“ວັນທີ 6–12 ເດືອນພະຈິກ. ເຮັບເຣີ 7–13: ‘ເປັນມະຫາປະໂລຫິດສຳລັບສິ່ງປະເສີດ ຊຶ່ງມາເຖິງແລ້ວ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 6–12 ເດືອນພະຈິກ. ເຮັບເຣີ 7–13,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
Melchizedek Blesses Abram [ເມນຄີເສເດັກໃຫ້ພອນແກ່ອັບຣາຮາມ], ໂດຍ ວາວເຕີ ເຣນ. ຂອງຂວັນນັກແຕ້ມ
ວັນທີ 6–12 ເດືອນພະຈິກ
ເຮັບເຣີ 7–13
“ເປັນມະຫາປະໂລຫິດສຳລັບສິ່ງປະເສີດ ຊຶ່ງມາເຖິງແລ້ວ”
ຂະນະທີ່ທ່ານອ່ານ ເຮັບເຣີ 7–13, ທ່ານອາດຢາກໄດ້ຮັບຄວາມປະທັບໃຈຜ່ານທາງພຣະວິນຍານບໍລິສຸດ. ໃຫ້ພິຈາລະນາວິທີທີ່ທ່ານສາມາດບັນທຶກມັນໄວ້; ຍົກຕົວຢ່າງ, ທ່ານສາມາດບັນທຶກມັນໄວ້ຢູ່ໃນໂຄງຮ່າງນີ້, ຢູ່ໃນຂອບໜ້າປຶ້ມພຣະຄຳພີຂອງທ່ານ, ຫລື ຢູ່ໃນປຶ້ມບັນທຶກ ຫລື ປຶ້ມບັນທຶກສ່ວນຕົວ.
ບັນທຶກຄວາມປະທັບໃຈຂອງທ່ານ
ເຖິງແມ່ນໄພ່ພົນທີ່ຊື່ສັດ ບາງຄັ້ງກໍຖືກ “ຂົ່ມເຫັງ [ແລະ ທຸກທໍລະມານ]” ທີ່ສາມາດສັ່ນສະເທືອນຄວາມໝັ້ນໃຈຂອງພວກເຂົາໄດ້ (ເບິ່ງ ເຮັບເຣີ 10:32–38). ໂປໂລຮູ້ວ່າ ຊາວຢິວທີ່ປ່ຽນໃຈເຫລື້ອມໃສເປັນຊາວຄຣິດກຳລັງປະເຊີນກັບການຂົ່ມເຫັງຢ່າງໜັກ ຍ້ອນຄວາມເຊື່ອໃໝ່ຂອງພວກເຂົາ. ເພື່ອຊຸກຍູ້ພວກເຂົາໃຫ້ຍຶດໝັ້ນຕໍ່ປະຈັກພະຍານຂອງພວກເຂົາ, ເພິ່ນໄດ້ເຕືອນພວກເຂົາເຖິງປະເພນີອັນຍາວນານຂອງຜູ້ເຊື່ອຈາກປະຫວັດສາດຂອງພວກເຂົາເອງ: ອາເບັນ, ເອນົກ, ໂນອາ, ອັບຣາຮາມ, ຊາຣາ, ໂຢເຊັບ, ໂມເຊ—“ພະຍານຫລວງຫລາຍຢູ່ອ້ອມຂ້າງ” ວ່າຄຳສັນຍາຂອງພຣະເຈົ້າມີຈິງ ແລະ ກຸ້ມຄ່າທີ່ຈະຄອຍຖ້າ (ເບິ່ງ ເຮັບເຣີ 11; 12:1). ປະເພນີນີ້ກໍເປັນຂອງທ່ານຄືກັນ. ມັນເປັນມໍລະດົກແຫ່ງສັດທາທີ່ແບ່ງປັນໂດຍທຸກຄົນທີ່ “ປັກຕາເບິ່ງພຣະເຢຊູ ຄືຜູ້ບຸກເບີກ [ສັດທາ] ຂອງພວກເຮົາເຖິງທີ່ສຳເລັດ” (ເຮັບເຣີ 12:2). ເພາະພຣະອົງ, ເມື່ອໃດກໍຕາມຄວາມຍາກລຳບາກເຮັດໃຫ້ເຮົາຢາກ “ຫລົບຖອຍຫລັງ,” ແຕ່ເຮົາສາມາດ “ເຂົ້າມາໃກ້ດ້ວຍຄວາມຈິງໃຈ ແລະ ດ້ວຍ [ສັດທາ] ອັນເຕັມບໍລິບູນ” (ເຮັບເຣີ 10:22, 38). ສຳລັບເຮົາ, ເໝືອນດັ່ງໄພ່ພົນໃນສະໄໝບູຮານ, ພຣະເຢຊູຄຣິດແມ່ນ “ມະຫາປະໂລຫິດສຳລັບສິ່ງປະເສີດ ຊຶ່ງມາເຖິງແລ້ວ” (ເຮັບເຣີ 9:11).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຖານະປະໂລຫິດແຫ່ງເມນຄີເສເດັກຊີ້ບອກເຮົາໃຫ້ໄປຫາພຣະເຢຊູຄຣິດ.
ເປັນເວລາຫລາຍສັດຕະວັດ, ຊາວຢິວໄດ້ໃຊ້ຖານະປະໂລຫິດເຜົ່າຊາວເລວີ, ຊຶ່ງຮູ້ຈັກກັນອີກວ່າເປັນຖານະປະໂລຫິດແຫ່ງອາໂຣນ. ແຕ່ດ້ວຍຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ ການຟື້ນຟູຖານະປະໂລຫິດແຫ່ງເມນຄີເສເດັກທີ່ຍິ່ງໃຫຍ່ກວ່າໄດ້ເກີດຂຶ້ນ, ຊຶ່ງສະເໜີມອບພອນທີ່ຍິ່ງໃຫຍ່ກວ່າໃຫ້. ທ່ານຮຽນຮູ້ຫຍັງແດ່ກ່ຽວກັບຖານະປະໂລຫິດແຫ່ງເມນຄີເສເດັກຈາກ ເຮັບເຣີ 7? ໂດຍການຈື່ຈຳວ່າ ຈຸດປະສົງຂອງສານສະບັບນີ້—ເໝືອນດັ່ງພຣະຄຳພີທັງໝົດ—ແມ່ນເພື່ອສ້າງສັດທາໃນພຣະເຢຊູຄຣິດ, ທ່ານອາດສັງເກດເຫັນຂໍ້ພຣະຄຳພີທີ່ເປັນພະຍານເຖິງພຣະອົງ.
ຕໍ່ໄປນີ້ແມ່ນບາງຕົວຢ່າງເຖິງຄວາມຈິງອື່ນໆທີ່ທ່ານອາດພົບເຫັນ:
-
ການແປຂອງໂຈເຊັບ ສະມິດ, ເຮັບເຣີ 7:3, 21: ຜູ້ທີ່ໄດ້ຮັບການແຕ່ງຕັ້ງສູ່ຖານະປະໂລຫິດແຫ່ງເມນຄີເສເດັກ “ຈະເປັນເໝືອນພຣະບຸດຂອງພຣະເຈົ້າ” ແລະ ເປັນ “[ປະໂລຫິດ] ສືບໄປ.”
-
ເຮັບເຣີ 7:11: ຖານະປະໂລຫິດເຜົ່າເລວີ ບໍ່ໄດ້ສະເໜີມອບ “ຄວາມບໍລິບູນ” ໃຫ້ ແລະ ສະນັ້ນ ຈຶ່ງຖືກທົດແທນໂດຍເມນຄີເສເດັກ (ເບິ່ງ ຄຳສອນ ແລະ ພັນທະສັນຍາ 84:18–22).
-
ເຮັບເຣີ 7:20–21: ຖານະປະໂລຫິດແຫ່ງເມນຄີເສເດັກ ຈະໄດ້ຮັບຜ່ານທາງ “ຄຳສາບານ ແລະ ພັນທະສັນຍາ” (ເບິ່ງ ຄຳສອນ ແລະ ພັນທະສັນຍາ 84:33–44).
ທ່ານໄດ້ຮັບພອນຢ່າງໃດແດ່ຈາກຖານະປະໂລຫິດແຫ່ງເມນຄີເສເດັກ ແລະ “ພິທີການດັ່ງກ່າວ”? (ຄຳສອນ ແລະ ພັນທະສັນຍາ 84:20). ຖານະປະໂລຫິດແຫ່ງເມນຄີເສເດັກຊ່ວຍທ່ານໃຫ້ມາຫາພຣະຄຣິດແນວໃດ?
ເບິ່ງ ແອວມາ 13:1–13; ຄຳສອນ ແລະ ພັນທະສັນຍາ 121:36–46; Gospel Topics, “Melchizedek Priesthood,” topics.ChurchofJesusChrist.org; ຄູ່ມືພຣະຄຳພີ, “ເມນຄີເສເດັກ,” scriptures.ChurchofJesusChrist.org; Russell M. Nelson, “Spiritual Treasures,” Liahona, Nov. 2019, 76–79; Dallin H. Oaks, “The Melchizedek Priesthood and the Keys,” Liahona, May 2020, 69–72 ນຳອີກ.
ພິທີການໃນສະໄໝບູຮານ ແລະ ໃນສະໄໝໃໝ່ຊີ້ໄປຫາພຣະເຢຊູຄຣິດ.
ຊາວເຮັບເຣີດັ້ງເດີມຜູ້ໄດ້ອ່ານສານສະບັບນີ້ ຄົງຄຸ້ນເຄີຍຫລາຍກັບຫໍເຕັນສັກສິດໃນສະໄໝບູຮານ ແລະ ພິທີການທີ່ໂປໂລໄດ້ບັນຍາຍ. ແຕ່ບາງຄົນບໍ່ຮັບຮູ້ຢ່າງເຕັມປ່ຽມວ່າ ຈຸດປະສົງຂອງພິທີການເຫລົ່ານີ້ ແມ່ນຊີ້ໄປຫາການເສຍສະລະຊົດໃຊ້ຂອງພຣະເຢຊູຄຣິດ.
ໃນສະໄໝພຣະຄຣິສຕະທຳຄຳພີ, ໃນເທດສະການປະຈຳປີທີ່ເອີ້ນວ່າ ວັນແຫ່ງການຊົດໃຊ້, ມະຫາປະໂລຫິດຄົນໜຶ່ງຈະເຂົ້າໄປໃນສະຖານທີ່ ທີ່ສັກສິດທີ່ສຸດ (ບ່ອນສັກສິດທີ່ສຸດ) ໃນພຣະວິຫານເຢຣູຊາເລັມ ແລະ ຖວາຍໂຕແບ້ ຫລື ໂຕແກະ ເພື່ອຊົດໃຊ້ແທນບາບຂອງຊາວອິດສະຣາເອນ.
ຂະນະທີ່ທ່ານອ່ານຄຳບັນຍາຍຂອງໂປໂລກ່ຽວກັບພິທີການເຫລົ່ານີ້, ໃຫ້ຊອກຫາສັນຍາລັກ ແລະ ຄຳສອນທີ່ຊ່ວຍທ່ານໃຫ້ເຂົ້າໃຈຫລາຍຂຶ້ນເຖິງພາລະກິດຊົດໃຊ້ຂອງພຣະຜູ້ຊ່ວຍໃຫ້ລອດ.
ພິທີການທີ່ເຮົາມີສ່ວນຮ່ວມໃນປະຈຸບັນ ແມ່ນແຕກຕ່າງຈາກພິທີການໃນສະໄໝຂອງໂປໂລ, ແຕ່ຈຸດປະສົງຂອງມັນແມ່ນຄືກັນ. ພິທີການໃນປະຈຸບັນເປັນພະຍານຕໍ່ທ່ານເຖິງພຣະເຢຊູຄຣິດແນວໃດ?
ເພື່ອຮຽນຮູ້ຕື່ມອີກກ່ຽວກັບພິທີການຂອງຊາວຢິວໃນສະໄໝບູຮານ ແລະ ສັນຍາລັກຂອງມັນ, ໃຫ້ເບິ່ງວິດີໂອ “The Tabernacle” ແລະ “Sacrifice and Sacrament” (ChurchofJesusChrist.org).
ສັດທາຮຽກຮ້ອງຄວາມໄວ້ວາງໃຈໃນຄຳສັນຍາຂອງພຣະເຈົ້າ.
ຖ້າຫາກບາງຄົນຂໍໃຫ້ທ່ານອະທິບາຍຄຳວ່າສັດທາ, ທ່ານຈະວ່າແນວໃດ? ຊິດສະເຕີ ແອນ ຊີ ພິງກຣີ ໄດ້ໃຊ້ຂໍ້ຄວາມຈາກ ເຮັບເຣີ 11 ເພື່ອບັນຍາຍຄວາມໝາຍຂອງສັດທາວ່າເປັນ: “ຄວາມສາມາດທາງວິນຍານທີ່ຍອມຮັບເອົາຄຳສັນຍາທີ່ເຫັນ ‘ຕັ້ງແຕ່ໄກ’ ແຕ່ອາດບໍ່ໄດ້ຮັບໃນຊີວິດນີ້” (“Seeing the Promises Afar Off,” Liahona, Nov. 2003, 14).
ໃຫ້ຄິດທີ່ຈະໃຊ້ຄຳເວົ້າຂອງຕົວເອງເພື່ອອະທິບາຍຄວາມໝາຍຂອງສັດທາ ຂະນະທີ່ທ່ານໄຕ່ຕອງແນວຄິດຢູ່ໃນ ເຮັບເຣີ 11. ຕົວຢ່າງຂອງຜູ້ຄົນທີ່ກ່າວເຖິງຢູ່ໃນບົດນີ້ ສິດສອນທ່ານກ່ຽວກັບສັດທາແນວໃດແດ່? (ເບິ່ງ ອີເທີ 12:6–22 ນຳອີກ.)
ຄຳສັນຍາຢ່າງໃດແດ່ທີ່ທ່ານເຫັນ “ຕັ້ງແຕ່ໄກ”? ທ່ານຈະສາມາດສະແດງໃຫ້ພຣະຜູ້ເປັນເຈົ້າເຫັນວ່າທ່ານ “ຍອມຮັບເອົາຄຳສັນຍາ, [ແລະ ຕ້ອນຮັບມັນ]” ແນວໃດ? (ເຮັບເຣີ 11:13).
ເບິ່ງ ແອວມາ 32:21, 26–43; Jeffrey R. Holland, “An High Priest of Good Things to Come,” Ensign, Nov. 1999, 36–38; Gospel Topics, “Faith in Jesus Christ,” topics.ChurchofJesusChrist.org ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ເຮັບເຣີ 10:32–36.ທ່ານອາດເຊື້ອເຊີນສະມາຊິກໃນຄອບຄົວໃຫ້ແບ່ງປັນປະສົບການທາງວິນຍານ ເມື່ອເຂົາເຈົ້າຮູ້ສຶກ “ໄດ້ຮັບແສງສະຫວ່າງ” ດ້ວຍຄວາມຈິງ. ປະສົບການເຫລົ່ານີ້ຊ່ວຍເຮົາບໍ່ໃຫ້ “ປະຖິ້ມຄວາມໝັ້ນໃຈ [ຂອງເຮົາ]” ໃນເວລາທີ່ຖືກທົດລອງ ຫລື ມີຄວາມສົງໄສແນວໃດ?
-
ເຮັບເຣີ 11.ທ່ານຈະສາມາດຊ່ວຍສະມາຊິກໃນຄອບຄົວຂອງທ່ານໃຫ້ຮຽນຮູ້ຈາກຕົວຢ່າງທີ່ຊອບທຳ ຊຶ່ງກ່າວຢູ່ໃນ ເຮັບເຣີ 11 ແນວໃດ? ມັນອາດເປັນສິ່ງມ່ວນຊື່ນທີ່ຈະສະແດງຕາມເລື່ອງຈາກບາງຕົວຢ່າງເຫລົ່ານີ້. ທ່ານສາມາດທົບທວນບາງເລື່ອງເຫລົ່ານີ້ຢູ່ໃນ ເລື່ອງພຣະຄຳພີເດີມ. ຫລື ບາງທີຄອບຄົວຂອງທ່ານສາມາດສົນທະນາຕົວຢ່າງຂອງຄົນທີ່ຊື່ສັດ ທີ່ທ່ານຮູ້ຈັກ—ລວມທັງບັນພະບຸລຸດ, ຜູ້ນຳຂອງສາດສະໜາຈັກ, ແລະ ຜູ້ຄົນໃນຊຸມຊົນຂອງທ່ານ. ພວກທ່ານກໍສາມາດຮ້ອງເພງກ່ຽວກັບສັດທານຳອີກ, ດັ່ງເຊັ່ນ “ບອກມາ ສັດຈະຄືຫຍັງ?” (ເພງສວດ ແລະ ເພງຂອງເດັກນ້ອຍ, 34).
-
ເຮັບເຣີ 12:2.ອີກຕາມຂໍ້ນີ້, ເປັນຫຍັງພຣະເຢຊູຈຶ່ງເຕັມພຣະໄທທີ່ຈະອົດທົນກັບຄວາມເຈັບປວດ ແລະ ທົນທຸກທໍລະມານຢູ່ເທິງໄມ້ກາງແຂນ? ສິ່ງນີ້ສິດສອນເຮົາຫຍັງແດ່ກ່ຽວກັບວິທີທີ່ເຮົາສາມາດທົນກັບການທົດລອງຂອງເຮົາ? ປະທານຣະໂຊ ເອັມ ແນວສັນ ໄດ້ໃຫ້ຄວາມຮູ້ທີ່ເປັນປະໂຫຍດກ່ຽວກັບຂໍ້ນີ້ໃນຂ່າວສານຂອງເພິ່ນ “Joy and Spiritual Survival” (Liahona, Nov. 2016, 81–84).
-
ເຮັບເຣີ 12:5–11.ເປັນຫຍັງພຣະຜູ້ເປັນເຈົ້າຈຶ່ງຕີສອນ ແລະ ດັດແປງເຮົາ? ເຮົາສັງເກດເຫັນສິ່ງໃດແດ່ຢູ່ໃນຂໍ້ເຫລົ່ານີ້ກ່ຽວກັບວິທີທີ່ພຣະຜູ້ເປັນເຈົ້າເບິ່ງການຕີສອນ? ຂໍ້ເຫລົ່ານີ້ມີຜົນກະທົບຕໍ່ວິທີທີ່ເຮົາຕີສອນຄົນອື່ນ ຫລື ຮັບເອົາມັນແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ບອກມາ ສັດຈະຄືຫຍັງ?,” ເພງສວດ ແລະ ເພງຂອງເດັກນ້ອຍ, 34.
ການປັບປຸງການສິດສອນຂອງເຮົາ
ໃຊ້ເພງເພື່ອເຊື້ອເຊີນພຣະວິນຍານ ແລະ ຮຽນຮູ້ຄຳສອນ. ຝ່າຍປະທານສູງສຸດໄດ້ກ່າວວ່າ, “ດົນຕີມີອໍານາດທີ່ບໍ່ມີຂອບເຂດສໍາລັບການເຄື່ອນຍ້າຍ [ພວກເຮົາ] ໄປສູ່ທາງວິນຍານທີ່ຍິ່ງໃຫຍ່ກວ່າ” (“First Presidency Preface,” Hymns, x). ບາງທີເພງກ່ຽວກັບສັດທາ, ດັ່ງເຊັ່ນ “ຂໍໃຫ້ເຮົາເດີນໄປ” (ເພງສວດ ແລະ ເພງຂອງເດັກນ້ອຍ, 10), ຈະເສີມການສົນທະນາຂອງຄອບຄົວຈາກ ເຮັບເຣີ 11.
ສັນຍາລັກ ແລະ ພິທີການຂອງພຣະວິຫານໃນສະໄໝບູຮານ ສິດສອນກ່ຽວກັບບົດບາດຂອງພຣະເຢຊູຄຣິດ.