“ວັນທີ 30 ເດືອນຕຸລາ–ວັນທີ 5 ເດືອນພະຈິກ. ເຮັບເຣີ 1–6: ‘ພຣະເຢຊູຄຣິດ, “ຕົ້ນກຳເນີດແຫ່ງ [ຄວາມລອດນິລັນດອນ]”’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 30 ເດືອນຕຸລາ–ວັນທີ 5 ເດືອນພະຈິກ. ເຮັບເຣີ 1–6,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

Balm of Gilead [ຫວ້ານຢາທີ່ກີເລອາດ], ໂດຍ ແອນນີ ເຮັນຣີ

ວັນທີ 30 ເດືອນຕຸລາ–ວັນທີ 5 ເດືອນພະຈິກ

ເຮັບເຣີ 1–6

ພຣະເຢຊູຄຣິດ, “ຕົ້ນກຳເນີດແຫ່ງ [ຄວາມລອດນິລັນດອນ]”

ການບັນທຶກຄວາມປະທັບໃຈທາງວິນຍານຊ່ວຍທ່ານໃຫ້ຮັບຮູ້ສິ່ງທີ່ພຣະວິນຍານບໍລິສຸດຢາກສິດສອນທ່ານ. ການປະຕິບັດຕາມຄວາມປະທັບໃຈຂອງທ່ານ ສະແດງໃຫ້ເຫັນເຖິງສັດທາຂອງທ່ານວ່າ ການກະຕຸ້ນເຫລົ່ານັ້ນເປັນຄວາມຈິງ.

ບັນທຶກຄວາມປະທັບໃຈຂອງທ່ານ

ເຮົາແຕ່ລະຄົນຕ້ອງປະຖິ້ມບາງຢ່າງ ກ່ອນຈະຮັບເອົາພຣະກິດຕິຄຸນຂອງພຣະເຢຊູຄຣິດ—ເຊັ່ນ ນິໄສທີ່ບໍ່ດີ, ຄວາມເຊື່ອທີ່ບໍ່ຖືກຕ້ອງ, ການຄົບຫາສະມາຄົມທີ່ບໍ່ເປັນປະໂຫຍດ, ຫລື ບາງຢ່າງອື່ນອີກ. ສຳລັບຄົນຕ່າງຊາດຢູ່ໃນສາດສະໜາຈັກຄຣິດສະຕຽນສະໄໝກ່ອນ, ການປ່ຽນໃຈເຫລື້ອມໃສມັກຈະໝາຍເຖິງການປະຖິ້ມພຣະເຈົ້າປອມ. ສຳລັບຊາວເຮັບເຣີ (ຫລື ຊາວຢິວ), ການປ່ຽນໃຈເຫລື້ອມໃສເປັນຫລັກຖານວ່າ, ຖ້າຫາກບໍ່ຍາກກວ່າ, ຈະຊັບຊ້ອນກວ່າເລັກນ້ອຍ. ເຖິງຢ່າງໃດ, ຄວາມເຊື່ອ ແລະ ປະເພນີທີ່ພວກເຂົາທະນຸຖະໜອມກໍມີຮາກຖານມາຈາກການນະມັດສະການພຣະເຈົ້າທີ່ແທ້ຈິງ ແລະ ຄຳສອນຂອງສາດສະດາຂອງພຣະອົງ, ຊຶ່ງຍາວນານກັບໄປຫລາຍພັນປີ. ແຕ່ອັກຄະສາວົກໄດ້ສິດສອນວ່າ ກົດຂອງໂມເຊໄດ້ສຳເລັດແລ້ວໃນພຣະເຢຊູຄຣິດ ແລະ ວ່າບັດນີ້ ກົດທີ່ສູງກວ່າເປັນມາດຕະຖານສຳລັບຜູ້ເຊື່ອ. ການຮັບເອົາສາດສະໜາຄຣິດສະຕຽນໝາຍຄວາມວ່າ ຊາວເຮັບເຣີຈະຕ້ອງປະຖິ້ມຄວາມເຊື່ອ ແລະ ປະຫວັດສາດເກົ່າແກ່ຂອງພວກເຂົາບໍ? ສານເຖິງຊາວເຮັບເຣີແມ່ນພະຍາຍາມຊ່ວຍແກ້ໄຂຄຳຖາມເຊັ່ນນັ້ນ ໂດຍທີ່ສິດສອນວ່າກົດຂອງໂມເຊ, ສາດສະດາ, ແລະ ພິທີການຕ່າງໆ ທັງໝົດກໍສຳຄັນ, ແຕ່ພຣະເຢຊູຄຣິດແມ່ນຍິ່ງໃຫຍ່ກວ່າ (ເບິ່ງ ເຮັບເຣີ 1:1–4; 3:1–6; 7:23–28). ຕາມຈິງແລ້ວ, ທຸກສິ່ງເຫລົ່ານີ້ຊີ້ໄປຫາ ແລະ ເປັນພະຍານເຖິງພຣະຄຣິດ ວ່າເປັນພຣະບຸດຂອງພຣະເຈົ້າ ແລະ ເປັນພຣະເມຊີອາຕາມຄຳສັນຍາ ທີ່ຊາວຢິວຄອຍຖ້າ.

ການປ່ຽນໃຈເຫລື້ອມໃສ, ໃນສະໄໝກ່ອນ ແລະ ໃນປະຈຸບັນ, ໝາຍເຖິງການເຮັດໃຫ້ພຣະເຢຊູຄຣິດເປັນສູນກາງໃນການນະມັດສະການ ແລະ ໃນຊີວິດຂອງເຮົາ. ມັນໝາຍເຖິງການຢືນຢັດຢູ່ຢ່າງໝັ້ນຄົງໃນຄວາມຈິງ ແລະ ປ່ອຍວາງສິ່ງທີ່ກີດກັນເຮົາຈາກພຣະອົງ, ເພາະພຣະອົງແມ່ນ “ຕົ້ນກຳເນີດແຫ່ງ [ຄວາມລອດນິລັນດອນ] ແກ່ຄົນທັງປວງທີ່ເຊື່ອຟັງພຣະອົງ” (ເຮັບເຣີ 5:9).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ແມ່ນໃຜຂຽນສານເຖິງຊາວເຮັບເຣີ?

ພວກອາຈານບາງຄົນສົງໄສວ່າ ອາດເປັນໂປໂລທີ່ຂຽນສານເຖິງຊາວເຮັບເຣີ. ຮູບແບບຂອງສານເຖິງຊາວເຮັບເຣີຂ້ອນຂ້າງແຕກຕ່າງຈາກຈົດໝາຍສະບັບອື່ນໆຂອງໂປໂລ, ແລະ ສານສະບັບທຳອິດບໍ່ໄດ້ລະບຸຊື່ຂອງຜູ້ຂຽນ. ເຖິງຢ່າງໃດກໍຕາມ, ເພາະແນວຄິດທີ່ສະແດງອອກໃນສານເຖິງຊາວເຮັບເຣີ ກົງກັບຄຳສອນອື່ນໆຂອງໂປໂລ, ໄພ່ພົນຍຸກສຸດທ້າຍໂດຍທົ່ວໄປ, ໃນການຮັກສາປະເພນີຂອງຊາວຄຣິດ, ຈຶ່ງຮັບຮູ້ວ່າ ຢ່າງໜ້ອຍໂປໂລກໍມີສ່ວນກ່ຽວຂ້ອງກັບການຂຽນສານສະບັບນີ້.

ເບິ່ງ Bible Dictionary, “Pauline Epistles” ນຳອີກ.

ເຮັບເຣີ 1–5

ພຣະເຢຊູຄຣິດມີ “ສະພາບເປັນແບບພິມດຽວກັນ” ກັບພຣະບິດາເທິງສະຫວັນ.

ຊາວຢິວຫລາຍຄົນພົບວ່າມັນເປັນເລື່ອງຍາກທີ່ຈະຮັບຮູ້ພຣະເຢຊູຄຣິດວ່າເປັນພຣະບຸດຂອງພຣະເຈົ້າ. ໃຫ້ສັງເກດເບິ່ງສານເຖິງຊາວເຮັບເຣີເປັນພະຍານເຖິງພຣະອົງ. ຍົກຕົວຢ່າງ, ຂະນະທີ່ທ່ານອ່ານຫ້າບົດທຳອິດ, ທ່ານສາມາດບັນທຶກຕຳແໜ່ງ, ບົດບາດ, ຄຸນລັກສະນະ, ແລະ ວຽກງານຂອງພຣະເຢຊູຄຣິດ, ທີ່ທ່ານພົບວ່າ ມີການກ່າວເຖິງ. ສິ່ງເຫລົ່ານີ້ສິດສອນທ່ານຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ? ມັນສິດສອນທ່ານຫຍັງແດ່ກ່ຽວກັບພຣະບິດາເທິງສະຫວັນ?

ຂໍ້ຄວາມດັ່ງຕໍ່ໄປນີ້ຈາກແອວເດີ ແຈັບຟະຣີ ອາ ຮໍແລນ ເພີ່ມຄວາມເຂົ້າໃຈໃຫ້ແກ່ທ່ານກ່ຽວກັບຄຳສອນໃນບົດເຫລົ່ານີ້ແນວໃດແດ່? “ພຣະເຢຊູ … ໄດ້ສະເດັດມາເພື່ອປັບທັດສະນະຂອງມະນຸດຕໍ່ພຣະເຈົ້າ ແລະ ຂໍຮ້ອງພວກເຂົາໃຫ້ຮັກພຣະບິດາເທິງສະຫວັນຂອງພວກເຂົາ ດັ່ງທີ່ພຣະອົງໄດ້ຮັກພວກເຂົາຕະຫລອດມາ ແລະ ຈະຮັກພວກເຂົາຕະຫລອດໄປ. … ສະນັ້ນ ການລ້ຽງຄົນຫິວໂຫຍ, ການປິ່ນປົວຄົນເຈັບປ່ວຍ, ການຕຳນິຄົນໜ້າຊື່ໃຈຄົດ, ການວິງວອນຂໍສັດທາ—ນີ້ຄືພຣະຄຣິດຜູ້ສະແດງໃຫ້ເຮົາເຫັນທາງຂອງພຣະບິດາ” (“The Grandeur of God,” Liahona, Nov. 2003, 72).

ເຮັບເຣີ 2:9–18; 4:12–16; 5:7–8

ພຣະເຢຊູຄຣິດໄດ້ທົນທຸກທໍລະມານກັບທຸກຢ່າງ ເພື່ອວ່າພຣະອົງຈະສາມາດເຂົ້າໃຈ ແລະ ຊ່ວຍເຮົາໄດ້ເມື່ອເຮົາທຸກທໍລະມານ.

ທ່ານຮູ້ສຶກວ່າ ທ່ານສາມາດ “ມີໃຈກ້າເຂົ້າໄປເຖິງພຣະທີ່ນັ່ງແຫ່ງພຣະຄຸນ” ແລະ ສະແຫວງຫາຄວາມເມດຕາບໍ? (ເຮັບເຣີ 4:16). ຂ່າວສານຢ່າງໜຶ່ງຂອງສານເຖິງຊາວເຮັບເຣີຄື ເຖິງແມ່ນເຮົາຈະມີບາບ ແລະ ຄວາມອ່ອນແອ, ແຕ່ເຮົາກໍສາມາດເຂົ້າຫາພຣະເຈົ້າ ແລະ ຮັບເອົາພຣະຄຸນຂອງພຣະອົງໄດ້. ທ່ານພົບເຫັນຫຍັງແດ່ໃນ ເຮັບເຣີ 2:9–18; 4:12–16; 5:7–8 ທີ່ເຮັດໃຫ້ທ່ານໝັ້ນໃຈຫລາຍຂຶ້ນວ່າ ພຣະເຢຊູຄຣິດຈະຊ່ວຍທ່ານກັບການທ້າທາຍໃນຊ່ວງມະຕະຂອງທ່ານ? ໃຫ້ຄິດທີ່ຈະບັນທຶກຄວາມຄິດ ແລະ ຄວາມຮູ້ສຶກຂອງທ່ານກ່ຽວກັບສິ່ງທີ່ພຣະຜູ້ຊ່ວຍໃຫ້ລອດໄດ້ເຮັດເພື່ອທ່ານ ໄວ້ໃນປຶ້ມບັນທຶກສ່ວນຕົວ.

ເບິ່ງ ໂມໄຊຢາ 3:7–11; ແອວມາ 7:11–13; 34; Matthew S. Holland, “The Exquisite Gift of the Son,” Liahona, Nov. 2020, 45–47 ນຳອີກ.

ເຮັບເຣີ 3:7–4:11

ພອນຂອງພຣະເຈົ້າມີໃຫ້ສຳລັບຜູ້ທີ່ “ບໍ່ໃຫ້ໃຈ [ພວກເຂົາ] ແຂງກະດ້າງ.”

ໂດຍການເລົ່າເລື່ອງລາວຂອງຊາວອິດສະຣາເອນໃນສະໄໝບູຮານຄືນອີກ, ໂປໂລຫວັງວ່າຈະຊັກຊວນຊາວຢິວໃຫ້ຫລີກເວັ້ນຈາກການເຮັດຄວາມຜິດທີ່ບັນພະບຸລຸດຂອງພວກເຂົາໄດ້ເຮັດ—ການປະຕິເສດພອນຂອງພຣະເຈົ້າເພາະຄວາມບໍ່ເຊື່ອ. (ທ່ານສາມາດອ່ານເລື່ອງລາວທີ່ໂປໂລກ່າວເຖິງໃນ ຈົດບັນຊີ 14:1–12, 26–35.)

ໃຫ້ພິຈາລະນາວິທີທີ່ ເຮັບເຣີ 3:7–4:11 ອາດກ່ຽວຂ້ອງກັບທ່ານແນວໃດ. ໃນການເຮັດສິ່ງນີ້, ທ່ານສາມາດໄຕ່ຕອງຄຳຖາມທີ່ຄືກັນກັບດັ່ງຕໍ່ໄປນີ້:

ຊາວອິດສະຣາເອນທ້າທາຍພຣະຜູ້ເປັນເຈົ້າແນວໃດ? (ເບິ່ງ ເຮັບເຣີ 3:8–11). ແມ່ນຫຍັງຄືຜົນສະທ້ອນຂອງການມີໃຈແຂງກະດ້າງ?
ເມື່ອໃດທີ່ເຮົາໄດ້ປ່ອຍໃຫ້ໃຈເຮົາແຂງກະດ້າງ? ມີພອນຢ່າງໃດບໍທີ່ພຣະເຈົ້າຢາກມອບໃຫ້ເຮົາ ແຕ່ເຮົາບໍ່ໄດ້ຮັບ ຍ້ອນການຂາດສັດທາ?
ເຮົາຈະເຮັດສິ່ງໃດເພື່ອຈະໄດ້ມີໃຈທີ່ອ່ອນໂຍນ ແລະ ສຳນຶກຜິດ? (ເບິ່ງ ອີເທີ 4:15; ສຸພາສິດ 3:5–6; ແອວມາ 5:14–15).

ເບິ່ງ 1 ນີໄຟ 2:16; 15:6–11; ຢາໂຄບ 1:7–8; ແອວມາ 12:33–36; Neill F. Marriott, “Yielding Our Hearts to God,” Liahona, Nov. 2015, 30–32 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ເຮັບເຣີ 1:8–9.ພຣະເຢຊູໄດ້ສະແດງໃຫ້ເຫັນວ່າ ພຣະອົງຮັກຄວາມຊອບທຳ ແລະ ກຽດຊັງຄວາມຊົ່ວຮ້າຍໃນທາງໃດແດ່? ຖ້າຫາກເຮົາມີຄວາມປາດຖະໜາທີ່ບໍ່ຊອບທຳ, ເຮົາສາມາດເຮັດສິ່ງໃດ ເພື່ອປ່ຽນແປງມັນ?

ເຮັບເຣີ 2:1–4.ທ່ານສາມາດຄິດກ່ຽວກັບບົດຮຽນທີ່ໃຊ້ສິ່ງຂອງຢ່າງໃດບໍ ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈວ່າ ການຍຶດໝັ້ນຢູ່ກັບຄວາມຈິງຂອງພຣະກິດຕິຄຸນ “ຊຶ່ງພວກເຮົາໄດ້ຍິນໄດ້ຟັງ” ໝາຍຄວາມວ່າແນວໃດ? ທ່ານສາມາດສາທິດສິ່ງນີ້ ໂດຍການໃຊ້ສິ່ງຂອງທີ່ຍຶດຖືໄວ້ຍາກ. ຄວາມພະຍາຍາມຂອງເຮົາທີ່ຈະຮັກສາປະຈັກພະຍານຂອງເຮົາ ເປັນຄືກັບການຍຶດຖືສິ່ງນີ້ແນວໃດ? ເຮົາຈະໝັ້ນໃຈໄດ້ວ່າ “ຂໍ້ຄວາມຈິງ ຊຶ່ງ [ເຮົາ] ໄດ້ຍິນໄດ້ຟັງ” ຈະບໍ່ “ຫລົງເສຍ” ໄປຈາກເຮົາໄດ້ແນວໃດ? (ຂໍ້ທີ 1).

ເຮັບເຣີ 2:9–10.ເພື່ອຄົ້ນຄວ້າວະລີທີ່ວ່າ “ຜູ້ນຳທາງ [ຄວາມລອດ],” ທ່ານສາມາດເລີ່ມຕົ້ນໂດຍການສົນທະນາສິ່ງທີ່ນາຍທັບເຮັດ. ຄວາມລອດໝາຍຄວາມວ່າແນວໃດ? ພຣະເຢຊູຄຣິດເປັນເໝືອນນາຍທັບຂອງເຮົາ ແລະ ຄວາມລອດຂອງເຮົາແນວໃດ?

ເຮັບເຣີ 5:1–5.ຂໍ້ເຫລົ່ານີ້ສາມາດຊ່ວຍພວກທ່ານໃຫ້ສົນທະນາກ່ຽວກັບວ່າ ການຖືກເອີ້ນຈາກພຣະເຈົ້າໂດຍຜູ້ທີ່ມີສິດອຳນາດ ໝາຍຄວາມວ່າແນວໃດ. ເຮົາສາມາດຮຽນຮູ້ຫຍັງແດ່ຈາກຕົວຢ່າງຂອງພຣະເຢຊູຄຣິດກ່ຽວກັບການຮັບເອົາ ແລະ ການເຮັດໜ້າທີ່ການເອີ້ນ?

ໂມເຊກຳລັງແຕ່ງຕັ້ງອາໂຣນ — “ບໍ່ຫ່ອນມີຜູ້ໃດຕັ້ງຕົນເອງຢູ່ໃນຕຳແໜ່ງນີ້, ມີແຕ່ພຣະເຈົ້າຊົງເອີ້ນເອົາ, ເໝືອນຢ່າງຊົງເອີ້ນອາໂຣນນັ້ນ” (ເຮັບເຣີ 5:4). Moses Calls Aaron to the Ministry [ໂມເຊເອີ້ນອາໂຣນສູ່ການປະຕິບັດສາດສະໜາກິດ], ໂດຍ ແຮຣີ ແອນເດີສັນ

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ຂໍເພິ່ງພຣະທຸກຊົ່ວໂມງ,” ເພງສວດ ແລະ ເພງຂອງເດັກນ້ອຍ, 12.

ການປັບປຸງການສຶກສາສ່ວນຕົວ

ລອງໃຊ້ວິທີອື່ນ. ແທນທີ່ຈະສຶກສາພຣະຄຳພີໃນແບບເກົ່າ, ໃຫ້ຄິດທີ່ຈະສຶກສາໃນແບບອື່ນ. ສຳລັບແນວຄິດບາງຢ່າງ, ໃຫ້ເບິ່ງ “ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ” ຢູ່ທີ່ຈຸດເລີ່ມຕົ້ນຂອງແຫລ່ງນີ້.

ພຣະເຢຊູຄຣິດ — Light of the World [ຄວາມສະຫວ່າງຂອງໂລກ], ໂດຍ ວາວເຕີ ເຣນ