Jesu achitaura kumwana mudiki

Gunyana 18–24

2 VaKorinte 8:13

“Mwari Unoda Munhu Unopa Nomufaro”

Kunyora pasi manzwiro ezvemweya kunozokubatsira kuyeuka zvaunodzidza panguva yekunzvera magwaro matsvene. Unokwanisa kunyora mujenari raunonyora zvaunonzvera, kunyora manotsi mumicheto yemagwaro matsvene ako, kuisa manotsi muapp yako yeRaibhurari yeVhangeri, kana kurekodha odhiyo yepfungwa dzako.

Nyora Pasi Manzwiro Ako

Chii chaungazoita kana ukanzwa kuti gungano reVatendi mune imwe nzvimbo riri kunetseka muhurombo? Aya ndiwo mamiriro ezvinhu akatsanangurwa naPauro kuVatendi vechiKorinte muna 2 VaKorinte 8–9. Aitarisira kunyengetedza Vatendi vechiKorinte kuti vape zvimwe zveupfumi hwavo kuVatendi vanoshaya. Asi kupfuura chikumbiro chezvipo, mashoko aPauro ane zvokwadiwo zvakadzama pamusoro pekupa: “Mumwe nomumwe ngaaite sezvaakafunga pamwoyo; arege kuita nokuchema, kana nokurovererwa; nokuti Mwari unoda munhu unopa nomufaro ”(2 VaKorinte 9:7). Muzuva redu, kuchine Vatendi pasi rose vanoda rubatsiro. Dzimwe nguva zvikuru zvatinokwanisa kuvaitira kutsanya uye topa mipiro yekutsanya. Mune mamwe mamiriro ezvinhu, kupa kwedu kunokwanisa kuva kwaunoita iwe wega uye kwako pachako. Zvisinei nerudzi rwekuzvipira rwatinoita, zvakakosha kuti tiongorore kurudziro dzedu dzekupa. Kuzvipira kwedu iratidzo dzerudo here? Mushure mezvose, rudo ndirwo rwunoita kuti mupi afare.

mufananidzo wekunzvera kwako wega

Mazano eKunzvera Magwaro Matsvene Kwako Wega

2 VaKorinte 8:1–15; 9:5–15

Ndinokwanisa kugovera nemufaro izvo zvandiinazvo kuropafadza varombo nevanoshaya.

Kune vanhu vazhinjisa vanoshaya pasi rose. Tingazvikwanisa sei kuita mutsauko? Gosa Jeffrey R. Holland vakapa rairo iyi: “Kunyangwe tiri vapfumi kana varombo, tinofanira ‘kuita zvatinokwanisa’ apo vamwe pavanoshaya [ona Marko 14:6, 8]. … [Mwari] vanozokubatsira uye nekukutungamirira muzviito zvine mutsa zveudzidzi kana neushingairi uchida uye uchinamata uye uchitsvaka nzira dzekuchengeta murairo uyu waVakatipa kakawanda” (Are We Not All Beggars?,” Liahona, Mbudzi 2014, 41).

Verenga 2 VaKorinte 8:1–15; 9:6–15, uchinyora pasi misimboti yakadzidziswa naPauro pamusoro pekutaririra varombo nevanoshaya. Chii chinokukurudzira pamusoro perairo yaPauro? Unogona kunamatira nhungamiro pamusoro pezvaungaite kuropafadza mumwe munhu anoshaiwa. Iva nechokwadi chekunyora pasi api zvawo manzwiro aunogamuchira uye woita chimwe chinhu paari.

Onawo Mosaya 4:16–27; Aruma 34:27–29

2 VaKorinte 11:1–6, 13–15; 13:5–9

“Zviidzei, muone kana muri pakutenda.”

Nhasi, semuzuva raPauro, kune avo vanotsvaka kutitsausa kubva “pakururama kuri muna Kristu” (2 Vakorinte 11:3). Nechikonzero ichocho, zvakakosha kuti uite zvakataurwa naPauro: “Zviidzei muone kana muri pakutenda” (2 Vakorinte 13:5). Unokwanisa kutanga nhanho iyi nekufunga pamusoro pezvazvinoreva kuva “pakutenda.” Unoziva sei kana uri murutendo? Tsvaka mikana yauinayo yekuzviongorora.

Sechikamu cheongororo yako, ungangofungisisawo ndevo inoti “kururama kuri muna Kristu” (2 Vakorinte 11:3). Wakawana sei kuchena mwoyo muna Kristu uye vhangeri rake? Pfungwa dzako dzingango “svibiswa dzitsauke pakururama nokuchena mwoyo [ikoko]” sei? Irairo ipi inobatsira yaunowana muna 2 Vakorinte 11:1–6, 13–15?

Fungawo pamusoro perairo iyi inobva kuna Mutungamiri Dieter F. Uchtdorf inoti: “Kana uchimbofunga kuti vhangeri harisi kushanda zvakanyanyonaka kwauri, ndinokukoka kuti umbomira, uongorore upenyu hwako kubva pamafungiro makuru ezvemweya, uye worerutsa maoenero ako ehudzidzi. Nangisa pfungwa padzidziso, misimboti, uye mashandisirwo akakosha evhangeri. Ndinovimbisa kuti Mwari vanozokutungamirira nekukuropafadza panzira yako yeupenyu hune gutsikano, uye vhangeri rinozoshanda zvirinani kwauri zvechokwadi ” (“It Works Wonderfully!,” Liahona, Mbudzi 2015, 22).

2 VaKorinte 12:5–10

Nyasha dzeMuponesi dzakakwana kundibatsira kuti ndiwane simba muutera hwangu.

Hatizive kuti “munzwa munyama” waPauro waiva chii, asi tose tine minzwa yedu pachedu yatinoshuvira kuti dai Mwari vaiibvisa kubva muupenyu hwedu. Funga pamusoro peminzwa yako apo paunoverenga 2 VaKorinte 12:5–10, uye fungisisa izvo zvaunodzidza pamusoro paJesu Kristu mundima idzi. Chii chakadzidziswa naPauro mundima idzi pamusoro pemiedzo uye utera? Zvinorevei kwauri kuti “nyasha dzaMwari dzinokuringana”?

Onawo Mosaya 23:21–24; 24:10–15; Eta 12:27; Moronai 10:32–33.

mufananidzo wekunzvera kwemhuri

Mazano ekuNzvera Magwaro Matsvene kweMhuri uye eNguva yeMhuri Pamba Manheru

2 VaKorinte 8–9.Chii chatinowana muzvitsauko izvi chinotikurudzira kuti tinanavire kuvarombo nevamwe vanoshaya? Ino ingangova nguva yakanaka yekuronga chiito chekushandira semhuri kune mumwe munhu anoshaya.

2 VaKorinte 9:6–7.Mhuri yako inoziva here mumwe munhu anokwanisa kutsanangurwa “semupi anemufaro”? Tingakwanise sei kuita kuti kushandira kwedu kune vamwe kunyanye kuva nomufaro? Nhengo dzemhuri diki dzinokwanisa kugadzira mabheji anoti “Ndiri mupi anomufaro.” Unokwanisa kupa mubairo wemabheji acho kunhengo dzemhuri apo papi zvapo paunovaona vachishandirana nemufaro.

2 VaKorinte 10:3–7.Ungakwanisa sei kudzidzisa mhuri yako pamusoro “pehondo” yedu yekurwisa huipi? Mhuri yako ingafarire here kuvaka rusvingo kana nhare nezvigaro nemagumbeze? Izvi zvinokwanisa kutungamirira kuhurukuro pamusoro pokuti tingakanda pasi sei zvinhu zvinotitsausa kubva kuna Mwari uye kuti “[tingaunza sei] muutapwa mifungo yose kuti iteerere Kristu.” Ndezvipi “zvombo” zvemweya zvatinoshandisa kudzora pfungwa dzedu? (ona VaEfeso 6:11–18).

2 VaKorinte 11:3.Chii chingakwanise kuitwa nemhuri yako kuti vanyanye kunangisa pfungwa “pakururama kuri muna Kristu”?

Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki.

 

Kunatsurudza Kunzvera Kwako Wega

Nyora Pasi Manzwiro Ako. Gosa Richard G. Scott vakati: “Ruzivo rwakanyorwa pasi zvakanaka ruzivo rwunowanikwa munguva yakaoma. … [Kunyora pasi nhungamiro yemweya] kunowedzera mikana yekugamuchira chimwe chiedza” (“Acquiring Spiritual Knowledge,” Ensign, Mbudzi 1993, 88; onawo Teaching in the Savior’s Way, 12, 30).

vechidiki vachibatsira nemushando wepurojekiti

“Mumwe nomumwe ngaaite sezvaakafunga pamwoyo; arege kuita nokuchema, kana nokurovererwa, nokuti Mwari unoda munhu unopa nomufaro” (2 VaKorinte 9:7).