Itok eo Kein Karuo

Itok eo Kein Karuo, jān Harry Anderson

Māe 22–28

Josep Smith—Matu 1; Matu 24–25; Mark 12–13; Luk 21

“Nejin Armej Enaaj Itok”

Ļōmņake ta eo ajri ro kwoj katakin rekōņaan jeļā jān Josep Smith—Matu 1; Matu 24–25; Mark 12–13; im Luk 21. Jouj im kōm̧m̧an okoktak ko n̄an ajri ro rōrūttoļo̧k ilo laajrak in n̄an ajri ro reddikļo̧k ilo laajrak in.

pija ej bōk jikin kwaļo̧k

Kajjitōk bwe ren Kwaļo̧k

Bōktok n̄an kūlaaj juon kein ekkatak ak pija n̄an keidi juon iaan būrabōļ ko ak bwebwenato ko ilo riitiin̄ ko an wiik in (āinwōt oiļ eo ej pinej jenkwan virgin ro jon̄oul ak jāān eo ej pinej jenkwan taļōn ko ak kōrā eo emej ļeo pāleen). Kajjitōk ippān ajri ro n̄an kwaļo̧k ta eo rejeļā kōn būrabōļ in ak bwebwenato in.

pija ej bōk jikin katakin

Katakin Katak eo: Ajri ro Reddikļo̧k

Josep Smith—Matu 1:31

M̧okta jān an Jisōs bar itok, gospel in enaaj kwaļo̧k n̄an aolepen laļin.

Juon kōkaļļe ke Jisōs enaaj ro̧o̧ltok ej bwe gospel in An enaaj waļo̧k aolepen laļin. Ajri ro remaron̄ jipan̄ kakūrm̧ool kanaan in ilo kwaļo̧k gospel in.

M̧akūtkūt ko Maron̄ Kōm̧m̧ani

• Kwaļo̧k juon m̧ab, ak pija in laļ in (lale Gospel Art Book, no. 3) im jipan̄ ajri ro ba, “Gospel in … naaj kwaļo̧k n̄an aolepān laļ” (Josep Smith—Matu 1:31). Etke Anij ekōņaan bwe aolep ro Nejin ren ron̄ gospel eo An?

• Kajjitōk ippān ajri ro n̄an kōmājeeji ilo jikin ko ilo ami al ippān doon juon al kōn kwaļo̧k gospel in, āinwōt “I Want to Be a Missionary Now” ak “Called to Serve” (Children’s Songbook, 168, 174).

• Kwaļo̧k pija eo “I’ll Go Where You Want Me to Go” (ChurchofJesusChrist.org). Ilo an ajri ro alooj, jipan̄ er bwini wāween ko remaron̄ kwaļo̧k gospel eo me rej loe ilo bitio eo. Ta wāween ko jet n̄an kwaļo̧k gospel in me rej ļōmņake?

laļin

Gospel eo enaaj kwaļo̧k ilo aolepen laļin Pijaan NASA Johnson Space Center

Matu 25:14–30

Imaron̄ kōjerbal menin letok ko Anij ekar letok n̄an eō.

Ajri ro reddik remaron̄ jeļā menin letok ko im maron̄ ko aer. Jipan̄ er meļeļe bwe menin letok im maron̄ kein rej itok jān Jemedwōj Ilan̄.

M̧akūtkūt ko Maron̄ Kōm̧m̧ani

• Bōktok bwijin jāān n̄an kōjerbali ilo am̧ kwaļo̧k būrabōļ eo kōn taļōn ko, walok ilo Matu 25:14–30. Kwomaron̄ kajjitōkin 3 ajri n̄an pinej jenkwan rijerbal ro jilu. Kōmeļeļiki bwe ilo tōre ko an Jisōs, taļōn̄ ko rej jāān, ak rainin taļōnn emaron̄ meļeļein menin letok im maron̄ ko ad.

• Kajjitōk ippān ajri ro n̄an kwaļo̧k wāween ko ro jineer im jemeer, ro jeier im jatier, rūkaki ro, ak ro m̧ōttaer rekar jipan̄ er. Ta talōņ ko an armej rein rekar jipan̄ er jerbal n̄an ro jet?

• Je jidik naan n̄an ajri ro jiron̄ļo̧k er kōn menin letok im maron̄ ko kwoj loe ippāer. Ilo am̧ kwaļo̧k n̄an kajjojo iaan ajri ro kōn menin letok ko kwoj loe ilo er, rōjan̄ er n̄an kōkm̧anm̧anļo̧k menin letok ko aer im kōjerbali n̄an jerbal n̄an ro jet.

Matu 25:31–46

Jisōs ekōņaan bwe jen jerbal n̄an doon.

Jej jerbal n̄an Jemedwōj Ilan̄ im Jisōs Kraist n̄e jej jerbal n̄an ro ipeļakid. Jipan̄ ajri ro ļōmņaki wāween ko remaron̄ jerbal n̄an ro jet.

M̧akūtkūt ko Maron̄ Kōm̧m̧ani

• Kakkilōklōke būrabōļ in ilo Matu 25:34–46. Jipan̄ ajri ro meļeļe bwe jej jeraam̧m̧an n̄e jej jerbal n̄an ro jet, jej jerbal n̄an Jisōs.

• Kotak juon pijain juon ajri ippān juon pijain Jisōs ej pād ilikin. Ta eo jemaron̄ kōm̧m̧ane n̄an jerbal n̄an ajri in? Joļo̧k pijain ajri eo im kōmeļeļeiki bwe n̄e jej jerbal n̄an ro jet, jej jerbal n̄an Jisōs.

• Kajjitōk ippān ajri ro n̄an jin̄aik pijaier make jerbal n̄an ro jet ilo wāween ko Rilo̧mo̧o̧r ej kōmeļeļeiki ilo Matu 25:35–36. Kajjitōk ippān ro jet n̄an kajidede ba ta eo rej jin̄aiki.

• Kajjitōk ippān ajri ro n̄an kwaļo̧k en̄jake ko n̄e ro rej kwaļo̧k mour ĀinwōtKraist n̄an jerbal n̄an er im baam̧le ko aer.

pija ej bōk jikin katakin

Katakin Katak eo: Ajri ro Rerūttoļo̧k

Josep Smith—Matu 1:31

M̧okta jān an Jisōs bar itok, gospel in enaaj kwaļo̧k n̄an aolepen laļin.

Jipan̄ ajri ro kwoj katakin er ļōmņak kōn wāween ko gospel eo ej kōpooj laļ in n̄an Itok Eo Kein Karuo an Rilo̧mo̧o̧r eo.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k kōjeraam̧m̧an ko raar bōki ak naaj būki kōnke rej membōr in Kabun̄ in an Kraist. Riit ippān doon Josep Smith—Matu1:31, im kajjitōk ippān ajri ro elmen aer en̄jake n̄e gospel in enaaj kōjeraam̧m̧an ajri ro nejin Anij ilo aolepen laļin.

• Kwaļo̧k n̄an ajri ro juon m̧ab in laļin ak laļ eo am̧, im jipan̄ er kalikkar jet jikin ko ijo juon membōr in baam̧le ak m̧ōttam̧ ekar kwaļo̧k gospel in ilo juon mijen.

• Kajjitōk ippān jejjo̧ ajri n̄an pojaktok n̄an kwaļo̧k elmen an baam̧le eo aer ak ro jibun im jim̧m̧an kar bōk gospel in.

• Kajjitōk ippān kajjojo ajri n̄an je etan ro emaron̄ bwebwenato ippān kōn Jisōs Kraist ak kūrtok bwe en jar. Bar kajjitōk ippān ajri ro n̄an kōlaajrakin men ko remaron̄ kōm̧m̧ani n̄an mijinede kiiō.

Matu 25:1–13

Ij make eddoik oktak eo aō n̄an Jisōs Kraist.

Būrabōļ in kōn virgin ro jon̄oul ej kwaļo̧k bwe jejjab maron̄ baroki oktak eo ad n̄an Rilo̧mo̧o̧r jān ro jet. Elmen am̧ maron̄ jipan̄ ajri ro bōk eddoin make oktak eo aer?

M̧akūtkūt ko Maron̄ Kōm̧m̧ani

• Kajjitōk ippān juon ajri bwe en itok n̄an kwaļo̧k ta eo ekar ekkatak jān būrabōļ in kōn virgin ro jon̄oul ilo m̧weo wiik in.

• Jin̄aik juon oiļ in ļaam̧ ioon bo̧o̧t eo, im je naan in kam̧ool. Leļo̧k n̄an kajjojo ajri jidik peba in bili in oiļ, im kajjitōk ippān kajjojo ajri n̄an je ioon men eo enaaj kōm̧m̧ane bwe en em̧m̧anļo̧k an oktak n̄an Rilo̧mo̧o̧r. Kaddāppi peba in oiļ eo ioon bo̧o̧t eo iturin ļaam̧ eo.

• Kajjitōk ippān ajri ro n̄an jipan̄ eok kōm̧m̧ane juon laajrak in men ko n̄an kepooji n̄an eo ej lotok. Elmen an men kein āinwōt juon ak oktak jān wāween ko jemaron̄ pojak ilo jetōb n̄an Itok eo an Rilo̧mo̧o̧r Kein Karuo?

• Ilo peba ko ļalem, je men ko me jeban baroiki. Ilo peba ko ļalem, je men ko me jemaron̄ baroiki. Kwaļo̧k peba ko, im kajjitōk ippān ajri ro n̄an kōjenoļo̧ki n̄an ruo kurup ko. Riit ippān doon Matu 25:1–13. Etke eaorōk n̄an jab pedped ioon ro jet kōn oktak eo ad n̄an Jisōs Kraist?

Matu 25:14–16

Ilo Ekajet eo Āliktata, jenaaj kwaļo̧k n̄an Irooj aolep kōm̧m̧an ko ad.

Ālkin Jerkakpeje eo, Iroon enaaj ekajet kōj pedped ioon ad pokake n̄an kien ko An im bōk en̄taan in pinmuur eo An. Būrabōļ in taļōn ko im būrabōļ in sip eo im kot eo rej katakin kōj kōn Ekajet eo Āliktata.

M̧akūtkūt ko Maron̄ Kōm̧m̧ani

• Kajjitōk ippān jimettan in kūlaaj eo n̄an riit Matu 25:14–30 im jimettan ren riiti Matu 25:31–46. Kajjitōk ippān kurup ko n̄an kōm̧m̧ani būrabōļ ko n̄an kūlaaj eo. Ta eo Irooj ej katakin kōj ilo būrabōļ kein?

• Kajjitōk ippān ajri ro n̄an riiti Matu 25:35–36 ilo kurup im kōm̧m̧ane juon laajrak in men ko remaron̄ kōm̧m̧ani n̄an kwaļo̧k iakwe n̄an Jisōs Kraist.

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an kwaļo̧k n̄an baam̧le ko aer wāween ko remaron̄ in mijinede ro rem̧m̧an im kenono ippān baam̧le ko aer kōn armej ro remaron̄ kwaļo̧k gospel in ippāer.

Kōkm̧anm̧anļo̧k Ad Katakin

Ron̄jake im kōm̧m̧an arin juon bwebwenato. Kōnke em̧m̧an bwebwenato ippān ajri ro, pukōt wāween ko n̄an kobaik er ilo bwebwenatoin jeje ko rekwojarjar kwoj kwaļo̧ki. Remaron̄ jibwe pija ak kein katakin ko, jin̄a pija ko kōn ta eo rej ron̄, im kōm̧m̧an arin bwebwenato eo, ak jipan̄ kwaļo̧k bwebwenato eo. Āliji bwebwenato ko n̄an jipan̄ er kile aorōk in men ko im katak ko an gospel in.

peij in m̧akūtkūt: Rilo̧mo̧o̧r ekōņaan bwe in kwaļo̧k gospel eo