Bwebwenato eo ilo Iaļ eo n̄an Damascus, jān Michelangelo Merisi da Caravaggio

Juļae 10–16

Jerbal 6–9

“Ta Eo Kwoj Kōņaan Bwe In Kōm̧m̧ane?”

Ijjinoe ilo am̧ riiti Jerbal 6–9. Elmakot ko ilo unin tōl in emaron̄ jipan̄ eok loe jet iaan pedped in katak ko ilo jepta kein, aaet komaron̄ loe ko jet ilo am̧ make ekkatak.

Je En̄jake ko Rej Im̧we Eok

Eļan̄n̄e jabdewōt eo kar kalimjōke ke eban juon eo ekkar n̄an oktak, ekar bōlen Paul—juon Riparisi eo ekar bun̄bun̄ kōn an m̧anm̧an Rikūrijin. Kōn menin ke Irooj ekar ba n̄an juon rikaļoor etan Anenaiōs n̄an kappukot Saul im leļo̧k n̄an e juon kōjeram̧m̧an, Anenaiōs kar meļeļe ke ekar āļiklik. “Irooj,” ekar ba, “Iar ron̄ jān elōn̄ kōn armej in, ie ḷap nana ear kōṃṃane n̄an ro Am̧” (Jerbal 9:13). Ak Irooj ekar jeļā kōn būruōn Saul im jon̄an aurōkin, im E ekar wōr juon an mijen ilo kōlmenļo̧kijeņ n̄an Saul: “E juon Aō jāpe eo Ij kāālōt e, bwe en bōkḷọk Eta iṃaan mejān ri aelōn̄ ko, im kiiñ ro, im ro nejin Israel” (Jerbal 9:15). Em̧ool Anenaiōs ekar pokake, im ke ekar loe in ekar juon rikalbuuj, ekar kūri “Jatū Saul” (Jerbal 9:17). N̄e Saul emaron̄ kar m̧oolin oktak im Anenaiō emaron̄ kar karuwaineneiki ilo ejjeļo̧k apan̄, innem jej ke ļōmņak ke juon ejjab ekkar n̄an oktak—ekoba kōj make?

Ļōmņak ko n̄an Ekkatak Jeje Ko Rekwojarjar Ippam̧ Make

Jerbal 6–8

Būruo ej aikujin “jim̧we im̧aan mejān Anij.”

Juon kabun̄ eo ej eddōkļo̧k ej meļeļein eļapļo̧k aikuji bwe en wōr rikaļoor ro n̄an jerbal ilo aelōn̄ in kiin̄ eo. Ekkar n̄an Jerbal 6:1–5, ta m̧wil ko Rijilōk ro Jon̄oulruo rekar kappukoti ilo ippān ro renkar jerbal ippāer? Ilo am̧ riiti Jerbal 6–8, kile ekōjkan an m̧wil kein, im ro jet, kar waļo̧k ilo armej ro āinwōt Stephen im Pilip. Ta eo ekar ejjeļo̧k ilo Simon, im ta eo jemaron̄ ekkatak jān e kōn ikdeelel eo n̄an oktak?

Ewōr ke jabdewōt men koj im̧we n̄an oktak n̄an kōm̧m̧an bwe būruom̧ ej “jim̧we im̧aan mejen Anij”? (Jerbal 8:21–22). Ekōjkan kōm̧m̧ane oktak in maron̄ kōjeraam̧m̧an eok ilo am̧ jerbal n̄an Anij?

Jerbal 6–7

Jum̧ae Jetōb Kwojarjar emaron̄ tōl eok n̄an karmejete Rilo̧mo̧o̧r im rijerbal ro An.

Ritōl ro an riJew kar aer eddo n̄an kōpooje armej ro n̄an itok eo an Messaia eo. Im aaet rekar likjab n̄an kile Messaia eo im kar kaarmejete E. Ekōjkan an kar menin waļo̧k? Mōttan uwaak eo maron̄ in loe ilo naan ko an Stephen: “Koṃij juṃae Jetōb Kwōjarjar” (Jerbal 7:51). Ta eo kwoj ļōmņak ej meļeļein jum̧ae Jetōb Kwojarjar? Etke jum̧ae Jetōb Kwojarjar emaron̄ tōl eok n̄an kaarmejete Rilo̧mo̧o̧r im rijerbal ro An?

Ilo am̧ riiti Jerbal 6–7, kappukot ennaan ko jet me Stephen ekar katakin riJew ro. Ta m̧wil ko ekar kakkōl kaki? Kwoj ke loe jabdewōt iaan m̧wil kein ilo kwe make? Ta eo naan ko an Stephen ej katakin eok kōn kaje ko rej itok jān jum̧ae Jetōb Kwojarjar? Ekōjkan am̧ maron̄ ļapļo̧k am̧ en̄jake im m̧ōkaj ilo uwaak n̄an im̧we ko an Jetōb Kwojarjar ilo mour eo am̧?

Bar lale “The Martyrdom of Stephen” (pija in alooj), ChurchofJesusChrist.org.

Jerbal 8:26–39

Jetōb Kwojarjar enaaj jipan̄ eō tōl ro jet n̄an Jisōs Kraist.

Ta eo kwoj ekkatak kōn kwaļo̧k kōn gospel in jān bwebwenato eo ilo Jerbal 8:26–39? Ekōjkan an kar Jetōb Kwojarjar jipan̄ Pilip? Ekōjan kwaļo̧k kōn gospel eo n̄an ro jet āinwōt juon kein tōl? (lale Jerbal 8:31).

Elder Ulisses Soares ekar ba kōn bwebwenato in “ej juon kakeememej kōn eddo eo ad ekwojarjar eped ipped n̄an kappukot n̄an ekkatak im n̄an katakin doon gospel in an Jisōs Kraist. … Kōj jet iien jej āinwōt Riethiopia eo—jej aikuj jipan̄ an juon rikaki eo etiljek im eim̧we—jej aikuj n̄an katakin im kōkajoorļo̧k ro jet ilo oktaktok eo aer” (“Ekōjkan Aō Maron̄ Meļeļe?,” Liaona, Māe 2019, 6). Ļōmņak in riiti aolepen katak eo an Elder Soares im kejoklo̧kijeņ kōn wāween an Jetōb Kwojarjar maron̄ jipan̄ eok erom̧ juon rikatak eo em̧m̧anļo̧k im rikaki in gospel in.

Jerbal 9

N̄e ij leļo̧k aō n̄an ankilaan Irooj, imaron̄ oktak im juon kein jerbal ilo pā ko Pein.

Oktaktok eo an Saul ekar jidimkij; ekar m̧ōkaj an oktak jān an kalibuuji Rikūrijin ro n̄an kwaļo̧k kōn Kraist ilo jikin jar ko. Ilo am̧ riiti bwebwenato in an, kejokļo̧kijeņ etke ekar ļap an ikdeelel n̄an oktak. (N̄an riiti kōmeļeļe ko an Saul make kōn oktaktok eo an, lale Jerbal 22:1–16 im 26:9–18. Jeļā bwe ilo bwebwenato kein, Saul kar ņae etan Paul [lale Jerbal 13:9].)

Ilo an menin m̧ool ke en̄jake eo an Paul ekar jeja—n̄an eļōn̄ armej, oktaktok ej juon jerbal itok kitien—ewōr ke jabdewōt men komaron̄ ekkatak jān oktaktok eo an Saul? Ta eo kwoj ekkatak jān wāween an Anenaiō im rikaļoor ro jet en̄jake kōn oktaktok eo an Saul? Ta eo komaron̄ kōm̧m̧ane n̄an mour kōn katak kein ilo mour eo am̧? Komaron̄ jinoe ilo am̧ kajjitōk ilo jar, āinwōt an kar Saul kōm̧m̧ane, “Ta eo kwoj kōņaan bwe In kōm̧m̧ane?”

Ilo am̧ riiti Jerbal 9:36–42, ļōmņak kōn wāween an Tabita kar juon kein jerbal ilo pein Anij. Ta eaar im̧we eok kōn waanjon̄o̧k in an?

Bar lale Dieter F. Uchtdorf, “Waiting on the Road to Damascus,” Liaona, Māe 2011, 70–77; “The Road to Damascus” (video), ChurchofJesusChrist.org.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jerbal 6:8; 7:51–60.Keidi bwebwenato ko kōn Stipen ilo Jerbal 6:8 im Jerbal 7:51–60 n̄an bwebwenato ko kōn Rilo̧mo̧o̧r ilo Luk 23:1–46. Ekōjkan ad kar Stipen ļoor waanjon̄ak eo an Rilo̧mo̧o̧r eo?

Jerbal 7:51–60.Ekōjkan an kar Jetōb Kwojarjar kōjeraam̧m̧an Stipen ke rekar ko̧kkure? N̄āāt eo kwar bōk kajoor jān Jetōb Kwojarjar ilo iien ko reppen?

Jerbal 9:5.Juon dōkā ekar juon m̧ade ekkan̄ kar kōjerbal n̄an kakko menin mour ko. Ekkā an menin mour ko bar ijjuurliktak n̄e rej dibōj er, eo emaron̄ kōm̧m̧an m̧ade eo en rūm̧ļo̧k ļak wōt n̄an lowaan kūlin menin mour ko. Ekōjkan an waanjon̄o̧k in jet iien jerbal n̄an kōj? Ta eo jemaron̄ kōm̧m̧ane n̄an kōkm̧anm̧anļo̧k ad bōk kajjim̧we jān Irooj?

Tabitha Jerkak, jān Sandy Freckleton Gagon

Jerbal 9:32–43.Ļōmņak in kajjitōk ippān ro uwaan baam̧le eo am̧ n̄an jin̄n̄aik pija ko in bwebwenato ko ilo Jerbal 9:32–43. Ta eo jej ekkatak kōn mour in rikaļoor jān bwebwenato kein? Ekōjkan an juon armej maron̄ “obrak kōn jerbal ko reṃṃan,” āinwōt an kar Tabita, jipan̄ ro jet tōmak ilo Irooj? (lale Jerbal 9:36; “Jebta 60: Pita Brings Tabitha Back to Life” (ilo New Testament Stories, 156–57, ak pija in alooj eo ilo ChurchofJesusChrist.org).

N̄an ļōmņak ko rellōn̄ļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Emaron̄ Jab Ion Tol Eutiej,” Al ko Al in Ajri, nō. 36.

Kōkōm̧anm̧anļo̧k Am̧ Ekkatak Ippam̧ Make

Keidi jeje ko rekwojarjar n̄an mour eo am̧ Ilo am̧ riit, ļōmņak kōn ekōjkan an bwebwenato ko im katak ko ilo jeje ko rekwojarjar jerbal ilo mour eo am̧. N̄an waanjon̄o̧k, iien ta ko rem̧man ewōr ippom̧ n̄an jerbal in jipan̄ ro jet, āinwōt an kar Tabita kar kōm̧m̧ane ilo Jerbal 9:36–39?

“Im rej kade Stipen, im ej jar, kūr n̄an Irooj, ba, Irooj Jisōs, kwōn bōk aō.” (Ukok eo an Josep Smith, Jerbal 7:59 [ilo Jerbal 7:59, footnote c]).