“ວັນທີ 3–9 ເດືອນກໍລະກົດ. ກິດຈະການ 1–5: ‘ພວກເຈົ້າຈະເປັນພະຍານໃຫ້ແກ່ເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 3–9 ເດືອນກໍລະກົດ. ກິດຈະການ 1–5,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ຝູງຊົນຢູ່ແຄມນ້ຳ ແລະ ກຳລັງຮັບບັບຕິສະມາໃນແມ່ນ້ຳ

Day of Pentecost [ວັນເພັນເຕຄໍສະເຕ], ໂດຍ ຊິດນີ ຄິງ

ວັນທີ 3–9 ເດືອນກໍລະກົດ

ກິດຈະການ 1–5

“ພວກເຈົ້າຈະເປັນພະຍານໃຫ້ແກ່ເຮົາ”

ຂະນະທີ່ທ່ານສຶກສາ ກິດຈະການ 1–5, ພຣະວິນຍານບໍລິສຸດສາມາດດົນໃຈທ່ານໃຫ້ພົບເຫັນຄວາມຈິງ ທີ່ກ່ຽວພັນກັບຊີວິດຂອງທ່ານ. ໃຫ້ບັນທຶກຂໍ້ທີ່ປະທັບໃຈທ່ານ, ແລະ ຊອກຫາໂອກາດທີ່ຈະແບ່ງປັນສິ່ງທີ່ທ່ານໄດ້ຮຽນຮູ້.

ບັນທຶກຄວາມປະທັບໃຈຂອງທ່ານ

ທ່ານເຄີຍສົງໄສບໍວ່າ ເປໂຕອາດຄິດ ແລະ ຮູ້ສຶກແນວໃດ ເມື່ອເພິ່ນ, ພ້ອມທັງອັກຄະສາວົກຄົນອື່ນໆ, “ແນມເບິ່ງທ້ອງຟ້າ” ຂະນະທີ່ພຣະເຢຊູສະເດັດຂຶ້ນສະຫວັນໄປຫາພຣະບິດາຂອງພຣະອົງ? (ກິດຈະການ 1:10). ສາດສະໜາຈັກທີ່ຖືກຈັດຕັ້ງຂຶ້ນໂດຍພຣະບຸດຂອງພຣະເຈົ້າ ບັດນີ້ຢູ່ໃນຄວາມດູແລຂອງເປໂຕ. ພາລະຂອງການທີ່ຈະນຳເອົາພຣະກິດຕິຄຸນໄປ “[ສິດສອນໃຫ້ແກ່] ທຸກຊາດເປັນລູກສິດ” ບັດນີ້ຕົກຢູ່ທີ່ເພິ່ນ (ມັດທາຍ 28:19). ແຕ່ຖ້າຫາກເພິ່ນຮູ້ສຶກບໍ່ພຽບພ້ອມ ຫລື ຢ້ານກົວ, ເຮົາກໍບໍ່ພົບເຫັນຫລັກຖານໃດໆເລີຍຢູ່ໃນພຣະທຳກິດຈະການ. ສິ່ງທີ່ເຮົາພົບເຫັນແມ່ນຕົວຢ່າງຂອງປະຈັກພະຍານ ແລະ ຄວາມເຫລື້ອມໃສທີ່ບໍ່ມີຄວາມຢ້ານກົວ, ການປິ່ນປົວທີ່ໜ້າອັດສະຈັນ, ການສະແດງໃຫ້ປະຈັກທາງວິນຍານ, ແລະ ຄວາມເຕີບໂຕຢ່າງຫລວງຫລາຍສຳລັບສາດສະໜາຈັກ. ມັນຍັງແມ່ນສາດສະໜາຈັກຂອງພຣະຜູ້ຊ່ວຍໃຫ້ລອດ, ຍັງຖືກນຳພາໂດຍພຣະອົງຢູ່. ຕາມຈິງແລ້ວ, ພຣະທຳກິດຈະການຂອງອັກຄະສາວົກ ສາມາດຖືກເອີ້ນວ່າກິດຈະການຂອງພຣະເຢຊູຄຣິດນຳອີກ ຜ່ານທາງອັກຄະສາວົກຂອງພຣະອົງ. ໂດຍທີ່ຖືກນຳພາໂດຍພຣະວິນຍານທີ່ຖອກເທລົງມາ, ເປໂຕຈຶ່ງບໍ່ໄດ້ເປັນຄົນຫາປາທີ່ດ້ອຍການສຶກສາ ຜູ້ທີ່ພຣະເຢຊູໄດ້ພົບເຫັນຢູ່ແຄມທະເລສາບຄາລີເລອີກຕໍ່ໄປ. ທັງເພິ່ນບໍ່ໄດ້ທໍ້ແທ້ ຊຶ່ງພຽງແຕ່ບໍ່ເທົ່າໃດອາທິດກ່ອນໜ້ານັ້ນໄດ້ຮ້ອງໄຫ້ຢ່າງຂົມຂື່ນ ເພາະເພິ່ນໄດ້ປະຕິເສດວ່າ ເພິ່ນບໍ່ຮູ້ຈັກພຣະເຢຊູຊາວນາຊາເຣັດ.

ໃນພຣະທຳກິດຈະການ, ທ່ານຈະອ່ານຄຳປະກາດທີ່ມີພະລັງກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ທ່ານກໍຈະເຫັນວິທີທີ່ພຣະກິດຕິຄຸນສາມາດປ່ຽນແປງຜູ້ຄົນນຳອີກ—ລວມທັງຕົວທ່ານ—ໄປສູ່ການເປັນສານຸສິດທີ່ກ້າຫານ ທີ່ພຣະເຈົ້າຮູ້ວ່າພວກເຂົາສາມາດເປັນໄດ້.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ກິດຈະການ 1:1–8, 15–26; 2:1–42; 4:1–13, 31–33

ພຣະເຢຊູຄຣິດຊີ້ນຳສາດສະໜາຈັກຂອງພຣະອົງຜ່ານທາງພຣະວິນຍານບໍລິສຸດ.

ພຣະທຳກິດຈະການບັນທຶກຄວາມພະຍາຍາມຂອງອັກຄະສາວົກທີ່ຈະຈັດຕັ້ງສາດສະໜາຈັກຂອງພຣະເຢຊູຄຣິດຫລັງຈາກການສະເດັດຂຶ້ນສະຫວັນຂອງພຣະຜູ້ຊ່ວຍໃຫ້ລອດ. ເຖິງແມ່ນວ່າພຣະເຢຊູຄຣິດບໍ່ໄດ້ຢູ່ໃນໂລກອີກຕໍ່ໄປ, ແຕ່ພຣະອົງຍັງຊີ້ນຳສາດສະໜາຈັກຢູ່ໂດຍການເປີດເຜີຍ ຜ່ານທາງພຣະວິນຍານບໍລິສຸດ. ໃຫ້ພິຈາລະນາວິທີທີ່ພຣະວິນຍານບໍລິສຸດນຳພາຜູ້ນຳຄົນໃໝ່ຂອງສາດສະໜາຈັກຂອງພຣະຄຣິດ ຂະນະທີ່ທ່ານທົບທວນຂໍ້ພຣະຄຳພີດັ່ງຕໍ່ໄປນີ້: ກິດຈະການ 1:1–8, 15–26; 2:1–42; 4:1–13, 31–33.

ໃນຖານະສະມາຊິກຂອງສາດສະໜາຈັກຂອງພຣະຄຣິດໃນປະຈຸບັນ, ເຮົາແຕ່ລະຄົນມີໜ້າທີ່ຮັບຜິດຊອບໃນການມີສ່ວນຮ່ວມໃນວຽກງານແຫ່ງຄວາມລອດ ແລະ ຄວາມສູງສົ່ງ—ເພື່ອດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ, ດູແລຄົນຂັດສົນ, ເຊື້ອເຊີນຄົນອື່ນໃຫ້ມາຫາພຣະຄຣິດ, ແລະ ເຕົ້າໂຮມຄອບຄົວສຳລັບນິລັນດອນ (ເບິ່ງ General Handbook, 1.2). ທ່ານຮຽນຮູ້ຫຍັງແດ່ຈາກອັກຄະສາວົກດັ້ງເດີມກ່ຽວກັບວິທີທີ່ທ່ານສາມາດເພິ່ງອາໄສພຣະວິນຍານບໍລິສຸດເພື່ອນຳພາຄວາມພະຍາຍາມຂອງທ່ານ?

ເບິ່ງ Bible Dictionary, “Holy Ghost” ນຳອີກ.

ກິດຈະການ 2:36–47; 3:12–21

ຫລັກທຳ ແລະ ພິທີການແຫ່ງພຣະກິດຕິຄຸນຊ່ວຍເຮົາໃຫ້ມາຫາພຣະຄຣິດ.

ທ່ານເຄີຍຮູ້ສຶກ “ເຈັບຊ້ຳກິນແໜງໃຈ,” ຄືກັນກັບຊາວຢິວ ໃນວັນເພັນເຕຄໍສະເຕຫລືບໍ່? (ກິດຈະການ 2:37). ບາງທີທ່ານເຄີຍເຮັດບາງສິ່ງທີ່ເຮັດໃຫ້ທ່ານກິນແໜງ, ຫລື ບາງທີທ່ານອາດພຽງແຕ່ຢາກປ່ຽນແປງຊີວິດຂອງທ່ານ. ທ່ານຄວນເຮັດຫຍັງເມື່ອທ່ານຮູ້ສຶກເຊັ່ນນີ້? ຄຳແນະນຳຂອງເປໂຕຕໍ່ຊາວຢິວມີຢູ່ໃນ ກິດຈະການ 2:38. ໃຫ້ສັງເກດເບິ່ງວ່າຫລັກທຳ ແລະ ພິທີການຢ່າງທຳອິດຂອງພຣະກິດຕິຄຸນ (ລວມທັງສັດທາ, ການກັບໃຈ, ການບັບຕິສະມາ, ແລະ ຂອງປະທານແຫ່ງພຣະວິນຍານບໍລິສຸດ—ຫລື ສິ່ງທີ່ບາງເທື່ອກ່າວເຖິງວ່າເປັນຄຳສອນຂອງພຣະຄຣິດ) ມີຜົນກະທົບຕໍ່ຜູ້ປ່ຽນໃຈເຫລື້ອມໃສເຫລົ່ານີ້, ດັ່ງທີ່ບັນທຶກຢູ່ໃນ ກິດຈະການ 2:37–47.

ທ່ານອາດໄດ້ຮັບບັບຕິສະມາ ແລະ ໄດ້ຮັບຂອງປະທານແຫ່ງພຣະວິນຍານບໍລິສຸດແລ້ວ, ສະນັ້ນ ທ່ານຈະສືບຕໍ່ນຳໃຊ້ຄຳສອນຂອງພຣະຄຣິດແນວໃດ? ໃຫ້ພິຈາລະນາຂໍ້ຄວາມເຫລົ່ານີ້ຈາກແອວເດີ ແດວ ຈີ ເຣັນລັນ: “ເຮົາອາດຈະດີພ້ອມ … ໂດຍການໃຊ້ສັດທາຊ້ຳແລ້ວຊ້ຳອີກ ໃນ [ພຣະຄຣິດ], ກັບໃຈ, ຮັບສ່ວນສິນລະລຶກ ເພື່ອຕໍ່ພັນທະສັນຍາ ແລະ ພອນຂອງການບັບຕິສະມາ, ແລະ ຮັບເອົາພຣະວິນຍານບໍລິສຸດໃຫ້ມາສະຖິດຢູ່ນຳເປັນເພື່ອນຕະຫລອດເວລາ ໃນລະດັບທີ່ສູງກວ່າ. ເມື່ອເຮົາເຮັດດັ່ງນັ້ນ, ເຮົາຈະກາຍເປັນເໝືອນດັ່ງພຣະຄຣິດຫລາຍຂຶ້ນ ແລະ ອົດທົນຈົນເຖິງທີ່ສຸດ, ກັບທຸກສິ່ງທີ່ກ່ຽວຂ້ອງ” (“Latter-day Saints Keep on Trying,” Liahona, May 2015, 56).

ກິດຈະການ 3:19–21

ແມ່ນຫຍັງຄື “[ເວລາແຫ່ງຄວາມສົດຊື່ນ]” ແລະ “ເວລາທີ່ທຸກສິ່ງຈະຖືກຕັ້ງຂຶ້ນໃໝ່”?

“ເວລາແຫ່ງຄວາມສົດຊື່ນ” ໝາຍເຖິງຊ່ວງໄລຍະພັນປີ, ເມື່ອພຣະເຢຊູຄຣິດຈະກັບຄືນມາຍັງໂລກ. “ເວລາທີ່ທຸກສິ່ງຈະຖືກຕັ້ງຂຶ້ນໃໝ່” ໝາຍເຖິງການຟື້ນຟູພຣະກິດຕິຄຸນ, ຊຶ່ງກະກຽມໂລກສຳລັບຊ່ວງໄລຍະພັນປີ.

ກິດຈະການ 3; 4:1–31; 5:12–42

ພວກສາວົກຂອງພຣະເຢຊູຄຣິດໄດ້ຮັບອຳນາດໃຫ້ກະທຳການອັດສະຈັນໃນພຣະນາມຂອງພຣະອົງ.

ຊາຍທີ່ເປັນລ່ອຍຫວັງວ່າຈະໄດ້ຮັບເງິນຈາກຜູ້ທີ່ມາຍັງພຣະວິຫານ. ແຕ່ຜູ້ຮັບໃຊ້ຂອງພຣະຜູ້ເປັນເຈົ້າໄດ້ສະເໜີມອບສິ່ງທີ່ມີຄ່າຫລາຍກວ່ານັ້ນ. ຂະນະທີ່ທ່ານອ່ານ ກິດຈະການ 3; 4:1–31 ແລະ 5:12–42, ໃຫ້ພິຈາລະນາວ່າ ການອັດສະຈັນທີ່ຕາມມາ ມີຜົນກະທົບຕໍ່ຜູ້ຄົນເຫລົ່ານີ້ແນວໃດ:

ຄົນເປ້ຍຜູ້ໜຶ່ງ
ເປໂຕກັບໂຢຮັນ
ພະຍານທີ່ພຣະວິຫານ
ພວກມະຫາປະໂລຫິດກັບພວກຜູ້ປົກຄອງ
ໄພ່ພົນຄົນອື່ນໆ

Such as I Have I Give Thee [ສິ່ງທີ່ເຮົາມີນັ້ນ ເຮົາຈະໃຫ້ແກ່ເຈົ້າ], ໂດຍ ວາວເຕີ ເຣນ

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ກິດຈະການ 1:21–26.ການອ່ານ ກິດຈະການ 1:21–26 ສາມາດຊ່ວຍຄອບຄົວຂອງທ່ານໃຫ້ສົນທະນາພອນທີ່ມາຈາກການທີ່ມີອັກຄະສາວົກຢູ່ໃນໂລກທຸກວັນນີ້. ສະມາຊິກໃນຄອບຄົວສາມາດແບ່ງປັນວິທີທີ່ເຂົາເຈົ້າໄດ້ຮັບການເປັນພະຍານວ່າ ອັກຄະສາວົກໃນປະຈຸບັນ ແລະ ສາດສະດາ ໄດ້ຖືກເອີ້ນຈາກພຣະເຈົ້າແນວໃດ. ການມີພະຍານນີ້ມີຄວາມສຳຄັນແນວໃດ?

ກິດຈະການ 2:37.ວະລີທີ່ວ່າ “ເຈັບຊ້ຳກິນແໜງໃຈ” ໝາຍຄວາມວ່າແນວໃດ? ທ່ານເຄີຍຮູ້ສຶກຄ້າຍຄືກັນນີ້ຕອນໃດ? ເປັນຫຍັງມັນຈຶ່ງສຳຄັນທີ່ຈະກ່າວວ່າ “ພວກເຮົາຈະຕ້ອງເຮັດຢ່າງໃດ?” ເມື່ອເຮົາມີຄວາມຮູ້ສຶກເຊັ່ນນັ້ນ?

ກິດຈະການ 3:1–10.ຄອບຄົວຂອງທ່ານອາດມັກສະແດງຕາມເລື່ອງລາວໃນຂໍ້ເຫລົ່ານີ້. ຫລື ທ່ານສາມາດເບິ່ງວິດີໂອ “Peter and John Heal a Man Crippled Since Birth” (ChurchofJesusChrist.org). ຜູ້ຊາຍຢູ່ທີ່ພຣະວິຫານໄດ້ຮັບພອນແນວໃດ ທີ່ແຕກຕ່າງໄປຈາກສິ່ງທີ່ລາວຄາດຫວັງ? ເຮົາເຄີຍເຫັນພອນຂອງພຣະບິດາເທິງສະຫວັນມາສູ່ເຮົາໃນທາງທີ່ບໍ່ຄາດຄິດແນວໃດ?

ກິດຈະການ 3:12–26; 4:1–21; 5:12–42.ແມ່ນຫຍັງທີ່ປະທັບໃຈທ່ານກ່ຽວກັບຄວາມຊື່ສັດຂອງເປໂຕ ແລະ ໂຢຮັນ? (ເບິ່ງ ວິດີໂອ “Peter Preaches and Is Arrested” ທີ່ ChurchofJesusChrist.org ນຳອີກ). ເຮົາຈະກ້າຫານໃນປະຈັກພະຍານຂອງເຮົາເຖິງພຣະເຢຊູຄຣິດໄດ້ແນວໃດ? ໃຫ້ຄິດທີ່ຈະຊ່ວຍລູກຜູ້ນ້ອຍຝຶກການແບ່ງປັນປະຈັກພະຍານຂອງພວກເຂົາ.

ກິດຈະການ 4:31–5:4.ເຮົາຈະສາມາດຊ່ວຍເຫລືອຄອບຄົວ, ຫວອດ, ຫລື ຊຸມຊົນຂອງເຮົາ ໃຫ້ກາຍເປັນເໝືອນດັ່ງທີ່ບັນຍາຍຢູ່ໃນ ກິດຈະການ 4:31–37 ໄດ້ແນວໃດ? ການເປັນ “ນ້ຳໜຶ່ງໃຈດຽວກັນ” ໝາຍຄວາມວ່າແນວໃດ? ໃນທາງໃດແດ່ທີ່ບາງເທື່ອເຮົາໄດ້ “[ເກັບ] ສ່ວນໜຶ່ງ” ຂອງເງິນບໍລິຈາກຂອງເຮົາໄວ້? ເປັນຫຍັງການເຮັດແນວນີ້ຈຶ່ງເປັນການ “[ຕົວະ] ຕໍ່ພຣະເຈົ້າ”? (ກິດຈະການ 5:2, 4). ການບໍ່ສັດຊື່ມີຜົນກະທົບຕໍ່ເຮົາທາງວິນຍານແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງສວດແນະນຳ: “ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30.

ການປັບປຸງການສິດສອນຂອງເຮົາ

ເລືອກຫົວຂໍ້. ໃຫ້ສະມາຊິກໃນຄອບຄົວປ່ຽນກັນເລືອກເອົາຫົວຂໍ້ຈາກ ກິດຈະການ 1–5 ເພື່ອສຶກສານຳກັນ.