“Māe 29–Juun 4. Matu 26; Mark 14; Jon 13: ‘Ilo Ememej”,’” Itok, Ļoor Eō—N̄an Kajjojo Armej im Baam̧le ko: Kallim̧ur Ekāāl 2023 (2022)

“Māe 29–Juun 4. Matu 26; Mark 14; Jon 13,” Itok, Ļoor Eō—N̄an Kajjojo Armej im Baam̧le ko: 2023

Pija

Kejota eo Āliktata

Ilo Ememej Eō, jān Walter Rane

Māe 29–Juun 4

Matu 26; Mark 14; Jon 13

“Ilo Ememej”

Ilo am̧ riit kōn iien kein reļlap kōmeļeļeik ilo Matu 26; Mark 14; im Jon 13, likkuun lale im̧we ko konaaj bōk, eļaptata im̧we ko me rej kam̧wilaļļo̧k tōmak eo am̧ ilo Jisōs Kraist im kallim̧ūr eo am̧ n̄ane.

Je En̄jake ko Rej Im̧we Eok

Raan eo m̧okta jān An kar mej, Jisōs Ekar leļo̧k n̄an rikaļoor ro An juon men n̄an kakeememej E. Ekar “bōk pilawā, im jar, im ruje, im leḷọk ñan ro rū kaḷoran im ba, Koṃwin bōke im ṃōñā; eñin ānbwinnū. Im Ej bōk kab, im jar, im leḷọk ñan er im ba, Koṃwin otemjej idaak jān e; bwe men in daō” (Matu 26:26–28).

Men eo ekar waļo̧k emaron̄ 2,000 iiō ko, ilo juon jikin eiten aoleped jejjāmin loe, ilo juon kajin eo jejjo wōt iaad emaron̄ meļeļe. Ak kiiō, aolep Jabōt ilo jikin kweilo̧k ko ad make, rikabwijer priesthood ro, rej mālim n̄an kōm̧m̧ane ilo etan Jisōs Kraist, kōm̧m̧ane ta eo Ekar kōm̧m̧ane juon. Rej bōke pilawe eo im dren eo, kōjeram̧m̧an e, im letok n̄an kajjojo iaad, rikaļoor ro An. Ej juon m̧akūtkūt epidodo—emaron̄ ke bar wōr men epidodolok, aurōkļo̧k, jān m̧ōn̄ā pilawe im draak dren? Ak pilawe eo im dren eo rekwojarjar n̄an kōj kōnke rej jipan̄ kōj kemeemej E. Rej wāween ad ba, “Ijjāmin meļo̧kļo̧k E”—ejjab wōt, “Ijjāmin meļo̧kļo̧k ta eo ikar riiti kōn katak ko An im mour eo An.” Ijjelo̧kin, jej ba, “Ijjāmin meļo̧kļo̧k ta eo Ekar kōm̧m̧ane n̄an n̄a.” “Ijjāmin meļo̧kļo̧k wāween An kar lomo̧o̧ren eō ke ikar jan̄ kōn jipan̄.” Im “Ijjāmin meļo̧kļo̧k kallim̧ūr eo An n̄an n̄a im kallim̧ūr eo aō n̄an E—bujen eo kōm ekar kōm̧m̧ane.”

Pija

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

Matu 6:6–13; Mark 14:3–9

“Lio ear kōṃṃan … kapit ānbwinnū ṃokta ñan kalbwin Eō.”

Kōn juon m̧akūtkūt in nebar epidodo, kōrā eo kōmeļeļe kake ilo eoon kein ekar kwaļo̧k bwe ekar jeļā wōn Jisōs im ta eo Ekar pojak in tōn kōm̧m̧ane (lale Matu 26:12). Etke kwoj ļōmņak m̧akūtkūt ko an rekar aurōk ippān Rilo̧mo̧o̧r? (lale eoon 13). Ta eo em̧m̧an ippom̧ kōn kōrā in im tōmak eo an? Kejokļo̧kijeņ kōn wāween am̧ maron̄ ļoor waanjon̄o̧k eo an.

Bar lale Jon 12:1–8.

Matu 26:20–22; Mark 14:17–19

“Irooj, n̄a ke?”

Ta eo kwoj ekkatak kōn rikaļoor ro jān kajjitōk in aer n̄an Irooj ilo eoon kein? Etke kwoj ļōmņak rekar kajjitōk kake? Ļōmņak kōn wāween am̧ naaj maron̄ kajjitōk ippān Irooj, “n̄a ke?”

Lale bar Dieter F. Uchtdorf, “Lord, Is It I?,” Liaona, Nob. 2014, 56–59.

Matu 26:26–29; Mark 14:22–25

Kwojkwoj eo ej juon iien em̧m̧an n̄an kemeemej e Rilo̧mo̧o̧r.

Ke Rilo̧mo̧o̧r ekar kwaļo̧k kadkad in kwojkwoj eo n̄an rikaļoor ro An, ta ļōmņak ko im en̄jake kwoj pijaikļo̧k ke renkar pād ippāer? Ļōmņak kōn menin ilo am̧ riit kōn en̄jake eo aer ilo Matu 26:26–29 and Mark 14:22–25. Etke kwoj ļōmņak Jisōs ekar kālet wāween n̄an ad kōkeememej E? Komaron̄ barānwōt kejokļo̧kijeņ kōn en̄jake ko kwar bōki ilo iien kwojkwoj eo. Ewōr ke jabdewōt men komaron̄ kōm̧m̧ane n̄an kōm̧m̧an bwe en̄jake eo am̧ en ļapļo̧k an ekwojarjar im ļap meļeļein?

Ālikin am̧ riiti im kejokļo̧kijeņ kōn eoon kein, komaron̄ je jet men kwoj en̄jake n̄an keememej kōn Rilo̧mo̧o̧r? Komaron̄ etale men kein ilo iien eo tok juon n̄e konaaaj bōk kwojkwoj eo. Komaron̄ barāinwōt etale er ilo bar jet iien, āinwōt juon wāween eo n̄an “keememej E iien otemjej” (Moronai 4:3).

Bar lale Luk 22:7–39; 3 Nipai 18:1–13; Katak im Bujen Ko 20:76–79; Gospel Topics, “Sacrament,” topics.ChurchofJesusChrist.org; “Always Remember Him” (bitio), ChurchofJesusChrist.org.

Jon 13:1–17

Rilo̧mo̧o̧r ej waanjon̄o̧k eo ad in ettā ilo ad jerbal n̄an ro jet.

Ilo etan Jisōs, kwaļe neen bar juon armej ekar juon jerbal n̄an rijerbal ro, ejjab ritōl ro. Ak Jisōs ekar kōņaan bwe rikaļoor ro an ren oktak aer ļōmņak kōn ta meļeļein n̄an tōl im jerbal. Ta enaan ko kwoj loe ilo naan ko im kōm̧m̧an ko an Rilo̧moor ilo Jon 13:1–17? Ilo m̧anit eo am̧, kwaļe neen ro jet emaron̄ juon kōkaļļe in wāween jerbal in jipan̄. Ak ļōmņak kōn ta eo komaron̄ kōm̧m̧an n̄an ļoor waanjon̄o̧k eo an Rilo̧mo̧o̧r kōn ettā ilo jerbal in jipan̄.

Emaron̄ barāinwōt letok ļōmņak n̄an kile men ko me Jisōs ekar jeļā im en̄jake ilo iien in ekwojarjar ippān Rijilōk ro An (lale eoon ko 1 im 3). Ta eo im̧we kein rej jipan̄ eo meļeļe kōn Rilo̧mo̧o̧r?

Bar lale Luk 22:24–27.

Jon 13:34–35

Iakwe eo aō n̄an ro jet ej juon kōkaļļe bwe ij juon rikaļoor an Jisōs Kraist.

Moktaļo̧k, Jisōs ekar leļo̧k juon kien n̄an “kwōn yokwe ri turuṃ im āinwōt kwe” (Matu 22:39). Kiiō E ekar leļo̧k “juon kien ekāāl.” Ta eo kwoj ļōmņak ej meļeļein n̄an iakwe ro jet āinwōt an Jisōs iakwe eok? (lale Jon 13:34).

Komaron̄ barāinwōt kejokļo̧kijeņ kōn wāween an jet armej jeļā bwe kwoj juon rikaļoor an Jisōs Kraist. Ekōjkan am̧ maron̄ kōm̧m̧an bwe iakwe eo am̧ ej kalikkar m̧wil ko m̧wilin juon ri Kūrijin?

Pija

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Matu 26:26–29; Mark 14:22–25.Ta en̄jake eo an baam̧le eo am̧ ilo iien kwojkwoj eo kajojo wiik? Riit kōn kwojkwoj eo m̧oktata enaaj kōketak juon iien ekōnono kōn aurōkin kwojkwoj eo im wāween ko n̄an kōkm̧anm̧anļo̧k en̄jake eo am̧. Ļōmņak in kwaļo̧k juon pijaan Passing the Sacrament (Gospel Art Book, no. 108) im kwaļo̧k ļōmņak ko kōn ta eo komarn̄ kōm̧m̧ane m̧okta, ilo iien, im ālikin kwojkwoj eo.

Kwojkwoj eo ej jipan̄ kōj keememej Jisōs Kraist.

Matu 26:30.Ļōmņak in al juon al, āinwōt an kar Jisōs im Rijilōk ro An kōm̧m̧ane—bōlen juon al in jar in kwojkwoj. Ekōjkan an al juon al in jar maron̄ kar juon kōjeram̧m̧an n̄an Jisōs im Rijilōk ro An ilo iien eo? Ekōjkan an al in jar ko juon kōjeram̧m̧an n̄an kōj?

Jon 13:1–17.Komaron̄ kōņaan kwalo̧k n̄an baam̧le eo am̧ juon pija ilo jem̧ļo̧kin unin tōl in ilo am̧ riiti eoon kein. Ta m̧ool ko Rilo̧mo̧o̧r ekar katakin jān kōm̧m̧an ko An? Ta meļeļe ko ilo pija in emaron̄ jipan̄ eok meļeļe m̧ool kein? Bōlen ro uwaan baam̧le eo am̧ remaron̄ kwaļo̧k ekōjkan mour kōn m̧ool kar boktok n̄an er m̧ōņōņō (lale Jon 13:17).

Jon 13:34–35Ālikin am̧ riiti eoon kein, komaron̄ ekōnono ippān doon kōn wāween an jet armej jeļā bwe kwoj rikaļo̧or ro an Jisōs Kraist. Ilo jekjek rōt eo Rilo̧mo̧o̧r ekōņaan bwe ro ren jeļā kake ro rej ļoor E? Komaron̄ kajjitōk ippān ro uwaan baam̧le eo am̧ n̄an ekōnono kake armej ro iakwe eo aer n̄an ro jet ej kwaļo̧k bwe rej m̧oolin rikaļoor ro an Jisōs Kraist. Komaron̄ barāinwōt ekōnono kōn wāween ko komaron̄ kwaļo̧k eļapļo̧k iakwe āinwōt juon baam̧le.

N̄an ļōmņak ko rellōn̄lo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Love One Another,” Children’s Songbook, 136.

Kōkm̧anm̧anļo̧k Am̧ Make Ekkatak

Kejokļo̧kijeņ. Jeje ko rekwojarjar ewōr ie meļeļe ko ilo jetōb me jemaron̄ likjab jeni n̄e jej riit bajjōk, āinwōt ad naaj kōm̧m̧ane n̄an kein riit ko jet. Jab m̧ōkaj in kadedeļo̧k juon jepta. Bōk iien n̄an ļōmņak m̧wilal kōn ta eo kwoj riiti.