“Juun 12–18. Luk 22; Jon 18: ‘A En Jab Ankil Aō a Aṃ Wōt,’” Itok Ļoor Eō—N̄an Būraimere: Kallim̧ur Ekāāl 2023 (2022)
“Juun 12–18. Luk 22; Jon 18,” Itok, Ļoor Eō—N̄an Būraimere: 2023
Jikin Kallib Gethsemane, jān Derek Hegsted
Juun 12–18
Luk 22; Jon 18
“A En Jab Ankil Aō a Am̧ Wōt”
Ekkatak jān Luk 22 im Jon 18 ippān ajri ro ej juon iien em̧m̧an n̄an jipan̄ er kam̧wilaļļo̧k aer iakwe n̄an Jisōs Kraist im aer tōmak ilo E. Lukkuun ļōmņak elmen am̧ naaj kōm̧m̧ane menin.
Kajjitōk bwe ren Kwaļo̧k
Kwaļo̧k pija ko in iien ko ilo jebta kein, āinwōt Christ in Gethsemane (Gospel Art Book, no. 56) im pija ko ilo Itok, Ļoor Eō—N̄an Kajjojo Armej im Baam̧le Ko. Kajjitōk ippān ajri ro n̄an kwaļo̧k ta eo ej waļo̧k ilo pija kein.
Katakin Katak eo: Ajri ro Reddikļo̧k
Jisōs Kraist eaar en̄taaan kōn n̄a kōnke Ej iakwe eō.
Ļōmņake elmen am maron̄ jipan̄ ajri en̄jake iakwe eo an Jisōs n̄an er ilo am kōnono kōn bwebwenato eo kōn en̄taan eo An ilo Getsemane.
M̧akūtkūt ko Maron̄ Kōm̧m̧ani
-
Kwaļo̧k bwebwenato eo ilo Luk 22:39–46 n̄an ajri ro, bōlen kōjerbal “Chapter 51: Jesus Suffers in the Garden of Gethsemane” (ilo Bwebwenato ko ilo Kalim̧m̧ur Ekāāl, 129–32, ak bitio eo ilo ChurchofJesusChrist.org). Kōmeļeļeiki bwe Jisōs ekar en̄jake aolep metak im būrom̧ōj me aolep rejjan̄in kar en̄jake. Kajjitōk ippān ajri ro ta eo emaron̄ kōm̧m̧an bwe juon armej en en̄jake būrom̧ōj, metak, ak inepata. Kam̧ool bwe Jisōs emaron̄ jipan̄ kōj en̄jake em̧m̧anļo̧k n̄e jej en̄jake wāween kein.
-
Leto letak juon pijain Rilo̧mo̧o̧r ilo Getsemane (āinwōt eo juon ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko). Ilo an kajjojo ajri kota pija eo, ba, “Jisōs ekar en̄taan kōn Ej iakwe [etan ajri eo].” Kajjitōk ippān ajri ro n̄an āliji naan kein ippam̧.
-
Al ippān ajri ro juon al kōn iakwe eo an Jisōs n̄an kōj, āinwōt “ “I Feel My Savior’s Love” (Children’s Songbook, 74–75). Jipan̄ er ļōmņaki wāween ko remaron̄ en̄jake iakwe eo an Jisōs.
Imaron̄ jar n̄e ij aikuj jipan̄.
Ke Jisōs ekar jar ilo Getsamene, juon enjeļ ekar waļo̧k n̄an e im kōkajoor E. Elmen am̧ maron̄ jipan̄ ajri ro kwoj katakin er meļeļe bwe remaron̄ in bar jar n̄an Jemedwōj Ilan̄ kōn kajoor?
M̧akūtkūt ko Maron̄ Kōm̧m̧ani
-
Kōmeļeļeiki Luk 22:41–43 n̄an ajri ro. Kwaļo̧k juon en̄jake me kwaar jar n̄an kōn jipan̄ im Jemedwōj Ilan̄ ekar kōkajoorļo̧k eok kōn Jetōb Kwojarjar ak jilkinwaj juon n̄an jipan̄ eok.
-
Ilo juon peba to, je men ko jemaron̄ ba ilo jar, āinwōt “Jemedwōj Ilan̄,” “Ij kam̧m̧oolol eok,” “Ij kajjitōk ippam̧,” im “ilo etan Jisōs Kraist, amen.” Likūt peba to ko ioon laļ in ilo jab elaajrakier, im jipan̄ ajri ro karōki ilo elaajrakier me jemaron̄ ba ilo juon jar. Ta eo jemaron̄ kam̧m̧oolo Jemedwōj Ilan̄ kake? Ta ko jet jemaron̄ ba n̄an E? Kam̧ool bwe ajri ro remaron̄ jar n̄an Jemedwōj Ilan̄ jabdewōt jikin im jabdewōt iien.
Kraist ej Jar ilo Jikin Kallib Getsemane, jān Hermann Clementz
Katakin Katak eo: Ajri ro Rerūttoļo̧k
Ilo Getsemane, Jisōs Kraist ekar bōk ioon Make jerawiwi im metak ko aō.
Jeļā kōn ta eo Jisōs ekar kōm̧m̧ane n̄an kōj ilo Getsemane emaron̄ jipan̄ ajri ro ukweļo̧k jān jerawiwi ko aer im oktaļo̧k n̄an Rilo̧mo̧o̧r n̄e rej en̄jake apan̄ ko.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an riiti Luk 22:39–46, lali naan ko ak eoon ko me rej kōmeļeļeik wāween an kar Jisōs en̄jake ilo Getsemane. Ta eo Jisōs ekar en̄jake bwe E en kar en̄jake rot in? (lale Katak im Bujen Ko 19:16–19). Leļo̧k n̄an ajri ro iien em̧m̧an n̄an kwaļo̧k en̄jake ko aer kōn Jisōs im en̄taan eo An n̄an kōj.
-
Kajjitōk ippān ajri ro n̄an kwaļo̧k juon iien ke raar būrom̧ōk ak metak. Kajjitōk ippāer n̄e rejeļā kajjien juon armej me ekar en̄jake ejja men rot in. Kajjitōk ippāer n̄an riiti Alma 7:11–12. Ta eo eoon kein rej katain kōj kōn Jisōs Kraist im An en̄taan kōn kōj?
-
Leļo̧k n̄an ajri eo juon aļaļ ebwe an aetok ilo kūlaaj eo, im ba bwe en kotake im kajjieon̄ etatal kake ļo̧k n̄an kōjem eo. Kōmeļeļe bwe aļaļ eo ej pinej jenkwan jerawiwi ko ad, me ej kōm̧m̧an bwe jen jab deļo̧n̄e aelōn̄ in kiin̄ eo an Anij. Likūt aļaļ eo im kōmeļeļeiki bwe Jisōs ekar bōk ioon Make jerawiwi ko ad bwe jen maron̄ bōk jeo̧rļo̧kin bōd n̄e jej ukweļo̧k.
Imaron̄ ļoor waanjon̄ak ko an Jisōs n̄an pokake Jemedwōj Ilan̄.
Jisōs ekar kwaļo̧k an pokake n̄an Jemān ke Eaar ba, “A en jab ankil Aō a Am̧ wōt” (Luk 22:42). Elmen am̧ maron̄ jipan̄ ajri ro katak jān waanjon̄ok eo an Jisōs?
M̧akūtkūt ko Maron̄ Kōm̧m̧ani
-
Jipan̄ ajri ro kakkilōklōke naan eo “A en jab ankil Aō a Am̧ wōt” (Luk 22:42) im kōnono ta meļeļein. Ta eo jemaron̄ kōm̧m̧ane n̄an pokake ankilaan Jemedwōj Ilan̄?
-
Jipan̄ ajri ro kwaļo̧k un ko jet iie epen n̄an kōm̧m̧ane ta eo Jemedwōj Ilan̄ ekōņaan. Ta kōjeraam̧m̧an ko jaar būki jān pokake Jemedwōj Ilan̄, men̄e epen?
Jisōs eaar iakwe ro raar kōjdat E.
Ekkatak kilen rikōm̧m̧an aenōm̧m̧an ejjab pidodo, eļaptata n̄e rej jet rejjab jouj n̄an kōj. Elmen aan bwebwenato in ilo Luk 22:50–51 im̧we ajri ro kwoj katakin n̄an jouj ilo aolep jekjek?
M̧akūtkūt ko Maron̄ Kōm̧m̧ani
-
Kajjitōk bwe ajri ro ren riiti Luk 22:50–51. Ta ko jej katak kōn Jisōs jān bwebwenato in? Ilo wiik in, kajjitōk ippān jet iaan jinen im jemen ajri ro n̄an kwaļo̧k n̄an eok kōn tōre eo ajri ro nejier rekar kwaļo̧k jouj, men̄e ekar pen. Kwaļo̧k bwebwenato kein ilo kūlaaj eo. (Kakeememej ajri bwe menin jouj ejjab meļeļe kōmetak ro jet; rej aikuj kōnono n̄an jineer im jemeer ak ro jet rej leke er n̄e juon ej kōmetak er.)
-
Al ippān doon juon al kōn jouj, eo āinwōt “Kindness Begins with Me” (Children’s Songbook,, 145). Ta eo al in ej kwaļo̧ke kōn jouj? Elmen am̧ kwaļo̧k jouj n̄an ro jet āinwōt kar Rilo̧mo̧o̧r?
Kōketak Ekkatak ilo M̧weo
Karuwaineneik ajri ro n̄an kwaļo̧k naan in kam̧ool ko aer kōņ Rilo̧mo̧o̧r n̄an baam̧le ko aer. Remaron̄ bar kajjitōk ippān ro uwaan baam̧le eo n̄an kwaļo̧k naan in kam̧ool ko aer kōn E.
Kōkm̧anm̧anļo̧k Ad Katakin
Kajjitōk ippān ajri n̄an kwaļo̧k ta eo rejeļā. “Kajjitōk [ippān ajri] ro n̄an kwaļo̧k n̄an eok aer ļōmņak, en̄jake, im imminene me reiokļo̧k pedped ko kwaar kwaļo̧ki. Kwonaaj lo bwe ewōr aer en̄jake ko me rem̧m̧an, kwojarjar, im kajoor” (Teaching in the Savior’s Way, 26).