usapho lujonge kwiifoto

EyeDwarha 2–8

Abase-Efese

“Ukuze abaNgcwele baSulungekiselwe”

Ingaba uyalubona naluphi na unxibelelwano phakathi kwemiyalezo kwinkomfa yajikelele kunye neNcwadi kaPawulos eya kwabase-Efese?

Bhala Iimvakalelo Zakho

Xa ivangeli yayiqala ukusasazeka e-Efese, yabangela “inkathazeko engencinane” (IZenzo 19:23) phakathi kwabase-Efese. Amagcisa asekuhlaleni awayesenza iitempile zothixokazi womhedeni abona ubuKrestu njengesisongelo kubomi bawo, kwaye kungekudala “bazala ngumsindo, … wazala umzi uphela sisidubedube ”(bona IZenzo 19:27–29). Yiba nomfanekiso-ngqondweni ungumntu omtsha oguqukele kwivangeli kwimeko enjalo. Ama-Efese amaninzi amkela kwaye aphile ngeendaba ezilungileyo phakathi kwesi “saqunge” (IZenzo 19:40), kwaye uPawulos wabaqinisekisa ukuba “uKrestu … luxolo lwethu” (Abase-Efese 2:13–14). La mazwi, kunye nesimemo sakhe esithi “mabukhweleliswe kuni bonke ubukrakra, nomsindo, nengqumbo, nengcolo, nonyeliso.” (Abase-Efese 4:31), abonakala ngathi afike ngexesha kwaye ayathuthuzela ngoku njengokuba ayenjalo ngelo xesha. Kuma-Efese, njengamntu ngamnye nakuthi, amandla okumelana nobunzima asuka “eNkosini, nasekuqineni kokomelela kwayo.” (bona Abase-Efese 6:10–13).

umfanekiso wokuzifundela wedwa

Iingcebiso Zokuzifundela Izibhalo Wedwa

Abase-Efese 1:4–11, 17–19

UThixo ukhethe, okanye wandimisela kwangaphambili, ukuzalisekisa uxanduva oluthile emhlabeni.

UPawulos wathetha ngabaNgcwele “abamiselwa ngenxa engaphambili” nguThixo kwaye “bonyulwa … kwaphambi kokusekwa kwehlabathi” ukuba babe ngabantu baKhe. Nangona kunjalo, njengoko uMongameli Henry B. Eyring ephawulile, oku akuthethi “ukuba uThixo umele ukuba wamisela kwangaphambili ukuba ngabaphi na abantwana baKhe awayeza kubasindisa kwaye wenza ivangeli yafumaneka kubo, xeshikweni abo bangazange bayive ivangeli ngokulula babengo ‘nyulwanga.’ … Icebo likaThixo linothando ngakumbi kwaye linobulungisa kunoko. UBawo wethu oseZulwini unolangazelelo lokuqokelela kwaye asikelele lonke usapho lwaKhe” (“Gathering the Family of God,” Liahona, Canzibe 2017, 20–21). Bonke abantwana bakaThixo banokwamkela ivangeli kunye nemimiselo yayo ngenxa yomsebenzi owenzelwa abafileyo kwiitempile ezingcwele.

Nangona kungekho mntu owamiselwa ngenxa engaphambili ukuba asindiswe okanye angasindiswa, isityhilelo sanamhlanje sifundisa ukuba abanye babantwana bakaThixo bonyulwa, okanye “abaziwayo ngenxa engaphambili,” kwihlabathi langaphambi kokuzalwa ukuzalisekisa uxanduva oluthile ekufezekiseni iinjongo zikaThixo emhlabeni. Njengoko ufunda Abase-Efese 1, cinga nzulu ngendlela esebenza ngayo le nyaniso kuwe.

Abase-Efese 1:10

UThixo uyakuthi “azihlanganisele zonke izinto kuye uKrestu.”

Kutheni le nto ucinga ukuba umhla wethu ubizwa ngokuba “kukuzaliseka amaxesha”? Kunokuthetha ntoni “azihlanganisele zonke izinto kuye uKrestu”? Njengoko ucinga nzulu ngala mabinzana, funda ezi zibhalo zilandelayo: Abase-Efese 4:13; 2 Nifayi 30:7–8; IMfundiso neMinqophiso 110:11–16; 112:30–32; 128:18–21. Unokuziva uphenjelelwe ukuba ubhale iinkcazo zakho zala mabinzana.

Abase-Efese 2:19–22; 3:1–7; 4:11–16

IBandla lisekelwe kubapostile nakubaprofeti, kwaye uYesu Krestu lilitye lembombo eliyintloko.

Ngokubhalwe kwAbase-Efese 2:19–22; 3:1–7; 4:11–16, kutheni sinabaprofeti nabapostile? Cinga ngemiyalezo evela kubaprofeti kunye nabapostile oyivileyo ngexesha lenkomfa yajikelele. Iimfundiso zabo zizalisekisa njani iinjongo ezichazwe nguPawulos? Umzekelo, zikuncede njani ezi mfundiso ukuba “ungaphetshethwa ngumoya wonke wemfundiso”?

UYesu Krestu ufana njani nelitye lembombo leBandla? Ufana njani Yena nelitye lembombo ebomini bakho?

Bona kananjalo IZenzo 4:10–12.

ilitye lembombo lesakhiwo

UYesu Krestu lilitye lembombo leBandlaa.

Abase-Efese 5:21-6:4

Ukulandela umzekelo woMsindisi kungomeleza ubudlelwane bam bosapho.

Njengoko ufunda Abase-Efese 5:21–6:4, cinga ngendlela ingcebiso kule miqolo engathi yomeleze ngayo ubudlelwane bosapho lwakho.

Kubalulekile ukuba uqaphele ukuba amazwi kaPawulos ku-Abase-Efese 5:22–24 aye bhalwe kwimeko yenkcubeko yentlalo yexesha lakhe. Abaprofeti nabapostile namhlanje bafundisa ukuba amadoda awaphakamanga kunabafazi kwaye amaqabane enzelwe ukuba abe “ngamaqabane alinganayo” (bona “USapho: IsiBhengezo kwiHlabathi,” ChurchofJesusChrist.org). Nangona kunjalo, usenokufumana ingcebiso efanelekileyo ku-Abase-Efese 5:25–33. Umzekelo, uKrestu ulubonisa njani uthando lwaKhe kwabaNgcwele? Oku kuthetha ntoni malunga nendlela amaqabane, njengamaqabane alinganayo, ekufuneka ephathane ngayo? Yeyiphi imiyalezo ozifumanela yona kule miqolo?

Abase-Efese 6:10–18.

Isikrweqe sikaThixo siya kundikhusela ebubini.

Njengoko ufunda Abase-Efese 6:10–18, cinga ukuba kutheni uPawulos abize isikrweqe ngasinye ngendlela awasenza ngayo. Sikukhusela kwintoni “sonke isikrweqe sikaThixo”? Yintoni onokuyenza ukunxiba ngokupheleleyo isuntswana ngalinye lesikrweqe yonke imihla?

Bona kananjalo 2 Nifayi 1:23; IMfundiso neMinqophiso 27:15–18.

umfanekiso wofundo losapho

Iingcebiso Zofundo Lwezibhalo Zosapho kunye noMhlangano Wangorhatya Wosapho

Abase-Efese 1:10. UThixo uzihlanganisa njani zonke izinto kuKrestu? Sisikeleleke njani ngenxa yoku kuhlanganiswa?

Abase-Efese 2:4–10; 3:14–21.Mema amalungu osapho ukuba abelane ngamava apho aye aluva khona uthando nenceba kaThixo noYesu Krestu echazwe kule miqolo.

Abase-Efese 2:12–19.Usapho lwakho lunokonwabela ukwakha iindonga ngemiqamelo okanye ezinye izinto olunazo ekhayeni emva koko uziwise phantsi. Ngelixa uPawulos wayethetha “ngodonga” olwaluphakathi kweeNtlanga namaYuda, zintlobo zini zeendonga ezahlula abantu namhlanje? UYesu Krestu uthe “wazichitha” njani ezi ndonga? Yena uthi “asixolelanise [thina] noThixo njani”? (umqolo 16).

Abase-Efese 6:10–18.Usapho lwakho lunokuzenzela “isikrweqe sikaThixo” lusebenzisa izinto zasekhaya. Isuntswana ngalinye lesikrweqe lisikhusela njani ngokwasemoyeni? Yintoni esinokuyenza ukuncedana “sixhobe sonke isikrweqe sikaThixo” (Abase-Efese 6:11) yonke imihla?

Ngeengcebiso ezithe vetshe malunga nokufundisa abantwana, bona isishwankathelo sale veki kwi-Come, Follow Me—For Primary.

Ukuphucula Ukuzifundela Izibhalo Wedwa

Vumela uMoya ukhokele ufundo lwakho. Yiba novakalelo kuMoya njengoko Wona ekukhokelela kwizinto ekufuneka uzifunde suku ngalunye, nokuba oku kukhokelela ekubeni ufunde isihloko owawungacwangcisanga kwasekuqaleni.

indoda kwisikrweqe sangexesha leTestamente eNtsha

Ukunxiba isikrweqe sikaThixo kunokusikhusela ngokwasemoyeni.