Juļae 24–30

Jerbal 16–21

“‘Irooj Ear Kūrḷọk Kōj Bwe Kōmin Kwaḷọk Gospel”

Ilo am̧ riit kōn kijejeto ko an Paul n̄an kwaļo̧k kōn gospel in, Jetōb emaron̄ im̧we eok kōn ļōmņak ko ak en̄jake ko. Je im̧we kein, im kōm̧m̧an karōk n̄an kōm̧m̧ani.

Je En̄jake ko Rej Im̧we Eok

Ilubwilijin naan ko āliktata an Irooj n̄an Rijilōk ro An kar kien eo “Koṃwin ilọk, im kōṃṃan ri aelōñ ko otemjej bwe ren rikaḷora, im peptaij er ilo etan Jema im Nejin im Jetōb Kwōjarjar; katakin er bwe ren pokake naan ko otemjej I ar jiroñ kom” (Matu 28:19–20). Ilo an rijilōk ro kar jab tōprakļo̧k aolep aelōn̄ ko, Jerbal 16–21 ej kwaļo̧k bwe Paul im kam̧pānien ro an rekar kōm̧m̧na juon tōprak eļap ilo kalōk Kabun̄ in. Rekar katakin, kar kōpeptaij, im leļo̧k menin letok eo an Jetōb Kwojarjar. Rekar kōm̧m̧an kabwilōn̄lōn̄ ko, em̧ool kajutak juon em̧m̧aan jān mej, im kwaļo̧k kōn Bun̄ Jān Tōmak eo Eļap (Jerbal 20:7–12, 28–31). Im jerbal eo rekar ijjinoe ej wōnm̧aanļo̧k ippān Rijilōk ro rej mour rainin, ekobaļo̧k ippen rikaļoor ro āinwōt kwe rej kate er, ro rej jipan̄ kakūrm̧ool kakien eo an Rilo̧mo̧o̧r Paul ejjāmin kar pijaikļo̧k. Bōlen kwoj juon ekkōl kōn armej ro rejjab jeļā kōn Jemedwōj Ilan̄ ak gospel eo An. Bōlen kwar en̄jake bwe “epok būruōn [kwe]” n̄an kwaļo̧k ippāer ta eo kwojeļā kōn E (Jerbal 17:16). Eļan̄n̄e kwoj ļoor waanjon̄o̧k eo an Paul in tiljek im peran ilo kwaļo̧k gospel eo, komaron̄ loe juon armej “Irooj [ekar] kapeḷḷọk būruon” (Jerbal 16:14).

Ļōmņak ko n̄an Ekkatak Jeje Ko Rekwojarjar Ippam̧ Make

Jerbal 16–21

Jetōb enaaj tōl eō ilo kijejeto ko ao n̄an kwalo̧k gospel in.

Rikanaan Josep Smith ekar kwalo̧k, “Ejjeļo̧k juon armej emaron̄ kwaļok Gospel in ilo an jako Jetōb Kwojarjar” (Teachings of Presidents of the Church: Joseph Smith [2007], 332). Ilo am̧ riiti Jerbal 16–21, ļōmņak etke meļeļe in an Rikanaan eo ej m̧ool. Lale waanjon̄o̧k ko ilo an Jetōb tōl Paul im kam̧pānien ro an. Ta kōjeraam̧m̧an ko rej itok ilo ad ļoor Jetōb? N̄eet eo kwar en̄jake an Jetōb im̧weik eok ilo kijejeto ko am̧ n̄an kwaļo̧k kōn gospel in?

Jerbal 16–21

Imaron̄ kwaļo̧k gospel in ilo aolep jekjek ko in mour in.

Joļo̧k n̄an kalbuuj kōn kwalo̧k kōn gospel in emaron̄ juon un jemeļeļe kake n̄an kabōjrak kwalo̧k naan. Ak n̄an Paul im Silas, ekar juon iien em̧m̧an n̄an ukot juon rilale jikin kalbuuj (lale Jerbal 16:16–34). Ilo aolepān Jerbal 16–21, kappukot waanjon̄o̧k ko jet an Paul ikdeelel n̄an kwaļo̧k kam̧ool eo an n̄an aolep armej. Etke kwoj ļōmņak ekar likun peran im jab mijak? Ta eo kwoj ekkatak jān waanjon̄ak eo an Paul?

Elōn̄ļo̧k wōt enaan ko kōn kwaļo̧k kōn gospel in ilo Jerbal 16–21. Ilo am̧ ekkatak jebta kein, kappukot jet eļaptata ko rej ekkar n̄an eok.

See also Dieter F. Uchtdorf, “Jerbal in Mijenede: Kwaļo̧k Ta eo Kwoj Lukkuun Tōmak im En̄jake,” Liaona, Māe 2019, 15–18.

Kajjojo iaad ej nejin Anij.

Jerbal 17:16–34

“Kōj wōj jej ineen Israel.”

Ilo Antens, Paul ekar lo armej ro oketaktak jeļā ko aer im aer kabun̄. Rekar aolep iien kappukot n̄an “roñjake jabdewōt men eo ekāāl,” im ta eo Paul ekar leļo̧k ekar em̧ool kāāl n̄an er (lale Jerbal 17:19–21). Rekar kabun̄ n̄an elōn̄ anij ko, ekoba juon eo rek ņae etan “Anij eo je jaje kake” (Jerbal 17:23), ak rekar tōmak bwe anij ko rej kajoor im mejatoto ko, ejjab mour, āinwōt armej, im ealikkar ejjab Jemed. Kejokļo̧kijeņ kōn ta eo Paul ekar ba n̄an jipan̄ er itok n̄an jeļā kajjeen Anij. Ta meļeļein n̄an eok ke kwe “nejin Anij”? (Jerbal 17:29). Ilo ļōmņak eo am̧, ekōjkan am̧ juon eo nejin Anij oktak jān am̧ wōt juon iaan menin kōm̧anm̧an ko An? Ekōjkan meļeļe m̧ool in maron̄ im̧we eok n̄an kappukot n̄an eok make im ro jet?

Eļan̄n̄e kon kar jutak turin Paul ilo an kwaļo̧k kam̧ool, ta eo kon kar ba n̄an armej in Greek ro etto kōn Jemedwōj Ilan̄? Kojeļā ke juon armej eo me emaron̄ jeram̧m̧an jān ronjake naan in kam̧ool eo am̧?

Bar lale Rom 8:16; 1 Jon 5:2; “We Are the Offspring of God” (bitio), ChurchofJesusChrist.org.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jerbal 16–21.N̄an kam̧wilaļļo̧k meļeļe eo an baam̧le eo am̧ kōn Jerbal 16–21, komaron̄ ekkatak map eo ilo jem̧lo̧kin unin tōl in, kappukot jikin ko ijo Paul ekar kwaļo̧k gospel in ilo jepta kein. Ta menin jipan̄ ko ewōr ipped n̄an jipan̄ bōk gospel in n̄an aolep laļ?

N̄an im̧we baam̧le eo am̧ n̄an kwaļo̧k kōn gospel in, komaron̄ kwaļo̧k juon ak eļōn̄ļo̧k pija in alooj ko ilo “Sharing the Gospel” ilo Gospel Library.

Jerbal 17:10–12; 18:24–28.Ekōjkan ad maron̄ erom̧ eļapļo̧k āinwōt Rikwojarjar ro ilo eoon kein? Ta meļeļein nej kar n̄an “[bōk] naan im ṃōṇōṇō”? (Jerbal 17:11). Ta eo jemaron̄ kōm̧m̧ane n̄an “kajoor ilo naan in Jeje ko” (Jerbal 18:24).

Jerbal 19:1–7.Eoon kein remaron̄ jipan̄ baam̧le eo am̧ ekōnono kōn aorōkin peptaij im kapen. N̄an meļeļe em̧m̧anļo̧k m̧ool ko ilo Jerbal 19:1–7, komaron̄ ekōnono kōn jejjo men ko eban wōr tokjāer n̄e ejjab bar juon men, ko āinwōt juon cell phone n̄e ejjeļo̧k bāttōre. Ak komaron̄ kwaļo̧k ekkatak in jān Rikanaan Josep Smith: “Peptaij kōn dren ej jimmetan wōt in peptaij, im ejjeļo̧k tokjen n̄e ejjab men eo juon rājet in—eo im ej, peptaij kōn Jetōb Kwojarjar” (Teachings: Joseph Smith, 95). Etke peptaij “ejjeļo̧k tokjen” ijjeļo̧kin n̄e ejjab bōk menin letok eo an Jetōb Kwojarjar? (lale 3 Nipai 27:19–20; Moses 6:59–61).

Jerbal 19:18–20.Ilo am̧ riiti Jerbal 19:18–20, lale jon̄an aurōkin m̧weik ko me armej rej ikdeelel n̄an leļo̧k n̄an aer maron̄ m̧ōņōņō ilo gospel in (lale eoon 19). Ewōr ke m̧weik ko an laļ in ak makūtkūt ko jej aikuj n̄an joļoki n̄an ad maron̄ bōk kōjeraam̧m̧an ko an aelōn̄ in lan̄?

Jerbal 20:32–35.N̄eet eo baam̧le eo am̧ ekar ioon katak eo an Kraist me “‘m̧ōṇōṇō in leḷọk eḷap jān bōk”? (Jerbal 20:35). Ewōr ke juon armej emaron̄ bōk jeram̧m̧an jān jerbal in jipan̄, iien, im menin letok ko me baam̧le eo am̧ emaron̄ leļo̧k? Āinwōt juon baam̧le, ekōnono kōn jet ļōmņak ko im kōm̧m̧ane juon am̧ karōk n̄an jipan̄ juon armej. Ekōjkan ad en̄jake n̄e jej jerbal n̄an ro jet? Etke eļapļo̧k jeraam̧m̧an n̄an leļo̧k jān bōk?

N̄an ļōmņak ko reļļōn̄ļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “N̄a Nejin Anij,” Al ko Al in Ajri, 44.

Kōkōm̧anm̧anļo̧k Ekkatak Ippam̧ Make

Je Men ko Reim̧we. “N̄e kwoj jeik im̧we ko an jetōb, kwoj kwaļo̧k n̄an Irooj bwe kwoj kaurōk tōl eo An, im Enaaj kōjeram̧m̧an eok kōn eļōn̄ļo̧k revelesōn” (Teaching in the Savior’s Way, 12; bar lale peij 30).

Iaļ in mijenede ko an Rijilōk Paul.