Pita ej kōnono ippān Cornelius

Juļae 17–23

Jerbal 10–15

“A Naan in Anij ej Eddekļo̧k im Orļo̧k”

Lukkuun riiti Jerbal 10–15 im lale, kōtļo̧k bwe Jetōb eo en im̧we eok kōn ļōmņak im en̄jake. Ta eo epād ie n̄an am̧ ekkatak ilo jebta kein?

Je En̄jake ko Rej Im̧we Eok

Ilo iien kwaļo̧k naan eo an ioon laļ in, Jisōs Kraist ekkā an idajon̄jon̄e e manit im iminene ko an armej me eto aer mour kaki. Menin ekar jab bōjrak ālkin An kar weaaklōn̄ļo̧k n̄an lan̄, ilo An kar wōnm̧anļo̧k wōt im tōl kabun̄ eo An kōn revelesōn. N̄an waanjon̄ak, ilo mour eo an Jisōs, rikaļoor ro An rekar kwaļo̧k wōt gospel eo n̄an riJu ro m̧ōttan. Ak ejjab to ālkin an Rilo̧mo̧o̧r kar mej im Pita ekar erom̧ juon ritōl an Kabun̄ eo ioon laļ in, Jisōs Kraist ekar kwaļo̧k n̄an Pita ke iien eo ekar jejjet n̄an kwaļo̧k gospel eo n̄an riJu ro. Ļōmņak eo n̄an kwaļo̧k gospel eo ippān Riaelōn̄ ko ejjab juon men ekāāl rainin, kōn menin ta katak eo ilo bwebwenato in n̄an kōj? Bōlen juon katak ej bwe ilo jim̧or Kabun̄ eo etto im raan kein, juon Rilo̧mo̧o̧r eļap an iakwe ej tōl ritōl ro An ekar kāālet er (lale Amos 3:7; Katak im Bujen Ko 1:38). Wōnm̧aanļo̧k wōt kōn revelesōn ej juon kōkaļļe ekāāl kōn m̧ool im Kabun̄ eo emour an Jisōs Kraist. Āinwōt Pita, jej aikuj m̧ōņōņō kōn n̄an bōk revelesōn eo ej wōnm̧aanļo̧k wōt im mour kake “kōn naan an Anij” (Luk 4:4), ekoba “aolep men ko em̧ōj [An] kwaļo̧ki, aolep men ko E ej kwaļo̧ki,” im “elōn̄ men ko reļļap im aorōk” E enaaj kwaļo̧ki “rej ekkejelļo̧k n̄an Aelōn̄ in Anij” (Laajrak in Tōmak Ko 1:9).

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

Jerbal 10

“Anij e jab ļōmņak kōn okōtan armej.”

Ilo epepen ko, riJu ro rekar tōmak bwe jān “ineen Ebream,” ak juon lukkuun bwijjin Ebream, meļeļein bwe juon armej kar bōk im kūr jān Anij (lale Luk 3:8). Rej ļōmņak jabdewōt armej eo Riaelōn̄ ko “ejjab erreo” Anij ejjab bun̄būruon kake. Ilo Jerbal 10, ta eo Irooj ej katakin Pita kōn wōn “ej kabun̄būruon”? (Jerbal 10:35). Ta kam̧ool eo kwoj loe ilo jebta kein kōn mour eo an Cornelius me Irooj ekar bun̄būruōn kake? Kejokļo̧kjeņ kōn ta meļeļe ennaan in “Anij e jab ļōmņak kōn okōtan armej” (eoon 34; bar lale 1 Nipai 17:35). Etke eaorōk n̄an eok bwe kwon jeļā m̧ool in?

Āinwōt ri Ju ro rekar kajejtokjen ro me rekar jān ineen Ebream, emōj ke am̧ baj en̄jake am̧ make ļōmņak in kajidede ko me rejjab em̧m̧an im ejjab m̧ool kōn bar juon eo me eoktak jān eok? Ewi wāween am̧ anjo̧ jān m̧wil in? Emaron̄ lukkuun kaitoktok limo n̄an kajjieon̄ juon m̧akūtkūt eļam waan n̄an jejjo raan tokālik: N̄e kwoj iiaio ippān bar juon, kajjieon̄ n̄an ļōmņak kōn eok make, “Armej in ej nejin Anij.” Ilo am̧ kōm̧m̧ane menin, ta oktak ko kwoj loi ilo wāween eo kwoj ļōmņak kake im iiaio ippān ro jet?

Bar lale 1 Samuel 16:7; 2 Nipai 26:13, 33; Russell M. Nelson, “Anij En Anjo̧,” Liaona, Nob. 2020, 92–95; “Pita’s Revelation to Take the Gospel to the Gentiles” (video), ChurchofJesusChrist.org.

Jerbal 10; 11:1–18; 15

Jemedwōj Ilan̄ ej katakin eō lain im bar lain kōn revelesōn.

Ke Pita ekar lo visōn eo ekar kōmeļeļeiki ilo Jerbal 10, ekar apan̄ kar jinoin ilo an meļeļe kake im “pere ta meļeļein visōn eo ear loe” (eoon 17). Aeet Irooj ekar leļo̧k n̄an Pita juon jeļāļo̧kjeņ eļap āinwōt an Pita kar kappukot. Ilo am̧ riiti Jerbal 10, 11, im 15, kile wāween jeļā eo an Pita kōn visōn eo an ekar m̧wūlaļļo̧k ilo elōn̄ iien ko. Ewi wāween am̧ kappukot im bōk jeļāļo̧kjeņ jān Anij n̄e ewōr am̧ kajjitōk?

Jerbal 10, 11, im 15 bar ba bwebwenato ko me Irooj ekar tōl ro rikarejeran kōn revelesōn. Emaron̄ jipan̄ n̄an rekoote ta eo kwoj ekkatak kōn revelesōn ilo am̧ riiti jebta kein. Ilo wāween ta Jetōb eo ej kōnono n̄an eok?

Bar lale Gospel Topics, “Revelation,” topics.ChurchofJesusChrist.org; Quentin L. Cook, “The Blessing of Continuing Revelation to Prophets and Personal Revelation to Guide Our Lives,” Liaona, Māe 2020, 96–100; “The Jerusalem Conference” (video), ChurchofJesusChrist.org.

Jerbal 11:26

Ij juon Rikūrijin kōnke ij tōmak ilo im ļoor Jisōs Kraist.

Ta eo eaorōk kōn juon armej eo ej kūr āinwōt juon Rikūrijin? (lale Jerbal 11:26). Ta meļeļein n̄an eok n̄an erom̧ āinwōt juon Rikūrijin? Ļōmņak kōn aorōkin āt ko. N̄an waanjon̄ak, ta meļeļein etan baam̧le eo am̧ n̄an eok? Etke etan Kabun̄ in eaorōk n̄an eok? (lale Katak im Bujen Ko 115:4). Ta meļeļein n̄an eok n̄an bōk ioom̧ etan Jisōs Kraist kōn bujen? (lale Katak im Bujen Ko 20:77).

Bar lale Mosaia 5:7–15; Alma 46:13–15; 3 Nipai 27:3–8; Russell M. Nelson, “Jim̧we in Etan Kabun̄ In,” Liaona, Nob. 2018, 87–90.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Nokon in Jota an Baam̧le

Jerbal 10:17, 20.Em̧ōj ke ad kar en̄jake ilo jetōb im kar pere ta eo jekar en̄jake ak ekkatak? Ta naan in rōjan̄ eo jemaron̄ leļo̧k n̄an ro jet n̄an jipan̄ kōj anjo̧ jān pere ko ad? (Lale Neil L. Andersen, “Ememļo̧kjeņ ko Ralikkar ilo Jetōb,” Liaona, Māe 2020, 18–22.)

Jerbal 10:34–35.Ewi wāween am̧ katakin baam̧le eo am̧ bwe “Anij ejjab kautiej rutiej ro”? (Jerbal 10:34). Bolen kwomaron̄ kwaļo̧k pija ko jān kajjo kadkad ko im manit ko ilo an baam̧le eo am̧ riiti eoon kein. Ewi wāween an m̧ool ko ilo eoon in aikuj jelet kōm̧m̧an ko ad? (lale, n̄an waanjon̄ake, “I’ll Walk with You” [Children’s Songbook, 140–41]).

Jerbal 12:1–17.Baam̧le eo am̧ emaron̄ kōm̧m̧an arin bwebwenato eo an Pita ke rekar joļo̧k ilo kalbuuj im ro uwaan Kabun̄ in rekar koba ippān doon im jar n̄an e. N̄āāt eo jekar en̄jake jeraam̧m̧an itok jān jar ko ad? Elōn̄ ke juon jej en̄jake im̧we n̄an jar kake, āinwōt juon ritōl an Kabun̄ ak juon eo ejitōnbōro? Ta meļeļein jar im “jab jokwōd jān jar”? (Jerbal 12:5; bar lale Alma 34:27).

Pita ekar rōļo̧k jān kalbuuj

Pita ej Rōļo̧k jān Kalbuuj, jān A. L. Noakes

Jerbal 14.Ilo am̧ riiti jebta in ippān doon, jet iaan ro uwaan baam̧le eo remaron̄ kar keememej kōjeraam̧m̧an ko me rekar itok n̄an rikaļoor ro an Kabun̄ in. Ro uwaan baam̧le ko jet remaron̄ keememej jum̧ae ko im mellijon̄ ko rikaļoor ro rekar jelm̧aeiki. Etke Anij ej kōtļo̧k bwe men ko reppen ren waļo̧k n̄an armej ro rem̧m̧an?

Jerbal 15:1–21.Eoon kein rej kōmeļeļeiki ilo Kabun̄ in eļan̄n̄e ri oktak tok ro rekar aikuj kōjparok kein Moses, ekoba m̧wijm̧wij. Ta eo Rijilōk ro rekar kōm̧m̧an n̄an kōm̧m̧ane kōn men in rejjab errā kake? Ta eo jemaron̄ ekkatak jān waanjon̄ak in kōn wāween an ritōl ro an Kabun̄ in tōl jerbal eo an Kabun̄ in?

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “I’ll Walk with You,” Children’s Songbook, 140–41.

Kōkōm̧anm̧anļo̧k Ad Katakin

Jin̄aik juon pija. Pija ko remaron̄ jipan̄ ro uwaan baam̧le eo pijaikiļo̧k katak ko ilo jeje ko rekwojarjar im bwebwenato ko. Kwomaron̄ karuwaineneik ro uwaan baam̧le eo n̄an jin̄n̄aiki pija ko kōn ta eo rej riiti, āinwōt visōn eo an Pita ilo Jerbal 10.

Pita im Jisōs

En̄jake ko an Pita im Cornelius ilo aer kwaļo̧k bwe “Anij e jab ļōmņak kōn okōtan armej” (Jerbal 10:34).