Kejota Eo Āliktata, jān William Henry Margetson

Juun 5–11

Jon 14–17

“Pād wōt ilo Aō Yokwe”

Jar n̄an jeļā aikuj ko an ajri ro kwoj katakin ilo am̧ riiti Jon 14–17. Itok, Ļoor Eō—N̄an Kajjojo Armej im Baam̧le Ko emaron̄ rie am̧ ekkatak, im laajrak in emaron̄ lewaj ļōmņak ko kilen am̧ katakin ajri ro ilo kūlaaj eo am̧.

Kajjitōk bwe ren Kwaļo̧k

N̄an jipan̄ ajri ro kwaļo̧k ta eo raar ekkatak ilo m̧weo, kōtļo̧k an kajjojo ajri bōk koņaer kotak juon peba jekjekin heart im kwaļo̧k men ko ekar kōm̧m̧ani n̄an kwaļo̧k iakwe n̄an ro jet.

Katakin Katak eo: Ajri ro Reddikļo̧k

Jon 14:15

Ij kwaļo̧k aō iakwe Jisōs Kraist ilo aō kōjparok kien ko An.

Jipan̄ ajri ro meļeļe bwe remaron̄ kwaļo̧k n̄an Rilo̧mo̧o̧r aer iakwe n̄an E ilo aer kōjparok kien ko An.

M̧akūtkūt ko Maron̄ Kōm̧m̧ani

• Jipan̄ ajri ro lale Jon 14:15. Kajjitōk ippāer n̄an ba “N̄e kom̧ij yokwe eō” n̄e kwoj kotak pepa eo me jekjekin heart. Kajjitōk ippāer n̄an ba “Kōjparok kien ko aō” n̄e kwoj kotake eoon eo.

• Jipan̄ ajri ro ļōmņake jet iaan kien ko an Jisōs. Kajjitōk ippāer n̄an kwaļo̧k wāween ko remaron̄ kōjparok kajjojo kien. Kam̧ool bwe ilo ad kōm̧m̧ani men kein jej kwaļo̧k ad iakwe Jisōs Kraist.

• Al ippān doon kōn juon al kōn kien ko, eo āinwōt “Keep the Commandments” (Children’s Songbook, 146–47).

• Ikkure juon ikkure ilo peij in m̧akūtkūt eo an wiik in ippān ajri ro.

Jon 14:26–27; 15:26; 16:13–14

Jetōb Kwojarjar ej jipan̄ eō.

Jisōs ekar katakin rijilōk ro An m̧ool ko raorōk kōn Jetōb Kwojarjar. Ļōmņak elmen an m̧ool kein maron̄ kōjeraam̧m̧an ajri ro me kwoj katakin er.

M̧akūtkūt ko Maron̄ Kōm̧m̧ani

• Kwaļo̧k pija ko The Last Supper (Gospel Art Book, no. 54). Kōmeļeļeiki ajri ro bwe ilo Kejota eo Āliktata, Jisōs ekar katakin rijilōk ro An kōn Jetōb Kwojarjar. Kwaļo̧k jet iaan m̧ool ko E ekar kwaļo̧ki ilo Jon 14:26–27; 15:26; 16:13–14.

  

  Kejota eo Āliktata, jān Clark Kelley Price

• Kwaļo̧k juon en̄jake me Jetōb Kwojarjar ekar kaenōm̧m̧an eok, tōl eok, ak jipan̄ eok jeļā m̧ool in. Kam̧ool bwe Jetōb Kwojarjar emaron̄ jipan̄ ajri ro ilo ejja wāween in wōt.

• Al ippān doon juon al kōn Jetōb Kwojarjar, eo āinwōt “The Holy Ghost” (Children’s Songbook, 105). Kajjitōk ippān ajri ro n̄an ron̄jake men ko kar kwaļo̧ki ilo al in me Jetōb Kwojarjar ej kōm̧m̧ane.

Jon 17:3

Imaron̄ jeļā kajjien Jemedwōj Ilan̄ im Jisōs Kraist.

Jisōs Kraist ekar kwaļo̧k bwe “mour indeeo” ej n̄an jeļā “juon wōt Anij, im Jisōs Kraist.” Ilo an ajri ro kwoj katakin itok n̄an jeļā kōn Er, renaaj lo jetōbin kajoor me enaaj kōjeraam̧m̧an er ilo aolepān mour ko aer im jipan̄ er bōk mour indeeo.

M̧akūtkūt ko Maron̄ Kōm̧m̧ani

• Riit Jon 17:3, im kajjitōk ippān ajri ro n̄an ron̄jake wōn eo Jisōs ekōņaan bwe jen jeļā kake. Kwaļo̧k juon pija me ej kwaļo̧k wāween ko jemaron̄ jeļā kōn Jemedwōj Ilan̄ im Jisōs Kraist, āinwōt pija in jeje ko rekwojarjar, an baam̧le ekkatak ippān doon, im an juon armej jerbal in jipan̄ n̄an bar juon armej. Kepedoiki pija ko, im kajjitōk ippān ajri ro n̄an bōk kuņaer kōjjedelān̄n̄i im kōmeļeļe ta eo ilo pija eo. Elmen an men kein jipan̄ kōj jeļā kajjien Jemedwōj Ilan̄ im Jisōs Kraist?

• Kōnono n̄an ajri ro kōn men ko remaron̄ būki n̄an jeļā kajjien ro m̧ōttāer. Elmen an em̧m̧anļo̧k ad jeļā kajjien Jemedwōj Ilan̄ im Jisōs Kraist? Kwaļo̧k wāween ko ilo am̧ kar kōm̧m̧ane menin.

Katakin Katak eo: Ajri ro Rerūttoļo̧k

Jon 14:15; 15:10–14

Ij kwaļo̧k aō iakwe Jisōs Kraist ilo aō kōjparok kien ko An.

Ilo am̧ riiti ennaan kein ilo am̧ make ekkatak, ļōmņake ajri ro me kwoj katakin er. Elmen aer naaj jeraam̧m̧an n̄e rej meļeļe bwe aer pokake n̄an Rilo̧mo̧o̧r ej juon kōkkaļļein iakwe eo aer n̄an E?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k wāween ko Jisōs ekar kwaļo̧k ke Ekar pokake Jemedwōj Ilan̄. Kwaļo̧k pija ko kōn mour eo an Rilo̧mo̧o̧r n̄an jipan̄ er (lale Gospel Art Book, nos. 34–35, 56–57). Kajjitōk ippān ajri ro n̄an kwaļo̧k iien ko ke raar pokake Jemedwōj Ilan̄.

• Kajjitōk ippān juon ajri n̄an riiti Jon 14:15. Kōtļo̧k an ajri ro bōk koņaer jin̄aiki pija ko me rej pinej jenkwan armej eo ej pokake, ilo an ajri ro jet kajidedeiki ta eo ekar jin̄aiki. N̄an waanjon̄ak in kien ko, lale N̄an Kōkajoorļo̧k Jodikdik ro bok jidikdik eo (2022). Ewi wāween ilo ad kōjparok kien ko kwaļo̧k n̄an Rilo̧mo̧o̧r ke jej iakwe E?

Jon 14:26; 15:26; 16:13

Jetōb Kwojarjar ej tōl, kaenōm̧m̧an, im kam̧ool kōn m̧ool eo.

Em̧ōj ke an ajri ro kwoj katakin kar bōk mennin letok eo an Jetōb Kwojarjar? Ta eo rejeļā kōn wāween an Jetōb Kwojarjar maron̄ jipan̄ er? Ļōmņake elmen am̧ naaj jipan̄ er meļeļe ļo̧k kōn jerbal eo an Jetōb Kwojarjar.

M̧akūtkūt ko Maron̄ Kōm̧m̧ani

• Leļo̧k n̄an ajri ro eoon kein ilaļ n̄an riiti ilo kurup: Jon 14:26; 15:26; im 16:13. Kajjitōk ippāer n̄an lali naan ko me rej katakin er ta eo Jetōb Kwojarjar ej kōm̧m̧ane. Je naan ko ioon bo̧o̧t eo.

• Kwaļo̧k juon en̄jake me Jetōb Kwojarjar ekar tōl eok, kaenōm̧m̧an eok, kakkōl eok, ak kam̧ool kōn m̧ool eo n̄an eok. Kajjitōk ippān ajri ro n̄an kwaļo̧k jabdewōt en̄jake ko rekar en̄jaki. Elmen aer kile im̧we eo an Jetōb Kwojarjar?

• Kajjitōk ippān kajjojo ajri n̄an jin̄aiki mejen ilo juon peba pāāk. Kabbōle teen̄ki eo, eo ej pinej jenkwan Jetōb Kwojarjar, ilo kajjojo lowaan pāāk. Innām likūt men ko ilo pāāk me ej pinej meram eo, āinwōt m̧ōttan nuknuk, n̄an katakin bwe kāālet ko ad rebōd remaron̄ kadik im̧we ko an Jetōb Kwojarjar ilo mour ko ad. Kōtļo̧k an ajri ro kōm̧akūt men ko jān pāāk ko aer n̄an pinej jenkwan ukweļo̧k.

Jon 15:1–9; 17:3

Jemedwōj Ilan̄ im Jisōs rekōņaan bwe in jeļā kōn Er.

Kwonaaj kōjeraam̧m̧an mour ko an ajri ro n̄an jipan̄ er itok n̄an jeļā kajjien Jemedwōj Ilan̄ im Jisōs Kraist.

M̧akūtkūt ko Maron̄ Kōm̧m̧ani

• Kwaļo̧k juon pijain menin eddōk (āinwōt in) ilo an ajri ro bōk koņaer riiti eoon kein ilo Jon 15:1–9. Elmen an Jisōs Kraist āinwōt juon vain? Ewi wāween ad āinwōt ra ko? Ta eo jemaron̄ kōm̧m̧an n̄an “pād wōt ilo,” ak epaake wōt, Rilo̧mo̧o̧r?

• Kōļap ainikien am̧ riiti Jon 17:3. Kajjitōk ippān ajri ro ta ko rej kōm̧m̧ani n̄an jeļā kajjien Jemedwōj Ilan̄ im Jisōs Kraist. Kwaļo̧k elmen am̧ jeļā Er.

Kōketak Ekkatak ilo M̧weo

Rōjan̄ ajri ro n̄an kwaļo̧k n̄an baam̧le ko aer juon al rekar ekkatak ilo kūlaaj ak ilo iien al.

Kōkm̧anm̧anļo̧k Ad Katakin

Ukukōt m̧akūtkūt ko. N̄e kwoj katakin ajri ro rōreddikļo̧k, komaron̄ lo kakobaba in ļōmņak ko me komaron̄ ukukōti ilo kūlaaj eo am̧ ilo laajrak in jekjen in n̄an ajri ro rōrūttoļo̧k. Āinwōt, m̧akūtkūt ko n̄an ajri ro reddikļo̧k maron̄ ukukōti n̄an katakin ajri ro rōrūttoļo̧k.