Jisōs ej kōnono n̄an Pita jān pārijet

Naajdik Aō Siip, jān Kamille Corry

Juun 26–Juļae 2

Matu 28; Mark 16; Luk 24; Jon 20–21

“E Ar Jerkakpeje”

Jar im riiti Matu 28; Mark 16; Luk 24; im Jon 20–21, ej pedped ioon lan̄lōn̄ eo me kwoj en̄jake kōn Jerkakpeje eo an Kraist. Wōn eo emaron̄ jeram̧m̧an jān an ron̄jake naan in kam̧ool eo kōn men eo ekar waļo̧k?

Je En̄jake ko Rej Im̧we Eok

N̄an elōn̄ rietale ro, mej eo an Jisōs jān Nazareth emaron̄ kar ilo lale juon jem̧ļo̧k eo jekar jab kōtmene n̄an juon mour ekabwilōn̄lōn̄. Em̧m̧aan eo in ke me kar kōjerkak Lazarus jān mej? Ekar ke jutak pen ņae jerbal in kamijak im m̧ōrō ko an riParisi ro jān iien n̄an iien? E ekar kōjerbal kajoor eo n̄an kōmour ribilo ro, rilepa ro, im akā ro. Kōto ko reļļap im limajņoņo in lojet ko rekar pokake E. Im aeet Ekar pād ijin, etoto ioon debwāāl, im ba, “Em̧ōj” (Jon 19:30). Ekar bar lōn̄ men ko rekabwilōn̄lōn̄ rem̧ool rekar waļo̧k ilo naan in kajirere ko “E ar lo̧mo̧o̧ren armej ro jet; E ban make lo̧mo̧o̧ren E” (Matu 27:42). Ak jejeļā bwe mej eo an Jisōs ekar jab jem̧ļo̧kin bwebwenato eo. Jejeļā bwe an ikūn lōb eo ekar an jidik wōt iien bwe jerbal in lo̧mo̧o̧r an Kraist ej kab tin kar ijjino. Em̧ōj loe rainin “ippān ro remej” ak ilubwilijin ro remour (Luk 24:5). Katak ko an rekar jab ittino, bwe rikaļoor ro rem̧ool renaaj kajedeed gospel eo ilo “aelōn̄ ko otemjej,” lōke kallim̧ur eo An bwe E enaaj “pād [ippāer] iien otemjej, n̄an jem̧ļo̧kōn laļ” (Matus 28:19–20).

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

Matu 28; Mark 16; Luk 24; Jon 20

Jisōs Kraist ekar bar jerkakpeje.

Ilo eoon kein, kwonaaj riit kōn juon iaan iien ko reļļap im aorōk ilo bwebwenato an armej: Jerkakpeje eo an Jisōs Kraist. Ilo am̧ riit, likūt eok make ilo jikin armej ro me rekar kam̧oole ta ko rekar waļo̧k ilo iien Jerkakpeje eo. Ta eo kwoj ekkatak jān en̄jake ko aer?

Ewi wāween am̧ en̄jake ilo am̧ riiti kōn Jerkakpeje eo an Rilo̧mo̧o̧r? Ļōmņak kōn wāween an kar jelete eok—ļōmņak eo am̧ kōn mour, jem̧jerā eo am̧, tōmak eo am̧ ilo Kraist, im am̧ tōmak ilo m̧ool ko jet an gospel in.

Bar lale Bible Dictionary, “Resurrection”; Gospel Topics, “Resurrection,” topics.ChurchofJesusChrist.org.

Luk 24:13–35

Imaron̄ karuwaineneik Rilo̧mo̧o̧r n̄an “pād wōt [ippa].”

Ilo am̧ riiti en̄jake ko kōn rikaļoor ro rekar ito itak ro me rekar ioon Rilo̧mo̧o̧r eo ekar jerkakpeje, kappukot men ko rej jon̄an wōt juon n̄an en̄jake eo am̧ āinwōt juon rikaļoor an Kraist. Ewi wāween am̧ etetal Ippān rainin im karuwaineneik E n̄an “pād” bar aitok ļo̧k jidik? (Luk 24:29). Ewi wāween am̧ kilen An pād ilo mour eo am̧? Ilo wāween ta eo Jetōb Kwojarjar ekar kam̧ool kōn kwojarjar eo an Jisōs Kraist n̄an eok?

Bar lale “Abide with Me; ’Tis Eventide,” “Abide with Me!,” Hymns, nos. 165–66.

Luk 24:36–43; Jon 20

Jerkakpeje ej wōnm̧aanļo̧k in bar kobatok eo an jetōb im ānbwin.

Bwebwenato in Jerkakpeje eo an Jisōs Kraist emaron̄ jipan̄ eok meļeļe ta meļeļein n̄an jerkakpeje. N̄an waanjon̄ak, ta m̧ool ko kwoj loe ilo Luk 24:36–43 im Jon 20 kōn ānbwin ko em̧ōj aer jerkakpeje? Kwomaron̄ bar lale eoon ko jet kōn jerkakpeje, āinwōt 1 Korint 15:35–44; Pilippai 3:20–21; 3 Nipai 11:13–15; Katak im Bujen Ko 88:27–31; 110:2–3; 130:1, 22.

Jon 20:19–29

“E m̧ōņōņō ro raar jab lo, im rej tōmak .”

Jet armej rej en̄jake āinwōt Thomas, eo ekar ba, “Eļan̄n̄e I jab lo … , I jāmin tōmak” (Jon 20:25). Ilo tōmak eo am̧ make, etke tōmak wōt ilo am̧ jab loe erom̧ juon kōjeraam̧m̧an? (lale Jon 20:29). Kejokļo̧kjeņ kōn wāween am̧ jeram̧m̧an kōn am̧ tōmak ilo men ko kwojjab maron̄ loe. Ta eo ejipan̄ eok n̄an wōr am̧ tōmak ilo Rilo̧mo̧o̧r men̄e kwojjab maron̄ lo E? Ewi wāween am̧ wōnm̧anļo̧k wōt im kōkajoorļo̧k tōmak eo am̧ ilo “men ko jab loi, ko rem̧ool”? (lale Alma 32:16–21; Ether 12:6). Ļōmņak in rekoote ilo juon jōōņal en̄jake ko me rekar jipan̄ eok tōmak ilo Jisōs Kraist, ak jeeri ippān juon eo kwojeļā kajjien.

Jon 21:1–17

Rilo̧mo̧o̧r eo ej karuwaineneik eō n̄an naajdik sip ko An.

Emaron̄ lukkuun kaitoktok limo n̄an keidi iiaio ko an Rilo̧mo̧o̧r ippān Rikaļoor ro An ilo Jon 21 n̄an jinoin iien eo Ekar kakien er n̄an joļo̧k o̧o̧k in en̄ōd eo aer, kar rekoote ilo Luk 5:1–11. Ta men ko rej jon̄an wōt juon im men ko roktak kwoj loe? Ta meļeļe ko kōn mour in rikaļoor eo kwoj lo ilo naan ko An?

Ļōmņak kōn wāween an naan ko an Rilo̧mo̧o̧r n̄an Pita ilo Jon 21:15–17 emaron̄ iookwaj eok. Elōn̄ ke jabdewōt men ej dāpiji eok jān am̧ jerbal in karejar n̄an sip ko an Irooj? Ta uwaak eo am̧ eļan̄n̄e Irooj ekar kajitōk ippām̧, “Kwōj yokwe Eō?” Kejokļo̧kjeņ ewi wāween am̧ maron̄ kwaļo̧k iakwe eo am̧ n̄an Irooj.

Bar lale 1 Pita 5:2–4, 8; Jeffrey R. Holland, “Kien eo Eļap im M̧oktata,” Liaona, Nob. 2012, 83–85.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Nokon in Jota an Baam̧le

Luk 24:5–6.Būreejtōn Thomas S. Monson ekar ba kōn Luk 24:5–6, “Ejjeļo̧k naan ilo aolepen doulul an rikūrijtin eļapļo̧k meļeļein n̄an eō” (“He Is Risen!,” Liaona, Māe 2010, 89). Ta meļeļein naan kein n̄an eok im baam̧le eo am̧?

Matu 28; Mark 16; Luk 24; Jon 20–21.Ilo an baam̧le eo am̧ riiti jebta kein, kile bwe armej ro rekar iiaio ippān Jisōs ilo kajjojo bwebwenato. N̄an waanjon̄ak, ta eo ej im̧we eok kōn armej ro me rekar loļo̧k lōb eo an Rilo̧mo̧o̧r? Ta eo kwoj ekkatak jān naan ko ak m̧akūtkūt ko an Rijilōk ro ak jān rikaļoor ro ilo iaļ eo aer n̄an Emmaus?

Ļōmņak in al ippān doon “Did Jesus Really Live Again?” (Children’s Songbook,64). Kōnono kōn juon ilo baam̧le eo am̧ me ekar mej, im kōnono kōn wāween an m̧ool ko ilo al eo bōktok aeņōm̧m̧an.

Jisōs ej etetal ippān em̧m̧aan ro ruo ilo juon iaļ

Iaļ eo ļo̧k n̄an Emmaus,jān Wendy Keller

Matu 28:16–20; Mark 16:14–20; Luk 24:44–53.Ilo eoon kein, ta eo Irooj ekar kajjitōk ippān Paul n̄an kōm̧m̧ane? Ewi wāween ad jipan̄ kadedeikļo̧k jerbal in? Ro uwaan baam̧le eo remaron̄ kwaļo̧k en̄jake ko ke raar en̄jake “Irooj ej jerbal ippāer” n̄an kadedeikļo̧k kōttōpar ko An (Mark 16:20).

Jon 21:15–17.Ļōmņak in riiti eoon kein ilo aer m̧ōn̄ā ippān doon. Menin emaron̄ kakobaiktok jet meļeļe n̄an naan ko an Rilo̧mo̧o̧r “naajdik sip ko aō.” Pedped wōt ioon ta eo Jisōs ekar katakin kōn sip ko ilo Kallim̧ur Ekāāl (lale, n̄an waanjon̄ak, Matu 9:35–36; 10:5–6; 25:31–46; Luk 15:4–7; Jon 10:1–16), etke naajdik sip ko ej juon wāween n̄an kōmeļeļeik jerbal im jipan̄ ajri ro nejin Anij? Ta eo waanjon̄ak in ej katakin kōn wāween an Jemedwōj Ilan̄ im Jisōs en̄jake kōn kōj?

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Did Jesus Really Live Again?,” Children’s Songbook, 64.

Kōkm̧anm̧anļo̧k Am̧ Make Ekkatak

Kōjerbal al ko n̄an karuwaineneik Jetōb im ekkatak katak ko. Ron̄jake ak al al in jar ko āinwōt “He Is Risen!” (Hymns, no. 199) emaron̄ karuwaineneik Jetōb im jipan̄ eok ekkatak kōn Jerkakpeje eo an Rilo̧mo̧o̧r.

Kōrā eo ej loe Kraist eo em̧ōj an jerkakpeje jān lōb eo

Kraist eo Em̧ōj an Jerkakpeje, jān Walter Rane