An Paul kwaļo̧k ioon toļ eo

Juļae 24–30

Jerbal 16–21

“Irooj Ear Kūrļo̧k Kōm bwe Kōmin Kwaļo̧k Gospel eo”

Ālkin riiti Jerbal 16–21, ļoor im̧we ko an Jetōb im kōļmenļo̧kjeņ kōn ļōmņak ko ilo laajrak in ilo am̧ kōppopo n̄an katakin. Lale “Tōpar Aikuj ko an Ajri ro Reddikļo̧k” ilo bok in katakin in n̄an jipan̄ ko reļapļo̧k.

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k ta eo rejeļā kōn en̄jake ko an Paul n̄an kwaļo̧k gospel in. Remaron̄ bar kōnono kōn mijinede ro jet rejeļā kajjier ak ļōmņak kōn en̄jake ko aer make n̄an kwaļo̧k gospel in n̄an ro jet.

pija ej bōk jikin katakin

Katakin Katak eo: Ajri ro Reddikļo̧k

Jerbal 16:25–34

Mijinede ro rej katakin armej ro kōn Jisōs.

Ajri ro kwoj katakin rejeļā ke ta eo mijinede ro rej kōm̧m̧ane? Ewi wāween komaron̄ im̧we ajri ro n̄an ļoor waanjon̄ak ko aer im kwaļo̧k gospel eo n̄an ro jet?

M̧akūtkūt ko Maron̄ Kōm̧m̧ani

• Jipan̄ ajri ro ikkure kōn Jerbal 16:25–34 ilo am̧ kōmeļeļeiki bwebwenatoin Paul im Silas aerro kwaļo̧k gospel eo ilo kalbuuj (bar lale “Jebta 61: Paul im Silas in Prison,” ilo Bwebwenato ko ilo Kalim̧m̧ur Ekāāl, 158–60, ak bitio in jipan̄ eo ilo ChurchofJesusChrist.org). Kōmeļeļeiki bwe mijenede ro rainin rej bar katakin armej ro kōn Jisōs im jipan̄ er pojak n̄an peptaij.

• Kōm̧m̧ane juon mijenede tāāk n̄an ajri ro bwe ren kōņake, im jipan̄ er je etaer ioon tāāk ko. Katakin ajri ro enaan ko ilo katak eo me remaron̄ kwaļo̧k n̄an ro jet, āinwōt “N̄a nejin Anij,” “Anij ej kōnono n̄an rikanaan eo emour,” ak “Jisōs ej ad Rilo̧mo̧o̧r.” Kakeememej ajri ro bwe jejjab aikuj kōņak mijenede tāāko n̄an kwaļo̧k gospel in n̄an ro jet.

Jerbal 17:10–12

Jeje ko Rekwojarjar rej kam̧ool kōn Jemedwōj Ilan̄ im Jisōs Kraist.

Men̄e jet iaan ajri ro kwoj katakin remaron̄ jab maron̄ jeļā riit, komaron̄ jipan̄ er kōļapļo̧k iakwe n̄an jeje ko rekwojarjar im lale elmen aer kam̧ool kōn Rilo̧mo̧o̧r.

M̧akūtkūt ko Maron̄ Kōm̧m̧ani

• Jipan̄ juon iaan ajri ro n̄an riiti naan in “Rej … jeje ko raan otemjeļo̧k” (Jerbal 17:11). Kajjitōk ippān ajri ro n̄an kalikkar kajjojo raan ilo juon wiik ilo kōļanta ilo aer āliji naan in ippām. Al juon al ippān doon me ej kwaļo̧k kōn kōjeraam̧m̧an kōn riiti jeje ko rekwojarjar, āinwōt “Search, Ponder, im Pray” (Children’s Songbook, 109).

• N̄an katakin ajri ro bwe jeje ko rekwojarjar rej kam̧ool kōn Jemedwōj Ilan̄ im Jisōs Kraist, jipan̄ er bōk kuņaer ilo juon jebta ilo eoon ko, āinwōt Jerbal 17 ak 18, im pukōt naan ko āinwōt Anij, Irooj, ak Jisōs. (Kwomaron̄ kōņaan kōkaļļeiki naan ko m̧oktaļo̧k bwe ajri ro en pidodo aer loi.) Kajjojo iien ajri ro rej loe juon iaan naan kein, kajjitōk ippāer n̄an kwaļo̧k men ko rejeļā kōn Jemedwōj Ilan̄ im Jisōs Kraist.

Jerbal 17: 22–31

N̄a nejin Anij.

Ilo ioon toļ eo, Paul ekar kwaļo̧k m̧ool ko kōn piktokin Anij, ekoba m̧ool ko bwe ajri ro Nejin im bwe E “ejjab ettoļo̧k jān kōj otemjej” (Jerbal 17:27). Elmen am̧ maron̄ jipan̄ ajri ro en̄jake epakeļo̧k n̄an Jemedwōj Ilan̄?

M̧akūtkūt ko Maron̄ Kōm̧m̧ani

• Kajjitōk bwe ajri ro ren ālijin naan in “Kōj ro nejin Anij” (Jerbal 17:29), im kōmeļeļeiki bwe nejin meļeļein ajri. Kwaļo̧k am̧ naan in kam̧ool n̄an ajri ro, juon ilo̧k juon, bwe ej nejin Anij. Karuwaineneik er bwe ren kwaļo̧k aer en̄jake kōn Jemedwōj Ilan̄.

• Kwaļo̧k pijain ajri ro ippān baam̧le ko aer (n̄e ekkar, kobaiki pija ajri ro ilo kūlaaj eo am̧). Kajjitōk ippān ajri ro n̄an kwaļo̧k ro jineer im jemeer ilo pija eo. Kōmeļeļeiki bwe jej ajri ro nejin jined im jemed, im jej aolep bar ajri in jetōb ro nejin jined im jemed ilo jetōb.

• Al ippāer juon al kōn Jemedwōj Ilan̄, āinwōt “I Know My Father Lives” (Children’s Songbook,, 5). Kōn jipan̄ jān ajri ro, je naan ko ak jin̄aiki pija ko ioon bo̧o̧t eo me ej bōk jikin men ko jej jeļā kōn Jemedwōj Ilan̄ jān al in.

• Riit n̄an ajri ro naan ko jān Jerbal 17:27: “E jab ettoļo̧k jān kōj otemjej.” Kōnono kōn tōre eo ke kwaar en̄jake am̧ epakeļo̧k Jemedwōj Ilan̄, im kajjitōk ippān ajri ro n̄an kōm̧m̧an āinwōt.

an em̧m̧aan eo jibwe leddik jidikdik eo

Kajjojo armej ej nejin Anij.

pija ej bōk jikin katakin

Katakin Katak eo: Ajri ro Rerūttoļo̧k

Jerbal 16:14–15, 25–34; 18:7–8, 24–28

Imaron̄ juon mijinede kiiō.

Elmen am̧ maron̄ jipan̄ ajri ro bwe ren āinwōt Paul n̄an kwaļo̧k n̄an ro jet ta eo rej ekkatak kōn gospel in?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Jerbal 16:14–15, 25–34; 18:7–8, 24–28 im kōm̧m̧ane juon laajrak in armej ro Paul im Apollos rekar kwaļo̧k gospel eo ippāer. Innām kajjitōk ippāer n̄an kōm̧m̧ane juon laajrak in armej ro rekar maron̄ gospel eo ippāer. Kōtļo̧k an ajri ro ikkure elmen aer maron̄ ba n̄an armej ro kōn Jisōs Kraist ak kajjitōk ippāer bwe ren itok im jar. Kwomaron̄ bar kajjitōk ippān ajri ro n̄an je kakeememej ko n̄an kwaļo̧k naan in kam̧ool eo kōn m̧ool eo an gospel in n̄an armej rein.

• Kajjitōk ippān mijinede ro rej jerbal aolep raan, mijinede ro rej kab ro̧o̧ltok, ak ward mijenede ro n̄an lowaj kūlaaj eo im kwaļo̧k en̄jake ko aer kōn kwaļo̧k gospel eo. Rōjan̄ ajri ro n̄an kajjitōk kajjitōk ko elmen aer maron̄ kwaļo̧k gospel eo n̄an ro jet.

Jerbal 17:2–4, 10–12; 18:28

Jeje ko rekwojarjar rej kam̧ool kōn Jisōs Kraist.

Aolep rikanaan ro rej kam̧ool kōn Jisōs Kraist. Elmen am̧ maron̄ katakin ajri ro lo E ilo jeje ko rekwojarjar, men̄e ejjab waļo̧k Etan?

M̧akūtkūt ko Maron̄ Kōm̧m̧ani

• Jipan̄ ajri ro riiti Jerbal 17:2–4, 10–12; 18:28, im kajjitōk ippāer n̄an lale ta eo eoon ko rej jim̧or kwaļo̧ke. Ekkar n̄an eoon kein, ta eo ekar waļo̧k n̄an armej ro rej tōmak gospel eo an Jisōs Kraist? Kajjitōk ippān ajri ro n̄an kwaļo̧k bwebwenato eo em̧m̧an ippāer kōn Jisōs me rekar ekkatak jān jeje ko rekwojarjar.

• Ilo pepba eo juon, je eoon in jipan̄ ko me rej kwaļo̧k kōn Rilo̧mo̧o̧r (komaron̄ lo jet iaer ilo Unin Tōl n̄an Jeje ko Rekwojarjar, “Jesus Christ,” scriptures.ChurchofJesusChrist.org). Ņooj jet peba ipeļaakin ruum̧ eo im kajjitōk ippān ajri ro n̄an kappukoti. Jipan̄ ajri ro pukōt eoon in katak ko rej loi, innām kajjitōk ippāer n̄an kwaļo̧k n̄an doon ta eo eoon kein jim̧or rej kwaļo̧ke kōn Jisōs Kraist.

Jerbal 17: 22–31

N̄a nejin Anij.

Elmen am̧ maron̄ jipan̄ ajri ro keememej bwe rej ajri ro nejin Anij?

M̧akūtkūt ko Maron̄ Kōm̧m̧ani

• Kwaļo̧k n̄an ajri ro juon dōkā, im kōmeļeļeiki bwe ilo tōre ko an Paul, arme jro rōkar kabun̄jar n̄an ekjab ko raar kōm̧m̧ani jān dōkā im men ko jet. Kajjitōk ippān ajri ro n̄an riiti Jerbal 17:27–29. Ta eo jej ekkatak kōn Anij jān eoon kein? Kōmeļeļeiki bwe nejin meļeļein ajri. Kajjitōk ippān ajri ro elmen kōm̧m̧an bwe ren en̄jake n̄an jeļā bwe rej ajri ro nejin Anij.

• Kajjitōk ippān ajri ro n̄an riiti Jerbal 17:27. Kajjitōk ippān ajri ro n̄an je ak jin̄aiki pija ko wāween eo remaron̄ “en̄jake ālkin” ak epaakļo̧k Anij. N̄āāt eo rekar en̄jake bwe E ej “ejab ettoļo̧k jān [er]”?

pija ej bōk jikin ekkatak

Kōketak Ekkatak ilo M̧weo

Rōjan̄ ajri ro n̄an pukōt juon eoon ilo wiik me ej kwaļo̧k kōn Jisōs Kraist (emaron̄ kar waļo̧k ilo tōre ko aer make ak katak jeje ko rekwojarjar an baam̧le). Wiik in laļ, karuwaineneik er n̄an kwaļo̧k ta eo rekar loi.

Kōkōm̧anm̧anļo̧k Ad Katakin

Jipan̄ ajri ro n̄an katak em̧m̧anļo̧k. Jibadbad eo am̧ n̄an katakin ajri ro ejjab baj leļo̧k wōt m̧ool eo n̄an er. Kwoj aikuj jipan̄ er kōļapļo̧k un̄are peid make ro rem̧ool rej pukōt m̧ool eo. N̄an waanjon̄ak, ijeļo̧kin kwaļo̧k n̄an ajri ro bwebwenato in an Paul kwaļo̧k ilo toļ eo, komaron̄ peek juon m̧akūtkūt, āinwōt kein ilo laajrak in, me ejipan̄ ajri ro lo m̧ool ko ilo bwebwenato in kōn er make.

peij in m̧akūtkūt: N̄a nejin Anij