“ວັນທີ 25 ເດືອນກັນຍາ–ວັນທີ 1 ເດືອນຕຸລາ. ຄາລາເຕຍ: ‘ຈົ່ງຍອມໃຫ້ພຣະວິນຍານນຳພາຊີວິດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 25 ເດືອນກັນຍາ–ວັນທີ 1 ເດືອນຕຸລາ. ຄາລາເຕຍ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນຢ້ຽມຢາມໂປໂລໃນຄຸກ (ເບິ່ງ ກິດຈະການ 23:11). ພຣະເຢຊູຄຣິດສາມາດປົດປ່ອຍເຮົາຈາກ “ການເປັນຂ້ອຍຂ້າ” (ຄາລາເຕຍ 5:1).

ວັນທີ 25 ເດືອນກັນຍາ–ວັນທີ 1 ເດືອນຕຸລາ

ຄາລາເຕຍ

“ຈົ່ງຍອມໃຫ້ພຣະວິນຍານນຳພາຊີວິດ”

ຂະນະທີ່ທ່ານອ່ານຄາລາເຕຍ, ໃຫ້ບັນທຶກຄວາມປະທັບໃຈທີ່ທ່ານໄດ້ຮັບ. ໃນການເຮັດສິ່ງນັ້ນ ຈະຊ່ວຍທ່ານໃຫ້ຈື່ຈຳ ແລະ ໄຕ່ຕອງມັນໃນອະນາຄົດ.

ບັນທຶກຄວາມປະທັບໃຈຂອງທ່ານ

ພຣະກິດຕິຄຸນຂອງພຣະເຢຊູຄຣິດສະເໜີມອບອິດສະລະຈາກການເປັນຂ້ອຍຂ້າທາງວິນຍານໃຫ້. ແຕ່ບາງເທື່ອຜູ້ຄົນທີ່ເຄີຍປະສົບກັບການເປັນອິດສະລະຂອງພຣະກິດຕິຄຸນ ໄດ້ຫັນໜີຈາກມັນ ແລະ “ຢາກຕົກເປັນຂ້ອຍຂ້າ … ອີກ” (ຄາລາເຕຍ 4:9). ນີ້ຄືສິ່ງທີ່ໄພ່ພົນຊາວຄາລາເຕຍກຳລັງເຮັດ—ພວກເຂົາໄດ້ຫັນໜີຈາກເສລີພາບທີ່ພຣະຄຣິດໄດ້ສະເໜີມອບໃຫ້ພວກເຂົາ (ເບິ່ງ ຄາລາເຕຍ 1:6). ສານຂອງໂປໂລເຖິງຊາວຄາລາເຕຍ, ໃນເວລານັ້ນ, ເປັນການເອີ້ນໃຫ້ກັບຄືນມາຫາ “ພຣະຄຣິດ [ເພື່ອ] ປົດປ່ອຍເຮົາໃຫ້ເປັນອິດສະລະ” (ຄາລາເຕຍ 5:1). ການເອີ້ນນີ້ເປັນສິ່ງທີ່ເຮົາຕ້ອງໄດ້ຍິນ ແລະ ເອົາໃຈໃສ່ນຳອີກ ເພາະໃນຂະນະທີ່ສະຖານະການປ່ຽນແປງໄປ, ການຕໍ່ສູ້ດີ້ນລົນລະຫວ່າງການເປັນອິດສະລະ ແລະ ການເປັນຂ້ອຍຂ້າຍັງຄົງດຳເນີນຕໍ່ໄປ. ດັ່ງທີ່ໂປໂລໄດ້ສິດສອນ, ມັນບໍ່ພຽງພໍທີ່ “ຖືກເອີ້ນໃຫ້ມີເສລີພາບ” (ຄາລາເຕຍ 5:13); ເຮົາຕ້ອງ “ຕັ້ງໝັ້ນ” ໃນມັນນຳດ້ວຍ (ຄາລາເຕຍ 5:1) ໂດຍການເພິ່ງພຣະຄຣິດ.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄາລາເຕຍ 1–5

ກົດຂອງພຣະຄຣິດເຮັດໃຫ້ເຮົາເປັນອິດສະລະ.

ໂປໂລໄດ້ຂຽນເຖິງໄພ່ພົນຊາວຄາລາເຕຍ ເມື່ອເພິ່ນໄດ້ຍິນວ່າ ພວກເຂົາໄດ້ຖືກນຳພາໃຫ້ຫລົງທາງໄປດ້ວຍຄຳສອນປອມ (ເບິ່ງ ຄາລາເຕຍ 1:6–9). ໜຶ່ງໃນຄຳສອນເຫລົ່ານີ້ແມ່ນວ່າ ກ່ອນຈະໄດ້ຮັບຄວາມລອດ, ຄົນຕ່າງຊາດຜູ້ໄດ້ຮັບເອົາພຣະກິດຕິຄຸນຕ້ອງໄດ້ຮັບພິທີຕັດ ແລະ ນັບຖືປະເພນີອື່ນຕາມກົດຂອງໂມເຊ (ເບິ່ງ ຄາລາເຕຍ 2). ໂປໂລໄດ້ເອີ້ນປະເພນີເຫລົ່ານີ້ວ່າ “ການເປັນຂ້ອຍຂ້າ” (ຄາລາເຕຍ 5:1). ຂະນະທີ່ທ່ານອ່ານຄຳແນະນຳຂອງໂປໂລຕໍ່ຊາວຄາລາເຕຍ, ໃຫ້ຊອກຫາຫລັກທຳທີ່ສາມາດຊ່ວຍທ່ານໃຫ້ເຂົ້າໃຈວ່າ ອິດສະລະທີ່ແທ້ຈິງນັ້ນແມ່ນຫຍັງ. ທ່ານກໍສາມາດໄຕ່ຕອງປະເພນີທີ່ຜິດອີກ ຫລື ການເປັນຂ້ອຍຂ້າຢ່າງອື່ນທີ່ມີຢູ່ໃນຊີວິດຂອງທ່ານ. ມີສິ່ງໃດບໍທີ່ກີດກັນທ່ານຈາກການປະເຊີນກັບການເປັນອິດສະລະທີ່ພຣະກິດຕິຄຸນສະເໜີມອບໃຫ້? ພຣະຄຣິດ ແລະ ພຣະກິດຕິຄຸນຂອງພຣະອົງ “ປົດປ່ອຍ [ທ່ານ] ໃຫ້ເປັນອິດສະລະ” ແນວໃດ? (ຄາລາເຕຍ 5:1).

ເບິ່ງ 2 ນີໄຟ 2:27; 9:10–12 ນຳອີກ.

ຄາລາເຕຍ 3

ເຮົາເປັນທາຍາດຜູ້ຈະໄດ້ຮັບພອນທີ່ສັນຍາໄວ້ກັບອັບຣາຮາມ.

ໄພ່ພົນຊາວຄາລາເຕຍບາງຄົນເປັນຫ່ວງວ່າ ເພາະພວກເຂົາບໍ່ໄດ້ເປັນລູກຫລານໂດຍກົງ (“ເຊື້ອສາຍ”) ຂອງອັບຣາຮາມ, ພວກເຂົາຈະບໍ່ໄດ້ຮັບພອນທີ່ສັນຍາໄວ້ກັບອັບຣາຮາມ, ລວມທັງຄວາມສູງສົ່ງ. ອີງຕາມ ຄາລາເຕຍ 3:7–9, 13–14, 27–29, ແມ່ນຫຍັງທີ່ເຮັດໃຫ້ບຸກຄົນເໝາະສົມກັບການເປັນ “ເຊື້ອສາຍຂອງອິດສະຣາເອນ”?

ເພື່ອຮຽນຮູ້ກ່ຽວກັບພອນທີ່ສັນຍາກັບອັບຣາຮາມ ແລະ ພອນທີ່ເຮົາສາມາດໄດ້ຮັບໃນຖານະເຊື້ອສາຍຂອງເພິ່ນ, ໃຫ້ເບິ່ງ Gospel Topics, “Abrahamic Covenant,” topics.ChurchofJesusChrist.org. ເປັນຫຍັງພອນທີ່ສັນຍາກັບອັບຣາຮາມຈຶ່ງສຳຄັນຕໍ່ທ່ານ?

ຄາລາເຕຍ 3:6–25

ອັບຣາຮາມມີພຣະກິດຕິຄຸນຂອງພຣະເຢຊູຄຣິດ.

ສາດສະດາໂຈເຊັບ ສະມິດ ໄດ້ອະທິບາຍວ່າ: “ເຮົາບໍ່ສາມາດເຊື່ອໄດ້ວ່າ ຄົນໃນສະໄໝກ່ອນໃນທຸກຍຸກທຸກສະໄໝເມີນເສີຍຈາກລະບົບສະຫວັນຢ່າງທີ່ຫລາຍຄົນຄິດ, ເນື່ອງຈາກວ່າທຸກຄົນທີ່ເຄີຍໄດ້ຮັບຄວາມລອດ, ໄດ້ລອດຜ່ານທາງອຳນາດຂອງແຜນແຫ່ງການໄຖ່ທີ່ຍິ່ງໃຫຍ່ນີ້, ຫລາຍເທົ່າກັບກ່ອນການສະເດັດມາຂອງພຣະຄຣິດ. … ອັບຣາຮາມໄດ້ຖວາຍເຄື່ອງບູຊາ, ແລະ ເຖິງແມ່ນວ່າບໍ່ໄດ້ຖວາຍ, ພຣະກິດຕິຄຸນກໍຍັງໄດ້ຖືກສັ່ງສອນແກ່ເພິ່ນ” (“The Elders of the Church in Kirtland to Their Brethren Abroad,” The Evening and the Morning Star, Mar. 1834, 143, JosephSmithPapers.org). ທ່ານຄິດວ່າເປັນຫຍັງມັນຈຶ່ງສຳຄັນສຳລັບໄພ່ພົນໃນສະໄໝຂອງໂປໂລ ທີ່ຈະຮູ້ວ່າ ອັບຮາຣາມ ແລະ ສາດສະດາຄົນອື່ນໆໃນສະໄໝບູຮານມີພຣະກິດຕິຄຸນຂອງພຣະເຢຊູຄຣິດ? ເປັນຫຍັງມັນຈຶ່ງສຳຄັນຕໍ່ທ່ານທີ່ຈະຮູ້ຈັກສິ່ງນີ້? (ເບິ່ງ ຮີລາມັນ 8:13–20; ໂມເຊ 5:58–59; 6:50–66.)

ເບິ່ງ Teachings of Presidents of the Church: Joseph Smith (2007), 45–56 ນຳອີກ.

ຄາລາເຕຍ 5:13–26; 6:7–10

ຖ້າຫາກເຮົາ “ຍອມໃຫ້ພຣະວິນຍານນຳພາຊີວິດ,” ເຮົາຈະໄດ້ຮັບ “ຜົນຂອງພຣະວິນຍານ.”

ການສຶກສາຂໍ້ເຫລົ່ານີ້ສາມາດຊ່ວຍທ່ານໃຫ້ປະເມີນວ່າ ທ່ານຍອມໃຫ້ພຣະວິນຍານນຳພາຊີວິດຢ່າງເຕັມທີ່ຫລາຍປານໃດ. ທ່ານກຳລັງປະສົບກັບຜົນຂອງພຣະວິນຍານທີ່ກ່າວເຖິງຢູ່ໃນ ຂໍ້ທີ 22–23 ບໍ? ທ່ານສັງເກດເຫັນຜົນ, ຫລື ຜົນສະທ້ອນຂອງການດຳລົງຊີວິດທາງວິນຍານແນວໃດຕື່ມອີກແດ່? ໃຫ້ໄຕ່ຕອງສິ່ງທີ່ທ່ານຕ້ອງເຮັດເພື່ອປູກຝັງຜົນນີ້ໃຫ້ເຕັມທີ່ຫລາຍຂຶ້ນ. ການປູກຝັງຜົນນີ້ຈະປັບປຸງຄວາມສຳພັນທີ່ສຳຄັນໃນຊີວິດຂອງທ່ານໄດ້ແນວໃດ?

ໝາກແອບເປິ້ນຢູ່ເທິງຕົ້ນ — ເຮົາຕ້ອງສະແຫວງຫາ “ຜົນຂອງພຣະວິນຍານ” ໃນຊີວິດຂອງເຮົາ.

ຖ້າຫາກທ່ານພະຍາຍາມຍອມໃຫ້ພຣະວິນຍານນຳພາຊີວິດ ແຕ່ຄວາມພະຍາຍາມຂອງທ່ານເບິ່ງຄືບໍ່ມີຜົນຂອງພຣະວິນຍານທີ່ສັນຍາໄວ້, ໃຫ້ອ່ານ ຄາລາເຕຍ 6:7–10. ຂ່າວສານໃດທີ່ທ່ານຮູ້ສຶກວ່າພຣະຜູ້ເປັນເຈົ້າມີໃຫ້ສຳລັບທ່ານ ຢູ່ໃນຂໍ້ເຫລົ່ານີ້?

ເບິ່ງ ແອວມາ 32:28, 41–43; ຄຳສອນ ແລະ ພັນທະສັນຍາ 64:32–34 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄາລາເຕຍ 3:11.“[ດຳເນີນຊີວິດດ້ວຍສັດທາ]” ໝາຍຄວາມວ່າແນວໃດ? ເຮົາຈະດຳເນີນຊີວິດດ້ວຍສັດທາເປັນຄອບຄົວແນວໃດ?

ຄາລາເຕຍ 4:1–7.ທ່ານສາມາດແນະນຳ ຄາລາເຕຍ 4 ໂດຍການສົນທະນາເຖິງຄວາມແຕກຕ່າງລະຫວ່າງຜູ້ຮັບໃຊ້ຂອງກະສັດ ກັບລູກໆຂອງເພິ່ນ. ໂອກາດ ຫລື ສັກກະຍະພາບຢ່າງໃດແດ່ທີ່ລູກໆຂອງກະສັດມີ ແຕ່ຜູ້ຮັບໃຊ້ບໍ່ມີ? ໃຫ້ຄິດກ່ຽວກັບສິ່ງນີ້ ຂະນະທີ່ທ່ານອ່ານ ຂໍ້ທີ 1–7. ຂໍ້ເຫລົ່ານີ້ສິດສອນຫຍັງແດ່ກ່ຽວກັບຄວາມສຳພັນຂອງທ່ານກັບພຣະບິດາເທິງສະຫວັນ?

ຄາລາເຕຍ 5:16–26.ໃຫ້ຄິດທີ່ຈະສົນທະນາຄວາມແຕກຕ່າງລະຫວ່າງ “ກິດຈະການແຫ່ງສັນດານມະນຸດ” ແລະ “ຜົນຂອງພຣະວິນຍານ.” ເພື່ອເພີ່ມຄວາມມ່ວນຊື່ນໃສ່ກັບການສົນທະນາຂອງພວກທ່ານ, ຄອບຄົວຂອງທ່ານສາມາດຕິດປ້າຍໃສ່ໝາກໄມ້ທີ່ແຕກຕ່າງກັນ ໂດຍໃຊ້ຄຳຂອງໂປໂລທີ່ບັນຍາຍເຖິງຜົນຂອງພຣະວິນຍານ. ແລ້ວສະມາຊິກໃນຄອບຄົວແຕ່ລະຄົນສາມາດເລືອກເອົາໜ່ວຍໜຶ່ງ, ອະທິບາຍກ່ຽວກັບມັນ, ແລະ ເວົ້າກ່ຽວກັບບາງຄົນທີ່ເປັນຕົວຢ່າງຂອງໝາກໄມ້ນັ້ນ. ສິ່ງນີ້ອາດພາໄປສູ່ການສົນທະນາກ່ຽວກັບວິທີທີ່ຄອບຄົວຂອງທ່ານສາມາດເຊື້ອເຊີນພຣະວິນຍານໃຫ້ເຂົ້າມາໃນບ້ານເຮືອນຂອງພວກທ່ານ ແລະ ປູກຝັງຜົນນີ້. ຫລັງຈາກການສົນທະນາ, ພວກທ່ານສາມາດກິນສະຫລັດໝາກໄມ້ນຳກັນ.

ຄາລາເຕຍ 6:1–2.ອາດມີເວລາທີ່ບາງຄົນໃນຄອບຄົວຂອງທ່ານ “ຖືກທົດລອງໃຫ້ເຮັດຜິດ.” ທ່ານພົບເຫັນຄຳແນະນຳຢ່າງໃດແດ່ໃນ ຄາລາເຕຍ 6:1–2 ກ່ຽວກັບສິ່ງທີ່ຈະເຮັດໃນສະຖານະການເຊັ່ນນັ້ນ?

ຄາລາເຕຍ 6:7–10.ຖ້າຫາກຄອບຄົວຂອງທ່ານເຄີຍໄດ້ປູກບາງສິ່ງນຳກັນ, ທ່ານສາມາດໃຊ້ປະສົບການນັ້ນເພື່ອສະແດງຫລັກທຳ ທີ່ວ່າ “ຜູ້ໃດຫວ່ານສິ່ງໃດລົງ, ກໍຈະເກັບກ່ຽວສິ່ງນັ້ນ” (ຂໍ້ທີ 7). ຫລື ທ່ານສາມາດຖາມສະມາຊິກໃນຄອບຄົວກ່ຽວກັບໝາກໄມ້ ຫລື ຜັກທີ່ເຂົາເຈົ້າມັກ ແລະ ເວົ້າລົມກັນກ່ຽວກັບວ່າ ຕ້ອງເຮັດຫຍັງແດ່ໃນການປູກຕົ້ນໝາກໄມ້ ຫລື ຜັກເຫລົ່ານັ້ນ. (ເບິ່ງຮູບພາບຢູ່ໃນທ້າຍຂອງໂຄງຮ່າງນີ້.) ພວກທ່ານສາມາດເວົ້າລົມກັນກ່ຽວກັບພອນທີ່ຄອບຄົວຂອງທ່ານຫວັງວ່າຈະໄດ້ຮັບ ແລະ ວິທີທີ່ຈະ “ເກັບກ່ຽວ” ພອນເຫລົ່ານັ້ນ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72.

ການປັບປຸງການສິດສອນຂອງເຮົາ

ຊ່ວຍຄອບຄົວຂອງທ່ານປຽບທຽບພຣະຄຳພີກັບຕົວເອງ. ນີໄຟໄດ້ກ່າວວ່າ “ຂ້າພະເຈົ້າປຽບທຽບພຣະຄຳພີທັງໝົດກັບຕົວຂອງພວກເຮົາ, ເພື່ອມັນຈະໄດ້ເປັນຜົນປະໂຫຍດ ແລະ ເປັນການຮຽນຮູ້ຂອງພວກເຮົາ” (1 ນີໄຟ 19:23). ເພື່ອຊ່ວຍຄອບຄົວຂອງທ່ານໃຫ້ເຮັດສິ່ງນີ້, ທ່ານສາມາດເຊື້ອເຊີນເຂົາເຈົ້າໃຫ້ໄຕ່ຕອງເວລາຕອນທີ່ເຂົາເຈົ້າໄດ້ປະສົບກັບຜົນຂອງພຣະວິນຍານ ທີ່ບັນຍາຍຢູ່ໃນ ຄາລາເຕຍ 5:22–23. (ເບິ່ງ Teaching in the Savior’s Way, 21.)

ໝາກແພຢູ່ເທິງຕົ້ນ — ໂປໂລໄດ້ສິດສອນວ່າ ເມື່ອເຮົາຍອມໃຫ້ພຣະວິນຍານນຳພາຊີວິດ, ເຮົາຈະປະສົບ “ຜົນຂອງພຣະວິນຍານ” ໃນຊີວິດຂອງເຮົາ.