“ວັນທີ 10–16 ເດືອນກໍລະກົດ. ກິດຈະການ 6–9: ‘ພຣະອົງປະສົງໃຫ້ຂ້ານ້ອຍເຮັດຢ່າງໃດ?,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 10–16 ເດືອນກໍລະກົດ. ກິດຈະການ 6–9,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ໂປໂລລົ້ມລົງຢູ່ກັບພື້ນດິນ

Conversion on the Way to Damascus [ການປ່ຽນໃຈເຫລື້ອມໃສຢູ່ໃນເສັ້ນທາງໄປຫາເມືອງດາມັສກັດ], ໂດຍ ໄມໂກແອນຈະໂລ ເມຣິຊິ ດາ ກາຣາບາຈີໂອ

ວັນທີ 10–16 ເດືອນກໍລະກົດ

ກິດຈະການ 6–9

“ພຣະອົງປະສົງໃຫ້ຂ້ານ້ອຍເຮັດຢ່າງໃດ?”

ເລີ່ມຕົ້ນໂດຍການອ່ານ ກິດຈະການ 6–9. ຄຳແນະນຳຢູ່ໃນໂຄງຮ່າງນີ້ສາມາດຊ່ວຍທ່ານໃຫ້ຊອກເຫັນຫລັກທຳທີ່ສຳຄັນບາງຢ່າງຢູ່ໃນບົດເຫລົ່ານີ້ໄດ້, ເຖິງແມ່ນວ່າທ່ານອາດພົບເຫັນບົດອື່ນໆໃນການສຶກສາສ່ວນຕົວຂອງທ່ານກໍຕາມ.

ບັນທຶກຄວາມປະທັບໃຈຂອງທ່ານ

ຖ້າຫາກມີຄົນໃດທີ່ເບິ່ງຄືວ່າ ຈະບໍ່ມີວັນປ່ຽນໃຈເຫລື້ອມໃສ, ຄົນນັ້ນກໍຄົງຈະເປັນໂຊໂລ—ຄົນຟາຣີຊາຍທີ່ມີຊື່ສຽງເລື່ອງການຂົ່ມເຫັງຊາວຄຣິດ. ສະນັ້ນເມື່ອພຣະຜູ້ເປັນເຈົ້າໄດ້ບອກສານຸສິດຄົນໜຶ່ງຊື່ ອານາເນຍ ໃຫ້ໄປຊອກຫາໂຊໂລ ແລະ ສະເໜີມອບພອນໃຫ້ແກ່ເພິ່ນ, ຈຶ່ງເຂົ້າໃຈໄດ້ວ່າ ອານາເນຍຄົງລັງເລໃຈ. “ຂ້າແດ່ພຣະອົງເຈົ້າ,” ລາວເວົ້າ, “ຫລາຍຄົນໄດ້ບອກຂ້ານ້ອຍເລື່ອງຊາຍຄົນນີ້, ຕະຫລອດທັງຄວາມຮ້າຍກາດທີ່ລາວໄດ້ເຮັດຕໍ່ໄພ່ພົນບໍລິສຸດຂອງພຣະອົງ” (ກິດຈະການ 9:13). ແຕ່ພຣະຜູ້ເປັນເຈົ້າຮູ້ຈັກໃຈຂອງໂຊໂລ ແລະ ສັກກະຍະພາບຂອງເພິ່ນ, ແລະ ພຣະອົງມີພາລະກິດສຳລັບໂຊໂລ: “ເຮົາໄດ້ເລືອກເອົາຊາຍຄົນນີ້ໃຫ້ຮັບໃຊ້ເຮົາ, ເພື່ອລາວຈະນຳເອົານາມຊື່ຂອງເຮົາໄປຍັງຄົນຕ່າງຊາດ, ບັນດາກະສັດ, ແລະ ປະຊາຊົນອິດສະຣາເອນ” (ກິດຈະການ 9:15). ສະນັ້ນອານາເນຍຈຶ່ງເຊື່ອຟັງຕາມ, ແລະ ເມື່ອລາວໄດ້ພົບເຫັນຜູ້ຂົ່ມເຫັງຄົນນີ້, ລາວຈຶ່ງເອີ້ນເພິ່ນວ່າ “ອ້າຍໂຊໂລ” (ກິດຈະການ 9:17). ຖ້າຫາກໂຊໂລສາມາດປ່ຽນແປງຢ່າງບໍລິບູນ ແລະ ອານາເນຍກໍສາມາດຕ້ອນຮັບເພິ່ນຢ່າງເປີດໃຈ, ແລ້ວເຮົາຄວນພິຈາລະນາຄົນໃດບໍ ທີ່ເບິ່ງຄືວ່າຈະບໍ່ສາມາດປ່ຽນແປງ—ລວມທັງຕົວເຮົາເອງ?

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ກິດຈະການ 6–8

ໃຈຂອງເຮົາຕ້ອງ “ສັດຊື່ຕໍ່ໜ້າພຣະເຈົ້າ.”

ສາດສະໜາຈັກທີ່ກຳລັງເຕີບໂຕໝາຍເຖິງການມີຄວາມຕ້ອງການເພີ່ມຂຶ້ນສຳລັບສານຸສິດທີ່ຈະຮັບໃຊ້ໃນອານາຈັກ. ອີງຕາມ ກິດຈະການ 6:1–5, ຄຸນສົມບັດຢ່າງໃດແດ່ທີ່ອັກຄະສາວົກສິບສອງສະແຫວງຫາໃນຜູ້ທີ່ຈະຮັບໃຊ້ກັບພວກເພິ່ນ? ຂະນະທີ່ທ່ານອ່ານ ກິດຈະການ 6–8, ໃຫ້ສັງເກດເບິ່ງຄຸນສົມບັດເຫລົ່ານີ້, ແລະ ອື່ນໆ, ທີ່ສະແດງອອກໃນຜູ້ຄົນດັ່ງເຊັ່ນ ຊະເຕຟາໂນ ແລະ ຟີລິບ. ແມ່ນຫຍັງທີ່ບົກພ່ອງໃນຕົວຊີໂມນ, ແລະ ເຮົາສາມາດຮຽນຮູ້ຫຍັງແດ່ຈາກເພິ່ນກ່ຽວກັບຄວາມເຕັມໃຈທີ່ຈະປ່ຽນແປງ?

ມີສິ່ງໃດບໍທີ່ທ່ານຮູ້ສຶກໄດ້ຮັບການດົນໃຈໃຫ້ປ່ຽນແປງ ເພື່ອວ່າໃຈຂອງທ່ານຈະ “ສັດຊື່ຕໍ່ໜ້າພຣະເຈົ້າ”? (ກິດຈະການ 8:21–22). ການປ່ຽນແປງນີ້ຈະເປັນພອນໃຫ້ກັບທ່ານແນວໃດ ຂະນະທີ່ທ່ານຮັບໃຊ້ພຣະເຈົ້າ?

ກິດຈະການ 6–7

ການຂັດຂວາງພຣະວິນຍານບໍລິສຸດສາມາດນຳໄປສູ່ການປະຕິເສດພຣະຜູ້ຊ່ວຍໃຫ້ລອດ ແລະ ຜູ້ຮັບໃຊ້ຂອງພຣະອົງໄດ້.

ຜູ້ນຳຊາວຢິວມີຄວາມຮັບຜິດຊອບໃນການກຽມຜູ້ຄົນສຳລັບການສະເດັດມາຂອງພຣະເມຊີອາ. ແຕ່ພວກເຂົາບໍ່ໄດ້ຮູ້ຈັກພຣະເມຊີອາ ແລະ ປະຕິເສດພຣະອົງ. ສິ່ງນີ້ເກີດຂຶ້ນໄດ້ແນວໃດ? ຄຳຕອບສ່ວນໜຶ່ງອາດຢູ່ໃນຖ້ອຍຄຳຂອງຊະເຕຟາໂນທີ່ວ່າ: “ເຈົ້າທັງຫລາຍຂັດຂວາງພຣະວິນຍານບໍລິສຸດຢູ່ສະເໝີ” (ກິດຈະການ 7:51). ທ່ານຄິດວ່າ ການຂັດຂວາງພຣະວິນຍານບໍລິສຸດໝາຍຄວາມວ່າແນວໃດ? ເປັນຫຍັງການຂັດຂວາງພຣະວິນຍານບໍລິສຸດຈຶ່ງນຳໄປສູ່ການປະຕິເສດພຣະຜູ້ຊ່ວຍໃຫ້ລອດ ແລະ ຜູ້ຮັບໃຊ້ຂອງພຣະອົງ?

ຂະນະທີ່ທ່ານອ່ານ ກິດຈະການ 6–7, ໃຫ້ຊອກຫາຂ່າວສານອື່ນໆທີ່ຊະເຕຟາໂນໄດ້ສິດສອນຊາວຢິວ. ທັດສະນະຄະຕິຢ່າງໃດແດ່ທີ່ເພິ່ນເຕືອນໃຫ້ລະວັງ? ທ່ານເຫັນທັດສະນະຄະຕິໃດໆບໍທີ່ຄ້າຍຄືກັນນັ້ນໃນຕົວທ່ານເອງ? ຖ້ອຍຄຳຂອງຊະເຕຟາໂນສິດສອນທ່ານຫຍັງແດ່ກ່ຽວກັບຜົນສະທ້ອນຂອງການຂັດຂວາງພຣະວິນຍານບໍລິສຸດ? ທ່ານຈະສາມາດຮູ້ສຶກໄວ ແລະ ຕອບຮັບການກະຕຸ້ນຂອງພຣະວິນຍານບໍລິສຸດໃນຊີວິດຂອງທ່ານໄດ້ແນວໃດ?

ເບິ່ງ “The Martyrdom of Stephen” (ວິດີໂອ), ChurchofJesusChrist.org ນຳອີກ.

ກິດຈະການ 8:26–39

ພຣະວິນຍານບໍລິສຸດຈະຊ່ວຍເຮົາໃນການນຳພາຄົນອື່ນໄປຫາພຣະເຢຊູຄຣິດ.

ທ່ານຮຽນຮູ້ຫຍັງແດ່ກ່ຽວກັບການແບ່ງປັນພຣະກິດຕິຄຸນຈາກເລື່ອງລາວໃນ ກິດຈະການ 8:26–39? ພຣະວິນຍານບໍລິສຸດຊ່ວຍຟີລິບໃນວິທີໃດ? ການແບ່ງປັນພຣະກິດຕິຄຸນໃຫ້ກັບຄົນອື່ນເປັນຄືກັນກັບການເປັນຄົນນຳທາງແນວໃດ? (ເບິ່ງ ກິດຈະການ 8:31).

ແອວເດີ ຢູລິດຊິສ໌ ໂຊອາເຣສ໌ ໄດ້ກ່າວວ່າ ເລື່ອງນີ້ “ເຕືອນເຖິງຄຳສັ່ງຈາກສະຫວັນທີ່ເຮົາທຸກຄົນຕ້ອງສະແຫວງຫາການຮຽນຮູ້ ແລະ ທີ່ຈະສິດສອນພຣະກິດຕິຄຸນຂອງພຣະເຢຊູຄຣິດໃຫ້ກັນແລະກັນ. … ບາງເທື່ອເຮົາກໍຄືກັນກັບໄທເອທິໂອເປຍ—ເຮົາຕ້ອງການຄວາມຊ່ວຍເຫລືອຈາກຄູສອນທີ່ຊື່ສັດ ແລະ ໃຫ້ການດົນໃຈ; ແລະ ບາງເທື່ອເຮົາກໍຄືກັນກັບຟີລິບ—ເຮົາຕ້ອງສິດສອນ ແລະ ເພີ່ມຄວາມເຂັ້ມແຂງໃຫ້ແກ່ຄົນອື່ນ ໃນການປ່ຽນໃຈເຫລື້ອມໃສຂອງເຂົາເຈົ້າ” (“How Can I Understand?,” Liahona, May 2019, 6). ໃຫ້ຄິດທີ່ຈະອ່ານຂ່າວສານສ່ວນທີ່ເຫລືອຢູ່ຂອງແອວເດີ ໂຊອາເຣສ໌ ແລະ ໄຕ່ຕອງວິທີທີ່ພຣະວິນຍານບໍລິສຸດສາມາດຊ່ວຍທ່ານໃຫ້ເປັນນັກຮຽນ ແລະ ຄູສອນພຣະກິດຕິຄຸນທີ່ດີກວ່າເກົ່າແນວໃດ.

ກິດຈະການ 9

ເມື່ອເຮົາຍິນຍອມຕາມພຣະປະສົງຂອງພຣະຜູ້ເປັນເຈົ້າ, ເຮົາຈະສາມາດກາຍເປັນເຄື່ອງມືໃນພຣະຫັດຂອງພຣະອົງ.

ການປ່ຽນໃຈເຫລື້ອມໃສຂອງໂຊໂລແບບທັນທີທັນໃດ, ເພິ່ນປ່ຽນຈາກການຈັບຊາວຄຣິດເຂົ້າຄຸກ ເປັນການສັ່ງສອນກ່ຽວກັບພຣະຄຣິດຢູ່ໃນທຳມະສາລາ. ຂະນະທີ່ທ່ານອ່ານເລື່ອງລາວຂອງເພິ່ນ, ໃຫ້ໄຕ່ຕອງວ່າ ເປັນຫຍັງເພິ່ນຈຶ່ງເຕັມໃຈແທ້ໆທີ່ຈະປ່ຽນແປງ. (ຖ້າທ່ານຢາກອ່ານການຂຽນຂອງໂຊໂລເອງເຖິງການປ່ຽນໃຈເຫລື້ອມໃສຂອງເພິ່ນ, ໃຫ້ເບິ່ງ ກິດຈະການ 22:1–16 ແລະ 26:9–18. ໃຫ້ສັງເກດເບິ່ງວ່າໃນເລື່ອງລາວເຫລົ່ານີ້, ໂຊໂລໄດ້ເລືອກໃຫ້ເອີ້ນເພິ່ນວ່າ ໂປໂລ [ເບິ່ງ ກິດຈະການ 13:9].)

ຂະນະທີ່ເປັນຄວາມຈິງທີ່ວ່າ ປະສົບການຂອງໂຊໂລແມ່ນແຕກຕ່າງ—ສຳລັບຜູ້ຄົນສ່ວນຫລາຍ, ການປ່ຽນໃຈເຫລື້ອມໃສແມ່ນຕ້ອງໃຊ້ເວລາດົນກວ່າ—ມີສິ່ງໃດບໍທີ່ທ່ານສາມາດຮຽນຮູ້ຈາກໂຊໂລກ່ຽວກັບການປ່ຽນໃຈເຫລື້ອມໃສ? ທ່ານຮຽນຮູ້ຫຍັງແດ່ຈາກວິທີທີ່ອານາເນຍ ແລະ ສານຸສິດຄົນອື່ນໆສະແດງປະຕິກິລິຍາຕໍ່ການປ່ຽນໃຈເຫລື້ອມໃສຂອງໂຊໂລ? ທ່ານຈະເຮັດສິ່ງໃດເພື່ອນຳໃຊ້ບົດຮຽນເຫລົ່ານີ້ໃນຊີວິດຂອງທ່ານ? ທ່ານອາດເລີ່ມຕົ້ນໂດຍການທູນຖາມໃນຄຳອະທິຖານ, ດັ່ງທີ່ໂຊໂລໄດ້ເຮັດ, “ພຣະອົງປະສົງໃຫ້ຂ້ານ້ອຍເຮັດຢ່າງໃດ?”

ຂະນະທີ່ທ່ານອ່ານ ກິດຈະການ 9:36–42, ໃຫ້ພິຈາລະນາວິທີທີ່ນາງຕາບີທາໄດ້ເປັນເຄື່ອງມືໃນພຣະຫັດຂອງພຣະເຈົ້າແນວໃດ. ແມ່ນຫຍັງທີ່ດົນໃຈທ່ານກ່ຽວກັບຕົວຢ່າງຂອງນາງ?

ເບິ່ງ Dieter F. Uchtdorf, “Waiting on the Road to Damascus,” Liahona, May 2011, 70–77; “The Road to Damascus” (ວິດີໂອ), ChurchofJesusChrist.org ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ກິດຈະການ 6:8; 7:51–60.ໃຫ້ປຽບທຽບເລື່ອງລາວຂອງຊະເຕຟາໂນໃນ ກິດຈະການ 6:8 ແລະ ກິດຈະການ 7:51–60 ໃສ່ກັບເລື່ອງລາວຂອງພຣະຜູ້ຊ່ວຍໃຫ້ລອດໃນ ລູກາ 23:1–46. ຊະເຕຟາໂນໄດ້ເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດແນວໃດ?

ກິດຈະການ 7:51–60.ພຣະວິນຍານບໍລິສຸດໄດ້ໃຫ້ພອນແກ່ຊະເຕຟາໂນແນວໃດ ຕອນລາວຖືກຂົ່ມເຫັງ? ເຮົາໄດ້ຮັບຄວາມເຂັ້ມແຂງຈາກພຣະວິນຍານບໍລິສຸດ ໃນຊ່ວງເວລາທີ່ຫຍຸ້ງຍາກເມື່ອໃດ?

Tabitha Arise [ນາງຕາບີທາເປັນຄືນມາຈາກຕາຍ], ໂດຍ ແຊນດີ ຟະເຣັກໂກທັນ ກາກອນ

ກິດຈະການ 9:32–43.ໃຫ້ຄິດທີ່ຈະເຊື້ອເຊີນສະມາຊິກໃນຄອບຄົວໃຫ້ແຕ້ມຮູບກ່ຽວກັບເລື່ອງລາວໃນ ກິດຈະການ 9:32–43. ເຮົາຮຽນຮູ້ຫຍັງແດ່ກ່ຽວກັບການເປັນສານຸສິດ ຈາກເລື່ອງລາວເຫລົ່ານີ້? ຄົນທີ່ “ເຮັດແຕ່ຄຸນງາມຄວາມດີ,” ເຊັ່ນນາງຕາບີທາ, ຊ່ວຍຄົນອື່ນໃຫ້ເຊື່ອໃນພຣະຜູ້ເປັນເຈົ້າແນວໃດ? (ເບິ່ງ ກິດຈະການ 9:36; “ບົດທີ 60: ເປໂຕນຳນາງຕາບີທາກັບຄືນມາມີຊີວິດ” (ໃນ ເລື່ອງພຣະຄຳພີໃໝ່, 156–57, ຫລື ວິດີໂອທີ່ກ່ຽວຂ້ອງ ຢູ່ທີ່ ChurchofJesusChrist.org).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ເຮົາຈະໄປທີ່ພຣະອົງບັນຊາ,” ເພງສວດ ແລະ ເພງຂອງເດັກນ້ອຍ, 50.

ການປັບປຸງການສຶກສາສ່ວນຕົວ

ປຽບທຽບພຣະຄຳພີໃສ່ກັບຊີວິດຂອງທ່ານ. ຂະນະທີ່ທ່ານອ່ານ, ໃຫ້ພິຈາລະນາວິທີທີ່ເລື່ອງລາວ ແລະ ຄຳສອນໃນພຣະຄຳພີກ່ຽວຂ້ອງກັບຊີວິດຂອງທ່ານແນວໃດ. ຍົກຕົວຢ່າງ, ມີໂອກາດໃດແດ່ທີ່ທ່ານເຄີຍມີເພື່ອຮັບໃຊ້ຄົນອື່ນ, ດັ່ງທີ່ນາງຕາບີທາໄດ້ເຮັດໃນ ກິດຈະການ 9:36–39?