musangano wesakaramende

Nyamavhuvhu 28–Gunyana 3

1 Vakorinte 8–13

Nyamavhuvhu 28–Gunyana “Imi Muri Muviri waKristu”

Apo paunoverenga 1 Vakorinte 8–13, Mweya Mutsvene ungangotaura kwauri nenzira dzisiri pachena (ona 1 Madzimambo 19:11–12). Kunyora pasi manzwiro aya kunozokubatsira kuyeuka manzwiro nepfungwa zvawakava nazvo panguva yokunzvera yako.

Nyora Pasi Manzwiro Ako

Munguva yaPauro, Korinte yaiva nzvimbo yokutengeserana yakapfuma yaiva nevagari vaibva kwose kwose muUmambo hweRoma. Netsika uye zvitendero zvakasiyana siyana zvizhinji kudaro muguta racho, nhengo dzeChechi muKorinte dzakatambudzika kuchengetedza rubatano, saka Pauro akatsvaka kuvabatsira kuti vawane rubatano mutendero yavo muna Kristu. Rubatano urwu rwaifanira kuva runopfuura kungova kugarisana kune runyararo; Pauro akanga asiri kuvakumbira kuti vangova vanotambira siyano dzavo chete. Pane kudaro, akadzidzisa kuti apo paunopinda muChechi yaJesu Kristu, “unobhabhatidzirwa mumuviri mumwe,” uye nhengo yomuviri yose inodikanwa (1 Vakorinte 12:13). Apo nhengo imwechete painorasika, zvakafanana nokurasikirwa nemutezo, uye muviri unova usina simba semhedzisiro. Apo nhengo imwechete painotambura, tinofanira tose kuzvinzwa uye toita chikamu chedu kuzvirerutsa. Murudzi urwu rwerubatano, siyano hadzingotambirwi chete asi dzinokosheswa, nokuti kana pasina nhengo dzine zvipo nekwaniso dzakasiyana siyana, muviri unozova usingashandi zvakakwana. Saka kunyangwe uchinzwa sokuti wakangogara uri wakagadzikana muChechi kana kuti uchizviwana uchinetsekana kuti uri wobwo zvechokwadi here, shoko raPauro kwauri nderekuti rubatano harurevi rufanano. Unoda vamwe vako Vatendi, uye vamwe vake Vatendi vanokuda.

mufananidzo wekunzvera kwako wega

Mazano eKunzvera Magwaro Matsvene Kwako Wega

1 VaKorinte 10:1–13

Mwari vanopa nzira yokukunda nayo chiedzo.

Zviitiko zvepamweya, kunyangwe izvo zvinoshamisa zvacho, hazvitidziviriri kubva kuzviedzo izvo zvinova “zvavanhu vose” (1 Vakorinte 10:13). Ichi chingangova chimwe chikonzero icho Pauro chaakanyorera pamusoro pamanetsekero nezviedzo aiita vaIsraeri muzuva raMosesi, kunyangwe zvazvo vaiona zvishamiso zvikurusa (ona Eksodo 13:21; 14:13–31). Apo paunoverenga 1 Vakorinte 10: 1–13, ndedzipi yambiro muzviitiko zvavaIsraeri dzinoratidzika kushanda kwauri? Ndeapi marudzi “ekukunda” zviedzo ayo Baba Vokudenga avakakupa? (onawo Aruma 13:27–30; 3 Nifai 18:18–19).

1 Vakorinte 10:16–17; 11:16–30

Sakaramende inotibatanidza senhengo dzeChechi yaKristu.

Kunyangwe zvazvo sakaremende ichisanganisira kuzvipira kwemunhu pachake pakati pako naIshe, chiitikowo chaunogoverana navamwe. Kazhinji nguva dzose tinotora sakaremende pamwechete, seboka raVatendi. Verenga izvo Pauro zvaakadzidzisa pamusoro pesakaramende, uye funga pamusoro pekuti chisungo chinoera ichi chinokwanisa sei kubatsira “vakawanda” kuva “mumwechete” muna Kristu (1 Vakorinte 10:17). Kutora sakaramende kunokubatsira sei kunzwa kuva pedyo kuna Kristu uye kuna vamwe vatendi? Ndima idzi dzinoshandura sei manzwiro ako pamusoro pesakaramende uye nenzira yaunogadzirira kuitora?

1 Vakorinte 11:11

Muchirongwa chaMwari, varume namadzimai vanodikanwa nemumwe nemumwe wavo.

Muna 1 Vakorinte 11:4–15, Pauro akataura tsika dzemagariro avanhu idzo dzatisingatevedzeri nhasi. Zvisinei, Pauro akadzidzisawo chokwadi chakakosha icho chinoshanda nokusingaperi, chinowanikwa mundima 11. Chii chaunofunga kuti ndima iyi inoreva, uye sei yakakosha? Gosa David A. Bednar vakadzidzisa kuti, “Murume nemudzimai vakaitirwa kuti vadzidzisane,vasimbisane, varopafadzane, uye vadanane” (“We Believe in Being Chaste,” Liona, Chivabvu 2013, 42). Chokwadi ichi chinofanira kushandura muchato sei? Chinofanira kushandura sei nzira yatinoshandira nayo muChechi?

­

1 VaKorinte 12–13

Zvipo zvemweya zvinopuwa kuitira rupundutso rwavana vose vaBaba Vokudenga.

Mudorongodzwa wezvipo zvemweya muna 1 Vakorinte 12–13 hausi wakazara. Asi inzvimbo yakanaka yokutangira apo paunodoma uye nokufungisisa zvipo izvo Baba Vokudenga zvavakakupa. Chinyorwa chinoti “Zvipo zvoMweya” muMisoro yenyaya yeVhangeri (topics.ChurchofJesusChrist.org) chingangokubatsira kunzwisisa zvipo izvi zvirinani. Apo paunoverenga mudorongodzwa waPauro wezvipo, ungangowedzera zvimwe izvo zvawakacherechedza muna vamwe, mauri, uye muvanhu vari mumagwaro matsvene. Kana uine ropafadzo rapatiriyaki, ringangova rinotaura zvimwe zvezvipo zvomweya zvako. Zvipo izvi zvinokubatsira sei kuropafadza vamwe? Funga pamusoro pamatsvakiro aungaita “noushingairi zvipo zvikuru” (1 Vakorinte 12:31).

Onawo 1 Vakorinte 14; Moronai 10:8–21, 30; Dzidziso neZvibvumirano 46:8–26; Misimboti yeChitendero 1:7.

mufananidzo wekunzvera kwemhuri

Mazano ekuNzvera Magwaro Matsvene kweMhuri uye eNguva yeMhuri Pamba Manheru

1 VaKorinte 9:24–27.Sezvo Pauro akaenzanisa kurarama vhangeri nokumhanya nhangemutange, munokwanisa kuita nhangemutange yemhuri kuratidza pfungwa yake. Ipai korona kumunhu wose anopedza nhangemutange yacho, uye mokurukura kuti avo vose vanoshingaira mukutevera Jesu Kristu muupenyu huno vanozohwina mubairo “usingawori” (1 Vakorinte 9:25; onawo 2 Timotio 4:7–8). Chii chinoitwa nemumhanyi kuti agadzirire kutora chinhano munhangemutange? Chii chatinokwanisa kuita kugadzirira kudzokera kuna Baba Vokudenga?

vamhanyi vari panzira

Pauro anoenzanisa kurarama vhangeri nokumhanya nhangemutange.

1 VaKorinte 12:1–11.Mushure mokuverenga ndima idzi pamwechete, funga pamusoro pokupa munhu wose bepa rakanyorwa zita reimwe nhengo yemhuri pamusoro. Kumbira munhu wose kuti aite mudorongodzwa wezvipo zvomweya zvaanocherechedza kuti munhu iyeye anazvo. Unokwanisa zvino kupfuudza mapepa acho nemudenderedzwa kusvikira munhu wose awana mukana wokunyora pamusoro pezvipo zvenhengo yemhuri yoga yoga.

1 VaKorinte 12:3.Sei Mweya Mutsvene uchidikanwa kuitira kuwana uchapupu hwaJesu Kristu? Chii chatinokwanisa kuita kukoka Mweya Mutsvene kuti usimbise uchapupu hwedu Hwake?

1 VaKorinte 12:12–27.Fananidzo yaPauro yemuviri inokwanisa kuva nzira isingakanganwikwi yokutsanangura rubatano rwemhuri. Somuenzaniso, nhengo dzemhuri dzinokwanisa kuedza kudhirowa muviri unenge ungori maziso kana nzeve chete (ona ndima 17). Ndima idzi dzinotaurei pamusoro pemabataniraro atinofanira kuita senhengo dzemhuri?

1 VaKorinte 13:4–8.Tsanangudzo yaPauro yerudo rwakadzama ingangoita chirevo chinokurudzira chemhuri yenyu. Unokwanisa kupa nhengo yemhuri yoga yoga ndevo yokunzvera mundima 4–8 uye ozodzidzisa mhuri yose izvo zvainoreva achishandisa tsanangudzo, mienzaniso, uye zviitiko zvake pachake. Muponesi muenzaniso hwehunhu uhwu sei? Munokwanisawo kuita maposita pamwechete eimwe neimwe yendevo idzi uye moaturika nomumba menyu mose. Shandisai unyazvi!

Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki.

­

Kunatsurudza Kudzidzisa Kwedu

Turika chinyorwa chitsvene Turika ndima yaunowana yakakosha munzvimbo yainozonekwa nenhengo dzemhuri nguva zhinji. Koka dzimwe nhengo dzemhuri kuti dzitore majano mukusarudza chinyorwa chitsvene chokuturika.

musangano wesakaramende

“Chingwa chatinomedura hakuzi kusongana nomuviri waKristu here? Isu vazhinji tiri chingwa chimwe, uyemuviri mumwe” (1 Vakorinte 10:16–17).