Kejota eo Āliktata, jān William Henry Margetson

Juun 5–11

Jon 14–17

“Koṃwin Pād Wōt ilo Aō Yokwe”

Ilo am̧ riiti katakin ko an Rilo̧mo̧o̧r ilo Jon 14–17, Jetōb Kwojarjar enaaj jipan̄ eok kile enaan ko n̄an eok. Rekoote im̧we ko am̧ kwoj būki.

Rekoote Im̧we ko Am̧

Rainin, jej ņa etan “Kejota eo Āliktata,” ak jejjab jeļā eļan̄n̄e rijilōk ro an Jisōs rekar lukkuun jeļā, ke rekar kuk tok ippān doon n̄an Kejota eo ej kōm̧m̧an aolep iiō, ke enkar iien m̧ōn̄ā eo aer āliktata ippān Rikaki eo aer m̧okta jān mej eo An. Jisōs, ijoke, “jeḷā bwe awa eo An e moottok” (Jon 13:1). Ejjab to E enaaj kar jelm̧ae en̄taan ilo Getsemene, kaarmejete eo im kariab eo jān ro m̧ōttan repaake, im juon mej e liājļōļ ioon dōbwāāl. Ak jekdoon aolepen men kein rekar pojen waļo̧k Im̧aan, Jisōs ekar jab ļōmņak kōn E wōt ak kōn rijilōk ro An. Ta eo rej aikuj jeļā ilo raan ko im iiō ko im̧aan? Katakin ko an Jisōs reobrak kōn iakwe ilo Jon 14–17 ej kwaļo̧k jon̄an An en̄jake kōn rijilōk ro An, iien ko im raan kein. Ippānļo̧k m̧ool ko rellōn̄ im rej letok aenōm̧m̧an me E ekar katakin kar kaenōm̧m̧an eo bwe, ilo m̧ool, E ejjāmin kōmakeik kōj. ““Eļan̄n̄e kom̧ij kōjparok kein ko Aō,” Ekar kallim̧ūr “kom̧ naaj pād ilo Aō yokwe” (Jon 15:10).

Ļōmņak ko n̄an Ekkatak Jeje Ko Rekwojarjar Ippam̧ Make

Jon 14–15

Ij kwaļo̧k aō iakwe n̄an Jisōs Kraist ilo kōjparok kien ko An.

Ilo am̧ riiti Jon 14–15, komaron̄ jeiki ak kōkaļļāik kajjojo iien naan in ej jerbal yokwe. Komaron̄ loe bwe naan eo kien ko emakijkij āliji ilo an iookļo̧k naan eo yokwe ilo jebta kein Ta eo kwoj ekkatak kōn jemjerā eo ikōtaan yokwe im kien ko jān katak ko an Rilo̧mo̧o̧r? Ta naan ko jet im enaan ko kwoj loe an jerbal ippān yokwe ilo jebta kein?

Kejoļo̧kijeņ kōn wāween an iakwe eo an Rilo̧mo̧o̧r jelōt eok.

Bar lale Jon 13:34–35; D. Todd Christofferson, “Pād ilo Aō Iakwe,” Liaona, Nob. 2016, 48–51.

Kejota eo Āliktata, jān Clark Kelley Price

Jon 14–16

Jetōb Kwojarjar ej jipan̄ eō kakūrm̧ool un eo aō āinwōt juon rijilōk an Jisōs Kraist.

Jon̄an in ekar juon men kabūrom̧ōjm̧ōj n̄an rijilōk ro an n̄an ron̄ bwe iien eo aer iipān Rilo̧mo̧o̧r ekar pojen jem̧ļo̧k. Remaron̄ kar bārāinwōt inepata kōn wāween aer naaj jerbal ippān doon ilo an Jako. Ilo am̧ riiti Jon 14–16, kappukot ta eo Rilo̧mo̧o̧r ekar ba n̄an kaenōm̧m̧an er. Eļaptata, kile ta eo Ekar katakin er kōn Jetōb Kwojarjar. Ta eo kwoj ekkatak kake kōn Jetōb Kwojarjar jān naan ko an Rilo̧mo̧o̧r ilo eoon kein ilaļ?

• Jon 14:16–17, 26

• Jon 15:26

• Jon 16:7–11

• Jon 16:12–15

Etke rijilōk ro rekar aikuje kain jipan̄ rōt in jān Jetōb Kwojarjar? Ekōjkan an Jetōb Kwojarjar kar kakūrm̧ool eddo kein n̄an eok? Ļōmņak kōn ta eo komaron̄ kōm̧m̧ane bwe im̧we eo An en kajoorļo̧k ilo mour eo am̧.

Bar lale 3 Nipai 19:9; 27:20; Katak im Bujen Ko 11:12–14; Moses 6:61; Michelle D. Craig, “Spiritual Capacity,” Liahona, Nob. 2019, 19–21.

Jon 15:1–8

Ilo aō pād ilo Kraist, inaaj boktok le ko rem̧m̧an.

Ta eo kwoj ļōmņak ej meļeļein “pād ilo [Kraist]”? (Jon 15:4). Ta “leen” eo leem̧ me ej kwaļo̧k bwe kwoj pād ilo vain eo, eo ej bōk jikin Jisōs Kraist?

Jon 17

Jisōs Kraist ekar ņa jikin rijilōk ro An.

Naan ko an Jisōs kar je ilo Jon 17 kar jeļā kaki āinwōt Jar eo Kōn ro Jet. Ilo jar in, Jisōs ekar jar kōn Rijilōk ro An im “barāinwōt kōn ro renaaj lōke [E] kōn aer in naan” (Jon 17:20). Meļeļein bwe E ekar jar kōn kwe. Ta eo Jisōs ekar kajjitōk jān Jemān ikkijeen kwe im aolep ritōmak ro jet? Ta eo menin ej katakin eok kōn en̄jake ko An n̄an eok?

Jar in ej barāinwōt katakin, m̧ool ko indeeo reļļap. Ta m̧ool ko kwoj loe? Ilo am̧ riiti jebta in, ļōmņak in jeiki ta ko kwoj ekkatak kake kōn men kein itulaļ:

• Jar

• Jemjerā eo an Rilo̧mo̧o̧r ippān Jemān.

• Jemjerā eo an Rilo̧mo̧o̧r ippān rijilōk ro An.

• Ewi wāween an rijilōk ro oktak jān laļ in

• M̧ool ko jet me kwoj loi

Jon 17:11, 21–23

Jemedwōj Ilan̄ im Jisōs Kraist rej juon wōt ilo ejjeļo̧k kalijōkļo̧k.

Ilo jar eo An ilo Jon 17, Jisōs ekar kalikkar An juon wōt ippān Jemān. Ilo jekjek rōt ko Jemān im eo Nejin “juon”? (Jon 17:11, 21–23). Jeļā bwe Rilo̧mo̧o̧r ekar jar bwe rijilōk ro An ren maron̄ juon wōt “āinwōt”—ak ilo jekjek eo wōt me—E im Jemān rej juon (Jon 17:22). Ta meļeļein men eo n̄an eok? Ļōmņak kōn jemjerā ko am̧—n̄an waanjon̄ak, ippān eo pāleem ak ro uwaan baam̧le eo am̧, ippān ward membōr ro, im ippān Rikūrijin ro jet. Ekōjkan am̧ maron̄ jerbal n̄an erom̧ juon wōt in me Jisōs ej ippān Jemān?

Bar lale Quentin L. Cook, “Bōrokuk ilo Kwojarjar im Ippen Doon,” Liaona, Nob. 2020, 18–22; Sharon Eubank, “Kōn Bōro Kuk ilo En̄jake Jej Bōk Kajoor ippān Anij,” Liaona, Nob. 2020, 55–57.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jon 14:5–6.Ro uwaan baam̧le eo remaron̄ itok limoier ilo kajjojo bōk koņaer tōl baam̧le eo am̧ ilo etetalļo̧k ilo juon iaļ. Ekōjkan an Jisōs “iaļ eo”? Ia eo Ej tōl kōj n̄ane?

Jon 14:26–27.Ekōjkan an ainōm̧m̧an eo an Jisōs oktak jān eo “an laḷ lewōj”? Ro uwaan baam̧le eo remaron̄ kwaļo̧k jekjek ko rekar lo aenōm̧m̧an im kajoor jān Jetōb Kwojarjar.

Jon 15:1–8.Emaron̄ kalimomo n̄an riiti eoon kein ilo nam̧ōj tūrin juon vain, juon wōjke, ak juon menin eddōk. Ta eo ej waļo̧k n̄an juon ra n̄e rej joļo̧k jān menin eddōk eo? Komaron̄ ekōnono kōn wāween ad āinwōt ra ko im ta meļeļein n̄an “pād” ilo Rilo̧mo̧o̧r im “jebar leen.”

Jon 15:17–27; 16:1–7.Etke kwoj ļōmņak Jisōs Kraist ekar kakkōl rijilōk ro An kōn jerbal in jum̧ae ko? Ekōjan an aer jum̧ae rijilōk ro an Kraist rainin? Ekōjkan an naan in kapilōk eo an Rilo̧mo̧o̧r ilo eoon kein jipan̄ kōj n̄e jej jelm̧ae jerbal in jum̧ae?

Jon 16:33Ekōjkan an Jisōs Kraist kar anjo̧ jān laļ in? Ekōjkan an Pinmuur eo An boktok aenōm̧m̧an im m̧ōņōņō ? (bar lale Katak im Bujen Ko 68:6).

Jon 17:21–23.Ta emaron̄ jipan̄ baam̧le eo am̧ ekkatak wāween n̄an aer kōļapļo̧k aer juon wōt āinwōt Jisōs Kraist im Jemedwōj Ilan̄. Bōlen komaron̄ ekōnono kōn juon tiim in ikkure em̧m̧antata ippom̧ im wāween aer jerbal ippān doon n̄an kōttōpar juon kōttōpar. Ak komaron̄ ron̄jake juon kuwaer ak kumi in kōjan̄jan̄ im ekōnono kōn wāween an ri al ro juon wōt n̄an kwaļo̧k ainikien kōjan̄jan̄ ko reaiboojoj.

N̄an elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere

Al eo elmakote: “The Holy Ghost,” Children’s Songbook, 105.

Kōkm̧anm̧anļo̧k Ad Katakin

Kōjerbal kein kanne ainikien ko. Ilo am̧ katakin baam̧le eo am̧ kōn jeje ko rekwojarjar, ļōmņak in ron̄jake kape in ainikien ko an jeje ko rekwojarjar, maron̄ lo ilo ChurchofJesusChrist.org ak ilo Gospel Library app. Ron̄jake Jon 14–17 emaron̄ kajoor kōne jebta kein ewōr ie naan ko rellōn̄ an Rilo̧mo̧o̧r.

Jisōs ekar katakin, “Ña vain, koṃ ra ko” (Jon 15:5).