“ວັນທີ 23–29 ເດືອນຕຸລາ. 1 ແລະ 2 ຕີໂມທຽວ; ຕີໂຕ; ຟີເລໂມນ: ‘ຈົ່ງເປັນແບບຢ່າງໃຫ້ຄົນທີ່ເຊື່ອທັງຫລາຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 23–29 ເດືອນຕຸລາ. 1 ແລະ 2 ຕີໂມທຽວ; ຕີໂຕ; ຟີເລໂມນ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ຜູ້ຍິງສາມຄົນກຳລັງຍ່າງຢູ່ນອກພຣະວິຫານ

ວັນທີ 23–29 ເດືອນຕຸລາ

1 ແລະ 2 ຕີໂມທຽວ; ຕີໂຕ; ຟີເລໂມນ

“ຈົ່ງເປັນແບບຢ່າງໃຫ້ຄົນທີ່ເຊື່ອທັງຫລາຍ”

ບາງເທື່ອມັນເປັນປະໂຫຍດທີ່ຈະເຂົ້າຫາການສຶກສາພຣະຄຳພີຂອງທ່ານ ດ້ວຍຄຳຖາມຂໍ້ໜຶ່ງ ຫລື ຫລາຍກວ່ານັ້ນໃນຈິດໃຈ. ເຊື້ອເຊີນພຣະວິນຍານໃຫ້ນຳພາທ່ານ ເພື່ອຕອບຄຳຖາມ ຂະນະທີ່ທ່ານສຶກສາ, ແລະ ບັນທຶກການດົນໃຈໃດໆທີ່ທ່ານໄດ້ຮັບ.

ບັນທຶກຄວາມປະທັບໃຈຂອງທ່ານ

ໃນສານທີ່ໂປໂລຂຽນເຖິງຕີໂມທຽວ, ຕີໂຕ, ແລະ ຟີເລໂມນ, ເຮົາເຫັນໜ້ອຍໜຶ່ງໃນໃຈຂອງຜູ້ຮັບໃຊ້ຂອງພຣະຜູ້ເປັນເຈົ້າ. ບໍ່ຄືກັນກັບສານສະບັບອື່ນໆຂອງໂປໂລເຖິງສາດສະໜາຈັກທັງໝົດ, ສານເຫລົ່ານີ້ແມ່ນເຖິງບຸກຄົນໃດໜຶ່ງໂດຍສະເພາະ—ເພື່ອນທີ່ໃກ້ຊິດຂອງໂປໂລ ແລະ ເພື່ອນຮ່ວມເຮັດວຽກງານຂອງພຣະເຈົ້າ—ແລະ ການອ່ານສານເຫລົ່ານີ້ ກໍຄືກັນກັບການຟັງການສົນທະນາ. ເຮົາເຫັນໂປໂລຊຸກຍູ້ຕີໂມທຽວ ແລະ ຕີໂຕ, ຜູ້ນຳຂອງສາດສະໜາຈັກສອງທ່ານ, ໃນການຮັບໃຊ້ສາດສະໜາຈັກຂອງພວກເພິ່ນ. ເຮົາເຫັນເພິ່ນຮຽກຮ້ອງ ຟີເລໂມນ ເພື່ອນຂອງເພິ່ນໃຫ້ຄືນດີກັບເພື່ອນໄພ່ພົນຄົນໜຶ່ງ ແລະ ປະຕິບັດຕໍ່ລາວຖານອ້າຍນ້ອງກັນໃນພຣະກິດຕິຄຸນ. ຖ້ອຍຄຳຂອງໂປໂລບໍ່ແມ່ນສຳລັບເຮົາໂດຍກົງ, ແລະ ເພິ່ນອາດບໍ່ຄິດວ່າ ຜູ້ຄົນຢ່າງຫລວງຫລາຍຈະອ່ານມັນໃນມື້ໜຶ່ງ. ແຕ່ເຮົາພົບເຫັນຄຳແນະນຳ ແລະ ການສະໜັບສະໜູນໃນສານເຫລົ່ານີ້ສຳລັບເຮົາ, ບໍ່ວ່າການປະຕິບັດສາດສະໜາກິດສ່ວນຕົວຂອງເຮົາໃນການຮັບໃຊ້ພຣະຄຣິດຈະເປັນສິ່ງໃດກໍຕາມ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຕີໂມທຽວ ແລະ ຕີໂຕແມ່ນໃຜ?

ຕີໂມທຽວ ແລະ ຕີໂຕໄດ້ຮັບໃຊ້ຮ່ວມກັບໂປໂລ ໃນການເດີນທາງໄປສອນສາດສະໜາຫລາຍເທື່ອ. ໃນລະຫວ່າງການຮັບໃຊ້ຂອງພວກເພິ່ນ, ພວກເພິ່ນໄດ້ຮັບຄວາມເຄົາລົບ ແລະ ຄວາມໄວ້ວາງໃຈຈາກໂປໂລ. ຕໍ່ມາ ຕີໂມທຽວໄດ້ຖືກເອີ້ນໃຫ້ເປັນຜູ້ນຳຂອງສາດສະໜາຈັກ ໃນເມືອງເອເຟໂຊ, ແລະ ຕີໂຕໄດ້ຖືກເອີ້ນໃຫ້ເປັນຜູ້ນຳໃນເກາະກະເຣເຕ. ໃນສານເຫລົ່ານີ້, ໂປໂລໄດ້ໃຫ້ຄຳແນະນຳ ແລະ ໃຫ້ກຳລັງໃຈຕີໂມທຽວ ແລະ ຕີໂຕ ກ່ຽວກັບໜ້າທີ່ຮັບຜິດຊອບຂອງເພິ່ນ, ຊຶ່ງລວມທັງການສັ່ງສອນພຣະກິດຕິຄຸນ ແລະ ການເອີ້ນພວກຜູ້ຊາຍໃຫ້ຮັບໃຊ້ເປັນອະທິການ.

ເບິ່ງ Bible Dictionary, “Pauline Epistles,” “ຕີໂມທຽວ,” “ຕີໂຕ” ນຳອີກ.

ຮູບພາບ

ຜູ້ສອນສາດສະໜາສອງຄົນກຳລັງເວົ້າລົມກັບຜູ້ຊາຍ

“ຢ່າໃຫ້ຜູ້ໃດໝິ່ນປະໝາດຄວາມໜຸ່ມຂອງເຈົ້າ; ແຕ່ຈົ່ງເປັນແບບຢ່າງໃຫ້ຄົນທີ່ເຊື່ອທັງຫລາຍ” (1 ຕີໂມທຽວ 4:12).

1 ຕີໂມທຽວ 4:10–16

“ຈົ່ງເປັນແບບຢ່າງໃຫ້ຄົນທີ່ເຊື່ອທັງຫລາຍ.”

ຕີໂມທຽວເປັນຄົນໜຸ່ມ, ແຕ່ໂປໂລຮູ້ວ່າ ເພິ່ນຈະເປັນຜູ້ນຳທີ່ຍິ່ງໃຫຍ່ຂອງສາດສະໜາຈັກ ເຖິງແມ່ນຍັງໜຸ່ມຢູ່ກໍຕາມ. ໂປໂລໄດ້ມອບຄຳແນະນຳຢ່າງໃດແດ່ໃຫ້ກັບຕີໂມທຽວໃນ 1 ຕີໂມທຽວ 4:10–16? ຄຳແນະນຳນີ້ຊ່ວຍທ່ານນຳພາຄົນອື່ນມາຫາພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງແນວໃດ?

ເບິ່ງ ແອວມາ 17:11 ນຳອີກ.

2 ຕີໂມທຽວ

“ພຣະເຈົ້າບໍ່ໄດ້ປະທານໃຈອັນຢ້ານກົວໃຫ້ແກ່ເຮົາ; ແຕ່ໄດ້ປະທານໃຈອັນປະກອບດ້ວຍອຳນາດ, ແລະ ຄວາມຮັກ, ແລະ ການບັງຄັບຕົນເອງ ໃຫ້ແກ່ເຮົາ.”

2 ຕີໂມທຽວ ຖືກເຊື່ອວ່າເປັນສານສະບັບສຸດທ້າຍທີ່ໂປໂລໄດ້ຂຽນ, ແລະ ເບິ່ງຄື ເພິ່ນຮູ້ວ່າ ເວລາຂອງເພິ່ນຢູ່ໃນໂລກມີໜ້ອຍລົງ (ເບິ່ງ 2 ຕີໂມທຽວ 4:6–8). ຕີໂມທຽວຄົງຮູ້ສຶກແນວໃດ, ໂດຍທີ່ຮູ້ວ່າ ບໍ່ດົນເພິ່ນຈະບໍ່ມີຜູ້ຝຶກສອນທີ່ໄວ້ວາງໃຈໄດ້ ແລະ ຜູ້ນຳຂອງເພິ່ນອີກຕໍ່ໄປ? ໂປໂລໄດ້ກ່າວສິ່ງໃດແດ່ເພື່ອໃຫ້ກຳລັງໃຈເພິ່ນ? ທ່ານອາດອ່ານດ້ວຍຄວາມຮູ້ສຶກເຖິງການທ້າທາຍ ແລະ ຄວາມຢ້ານກົວຂອງຕົວເອງນຳອີກ. ຂ່າວສານແຫ່ງຄວາມຫວັງ ແລະ ກຳລັງໃຈຢ່າງໃດແດ່ທີ່ພຣະຜູ້ເປັນເຈົ້າມີໃຫ້ແກ່ທ່ານໃນ 2 ຕີໂມທຽວ?

ເບິ່ງ Kelly R. Johnson, “Enduring Power,” Liahona, Nov. 2020, 112–14 ນຳອີກ.

2 ຕີໂມທຽວ 3

ການດຳລົງຊີວິດຕາມພຣະກິດຕິຄຸນໃຫ້ຄວາມປອດໄພຈາກອັນຕະລາຍທາງວິນຍານຂອງຍຸກສຸດທ້າຍ.

ເຮົາມີຊີວິດຢູ່ໃນ “ຄາວສຸດທ້າຍ” ທີ່ໂປໂລກ່າວເຖິງ, ແລະ “ຄວາມລຳບາກຢ່າງຮ້າຍແຮງ” ໄດ້ມາເຖິງ (2 ຕີໂມທຽວ 3:1). ຂະນະທີ່ທ່ານອ່ານ 2 ຕີໂມທຽວ 3, ໃຫ້ຂຽນໄພອັນຕະລາຍໃນຍຸກສຸດທ້າຍ ທີ່ຖືກກ່າວເຖິງ (ເບິ່ງ 1 ຕີໂມທຽວ 4:1–3 ນຳອີກ):

ທ່ານສາມາດນຶກເຖິງຕົວຢ່າງຂອງໄພອັນຕະລາຍເຫລົ່ານີ້ຢູ່ໃນໂລກອ້ອມຮອບທ່ານ—ຫລື ໃນຊີວິດຂອງທ່ານເອງໄດ້ບໍ? ໄພອັນຕະລາຍເຫລົ່ານີ້, ດັ່ງຜູ້ຄົນທີ່ຖືກບັນຍາຍຢູ່ໃນ ຂໍ້ທີ 6, “ລ່ວງເຂົ້າໄປຕາມ [ບ້ານເຮືອນຂອງທ່ານ], ແລະ ເອົາ [ທ່ານ] ໄປເປັນຊະເລີຍ” ແນວໃດ? ຄຳແນະນຳໃດແດ່ທີ່ທ່ານພົບເຫັນຢູ່ໃນ 2 ຕີໂມທຽວ 3, ແລະ ໃນບ່ອນອື່ນໆຢູ່ໃນສານເຫລົ່ານີ້, ທີ່ສາມາດຮັກສາທ່ານ ແລະ ຄອບຄົວຂອງທ່ານໃຫ້ປອດໄພຈາກອັນຕະລາຍທາງວິນຍານເຫລົ່ານີ້? (ເບິ່ງ, ສຳລັບຕົວຢ່າງ, 1 ຕີໂມທຽວ 1:3–11; 2 ຕີໂມທຽວ 2:15–16; ຕີໂຕ 2:1–8).

ຟີເລໂມນແມ່ນໃຜ?

ຟີເລໂມນແມ່ນຊາວຄຣິດຄົນໜຶ່ງທີ່ໄດ້ປ່ຽນໃຈເຫລື້ອມໃສໃນພຣະກິດຕິຄຸນໂດຍໂປໂລ. ຟີເລໂມນມີຂ້າທາດຄົນໜຶ່ງຊື່ ໂອເນຊີໂມ, ຜູ້ເຫັນໄດ້ຢ່າງແຈ້ງຊັດວ່າ ໄດ້ລັກໜີໄປກຸງໂຣມ. ຢູ່ທີ່ນັ້ນໂອເນຊີໂມໄດ້ພົບກັບໂປໂລ ແລະ ໄດ້ປ່ຽນໃຈເຫລື້ອມໃສໃນພຣະກິດຕິຄຸນ. ໂປໂລໄດ້ສົ່ງໂອເນຊີໂມກັບຄືນໄປຫາຟີເລໂມນ ພ້ອມດ້ວຍຈົດໝາຍຊຸກຍູ້ຟີເລໂມນໃຫ້ຮັບເອົາໂອເນຊີໂມຄືນ “ບໍ່ແມ່ນເປັນພຽງຄົນຮັບໃຊ້ຄົນໜຶ່ງເທົ່ານັ້ນ, ແຕ່ດີກວ່າຄົນຮັບໃຊ້ອີກ, ຄືເປັນອ້າຍນ້ອງທີ່ຮັກຄົນໜຶ່ງ” (ຟີເລໂມນ 1:16).

ຟີເລໂມນ

ສານຸສິດຂອງພຣະເຢຊູຄຣິດປະຕິບັດຕໍ່ກັນແລະກັນຖານອ້າຍເອື້ອຍນ້ອງກັນ.

ຂະນະທີ່ທ່ານອ່ານສານຂອງໂປໂລເຖິງຟີເລໂມນ, ໃຫ້ໄຕ່ຕອງວິທີທີ່ທ່ານອາດນຳໃຊ້ຄຳແນະນຳຂອງເພິ່ນກັບຄວາມສຳພັນຂອງທ່ານນຳຄົນອື່ນ. ຂ້າງລຸ່ມແມ່ນຄຳຖາມບາງຈຳນວນ ທີ່ທ່ານສາມາດພິຈາລະນາ:

ຂໍ້ທີ 1–7: ຄຳວ່າ “ນ້ອງຊາຍ” ແລະ “ເພື່ອນທະຫານ” ບອກທ່ານຫຍັງແດ່ກ່ຽວກັບຄວາມສຳພັນໃນບັນດາໄພ່ພົນ? ທ່ານຮູ້ສຶກ “ໄດ້ຮັບຄວາມສົດຊື່ນເພາະ” ການເປັນອ້າຍເອື້ອຍນ້ອງກັນໃນພຣະຄຣິດເມື່ອໃດ?
ຂໍ້ທີ 8–16: ຄຳວ່າ “ສັ່ງ” ແລະ “ຂໍຮ້ອງ” ໝາຍຄວາມວ່າແນວໃດ? ເປັນຫຍັງໂປໂລຈຶ່ງໄດ້ເລືອກທີ່ຈະ ຂໍຮ້ອງ ຟີເລໂມນ ແທນທີ່ຈະ ສັ່ງ ເພິ່ນ? ໂປໂລຫວັງທີ່ຈະບັນລຸສິ່ງໃດ ໂດຍການສົ່ງໂອເນຊີໂມກັບຄືນໄປຫາຟີເລໂມນ?
ຂໍ້ທີ 16: ຄຳວ່າ “ເປັນພີ່ນ້ອງກັນ … ໃນພຣະຜູ້ເປັນເຈົ້າ” ໝາຍຄວາມວ່າແນວໃດ? ທ່ານຮູ້ຈັກໃຜບໍ ຜູ້ທີ່ທ່ານຕ້ອງຮັບຕ້ອນໃນທາງນີ້?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

1 ຕີໂມທຽວ 2:9–10.ຄຳວ່າ “ປະດັບ [ຕົວເຮົາເອງ] … ດ້ວຍເຮັດການດີ” ໝາຍຄວາມວ່າແນວໃດ? ວຽກງານດີຢ່າງໃດແດ່ທີ່ຄອບຄົວຂອງເຮົາສາມາດເຮັດໃນອາທິດນີ້? ທ່ານອາດຮ້ອງເພງນຳກັນກ່ຽວກັບການເຮັດສິ່ງດີ, ດັ່ງເຊັ່ນ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70).

1 ຕີໂມທຽວ 4:12.ເພື່ອຊ່ວຍສະມາຊິກໃນຄອບຄົວຂອງທ່ານໃຫ້ມີຄວາມປາດຖະໜາທີ່ຈະ “ເປັນແບບຢ່າງໃຫ້ຄົນທີ່ເຊື່ອທັງຫລາຍ,” ໃຫ້ຄິດທີ່ຈະເຊື້ອເຊີນເຂົາເຈົ້າໃຫ້ແຕ້ມຮູບຜູ້ຄົນທີ່ເປັນຕົວຢ່າງທີ່ດີໃຫ້ກັບເຂົາເຈົ້າ. ຜູ້ຄົນເຫລົ່ານີ້ດົນໃຈເຮົາໃຫ້ຕິດຕາມພຣະເຢຊູຄຣິດແນວໃດ? ຂ່າວສານຂອງປະທານທອມມັສ ແອັສ ມອນສັນ “Be an Example and a Light” (Liahona, Nov. 2015, 86–88) ສາມາດໃຫ້ແນວຄິດບາງຢ່າງ ກ່ຽວກັບການເປັນຕົວຢ່າງໃຫ້ກັບຄົນອື່ນ.

1 ຕີໂມທຽວ 6:7–12.ທ່ານຄິດວ່າເປັນຫຍັງ “ການຮັກເງິນຄຳເປັນເຄົ້າມູນຂອງຄວາມຊົ່ວທຸກຢ່າງ”? ແມ່ນຫຍັງຄືອັນຕະລາຍຂອງການສຸມຊີວິດໃສ່ເງິນຄຳ ຫລື ຊັບສິນ? ເຮົາຈະສາມາດເພິ່ງພໍໃຈກັບພອນທີ່ເຮົາໄດ້ຮັບແນວໃດ?

2 ຕີໂມທຽວ 3:14–17.ອີງຕາມຂໍ້ເຫລົ່ານີ້, ພອນຢ່າງໃດແດ່ທີ່ມາເຖິງຜູ້ທີ່ຮູ້ຈັກ ແລະ ສຶກສາພຣະຄຳພີ? ບາງທີສະມາຊິກໃນຄອບຄົວສາມາດແບ່ງປັນຂໍ້ພຣະຄຳພີທີ່ເຂົາເຈົ້າພົບເຫັນວ່າ “ເປັນປະໂຫຍດ.”

ຟີເລໂມນ 1:17–21.ໂປໂລເຕັມໃຈຈະເຮັດຢ່າງໃດ ເພື່ອໂອເນຊີໂມ? ສິ່ງນີ້ຄ້າຍຄືກັນກັບສິ່ງທີ່ພຣະຜູ້ຊ່ວຍໃຫ້ລອດເຕັມພຣະໄທເຮັດເພື່ອເຮົາແນວໃດ? (ເບິ່ງ 1 ຕີໂມທຽວ 2:5–6; ຄຳສອນ ແລະ ພັນທະສັນຍາ 45:3–5 ນຳອີກ). ເຮົາຈະສາມາດເຮັດຕາມຕົວຢ່າງຂອງໂປໂລ ແລະ ພຣະຜູ້ຊ່ວຍໃຫ້ລອດໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72.

ການປັບປຸງການສິດສອນຂອງເຮົາ

ສິດສອນຄຳສອນທີ່ແຈ່ມແຈ້ງ ແລະ ລຽບງ່າຍ. ພຣະກິດຕິຄຸນຂອງພຣະຜູ້ເປັນເຈົ້າແມ່ນງົດງາມ ໃນຄວາມລຽບງ່າຍຂອງມັນ (ເບິ່ງ ຄຳສອນ ແລະ ພັນທະສັນຍາ 133:57). ແທນທີ່ຈະພະຍາຍາມບັນເທີງຄອບຄົວຂອງທ່ານດ້ວຍບົດຮຽນທີ່ຕ້ອງໃຊ້ເວລາຫລາຍເພື່ອກະກຽມ, ໃຫ້ພະຍາຍາມສິດສອນຄຳສອນທີ່ບໍລິສຸດ ແລະ ລຽບງ່າຍ (ເບິ່ງ 1 ຕີໂມທຽວ 1:3–7).