Oktak ilo Iaļ eo n̄an Damascus, jān Michelangelo Merisi da Caravaggio

Juļae 10–16

Jerbal 6–9

“Ta Eo Kwoj Kōņaan Bwe In Kōm̧m̧ane?”

Ijjino ilo am̧ riiti Jerbal 6–9. Laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko emaron̄ jipan̄ eo katak jebta kein. Makūtkūt ko n̄an ajri ro reddikļo̧k ilo laajrak in emaron̄ in oktak jān ajri ro rōrūttoļo̧k im ko jet.

Kajjitōk bwe ren Kwaļo̧k

Je ioon bo̧o̧t eo etan armej ro ilo Jerbal 6–9, āinwōt Saul, Stephen, im Tabita. Kajjitōk ippān ajri ro n̄an kwaļo̧k ta eo rejeļā kōn armej rein.

Katakin Katak eo: Ajri ro Reddikļo̧k

Jerbal 6–7

Imaron̄ ļoor Jisōs Kraist n̄an jutak kōn jim̧we.

Ta eo ajri ro remaron̄ ekkatak kōn Stephen āinwōt juon rikaļooraņ Jisōs Kraist.

M̧akūtkūt ko Maron̄ Kōm̧m̧ani

• Jipan̄ ajri ro kōm̧m̧ani ikkure ko ilo al eo n̄an kāālet jim̧we eo, āinwōt“Stand for the Right” (Children’s Songbook, 159). Kōjerbal Acts 7:51–60 n̄an katakin ajri ro ke Stephen ekar kwaļo̧k kōn Jisōs Kraist, men̄e ekar kōm̧m̧an bwe rikien ro an riJew ro ren illu (bar lale “Jebta 57: Wicked Men Kill Stephen,” ilo Bwebwenato ko ilo Kalim̧m̧ur Ekāāl, 150–51, ak pija in alooj in jipan̄ eo ilo ChurchofJesusChrist.org). Elmen an kar Stephen jutak kōn jim̧we eo?

• Leļo̧k n̄an ajri ro jet bwebwenatoin ajri ro me rekar kōm̧m̧an kāālet ikōtaan jim̧we im bōd. Kajjitōk ippān ajri ro ta ren kar kōm̧m̧ane n̄an jutak kōn jim̧we eo.

Jerbal 8:26–39

Jetōb Kwojarjar ej im̧we eō n̄an kwaļo̧k gospel eo n̄an ro jet.

Philip ekar ļoor im̧we ko an Jetōb n̄an jipan̄ juon em̧m̧aan in Ethiopian eo ekar pen an meļeļe jeje ko rekwojarjar. Ta katak ko katak in ej kwaļo̧ke n̄an ajri ro kwoj katakin?

Philip ej Kwaļo̧k n̄an Armej in Ethopia eo, jān Robert T. Barrett

M̧akūtkūt ko Maron̄ Kōm̧m̧ani

• Bōktok ruo jea ippān doon n̄an kōm̧m̧ane juon chariot. Kajjitōk ippān ruo ajri n̄an jijet ilo chariot eo, juon en pinej jenkwan Philip im ro jet em̧m̧aan in Ethopia eo. Innām kwaļo̧k bwebwenato elmen an Philip kar kwaļo̧k gospel eo n̄an em̧m̧aan eo jān Ethiopia.

• Kwaļo̧k juon en̄jake me kwaar en̄jake Jetōb Kwojarjar n̄an jiron̄ eok n̄an kwaļo̧k gospel eo n̄an ro jet. Kam̧ool bwe Jetōb Kwojarjar emaron̄ jipan̄ kōj jiron̄ ro jet kōn Jisōs.

Jerbal 9:1–20

Jemedwōj Ilan̄ ej karuwaineneik eō bwe in ukweļo̧k im oktak.

Ke Jisōs ekar jiron̄ Saul bwe en bōjrak jān kakkure Kabun̄ eo an Irooj, Saul ekar m̧ōkaj in ukweļo̧k im oktak. Elmen an bwebwenato in jipan̄ ajri ro kwoj katkain ikdeleel n̄an m̧ōkaj in oktak n̄e rej kōm̧m̧ane juon bōd?

M̧akūtkūt ko Maron̄ Kōm̧m̧ani

• Kōmeļeļeiki bwebwenatoin oktak eo an Saoul, loe ilo Jerbal 9:1–20 (bar lale “Jebta 59: Saul Learns about Jesus,” ilo Bwebwenato ko ilo Kalim̧m̧ur Ekāāl, 154–55, ak bitio in jipan̄ eo ilo ChurchofJesusChrist.org).

• Kōnono n̄an ajri ro kōn men ko remaron̄ oktak, āinwōt juon tadpole, me ej ukōt m̧oran n̄an frog, ak kūtan̄tan̄, me ej oktak n̄an juon babbub. Kwaļo̧k pija ko, n̄e rekkar. Ellmen an kar Saul oktak ke Jisōs Kraist ekar loļo̧k e?

• Jin̄aik iaļ ruo bōran ioon boot eo. Kajjitōk ippān ajri ro n̄an kwaļo̧k etan jikin ko rekōņaan loļo̧k, im je ilōn̄ in juon iaan iaļ ko. Ta eo enaaj waļo̧k n̄e jej oktaļo̧k n̄an iaļ eo ebōd? Keidi ukweļo̧k n̄an ro̧o̧ltok ilo iaļ eo ejim̧we.

• Kajjitōk ippān ajri ro n̄an āliji ta eo Saul ekar ba n̄an Irooj: “Ta eo kwoj kōņaan bwe in kōm̧m̧ane?” (Jerbal 9:6). Ta eo Irooj ekōņaan bwe jān kōm̧m̧ane?

Katakin Katak eo: Ajri ro Rerūttoļo̧k

Jerbal 6–7

Komaron̄ erom̧ juon rikam̧ool an Jisōs Kraist.

Elmen am̧ maron̄ jipan̄ ajri ro kwoj katakin ekkatak jān waanjon̄ak eo an Stephen n̄an jutak āinwōt juon rikam̧ool an Jisōs Kraist?

M̧akūtkūt ko Maron̄ Kōm̧m̧ani

• Riit Jerbal 6:5–15 im 7:51–60 ippān ajri ro. Ta eo ekar kōm̧m̧an bwe Stephen en juon rikam̧ool eo ekajoor an jesus Christ? Kajjitōk ippān juon ajri ak elōn̄ļo̧k n̄an katen wōt n̄e e Stephen im kwaļo̧k etke rej tōmak ilo Jesus Christ.

• Kajjitōk ippān ajri ro n̄an riiti Jerbal 6:3–10, pukōt m̧wiļ ko an Stephen me ekar jipan̄ e eddōkļo̧k.

• Kajjitōk ippān ajri ro n̄an jipan̄ eok ļōmņaki jekjek ko me remaron̄ jutak āinwōt rikam̧ool ro an Jisōs Kraist im gospel in An. Jipan̄ er ikkure kōn jet iaan jekjek kein. Kajjitōk ippān ajri ro n̄an riiti Jerbal 18:9. Kwaļo̧k bwe erom̧ juon rikam̧ool an Jisōs Kraist ekoba ilo kallim̧ur ko jej kōm̧m̧ani ilo iien peptaij.

Jerbal 8:9–24

Priesthood ej juon menin letok aorōk jān Anij.

Setan ej letok ennaan ko reriab kōn men ko rej letok n̄an kōj m̧ōņōņō. Elmen am̧ maron̄ kōjerbal bwebwenato in Simon n̄an jipan̄ ajri ro kaorōk men ko an jetōb āinwōt priesthood eo im kōjeram̧m̧an ko ie?

M̧akūtkūt ko Maron̄ Kōm̧m̧ani

• Kōmeļeļeiki bwebwenato Simon, epād ilo Jerbal 8:9–24 (bar alle “Chapter 58: Simon im the Priesthood,” ilo Bwebwenato ko ilo Kalim̧m̧ur Ekāāl, 152–53, ak bitio in jipan̄ eo ilo ChurchofJesusChrist.org). Etke jejjab bōk maron̄ wiaiki priesthood eo? Elmen an juon lukkuun bōk mālim eo an pristhood? (lale Laajrak in Tōmak ko 1:5).

• Kwaļo̧k pija in kwojkwoj eo, juon tampeļ (pinej jenkwan kōjeraam̧m̧an ko an tampeļ), peptaij, im kōjeraam̧m̧an ko jet jej būki jān priesthood eo. Kōmeļeļeiki bwe menin letok kein jān Anij reban wiaiki kōn jāān. Etke eļapļo̧k aer aorōk jān jabdewōt men eo jemaron̄ wiaiki? Ekōjkan ad bōk kōjeraam̧m̧an kein?

Jerbal 9:1–20

Jemedwōj Ilan̄ ej kajjitōk ippa bwe in ukweļo̧k im oktak.

Ke Jisōs ekar jiron̄ Saul bwe en bōjrak jān kakkure Kabun̄ eo an Irooj, Saul ekar m̧ōkaj in ukweļo̧k im oktak. Elmen an bwebwenato in jipan̄ ajri ro kwoj katakin bōk ikdeleel n̄an m̧ōkaj in oktak n̄e rej kōm̧m̧ane juon bōd?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an limi m̧ōttan peba eo n̄an jimettan. Kajjitōk ippāer n̄an je M̧okta ilo jimettan im Ālkin ilo bar jimettan. Riit ippān ajri ro Jerbal 8:1–3; 9:1–2; im 9:17–22, im kajjitōk ippāer n̄an jet naan ko ak eoon ilo me Saul ekar kōmeļeļeiki ālkin an lo Irooj.

• Kajjitōk ippān juon membōr in ward eo n̄an kwaļo̧k bwebwenatoin an kar oktak im elmen an kar jino membōr in Kabun̄ in kar ukōt mour eo an, āinwōt an kar oktak mour eo an Saul.

• Jin̄aiki “iaļ eo n̄an Damascus” ioon bo̧o̧t eo. Kajjitōk ippān ajri ro n̄an riiti Jerbal 9:6, 11, 18, 20–22, kappukot ta eo Saul ekar kōm̧m̧ane n̄an ukweļo̧k im oktakļo̧k n̄an Kraist, im je men ko ioon bo̧o̧t eo. Ta eo jej ekkatak jān Saul elmen ad maron̄ eļapļo̧k āinwōt Kraist?

• Kajjitōk ippān ajri ro n̄an jin̄aiki m̧ōttan eo em̧m̧an ippāer kōn bwebwenatoin oktak eo an Saul im kwaļo̧k jin̄a eo aer n̄an kūlaaj eo.

Kōketak Ekkatak ilo M̧weo

Rōjan̄ ajri ro n̄an kwaļo̧k n̄an baam̧le eo aer kōn m̧akūtkūt eo em̧m̧an ippāer jān kūlaaj eo rainin im ta eo kar katakin er.

Kōkōm̧anm̧anļo̧k Ad Katakin

Jipan̄ ajri ro katak jān jeje ko rekwojarjar. Ajri ro reddik remaron̄ jab lukkuun riit, ak kwomaro kobaik er ilo ekkatak eo jān jeje ko rekwojarjar. N̄an waanjon̄ak, komaron̄ riiti eoon ko im kajjitōk ippān ajri ro n̄an jutak ak kotak peier n̄e rej ron̄ naan ak eoon eo im kwoj kōņaan mije.