“ວັນທີ 17–23 ເດືອນກໍລະກົດ. ກິດຈະການ 10–15: ‘ພຣະທຳຂອງພຣະເຈົ້າກໍແຜ່ຂະຫຍາຍຈະເລີນທະວີຍິ່ງຂຶ້ນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 17–23 ເດືອນກໍລະກົດ. ກິດຈະການ 10–15,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ເປໂຕກຳລັງເວົ້າກັບໂກເນລີໂອ

ວັນທີ 17–23 ເດືອນກໍລະກົດ

ກິດຈະການ 10–15

“ພຣະທຳຂອງພຣະເຈົ້າກໍແຜ່ຂະຫຍາຍຈະເລີນທະວີຍິ່ງຂຶ້ນ”

ໃຫ້ອ່ານ ກິດຈະການ 10–15 ຢ່າງລະມັດລະວັງ, ໂດຍໃຫ້ເວລາສຳລັບພຣະວິນຍານກະຕຸ້ນທ່ານດ້ວຍຄວາມຄິດ ແລະ ຄວາມຮູ້ສຶກ. ມີຫຍັງແດ່ສຳລັບທ່ານທີ່ຈະຮຽນຮູ້ໃນບົດເຫລົ່ານີ້?

ບັນທຶກຄວາມປະທັບໃຈຂອງທ່ານ

ລະຫວ່າງການປະຕິບັດສາດສະໜາກິດໃນຊ່ວງມະຕະຂອງພຣະອົງ, ພຣະເຢຊູຄຣິດມັກທ້າທາຍປະເພນີ ແລະ ຄວາມເຊື່ອຖືມາແຕ່ດົນນານຂອງຜູ້ຄົນ. ສິ່ງນີ້ບໍ່ໄດ້ຢຸດ ຫລັງຈາກພຣະອົງໄດ້ສະເດັດຂຶ້ນໄປສະຫວັນ, ໂດຍທີ່ພຣະອົງຍັງສືບຕໍ່ນຳພາສາດສະໜາຈັກຂອງພຣະອົງໂດຍການເປີດເຜີຍ. ຍົກຕົວຢ່າງ, ໃນຊ່ວງທີ່ພຣະເຢຊູຢູ່ໃນໂລກ ພວກສາວົກຂອງພຣະອົງໄດ້ສັ່ງສອນພຣະກິດຕິຄຸນໃຫ້ແຕ່ຊາວຢິວເທົ່ານັ້ນ. ແຕ່ບໍ່ດົນຫລັງຈາກພຣະຜູ້ຊ່ວຍໃຫ້ລອດສິ້ນພຣະຊົນ ແລະ ເປໂຕໄດ້ກາຍເປັນຜູ້ນຳພາສາດສະໜາຈັກຢູ່ໃນໂລກ, ພຣະເຢຊູຄຣິດໄດ້ເປີດເຜີຍຕໍ່ເປໂຕວ່າ ເວລາມາເຖິງແລ້ວທີ່ຈະສັ່ງສອນພຣະກິດຕິຄຸນໃຫ້ກັບຜູ້ທີ່ບໍ່ໄດ້ເປັນຊາວຢິວ. ແນວຄິດໃນການແບ່ງປັນພຣະກິດຕິຄຸນໃຫ້ກັບຄົນຕ່າງຊາດ ເບິ່ງຄືວ່າບໍ່ເປັນໜ້າແປກໃຈໃນປະຈຸບັນ, ສະນັ້ນ ແມ່ນຫຍັງຄືບົດຮຽນສຳລັບເຮົາຢູ່ໃນເລື່ອງນີ້. ບາງທີບົດຮຽນໜຶ່ງແມ່ນວ່າ ໃນສາດສະໜາຈັກສະໄໝບູຮານ ແລະ ສະໄໝໃໝ່, ພຣະຜູ້ຊ່ວຍໃຫ້ລອດທີ່ຊົງຮັກໄດ້ນຳພາຜູ້ນຳທີ່ຖືກເລືອກຂອງພຣະອົງ (ເບິ່ງ ອາໂມດ 3:7; ຄຳສອນ ແລະ ພັນທະສັນຍາ 1:38). ການເປີດເຜີຍຕໍ່ເນື່ອງເປັນສັນຍານທີ່ສຳຄັນຂອງສາດສະໜາຈັກຂອງພຣະເຢຊູຄຣິດທີ່ແທ້ຈິງ ແລະ ດຳລົງຢູ່. ເໝືອນດັ່ງເປໂຕ, ເຮົາຈະຕ້ອງເຕັມໃຈທີ່ຈະຍອມຮັບການເປີດເຜີຍຕໍ່ເນື່ອງ ແລະ ດຳລົງຊີວິດ “[ໂດຍທຸກພຣະຄຳຂອງພຣະເຈົ້າ]” (ລູກາ 4:4), ລວມທັງ “ທັງໝົດທີ່ [ພຣະອົງ] ໄດ້ເປີດເຜີຍມາ, ທັງໝົດທີ່ພຣະອົງເປີດເຜີຍຢູ່ໃນຂະນະນີ້,” ແລະ “ເລື່ອງສຳຄັນ ແລະ ຍິ່ງໃຫຍ່ຫລາຍເລື່ອງ” ທີ່ພຣະອົງຍັງບໍ່ໄດ້ເປີດເຜີຍເທື່ອ “ກ່ຽວກັບອານາຈັກຂອງພຣະເຈົ້າ” (ຫລັກແຫ່ງຄວາມເຊື່ອ 1:9).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ກິດຈະການ 10

“ພຣະເຈົ້າເຮັດກັບທຸກຄົນໂດຍບໍ່ເລືອກໜ້າ.”

ເປັນເວລາຫລາຍລຸ້ນຄົນ, ຊາວຢິວເຊື່ອວ່າ ການເປັນ “ເຊື້ອສາຍຂອງອັບຣາຮາມ,” ຫລື ການເປັນລູກຫລານແທ້ໆຂອງອັບຣາຮາມ, ໝາຍຄວາມວ່າພວກເຂົາຖືກຮັບຮູ້ ແລະ ຖືກເລືອກໂດຍພຣະເຈົ້າ (ເບິ່ງ ລູກາ 3:8). ພວກເຂົາຖືວ່າ ຄົນອື່ນໆເປັນຄົນຕ່າງຊາດທີ່ມີ “ມົນທິນ” ຜູ້ບໍ່ໄດ້ຖືກຮັບຮູ້ໂດຍພຣະເຈົ້າ. ໃນ ກິດຈະການ 10, ພຣະຜູ້ເປັນເຈົ້າໄດ້ສິດສອນເປໂຕກ່ຽວກັບຜູ້ “ເປັນທີ່ພໍໃຈພຣະອົງ”? (ກິດຈະການ 10:35). ມີຫລັກຖານຢ່າງໃດແດ່ທີ່ທ່ານພົບເຫັນຢູ່ໃນບົດນີ້ ວ່າຊີວິດຂອງໂກເນລີໂອຖືກຮັບຮູ້ໂດຍພຣະຜູ້ເປັນເຈົ້າ? ໃຫ້ໄຕ່ຕອງຄວາມໝາຍຂອງຂໍ້ຄວາມທີ່ວ່າ “ພຣະເຈົ້າເຮັດກັບທຸກຄົນໂດຍບໍ່ເລືອກໜ້າ” (ຂໍ້ທີ 34; ເບິ່ງ 1 ນີໄຟ 17:35 ນຳອີກ). ເປັນຫຍັງມັນຈຶ່ງສຳຄັນຕໍ່ທ່ານທີ່ຮູ້ຈັກຄວາມຈິງນີ້?

ຄືກັນກັບຊາວຢິວທີ່ດູຖູກຜູ້ທີ່ບໍ່ໄດ້ເປັນເຊື້ອສາຍຂອງອັບຣາຮາມ, ທ່ານເຄີຍຮູ້ຕົວບໍວ່າ ທ່ານໄດ້ສັນນິຖານໃນແບບບໍ່ດີ ຫລື ບໍ່ຮູ້ຄັກແນ່ກ່ຽວກັບບາງຄົນທີ່ແຕກຕ່າງຈາກທ່ານ? ທ່ານຈະເອົາຊະນະແນວໂນ້ມນີ້ໄດ້ແນວໃດ? ມັນອາດເປັນສິ່ງທີ່ໜ້າສົນໃຈ ທີ່ຈະລອງເຮັດກິດຈະກຳທີ່ງ່າຍໆລະຫວ່າງສອງສາມວັນຂ້າງໜ້າ: ເມື່ອໃດກໍຕາມທີ່ທ່ານໄດ້ປະຕິສຳພັນກັບບາງຄົນ, ໃຫ້ລອງຄິດວ່າ, “ບຸກຄົນນີ້ເປັນລູກຂອງພຣະເຈົ້າ.” ເມື່ອທ່ານເຮັດເຊັ່ນນີ້, ມີການປ່ຽນແປງໃດແດ່ທີ່ທ່ານສັງເກດເຫັນໃນທາງທີ່ທ່ານຄິດກ່ຽວກັບ ແລະ ການປະຕິສຳພັນກັບຄົນອື່ນ?

ເບິ່ງ 1 ຊາມູເອນ 16:7; 2 ນີໄຟ 26:13, 33; Russell M. Nelson, “Let God Prevail,” Liahona, Nov. 2020, 92–95; “Peter’s Revelation to Take the Gospel to the Gentiles” (ວິດີໂອ), ChurchofJesusChrist.org ນຳອີກ.

ກິດຈະການ 10; 11:1–18; 15

ພຣະບິດາເທິງສະຫວັນສິດສອນເຮົາເທື່ອລະບັນທັດ ຜ່ານທາງການເປີດເຜີຍ.

ເມື່ອເປໂຕໄດ້ເຫັນພາບນິມິດທີ່ບັນຍາຍຢູ່ໃນ ກິດຈະການ 10, ເພິ່ນໄດ້ພະຍາຍາມເຂົ້າໃຈມັນໃນຕອນຕົ້ນ ແລະ “ຍັງຄິດບໍ່ອອກວ່າ [ມັນ] ໝາຍຄວາມວ່າຢ່າງໃດ” (ຂໍ້ທີ 17). ແຕ່ພຣະຜູ້ເປັນເຈົ້າໄດ້ມອບຄວາມເຂົ້າໃຈທີ່ຍິ່ງໃຫຍ່ກວ່າໃຫ້ເປໂຕ ຂະນະທີ່ເປໂຕສະແຫວງຫາທີ່ຈະເຂົ້າໃຈ. ຂະນະທີ່ທ່ານອ່ານ ກິດຈະການ 10, 11, ແລະ 15, ໃຫ້ສັງເກດເບິ່ງວ່າ ເປໂຕໄດ້ເຂົ້າໃຈພາບນິມິດຂອງເພິ່ນຢ່າງເລິກເຊິ່ງເມື່ອເວລາຜ່ານໄປແນວໃດ. ທ່ານໄດ້ສະແຫວງຫາ ແລະ ໄດ້ຮັບຄວາມເຂົ້າໃຈທີ່ຍິ່ງໃຫຍ່ກວ່າຈາກພຣະເຈົ້າ ເມື່ອທ່ານມີຄຳຖາມແນວໃດ?

ກິດຈະການ 10, 11, ແລະ 15 ເລົ່າເຖິງຕອນທີ່ພຣະຜູ້ເປັນເຈົ້າໄດ້ຊີ້ນຳຜູ້ຮັບໃຊ້ຂອງພຣະອົງຜ່ານທາງການເປີດເຜີຍ. ມັນອາດເປັນປະໂຫຍດທີ່ຈະບັນທຶກສິ່ງທີ່ທ່ານໄດ້ຮຽນຮູ້ກ່ຽວກັບການເປີດເຜີຍ ຂະນະທີ່ທ່ານອ່ານບົດເຫລົ່ານີ້. ພຣະວິນຍານກ່າວກັບທ່ານໃນທາງໃດແດ່?

ເບິ່ງ Gospel Topics, “Revelation,” topics.ChurchofJesusChrist.org; Quentin L. Cook, “The Blessing of Continuing Revelation to Prophets and Personal Revelation to Guide Our Lives,” Liahona, May 2020, 96–100; “The Jerusalem Conference” (ວິດີໂອ), ChurchofJesusChrist.org ນຳອີກ.

ກິດຈະການ 11:26

ເຮົາເປັນຊາວຄຣິດ ເພາະວ່າເຮົາເຊື່ອ ແລະ ຕິດຕາມພຣະເຢຊູຄຣິດ.

ແມ່ນຫຍັງທີ່ສຳຄັນກ່ຽວກັບບຸກຄົນທີ່ຖືກເອີ້ນວ່າ ຊາວຄຣິດ? (ເບິ່ງ ກິດຈະການ 11:26). ການທີ່ທ່ານຖືກຮູ້ຈັກວ່າເປັນຊາວຄຣິດໝາຍຄວາມວ່າແນວໃດຕໍ່ທ່ານ? ໃຫ້ພິຈາລະນາເຖິງຄວາມສຳຄັນຂອງນາມຕ່າງໆ. ຍົກຕົວຢ່າງ, ນາມສະກຸນຂອງຄອບຄົວທ່ານມີຄວາມໝາຍຕໍ່ທ່ານແນວໃດ? ເປັນຫຍັງຊື່ຂອງສາດສະໜາຈັກຈຶ່ງສຳຄັນຕໍ່ທ່ານ? (ເບິ່ງ ຄຳສອນ ແລະ ພັນທະສັນຍາ 115:4). ການທີ່ທ່ານຮັບເອົາພຣະນາມຂອງພຣະເຢຊູຄຣິດໂດຍພັນທະສັນຍາໝາຍຄວາມວ່າແນວໃດຕໍ່ທ່ານ? (ເບິ່ງ ຄຳສອນ ແລະ ພັນທະສັນຍາ 20:77).

ເບິ່ງ ໂມໄຊຢາ 5:7–15; ແອວມາ 46:13–15; 3 ນີໄຟ 27:3–8; Russell M. Nelson, “The Correct Name of the Church,” Liahona, Nov. 2018, 87–90 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ກິດຈະການ 10:17, 20.ເຮົາເຄີຍມີປະສົບການທາງວິນຍານບໍ ແລະ ຕໍ່ມາໄດ້ສົງໄສສິ່ງທີ່ເຮົາໄດ້ຮູ້ສຶກ ຫລື ໄດ້ຮຽນຮູ້? ມີຄຳແນະນຳຢ່າງໃດແດ່ທີ່ເຮົາສາມາດມອບໃຫ້ກັນແລະກັນ ທີ່ອາດຊ່ວຍເຮົາເອົາຊະນະຄວາມສົງໄສຂອງເຮົາໄດ້? (ເບິ່ງ Neil L. Andersen, “Spiritually Defining Memories,” Liahona, May 2020, 18–22.)

ກິດຈະການ 10:34–35.ທ່ານຈະສາມາດສິດສອນຄອບຄົວຂອງທ່ານວ່າ “ພຣະເຈົ້າເຮັດກັບທຸກຄົນໂດຍບໍ່ເລືອກໜ້າ” ແນວໃດ? (ກິດຈະການ 10:34). ບາງທີທ່ານສາມາດສະແດງຮູບພາບຂອງຜູ້ຄົນທີ່ມີພື້ນຖານ ແລະ ວັດທະນະທຳທີ່ແຕກຕ່າງກັນ ຂະນະທີ່ຄອບຄົວຂອງທ່ານອ່ານຂໍ້ເຫລົ່ານີ້. ຄວາມຈິງໃນຂໍ້ເຫລົ່ານີ້ຄວນເປັນອິດທິພົນໃຫ້ກັບການກະທຳຂອງເຮົາແນວໃດ? (ເບິ່ງ, ສຳລັບຕົວຢ່າງ, “ຂໍໃຫ້ເຮົາເດີນໄປ” [ເພງສວດ ແລະ ເພງຂອງເດັກນ້ອຍ, 10]).

ກິດຈະການ 12:1–17.ຄອບຄົວຂອງທ່ານສາມາດສະແດງຕາມເລື່ອງລາວຂອງເປໂຕ ຕອນຖືກຈັບເຂົ້າຄຸກ ແລະ ສະມາຊິກຂອງສາດສະໜາຈັກໄດ້ເຕົ້າໂຮມກັນ ແລະ ອະທິຖານເພື່ອເພິ່ນ. ເຮົາເຄີຍໄດ້ຮັບພອນຈາກການອະທິຖານເມື່ອໃດ? ມີຄົນໃດບໍທີ່ເຮົາຮູ້ສຶກດົນໃຈໃຫ້ອະທິຖານເພື່ອ, ດັ່ງເຊັ່ນຜູ້ນຳຂອງສາດສະໜາຈັກ ຫລື ຄົນທີ່ເຮົາຮັກ? ການອະທິຖານ “ດ້ວຍໃຈຮ້ອນຮົນ” ໝາຍຄວາມວ່າແນວໃດ? (ກິດຈະການ 12:5; ເບິ່ງ ແອວມາ 34:27) ນຳອີກ.

Peter Delivered from Prison [ເປໂຕຖືກປົດປ່ອຍອອກຈາກຄຸກ], ໂດຍ ເອ ແອວ ໂນກສ໌

ກິດຈະການ 14.ຂະນະທີ່ພວກທ່ານອ່ານບົດເຫລົ່ານີ້ນຳກັນ, ສະມາຊິກໃນຄອບຄົວບາງຄົນສາມາດບັນທຶກພອນທີ່ມາສູ່ສານຸສິດ ແລະ ສາດສະໜາຈັກ. ສະມາຊິກໃນຄອບຄົວຄົນອື່ນໆສາມາດບັນທຶກການຕໍ່ຕ້ານ ຫລື ການທົດລອງທີ່ສານຸສິດໄດ້ປະເຊີນ. ເປັນຫຍັງພຣະເຈົ້າຈຶ່ງປ່ອຍໃຫ້ສິ່ງຫຍຸ້ງຍາກເກີດຂຶ້ນກັບຄົນທີ່ຊອບທຳ?

ກິດຈະການ 15:1–21.ຂໍ້ເຫລົ່ານີ້ບັນຍາຍເຖິງຄວາມບໍ່ເຫັນດີນຳກັນໃນສາດສະໜາຈັກກ່ຽວກັບວ່າ ຜູ້ປ່ຽນໃຈເຫລື້ອມໃສຄວນຮັກສາກົດຂອງໂມເຊຫລືບໍ່, ລວມທັງການເຮັດພິທີຕັດ. ອັກຄະສາວົກເຮັດສິ່ງໃດກ່ຽວກັບຄວາມບໍ່ເຫັນດີນຳກັນນີ້? ເຮົາສາມາດຮຽນຮູ້ຫຍັງແດ່ຈາກຕົວຢ່າງນີ້ກ່ຽວກັບວິທີທີ່ຜູ້ນຳຂອງສາດສະໜາຈັກຊີ້ນຳວຽກງານຂອງສາດສະໜາຈັກ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.

ການປັບປຸງການສິດສອນຂອງເຮົາ

ແຕ້ມຮູບ. ຮູບພາບສາມາດຊ່ວຍສະມາຊິກໃນຄອບຄົວໃຫ້ວາດພາບຄຳສອນ ແລະ ເລື່ອງລາວໃນພຣະຄຳພີໄດ້. ທ່ານສາມາດເຊື້ອເຊີນສະມາຊິກໃນຄອບຄົວໃຫ້ແຕ້ມຮູບກ່ຽວກັບສິ່ງທີ່ທ່ານອ່ານ, ດັ່ງເຊັ່ນ ພາບນິມິດຂອງເປໂຕໃນ ກິດຈະການ 10.