Kejota eo Āliktata

Ilo Ememej Eō,, jān Walter Rane

Māe 29–Juun 4

Matu 26; Mark 14; Jon 13

“Ilo Ememej”

Ilo am riit Matu 26; Mark 14; im Jon 13, lale pedped ko me kwoj en̄jake renaaj kōjeraam̧m̧an ajri ro kwoj katakin.

juon eo ej kwaļo̧k ļōmņak im en̄jake ko an

Kajjitōk bwe ren Kwaļo̧k

Kwaļo̧k pija ko kōn makitkit ko rej bōk jikier ilo jebta kein, āinwōt Gospel Bok in Pija, nos. 54–55, im kajjitōk ippān ajri ro n̄ān kwaļo̧k ta eo ej waļo̧k ilo pija ko.

jikin katakin

Katakin Katak eo: Ajri ro Reddikļo̧k

Matu 26:26–29; Mark 14:22–24

Kwojkwoj eo ejipan̄ eō ļōmņak kōn Jisōs.

Jipan̄ ajri ro meļeļe bwe bōk m̧ōttan kwojkwoj eo ej juon iien n̄an keememej ta eo Jisōs ekar kōm̧m̧ane n̄an kōj.

M̧akūtkūt ko Maron̄ Kōm̧m̧ani

• Kōmeļeļeiki bwebwenato eo kōn an Jisōs kōm̧m̧ane kwojkwoj eo. Komaron̄ kōjerbal “Jebat 49: The First Sacrament” (ilo New Testament Stories, 124–26, ak bitio in jipan̄ eo ilo ChurchofJesusChrist.org), ak bitio eo “Sacrament” (ChurchofJesusChrist.org). Etke jej bōk kwojkwoj eo? Jipan̄ ajri ro meļeļe bwe jej keememej Jisōs ilo iien kwojkwoj eo.

• Kwaļo̧k n̄an ajri ro jidik pilawā im juon kab in dān. Kajjitōk ippāer n̄e rejeļā ta eo pilawā im dān eo ilo kwojkwoj rej jutak kake. Kōmeļeļeik bwe men kein rej kakeememej kōj bwe Jisōs ekar mej kōn kōj im kar jerkak jān mej.

• Kajjitōk ippān ajri ro n̄an kiil mejeer im ļōmņake juon eo rej iakwe, im kajjitōk ippāer n̄an kwaļo̧k n̄an eok armej eo. Kajjitōk ippāer n̄an bar kiil mejeer, ļōmņak kōn Rilo̧mo̧o̧r, innām kwaļo̧k men ko rejeļā kōn E. Rōjan̄ er n̄an ļōmņak kōn Jisōs ilo iien kwojkwoj eo kajjojo wiik.

• Kajjitōk ippān ajri ro n̄an kwaļo̧k n̄an eok ta eo remaron̄ kōm̧m̧ane n̄an keememej Jisōs im kautiej E ilo iien kwojkwoj eo. Jipan̄ ajri ro kōm̧m̧ane kōmeļeļe eo ilo bok in m̧akūtkūt eo an wiik in im kōjerbale n̄an jipan̄ er ļōmņak kōn Jisōs ilo iien kwojkwoj eo. Ak kōtļo̧k bwe ren lale jet Māākjin ko an Kabun̄ in kōn pijain Jisōs im aiin aolep pija remaron̄ lali ilo iien kwojkwoj eo.

Jon 13:34–35

Imaron̄ iakwe ro jet āinwōt kar Jisōs.

Jisōs ekar kwaļo̧k An iakwe ilo an kea kōn ro Ipeļakin. Ien ta ko rem̧m̧an n̄an an ajri ro kwoj katakin er remaron̄ kwaļo̧k aer iakwe n̄an ro jet?

M̧akūtkūt ko Maron̄ Kōm̧m̧ani

• Kwaļo̧k bwebwenato in pija ko ajiri ro rekar ekkatak iiō in me Jisōs ekar kwaļo̧k An iakwe n̄an ro jet (lale laajrak ko ļo̧k ilo Itok, Ļoor Eō—N̄an Kajjojo Armej im Baam̧le Ko). Riiti Jon 13:34–35, im jipan̄ ajri ro āliji naan in “Āinwōt Aō kar iakwe eok, … iakwe ro jet.” Elmen ad kwaļo̧k ad iakwe n̄an baam̧le eo ad im ro m̧ōttad?

• Kajjitōk ippān juon ajri n̄an kotak pijain Rilo̧mo̧o̧r ilo an kūlaaj eo al kōn iakwe eo an Rilo̧mo̧o̧r, āinwōt “Iakwe Doon” (Bok in Al an Ajiri Jidik Ro, 136). Leļo̧k n̄an ajri ro juon peba menono im kajjitōk ippāer n̄an jin̄aiki pijaier make kōm̧m̧ani men ko n̄an kwaļo̧k iakwe n̄an armej eo juon.

juon jikin katakin

Katakin Katak eo: Ajri ro Rerūttoļo̧k

Matu 26:26–29; Mark 14:22–24

Kwojkwoj eo ejipan̄ eō keememej Jisōs Kraist im en̄taan eo An kōn eō.

Elmen am̧ maron̄ jipan̄ ajri ro bōk eļapļo̧k en̄jake kōn kwojkwoj eo?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an bōk koņaer ilo eoon kein ilo Matu 26:26–29 ak Mark 14:22–24 (bar lale Josep Smith Ukook, Mark 14:20–24 [in the Bible appendix]) im Katak im Bujen Ko 20:75–79. Ta naan im ļōmņak ko rein juon ilo naan kein ruo?

• Kajjitōk ippān ajri ro ta eo rej kōm̧m̧ane n̄an jipan̄ er ļōmņak kōn Jisōs ilo iien kwojkwoj eo. Jipan̄ er pukōt eoon ko ak naan ko jān al in kwojkwoj ko me remaron̄ riiti ilo iien kwojkwoj eo, innām kōlaajraki ioon juon kaat bwe ajri ro ren maron̄ lale tokālik ilo aer bōk kwojkwoj eo. Al jejjo̧ iaan al kein ippān ajri ro (lale Hymns, nos. 169–97).

  ajri ro rej bōk kwojkwoj eo

  Kwojkwoj eo ejipan̄ eō keememej Jisōs Kraist im en̄taan eo An kōn eō.

• Je naan ko raorōk jān jar in kwojkwoj eo ioon bo̧o̧t eo, im jipan̄ ajri ro kōkkilōklōki. Ta meļeļein naan kein? Etke eaorōk n̄an kōkāāl bujen peptaij eo an kajjojo wiik?

• Kūrtok juon rikabwijer Priesthood eo an Aron bween kwaļo̧k n̄an ajri ro en̄jake eo an ilo an kepooje, kōjeraam̧m̧an, ak leto-letak kwojkwoj eo. Ta eo ejipan̄ e kōppopo n̄an maron̄ kōm̧m̧ane menin? Eļeman en̄jake eo an ilo an kōm̧m̧ane? Eļmem an pilawe im dān eo kakeememej e kōn Rilo̧mo̧o̧r?

• Kajjitōk ippān ajri ro eo im em̧ōj aer peptaij n̄an kwaļo̧k ta eo rej keememej kōn peptaij eo aer. Eļmen en̄jake ko rekar en̄jaki? Ta bujen ko rekar kōm̧m̧ani? (lale Mosaia 18:8–10). Ba n̄an er ke aolep wiik n̄e jej bōk m̧ōttan kwojkwoj eo, emaron̄ āinwōt n̄e jej bar peptaij—jemaron̄ jeo̧rļo̧k jerawiwi ko ad, im jej kōkāāl bujen ko ad.

Jon 13:1–17

Jisōs Kraist ekar kwaļo̧k n̄an eō elmen jerbal n̄an ro jet.

Bwebwenato eo kōn an Jisōs kwaļ neen rijilōk ro An emaron̄ im̧we ajri ro kwoj katakin n̄an iakwe im jerbal n̄an armej ro ipeļakier.

M̧akūtkūt ko Maron̄ Kōm̧m̧ani

• Jejjo̧ raan m̧oktaļo̧k, kajjitōk ippān juon iaan ajri ro n̄an riiti Jon 13:4–9 im kwaļo̧k bwebwenato eo n̄an kūlaaj eo kōn paaktokn Piter . Ta eo Rilo̧mo̧o̧r ekar kajjieon̄ katakin Piter im Rijilōk ro jet? Ajri ro remaron̄ kōnono kake ta eo rej ekkatak jān bwebwento in kōn Jisōs Kraist. Ta eo jej ekkatak kōn jerbal n̄an ro jet?

• Riit ippān doon Jon 13:12–17. Kajjitōk ippān ajri kajjojo n̄an je kōn juon tōre ke Rilo̧mo̧o̧r ekar jerbal n̄an ro jet. Rōjan̄ er n̄an kobaik ta eo raar jeļā jān waanjon̄ak eo An. N̄e rej aikuj jipan̄, remaron̄ lale waanjon̄ak ko ilo pija in alooj eo “Kadkad ko Rein Juōn Wōt Kraist” (ChurchofJesusChrist.org). Kajjitōk ippāer n̄an kwaļo̧k n̄an kūlaaj eo ta eo rekar je.

Jon 13:34–35

Rijilōk ro an Jisōs Kraist rej iakwe ro jet āinwōt kar E.

Ke jaar peptaij, jej kōm̧m̧ani bujen ko n̄an erom̧ rijililōk ro an Jisōs Kraist. Ilo Jon 13:34–35, Rilo̧mo̧o̧r eo ekar kōmeļeļeiki elmen ad maron̄ kwaļo̧k ke jej rijilōk ro An.

M̧akūtkūt ko Maron̄ Kōm̧m̧ani

• Je ioon bo̧o̧t eo yokwe doon; āinwōt Iar iakwe eok (Jon 13:34). Kajjitōk ippān ajri ro n̄an lale eoon eo im kanni ijōko ejjeļo̧k kobbaer. Ta men ko jet jemaron̄ kōm̧m̧ani n̄an kwaļo̧k ke jej rijilōk ro an Jisōs? Ajri ro remaron̄ ļōmņaki naan ko jet me remaron̄ kadedeļo̧k jentōj eo ioon bo̧o̧t, āinwōt jerbal im kar jerbal ak katakin im kar katakin.

• Kajjitōk ippān ajri ro n̄an riiti Jon 13:35 im ļōmņak kōn armej ro rejeļā kajjier me waanjon̄ak ko aer kōn rijilōk ro an Jisōs Kraist. Kajjitōk ippāer n̄an kwaļo̧k elmen an armej rein kwaļo̧k iakwe n̄an ro jet āinwōt kar Rilo̧mo̧o̧r.

juon jikin ekkatak

Kōketak Ekkatak ilo M̧weo

Kajjitōk ippān ajri ro n̄an ļōmņak kōn men ko remaron̄ kōņaan kōm̧m̧ane kōn ta eo rekar ekkatak kake ilo kūlaaj eo. N̄an waanjon̄ak, remaron̄ kwaļo̧k elmen aer naaj keememej Jisōs Kraist ilo iien kwojkwoj eo.

Kōkōm̧anm̧anļo̧k Ad Katakin

Kwaļo̧k naan in kam̧ool eo am̧ ilo kūlaaj eo am̧. Juon naan in kam̧ool emaron̄ ļōmwaan āinwōt “Ijeļā bwe Jemedwōj Ilan̄ ej iakwe kōj kajjojo” ak “Ij en̄jake aenōm̧m̧an ilo aō ekkatak kōn Jisōs Kraist.”

peij in m̧akūtkūt: kwojkwoj eo