Ecce Homo, jān Antonio Ciseri

Juun 19–25

Matu 27; Mark 15; Luk 23; Jon 19

“Ededeļo̧k”

Matu 27; Mark 15; Luk 23; im Jon 19 ekoba kōmeļeļe ko in awa ko āliktata in mour eo an Rilo̧mo̧o̧r ilo laļ in. Kappukot n̄an en̄jake iakwe eo An n̄an eok ilo am̧ ekkatak kōn en̄taan eo im mej eo An.

Je En̄jake ko Rej Im̧we Eok

Ilo aolep naan im kōm̧m̧an, Jisōs Kraist ekar kwaļo̧k waanjon̄o̧k in iakwe—ta eo Rijilōk Paul ekar ņae etan iakwe em̧ool (lale 1 Korint 13). Ejjeļo̧k bar iien menin ekar ļap an alikkar jān kar awa ko aliktata in mour eo an Rilo̧mo̧o̧r ilo laļ in. An jab keroro ilo an jelm̧ae ekajet ko reriab ekar kwaļo̧k bwe E “re jab kaillu e” (1 Korint 13:5). An kōtļo̧k e make n̄an ko̧kkure, kōm̧man kōjak kake, im dōbwāāl—ilo An dābij kajoor eo An n̄an kōjem̧ļok an en̄taan—kar kwaļo̧k bwe E ej “kijenmej ilo men otemjej” im “niknik ilo men otemjej” (1 Korint 13:4, 7). An tūriamo n̄an Jinen im An jouj n̄an ridōbwāāl ro—mekarta ilo iien en̄taan eo An make jejjab maron̄ keidi—ej kwaļo̧k bwe E “jab kappukot men ko An]” (1 Korint 13:5). Ilo awa ko an āliktata ilo laļ in, Jisōs ekar kōm̧m̧ane ta eo E ekar kōm̧m̧ane ilo mour in karejar eo an—katakin kōj ilo An kwaļo̧ke n̄an kōj. Em̧ool, iakwe em̧ool ej “iakwe eo erreo an Kraist” (Moronai 7:47).

Ļōmņak ko n̄an Ekkatak Jeje Ko Rekwojarjar Ippam̧ Make

Matu 27; Mark 15; Luk 23; Jon 19

Kōņaan eo an Jisōs Kraist n̄an en̄taan ej kwaļo̧k iakwe eo An n̄an Jemed im aoleped.

Men̄e Rilo̧mo̧o̧r ekar wōr Ippān kajoor n̄an kūr laļtak “ jon̄oul im ruo lijiōn enjeḷ enjeḷ” (Matu 26:53), E ekar kālet n̄an niknik ilo māllijon̄ ko rejjab jim̧we, kōm̧m̧an kōjak ko reuroor, im metak in ānbwin eo im epen ļōmņake. Etke Eaar kōm̧m̧ane? “Kōn iakwe in jouj eo An,” Nipai ekar kam̧ool, “im kōn kijenmej eo An kōn ro nejin armej” (1 Nipai 19:9).

“Im Ej bōk debwāāl eo An im ilọk n̄an … Golgota” (Jon 19:17).

Komaron̄ ijjinoe ekkatak eo am̧ kōn awa ko An Rilo̧mo̧o̧r āļiktata ilo jān am̧ riiti 1 Nipai 19:9. Ia ilo Matu 27; Mark 15; Luk 23; im Joh19 kwoj lo waanjon̄o̧k ko in kajjojo men kein me Nipai ekar ba ke Jisōs enkar en̄taan?

• “[Rekar] ekajet E bwe ej men pata”

• “Rekar den̄ļo̧ke E”

• “Rekar ubrare E”

• “Rekar em̧m̧ōje E”

Ewi iaan enaan kein rejipan̄ eok en̄jake “jouj eo“ An Rilo̧mo̧o̧r n̄an eok? Bar ta ļōmņak ko im en̄jake ko kwoj bōk ilo am̧ riiti bwebwenato kein? Ļōmņak in jeik er ak kwaļo̧k er n̄an ippān juon.

Bar lale “Jesus Is Condemned before Pilate” im “Jesus Is Scourged and Crucified” (pija in alooj ko), ChurchofJesusChrist.org.

Matu 27:27–49, 54; Mark 15:16–32; Luk 23:11, 35–39; Jon 19:1–5

Kajjirere eban ukot m̧ool eo.

Ke Jisōs ekar kijenmej ilo aer kajirere kake ilo aolepen jerbal in karejar eo An, ekar ļapļo̧k an nana ilo iien ko̧kkure eo An im iien Dōbwāāl eo. Ak kajirere in ekar jab maron̄ ukot m̧ool eo: Jisōs ej Nejin Anij. Ilo am̧ riit kōn an kar Jisōs niknik ilo aer kar ko̧kkure, ļōmņak kōn menin māllijon̄ ko im kajirere ko jerbal eo An ej iooni rainin. Ta im̧we ko kwoj bōk kōn niknik ilo māllijon̄ ko? Ta eo ej im̧we eok kōn naan ko an risenturiōn eo ilo Matu 27:54?

Matu 27:46; Mark 15:34

Jisōs Kraist ekar en̄taan make iaan bwe in jab aikuj en̄taan.

Ilo juon iaan iien ko rekabūrom̧ōjm̧ōj ilo ioon dōbwāāl, Jisōs, eo ekar iien otemjej pedped wōt ioon Jemān Ilan̄, kar m̧ōkaj an en̄jake An make Iaan. Riit kōn menin emaron̄ tōl eok n̄an ļōmņak kōn iien ko kwar en̄jake am̧ ettoļo̧k jān Anij. Komaron̄ kejokļo̧ijeņ kōn wāween an en̄taan eo an Rilo̧mo̧o̧r ioon dōbwāāl kōm̧m̧an bwe kwon maron̄ anjo̧ jān jon̄an ettoļo̧k in. Āinwōt an Elder Jeffrey R. Holland kar kam̧ool “Kōnke Jisōs ekar etetal ilo juon iaļ aitok, ajimakeke, jej jab aikuj kōm̧mane wāween in. … Anjo̧ jān ioon Calvary ej m̧ool eo bwe jāmin kōmakeik kōj ak barāinwōt jāmin jab letok jipan̄, men̄e eļan̄n̄e jet iien jemaron̄ en̄jake men kein” (“None Were with Him,” Liaona, Māe 2009, 88). Ļōmņak kōn wāween an Rilo̧mo̧o̧r maron̄ jipan̄ eok anjo̧ jān ajimakeke ilo am̧ riiti aolepen katak eo an Elder Holland.

Luk 23:34

Rilo̧mo̧o̧r ej waanjon̄o̧k eo ad in jeorļo̧k bōd.

Ekōjkan am̧ en̄jake n̄e kwoj riit naan ko an Rilo̧mo̧o̧r ilo Luk 23:34? (lale meļeļe eo kar letok jān Ukok eo an Josep Smith ilo footnote c). Oktakļo̧k n̄an naan ko an Rilo̧mo̧o̧r, Būreejtōn Henry B. Eyring ekar katakin: “Jej aikuj joļo̧k bwōd im jab ļōmņak in ukōt nana n̄an ro rekar kōmetak kōj. Rilo̧mo̧o̧r ekar kōm̧mane waanjon̄o̧k jān dōbwāāl eo. … Jejjab jeļā būruon ro rej kōmetak kōj” (“That We Māe Be One,” Ensign, Māe 1998, 68). Ekōjkan an eoon in maron̄ jipan̄ eok n̄e ej ben am̧ joļo̧k an juon bwōd?

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Matu 27; Mark 15; Luk 23; Jon 19.N̄an jipan̄ baam̧le eo am̧ ekkatak kōn iien kein reļlap kōmeļeļeik ilo jepta kein, komaron̄ kwaļo̧k e n̄an er “Jebta 52: The Trials of Jesus” im “Chapter 53: Jesus Is Crucified” (ilo New Testament Stories, 133–38, ak pija in alooj ko rekkar ilo ChurchofJesusChrist.org). Ak komaron̄ alooje jim̧or pija in alooj ko rej kwaļok kōn iien kein reļlap: “Jesus Is Condemned before Pilate” im “Jesus Is Scourged and Crucified” (ChurchofJesusChrist.org). Komaron̄ kajjitōk ippān ajri ro n̄an bar āliji bwebwenato ko ilo aer kōjerbal naan ko aer make. Ro uwaan baam̧le eo remaron̄ kwaļo̧k wāween aer en̄jake kōn Rilo̧mo̧o̧r kōn ta eo E ekar en̄taan kake n̄an kōj.

Matu 27:11–26; Mark 15:1–15; Luk 23:12–25; Jon 19:1–16.Etke Pilet ekar leļo̧k Jisōs bwe en dōbwāāl, men̄e ekar jeļā bwe ekar ejjeļo̧k an Jisōs bōd? Katak tak ko komaron̄ ekkatak jān en̄jake eo an Pilate kōn jutak kōn ta eo jejļā ejim̧we? Emaron̄ menin jipan̄ n̄an baam̧le eo am̧ n̄an role-play iien kein me ej kōtļo̧k aer kōmālmel jutak kōn ta eo ejim̧we.

Matu 27:46; Luk 23:34, 43, 46; Jon 19:26–28, 30.Bōlen komaron̄ leļo̧k n̄an kajjojo ro uwaan baam̧le eo bwe ren riiti juon ak elōn̄ļo̧k meļeļe ko Rilo̧mo̧o̧r ekar kōm̧m̧ane ilo ioon dōbwāāl eo, loe ilo eoon kein. Kajjitōk ippāer n̄an kwaļo̧k ta eo rekar ekkatak jān meļeļe kein kōn Rilo̧mo̧o̧r im mijen eo An?

Mark 15:39.Ekōjkan am riit kōn Dōbwāāl eo kōkajoorļok naan in kam̧ool eo am̧ bwe Jisōs ej “Nejin Anij”?

Jon 19:25–27.Ta eo jej ekkatak jān eoon kein kōn wāween ad maron̄ iakwe im jipan̄ ro uwaan baam̧le?

N̄an ļōmņak ko rellōn̄ļo̧k n̄an katakin ajri ro, lale unin tōl eo an wiik in ilo tok, Ļoor Eō—N̄an Būraimere.

AL eo kar elmakote: “Upon the Cross of Calvary,” Hymns, no. 184.

Kōkm̧anm̧anļo̧k Ad Katakin

Ļoor mour eo an Rilo̧mo̧o̧r. “Ej menin jipan̄ n̄an ekkatak wāween ko Rilo̧mo̧o̧r ekar katakin—jekjek ko Ekar kōjerable im men ko Ekar ba. Ak Rilo̧mo̧o̧r eo n̄an katakin im ļōn̄aj ro jet eaar itok jān wāween An kar mour im kar kain armej rōt E. Ļapļo̧k in am̧ kate eok n̄an mour āinwōt Jisōs Kraist, enaaj ļapļo̧k am̧ maron̄ katakin āinwōt E” (Teaching in the Savior’s Way, 13).

Kraist ilo ioon Dōbwāāl eo, jān Carl Heinrich Bloch