Naajdik Sip Ko Aō,, jān Kamille Corry

Juun 26–Juļae 2

Matu 28; Mark 16; Luk 24; Jon 20–21

“Em̧ōj an Jerkak”

Ajri ro kōn juon naan in kam̧ool kōn m̧ool ko ilo jeba kein rōbōk juon pedped eo epen eo ej kalōk tōmak eo aer. Elmen am̧ naj karuwaineneiktok Jetōb n̄an kam̧ool kōn m̧ool kein?

Kajjitōk bwe ren Kwaļo̧k

Lale pija eo emaron̄ jipan̄ ajri ro keememej men ko raar ekkatak ilo m̧weo ak ilo jikin ko jet. Bōlen komaron̄ kwaļo̧k pija eo ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko im kajjitōk ippān ajri ro n̄an kwaļo̧k ta eo rejeļā kōn bwebwenato in ilo pija eo.

Katakin Katak eo: Ajri ro Reddikļo̧k

Matu 28; Mark 16; Luk 24; Jon 20:1–23

Inaaj bar mour ālkin aō mej, āinwōt kar Jisōs.

Pinmuur eo an Jisōs Kraist, ekoba Jerkakpeje eo An, ej men ko raorōktata ilo bwebwenato, im ej pedped in tōmak eo an RiKūrijin. Ilo am̧ ekkatak kōn Jerkakpeje, ļōmņak kōn wāween am̧ maron̄ jipan̄ ajri ro kalōk tōmak eo aer ilo Jisōs Kraist.

M̧akūtkūt ko Maron̄ Kōm̧m̧ani

• Kwaļo̧k bwebwenato in Jerkakpeje eo an Jisōs ilo naan ko am make. (N̄e ekkar, kōjerbal “Jebta 54: Jisōs Ekar Jerkakpeje,” ilo Bwebwenato ko ilo Kalim̧m̧ur Ekāāl, 139–44, ak bitio in jipan̄ eo ilo ChurchofJesusChrist.org.) Kōmeļeļeiki bwe ke Jisōs ekar mej, jetōb eo An ekar etal jān Ānbwinnin. Ke Ekar jerkakpeje, jetōb eo An im Āinbwinnin rekar baar koba ippān doon. Kajjitōk ippān ajri ro n̄an bōk koņaer kwaļo̧k bwebwenato eo n̄an kwe. Kajjitōk ippān ajri ro elmen aer kar en̄jake n̄e ren kar lo an bar Jisōs mour.

• Kwaļo̧k pija eo “What Happens after We Die?” (ChurchofJesusChrist.org), im kwaļo̧k men ko kwojeļā kōn juon eo ekar mej. Kwaļo̧k naan in kam̧ool eo am̧ bwe aolep renaaj jerkakpeje juon raan. Kajjitōk ajri ro n̄an kwaļo̧k naan in kam̧ool ko aer

• Al juon al ippān doon kōn Jerkakpeje eo an Rilo̧mo̧o̧r, āinwōt “Did Jesus Really Live Again?” (Children’s Songbook,, 64). Kajjitōk ippān ajri ro n̄an antoone ta en̄jake eo n̄e jān kar lo Jisōs. Innām remaron̄ kwaļo̧k ļōmņak ko aer ippān kūlaaj eo.

Jon 20:24–29

Imaron̄ bōk tōmak ilo Jisōs Kraist men̄e ijab lo E.

Ļōmņak elmen am̧ maron̄ jipan̄ ajri ro meļeļe ta in tōmak im elmen aer maron̄ kōjerbal tōmak ilo Rilo̧mo̧o̧r.

M̧akūtkūt ko Maron̄ Kōm̧m̧ani

• Kwaļo̧k pija Christ Approaches Thomas (ChurchofJesusChrist.org) ilo am̧ kwaļo̧k en̄jake eo an Thomas ilo Jon 20:24–29. Āliji bwebwenato in, ak ilo tōre in kajjitōk ippān ajri ro n̄an lewaj jet meļeļe ko.

• Kwaļo̧k juon bo̧o̧k ilowaan kōn menin ekkatak ko me ajri ro ren jab loe, im kōmeļeļeiki menin ekkatak eo n̄an ajri ro. Kajjitōk ippāer n̄e rej tōmak menin ekkatak eo ilowaan bo̧o̧k eo im etke. Innām kwaļo̧k n̄an er menin ekkatak eo, im kōmeļeļeiki bwe tōmak ej tōmak men ko jejjab loi. Aorōk eo ilo tōmak emaron̄ wōr ad tōmak ilo Jisōs Kraist.

Lo Pā ko Peiū,, jān Jeff Ward.

Jon 21:15–17

Imaron̄ kwaļo̧k aō iakwe n̄an Jisōs n̄an jerbal n̄an ro jet.

Elmen am̧ maron̄ im̧we ajri ro n̄an iakwe im jipan̄ ro ipeļakier?

M̧akūtkūt ko Maron̄ Kōm̧m̧ani

• Riit Jon 21:15–17, ak kwaļo̧k bitio eo “Feed My Sheep” (ChurchofJesusChrist.org). Jipan̄ ajri ro meļeļe ta eo Jisōs ekar kōņaan bwe Piter en kōm̧m̧ane: n̄an kwaļo̧k gospel eo im karuwainenei aolep n̄an tōmak ilo Jisōs. Leļo̧k n̄an kajjojo ajri jidik peba sip, innām kajjitōk ippāer n̄an je ak jin̄a jet men remaron̄ kōm̧m̧ane n̄an jipan̄ ro jet rejeļā kajjier n̄an itok epake Jisōs.

• Jipan̄ ajri ro ļōmņaki men ko rej kōm̧m̧ani n̄an iakwe im jerbal n̄an ro jet. Ta ko jet jemaron̄ kōm̧m̧ane n̄an kwaļo̧k ad iakwe?

• Je etan aolep ajri ro ilo kūlaaj eo am̧ ioon jidik peba im m̧wijit jin̄a in sip eo, im kajeplekleke sip ko ilo ruum eo. (Ekoba etan ajri ro ejakutkut aer kobatok.) Kajjitōk ippān ajri ro n̄an aiin doon sip ko ilo pukoti kōn etaer ie. Jipan̄ ajri ro ļōmņake wāween ko remaron̄ tōpar eo m̧ōttaer ejako an itok n̄an jar.

Katakin Katak eo: Ajri ro Rerūttoļo̧k

Matu 28; Mark 16; Luk 24; Jon 20:1–23

Kōnke Jisōs Kraist ekar jerkakpeje, Inaaj barāinwōt jerkakpeje.

Ej menin aorōk n̄e ajri ro rej ļōmņak ta eo ej waļo̧k ālkin ad mej. Ļōmņake elmen am̧ maron̄ kwaļo̧k kōn Jerkakpeje ilo juon wāween me naaj kalōk tōmak eo an ajri ro.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄ān kiil mejeer im antoone n̄e ren kar jijet iturin leb eo an Jisōs ilo am̧ riiti Jon 20:1–17 ak kōmeļeļeiki bwebwenatoin Jerkakpeje eo An (bar lale “Jebta 54: Jisōs Ekar Jerkakpeje,” ilo Bwebwenato ko ilo Kalim̧m̧ur Ekāāl, 139–44, ak bitio in jipan̄ eo ilo ChurchofJesusChrist.org). Ta meļeļe in jerkakpeje? Ta en̄jake eo n̄e jān kar lo jerkakpeje Rilo̧mo̧o̧r?

• Kajjitōk ippān kajjojo ajri n̄an ekkatak kōn en̄jake eo n̄e juon en kar lo jerkakpeje Rilo̧mo̧o̧r im kwaļo̧k n̄an aolepen kūlaaj eo ta eo eaar ekkatak.

• Alooje juon ak elōn̄ļo̧k bitio ippān ajri ro: “Jesus Is Laid in a Tomb,” “Jesus Is Resurrected,” “Christ Appears on the Road to Emmaus,” im “The Risen Lord Appears to the Apostles” (ChurchofJesusChrist.org). Kajjitōk ippān ajri ro n̄an kwaļo̧k etke Jerkakpeje eo an Rilo̧mo̧o̧r eaorōk n̄an er.

Jon 20:24–29

Imaron̄ bōk tōmak ilo Jisōs Kraist men̄e ijab maron̄ lo E.

Elmen am̧ naaj jipan̄ ajri ro kōkajoorļo̧k tōmak eo aer ilo Jisōs Kraist?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Jon 20:24–29. (Bar lale bitio eo ““Blessed Are They That Have Not Seen, im Yet Have Believed” ilo ChurchofJesusChrist.org.) Elmen ad maron̄ jeļā ke Jisōs Kraist emour, men̄e jejjab lo E?

• Je aolep naan ilo eoon in “E m̧ōņōņō ro raar jab lo, im rej tōmak” ioon jet peba. Kajjitōk ippān ajri ro n̄an karōki naan ko. Kajjitōk ippāer n̄an kwaļo̧k en̄jake ko raar en̄jake iakwe eo an Rilo̧mo̧o̧r men̄e rejjan̄in lo E.

• Kajjitōk ippān ajri ro n̄an jin̄aiki pija in men ko remaron̄ kōm̧m̧ani n̄an kōkajoorļo̧k tōmak eo aer ilo wiik in. Kajjitōk ippāer n̄an kwaļo̧k ta eo rekar jin̄aiki, im kwaļo̧k ta eo kwaar kōm̧m̧ane n̄an kōkajoorļo̧k tōmak eo am̧ ilo Jisōs Kraist.

Jon 21:1–17

Imaron̄ kwaļo̧k aō iakwe n̄an Jisōs ilo aō naajdik An sip.

Ajri ro remaron̄ lukkuun im̧we ro ipeļakier. Elmen am̧ maron̄ rōjan̄ er n̄an kōkajoorļo̧k ro jet ilo gospel in?

M̧akūtkūt ko Maron̄ Kōm̧m̧ani

• Riit Jon 21:1–17 ippān doon. Ilo ami riiti eoon 9–13, kajjitōk ippān ajri ro n̄an ļōmņake juon iien n̄e juo eo ekar kōm̧m̧ane juon m̧ōn̄ā eļap n̄an er, im kajjitōk ippāer n̄an ļōmņake wāween ko me Jisōs ekar naajdik kōj ilo jetōb. Ilo ami riiti eoon 15–17, bōk jikin etan Saimōn n̄an etan ajri ro. Wōn ro an Jisōs sip? Ewi wāween ad jipan̄ E naajdik er?

• Jeere jidik m̧ōņā in kōkajoor ippen ajri ro. Ilo aer m̧ōn̄ā, kajjitōk ippāer elmen aer kwaļo̧k gospel in n̄an juon eo āinwōt n̄e rej naajdik er.

Kōketak Ekkatak ilo M̧weo

Kajjitōk ippān ajri ro n̄an kōjerbal peij in m̧akūtkūt eo an wiik in n̄an katakin baam̧le ko aer kōn Jerkekpeje eo an Rilo̧mo̧o̧r.

Kōkm̧anm̧anļo̧k Ad Katakin

Lale kūr ko eļan̄n̄e kar ļoori. N̄e kwoj kajjitōk ippān juon ajri n̄an kōm̧m̧ane ta eo raar ekkatak, bar ro̧o̧lļo̧k im lale kajjitōk eo ilo kūlaaj eo tok juon. Menin ej kwaļo̧k n̄an ajri ro bwe kwoj kea elmen an gospel in kōjeraam̧m̧an mour ko aer. Ilo aer kwaļo̧k en̄jake ko aer, renaaj kajoor im naaj jipan̄ doon mour kōn gospel.