Bukin Wōjke Ko ilo Gethsemane, jān Derek Hegsted

Juun 12–18

Luk 22; Jon 18

“A En Jab Ankil Aō A Am̧ Wōt”

Bōk am̧ iien im riiti Luk 22 im Jon 18 ilo wiik in. Kejokļo̧kjeņ im jar kōn ta eo kwoj riiti. Kōm̧m̧ane menin emaron̄ letok iien ko rem̧m̧an n̄an Jetōb eo n̄an an kwaļo̧k kam̧ool ilo būruōm̧ ke jeje ko rekwojarjar rem̧ool.

Je En̄jake ko Rej Im̧we Eok

Ekar wōr wōt jilu rikam̧ool ro ilo mour in kōn en̄taan eo an Jisōs Kraist ilo Jikin Kallip Getsemane—im rekar kiki ilo aolepān iien eo. Ilo jikin kallip eo im tokālik ioon debwāāl eo, Jisōs ekar bōk Ioon Make jerawiwi ko, metak im en̄taan ko an kajjojo armej ro me rekar jokwe, men̄e eiten aolep ro rekar mour ilo tōre eo rekar jab jeļā ta eo ekar waļo̧k. Makūktūt eo eaorōktata ilo mour indeeo ekkā an wōnm̧aanļo̧k wōt ilo an jab laļ in jeļā kake. Ak Anij Jemed ekar jeļā. Ekar ron̄ an eo Nejin akweļap: “Jema eļan̄n̄e Kwō kōņaan, Kwōn bōkļo̧k kab in jān Eō; meñe ejjab ankil Aō ak Am̧ wōt, enaaj tōbrak. Im juon enjeļ ej weaaktok n̄an E jān lan̄, im kakajoor E” (Luk 22:42–43). Ke kōm kar jako ijeņ n̄an kam̧oole jerbal in kōjdo̧o̧n e make im ajeļo̧k e make, kōj jej rikam̧ool ro kōn Pinmuur eo an Jisōs Kraist. Aolep iien jej ukweļo̧k im bōk jeorļo̧k bōd jān jerawiwi ko ad, aolep iien jej en̄jake kajoor in kōkajoor eo an Rilo̧mo̧o̧r, jemaron̄ kam̧ool m̧ool eo kōn ta eo ekar waļo̧k ilo Jikin Kallip Getsemane.

Ļōmņak ko n̄an Ekkatak Jeje Ko Rekwojarjar Ippam̧ Make

Luk 22:31–34, 54–62; Jon 18:17–27

Oktak tok ej juon jerbal ejjab jem̧ļo̧k.

Ļōmņak kōn en̄jake ko an Pita ippān kar Rilo̧mo̧o̧r—menin bwilōn̄ ko ekar kam̧ooli im katak ko ekar ron̄. Innem etke Rilo̧mo̧o̧r ekar ba n̄an Pita, “N̄e em̧ōj am̧ bar oktak, kwōn kakajoor ro jeim̧ im jatūm̧”? (Luk 22:32; italics added). Ilo am̧ kejokļo̧jen kōn menin, emaron̄ jipan̄ eok n̄an ļōmņak kōn ta eo Elder David A. Bednar ekar katakin kōn oktak eo ikōtaan wōr juon naan in kam̧ool im lukkuun m̧ool in oktak tok (lale “Converted unto the Lord,” Liaona, Nob. 2012, 106–9).

Ilo am̧ riiti en̄jake ko an Pita ilo Luk 22:31–34, 54–62 (bar lale Jon 18:17–27), ļōmņak kōn oktak tok eo am̧ make. Em̧ōj ke am̧ kar en̄jake bwe kwar wujlepļo̧k, jon̄an, āinwōt Pita, kwar “pojak bwe in etal Ippam̧ [Rilo̧mo̧o̧r], ilowaan jikin kalbuuj, im n̄an mej”? (Luk 22:33). Etke en̄jake kane rej jet iien jakoļo̧k? Elōn̄ iien ko rem̧m̧an aolep raan n̄an kōjekdo̧o̧n ak kam̧ool kōn Rilo̧mo̧o̧r; ta eo kwomaron̄ kōm̧m̧ane n̄an erom̧ juon rikam̧ool aolep raan kōn E? Ta katak ko jet kwpj ekkatak jān en̄jake eo an Pita?

Ilo am̧ wōnm̧aanļo̧k wōt im riiti Kallim̧ur Ekāāl, kappukot kam̧ool eo kōn oktak tok eo an Pita me ekar jab jem̧ļo̧k. Bar no̧o̧te wāween ko me ekar eo̧ron̄ kean̄ eo an Irooj “kakajoor ro jeim̧ im jatūm̧” (Luk 22:32; lale Jerbal 3–4).

Bar lale Mark 14:27–31.

Luk 22:39–46

Rilo̧mo̧o̧r ekar en̄taan kōn eō ilo Getsemane.

Būreejtōn Russell M. Nelson ekar karuwaineneik kōj n̄an “kōm̧m̧an ad iien ekkatak kōn Rilo̧mo̧o̧r im katok in pinmuur eo An” (“Bōktok Kajoor eo an Jisōs Kraist ilo Mour ko Ad,” Liaona, Māe 2017, 40).

Ļōmņak ta eo kwonaaj kōm̧m̧ane n̄an ļoor kūr eo an Būreejtōn Nelson. Kwomaron̄ jino ilo am̧ lukkuun jar im kejokļo̧kjeņ kōn en̄taan eo an Rilo̧mo̧o̧r ilo Getsemane, āinwōt kar kōmeļeļeiki ilo eoon kein, im ak ļōmņak ko kar jei im kajjitōk ko me rej jiktok ilo kōļmenļo̧kjeņ.

N̄an juon ekkatak eo em̧wūlaļ ļo̧k kōn Rilo̧mo̧o̧r im Pinmuur eo An, kajjieon̄ kappukot jeje ko jet rekwojarjar n̄an uwaak ko n̄an kajjitōk kein:

• Etke emenin aorōk Pinmuur eo an Rilo̧mo̧o̧r? (Lale 2 Nipai 2:5–10, 17–26; 9:5–26; Alma 34:8–16; 42:9–26.)

• Ta eo Rilo̧mo̧o̧r ekar en̄jake ilo An kar en̄taan? (Lale Aiseia 53:3–5; Mosaia 3:7; Alma 7:11–13; Katak im Bujen Ko 19:16–19.)

• Ewi wāween an en̄taan eo an Kraist jelet mour eo am̧? (Lale Jon 10:10–11; Hibru 4:14–16; 1 Jon 1:7; Alma 34:31; Moronai 10:32–33; Dallin H. Oaks, “Kajoorļo̧k kōn Pinmuur eo an Jisōs Kraist,” Liaona, Nob. 2015, 61–64.)

• Kajjitōk ko Jet ewōr Ippa:

Ilo am̧ ekkatak kōn ta eo ekar waļo̧k ilo Getsemane, ekar kaitoktok limo n̄an jeļā bwe Getsemane ekar juon jikin kallip in wōjke olive ko im ekar koba kein un̄jej an olive, n̄an keene olive ko im bōk wōt oil eo n̄an kabōlbōl im m̧ōn̄ā barāinwōt n̄an kōmour (lale Luk 10:34). Ekōjkan an eoon kein kam̧wilaļļo̧k kam̧m̧oolol eo ad kōn ta eo Rilo̧mo̧o̧r eo eaar kōm̧m̧ane n̄an kōj? N̄an ļōmņak ko jet, lale ennaan eo an Elder D. Todd Christofferson “Pād ilo Aō Iakwe” (Liaona, Nob. 2016, 50–51).

Bar lale Matu 26:36–46; Mark 14:32–42.

Jon 18:28–38

Aelōn̄ in kiin̄ eo an Rilo̧mo̧o̧r “Aō aelōn̄ e jab jān ijin.”

Āinwōt juon ritōl ilo kien, Potius Pilate ekar jeļā kōn kajoor im aelōn̄ in kiin̄ ko ilo laļ in. Ak Jisōs ekar kōnono eļap kōn kain oktak ko ilo aelōn̄ in kiin̄ ko. Ļōmņak likļo̧k kōn ta eo kwar riiti kōn mour eo an Rilo̧mo̧o̧r, ta kam̧ool eo kwoj loe An “aelōn̄ e jab jān ijin”? (Jon 18:36). Etke eaorōk n̄an eok n̄an jeļā kōn menin? Ta eo ejiktok n̄an ilo ļōmņak eo am̧ kōn naan ko an Jisōs n̄an Pilate?

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Luk 22:31–32.Ewi wāween an Pita kar en̄jake bwe en jeļā ke Jisōs ekar jar kōn e im tōmak eo an? Wōn eo jemaron̄ jar kake, “bwe [aer] tōmak e jāmin jako”? (eoon 32).

Luk 22:39–46.Ekkatak kōn en̄taan eo an Rilo̧mo̧o̧r ilo Getsemane emaron̄ erom̧ juon en̄jake ekwojarjar n̄an baam̧le eo am̧. Ļōmņak ta eo kwomaron̄ kōm̧m̧ane n̄an ejaake juon jetōb in kautiej im kabun̄ jar ilo am̧ ekkatak Luk 22:39–46. Kwomaron̄ ikkure ak al ippān doon jet iaan al in jar ko em̧m̧antata ippān baam̧le eo am̧ ak al ko an ajri ro kōn Rilo̧mo̧o̧r. Kwomaron̄ lale jet iaan jerbal ko me rej iookļo̧k ak jerbal in art ak alooje bitio eo āinwōt “The Savior Suffers in Gethsemane” (ChurchofJesusChrist.org). Ilo am̧ riiti eoon ko, ro uwaan baam̧le eo rej jeere eoon ko me eļap meļeļeier n̄an er—bolen juon eoon me ejipan̄ er en̄jake iakwe eo an Rilo̧mo̧o̧r (bar lale Matu 26:36–46; Mark 14:32–42). Kwomaron̄ bar karuwaineneik er n̄an kwaļo̧k naan in kam̧ool ko aer kōn Jisōs Kraist im Pinmuur eo An.

Luk 22:42.Ro uwaan baam̧le eo remaron̄ kar kwaļo̧k en̄jake ko aer n̄e rekar ekkatak n̄an ba, “A En Jab Ankil Aō A Am̧ Wōt.”

Luk 22:50–51; Joh 18:10–11.Ta eo jej ekkatak kōn Jisōs jān eoon kein?

Suffer Ye Thus Far, by Walter Rane

Jon 18:37–38.Ewi wāween ad uwaake kajjitōk eo an Pilate “Ta in m̧ool?” (eoon 38). N̄an ļōmņak ko jet, lale Jon 8:32; Katak im Bujen Ko 84:45; 93:23–28; im “Oh Say, What Is Truth?,” Hymns, no. 272.

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Ij Ļo̧kjeņ Aō,” Hymns, no. 193.

Kōkōm̧anm̧anļo̧k Ad Ekkatak

Ekkatak naan ko an rikanaan im rijilōk ro ilo raan ko āliktata. Riiti ta ko rikanaan im rijilōk ro rekar katakin kōn m̧ool ko kwoj loe ilo jeje ko rekwojarjar. N̄an waanjon̄ak, ilo katak eo an kweilo̧k eo eļap me ej kab jem̧ļo̧kļo̧k an Liaona, kwomaron̄ kappukot unin kōnono eo kōn “Atonement” (lale Teaching in the Savior’s Way, 21).

A En Jab Ankil Aō, A Am̧ Wōt, jān Walter Rane