃຫ້ແນວໃດ.
Road to Emmaus [ທາງໄປເມືອງເອມາອູດ], ໂດຍ ເວັນດີ ແຄວເລີ
-
ມັດທາຍ 28:16–20; ມາຣະໂກ 16:14–20; ລູກາ 24:44–53.ໃນຂໍ້ເຫລົ່ານີ້, ພຣະເຢຊູໄດ້ຂໍໃຫ້ພວກສາວົກຂອງພຣະອົງເຮັດຫຍັງ? ເຮົາຈະຊ່ວຍບັນລຸວຽກງານນີ້ແນວໃດ? ສະມາຊິກໃນຄອບຄົວສາມາດແບ່ງປັນປະສົບການ ຕອນທີ່ເຂົາເຈົ້າຮູ້ສຶກວ່າ “ພຣະຜູ້ເປັນເຈົ້າໄດ້ຮ່ວມງານກັບ [ເຂົາເຈົ້າ]” ເພື່ອການບັນລຸຈຸດປະສົງຂອງພຣະອົງ (ມາຣະໂກ 16:20).
-
ໂຢຮັນ 21:15–17.ໃຫ້ຄິດທີ່ຈະອ່ານຂໍ້ເຫລົ່ານີ້ຂະນະທີ່ກິນເຂົ້ານຳກັນ. ສິ່ງນີ້ອາດຕື່ມບາງສິ່ງທີ່ມີຄວາມໝາຍຕໍ່ພຣະຄຳຂອງພຣະຜູ້ຊ່ວຍໃຫ້ລອດທີ່ວ່າ “ຈົ່ງລ້ຽງແກະຂອງເຮົາເດີ.” ອີງຕາມສິ່ງທີ່ພຣະເຢຊູໄດ້ສິດສອນກ່ຽວກັບແກະຢູ່ໃນພຣະຄຳພີໃໝ່ (ໃຫ້ເບິ່ງ, ສຳລັບຕົວຢ່າງ, ມັດທາຍ 9:35–36; 10:5–6; 25:31–46; ລູກາ 15:4–7; ໂຢຮັນ 10:1–16), ວ່າເປັນຫຍັງການລ້ຽງແກະຈຶ່ງເປັນວິທີທີ່ດີ ໃນການບັນຍາຍການຮັບໃຊ້ລູກໆຂອງພຣະເຈົ້າ? ການປຽບທຽບນີ້ສິດສອນຫຍັງແດ່ກ່ຽວກັບວິທີທີ່ພຣະບິດາເທິງສະຫວັນ ແລະ ພຣະເຢຊູຮູ້ສຶກກ່ຽວກັບເຮົາ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ພຣະອົງຊົງຟື້ນ!,” ເພງສວດ ແລະ ເພງຂອງເດັກນ້ອຍ, 60.
ການປັບປຸງການສຶກສາສ່ວນຕົວ
ໃຊ້ເພງເພື່ອເຊື້ອເຊີນພຣະວິນຍານ ແລະ ຮຽນຮູ້ຄຳສອນ. ການຟັງ ຫລື ການຮ້ອງເພງສວດ ດັ່ງເຊັ່ນ “ພຣະອົງຊົງຟື້ນ!” (ເພງສວດ ແລະ ເພງຂອງເດັກນ້ອຍ, 60) ສາມາດເຊື້ອເຊີນພຣະວິນຍານ ແລະ ຊ່ວຍທ່ານໃຫ້ຮຽນຮູ້ກ່ຽວກັບການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດໄດ້.
The Resurrected Christ [ພຣະຄຣິດທີ່ຟື້ນຄືນພຣະຊົນ], ໂດຍ ວາວເຕີ ເຣນ