“ວັນທີ 16–22 ເດືອນຕຸລາ. 1 ແລະ 2 ເທສະໂລນິກ: ‘ເພື່ອຈະເສີມສ້າງ [ສັດທາ] ຂອງພວກເຈົ້າທີ່ບົກພ່ອງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 16–22 ເດືອນຕຸລາ. 1 ແລະ 2 ເທສະໂລນິກ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
ວັນທີ 16–22 ເດືອນຕຸລາ
1 ແລະ 2 ເທສະໂລນິກ
“ເພື່ອຈະເສີມສ້າງ [ສັດທາ] ຂອງພວກເຈົ້າທີ່ບົກພ່ອງ”
ຖ້າຫາກເຮົາບໍ່ບັນທຶກຄວາມປະທັບໃຈທີ່ເຮົາໄດ້ຮັບຈາກພຣະວິນຍານ, ເຮົາຈະລືມມັນ. ພຣະວິນຍານໄດ້ກະຕຸ້ນທ່ານໃຫ້ບັນທຶກສິ່ງໃດ ຂະນະທີ່ທ່ານອ່ານ 1 ແລະ 2 ເທສະໂລນິກ?
ບັນທຶກຄວາມປະທັບໃຈຂອງທ່ານ
ໃນເມືອງເທສະໂລນິກ, ໂປໂລ ແລະ ຊີລາ ໄດ້ຖືກກ່າວຫາວ່າ “ຂວ້ຳໂລກມະນຸດ” (ກິດຈະການ 17:6). ຄຳສັ່ງສອນຂອງພວກເພິ່ນເຮັດໃຫ້ຜູ້ນຳບາງຄົນໃນບັນດາຊາວຢິວໃຈຮ້າຍ, ແລະ ຜູ້ນຳເຫລົ່ານີ້ໄດ້ຍຸຍົງຜູ້ຄົນໃຫ້ວຸ້ນວາຍ (ເບິ່ງ ກິດຈະການ 17:1–10). ຜົນກໍຄື, ໂປໂລ ແລະ ຊີລາໄດ້ຖືກແນະນຳໃຫ້ໜີຈາກເມືອງເທສະໂລນິກ. ໂປໂລເປັນຫ່ວງນຳຜູ້ປ່ຽນໃຈເຫລື້ອມໃສໃໝ່ຊາວເທສະໂລນິກ ແລະ ການຂົ່ມເຫັງທີ່ພວກເຂົາກຳລັງປະເຊີນ, ແຕ່ເພິ່ນກໍບໍ່ສາມາດກັບຄືນໄປຢ້ຽມຢາມພວກເຂົາ. “ເມື່ອເຮົາທົນຕໍ່ການຄອຍຖ້າບໍ່ໄດ້ອີກແລ້ວ,” ເພິ່ນຂຽນ, “ຈຶ່ງໃຊ້ຄົນໄປ ເພື່ອຈະໄດ້ຮູ້ເຖິງ [ສັດທາ] ຂອງພວກເຈົ້າ.” ໃນຄຳຕອບ, ຕີໂມທຽວຜູ້ຊ່ວຍໂປໂລ, ທີ່ເຄີຍໄດ້ຮັບໃຊ້ຢູ່ໃນເມືອງເທສະໂລນິກ, “ໄດ້ນຳຂ່າວດີກ່ຽວກັບ [ສັດທາ] ແລະ ຄວາມຮັກຂອງພວກເຈົ້າມາຍັງພວກເຮົາ” (1 ເທສະໂລນິກ 3:5–6). ຕາມຈິງແລ້ວ, ໄພ່ພົນເມືອງເທສະໂລນິກຮູ້ກັນວ່າເປັນຕົວຢ່າງ “ແກ່ຄົນທີ່ເຊື່ອທັງໝົດ” (1 ເທສະໂລນິກ 1:7), ແລະ ຂ່າວເລື່ອງສັດທາຂອງພວກເຂົາໄດ້ຖືກເລົ່າລືໄປເຖິງຫົວເມືອງຕ່າງແດນ. ໃຫ້ວາດພາບເຫັນຄວາມຊື່ນຊົມຂອງໂປໂລ ແລະ ຄວາມໂລ່ງໃຈທີ່ໄດ້ຍິນວ່າ ວຽກງານຂອງເພິ່ນໃນບັນດາພວກເຂົາ “ບໍ່ໄດ້ເສຍປະໂຫຍດ” (1 ເທສະໂລນິກ 2:1). ແຕ່ໂປໂລຮູ້ວ່າ ຄວາມຊື່ສັດໃນອະດີດ ບໍ່ພຽງພໍສຳລັບຄວາມລອດທາງວິນຍານໃນອະນາຄົດ, ແລະ ເພິ່ນກໍລະມັດລະວັງກັບອິດທິພົນຂອງຄູສອນປອມໃນບັນດາໄພ່ພົນ (ເບິ່ງ 2 ເທສະໂລນິກ 2:2–3). ຂ່າວສານຂອງເພິ່ນຕໍ່ພວກເຂົາ, ແລະ ຕໍ່ເຮົາ, ແມ່ນໃຫ້ສືບຕໍ່ “ເສີມສ້າງ [ສັດທາຂອງເຮົາ] ທີ່ບົກພ່ອງ” ແລະ ໃຫ້ມີຄວາມຮັກ “ຫລາຍກວ່າເກົ່າ” (ເບິ່ງ 1 ເທສະໂລນິກ 3:10; 4:10).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ສານຸສິດຂອງພຣະຄຣິດຈະຮັບໃຊ້ກັນແລະກັນ ດ້ວຍໃຈຈິງ ແລະ ດ້ວຍຄວາມຮັກ.
ໃນ 1 ເທສະໂລນິກ, ຖ້ອຍຄຳຂອງໂປໂລເປີດເຜີຍທັງຄວາມເປັນຫ່ວງ ແລະ ຄວາມຊື່ນຊົມກັບບາງຄົນທີ່ໄດ້ມອບຕົວເອງທັງໝົດໃຫ້ກັບການຮັບໃຊ້ລູກໆຂອງພຣະເຈົ້າ. ໂດຍສະເພາະໃນສອງບົດທຳອິດຂອງ 1 ເທສະໂລນິກ, ທ່ານຈະພົບເຫັນຖ້ອຍຄຳ ແລະ ວະລີທີ່ບັນຍາຍເຖິງທັດສະນະຄະຕິ ແລະ ການກະທຳຂອງສານຸສິດຂອງພຣະຜູ້ເປັນເຈົ້າ. ຍົກຕົວຢ່າງ, ທ່ານຮຽນຮູ້ຫຍັງແດ່ຈາກ 1 ເທສະໂລນິກ 1:5–8; 2:1–13 ກ່ຽວກັບການຮັບໃຊ້ພຣະຜູ້ເປັນເຈົ້າ?
ໃຫ້ຄິດກ່ຽວກັບໂອກາດຂອງທ່ານເອງ ທີ່ຈະຮັບໃຊ້ພຣະເຈົ້າ ແລະ ລູກໆຂອງພຣະອົງ. ທ່ານພົບເຫັນຫຍັງແດ່ໃນບົດເຫລົ່ານີ້ ທີ່ດົນໃຈທ່ານໃຫ້ປັບປຸງການຮັບໃຊ້ຂອງທ່ານ? ໃຫ້ຄິດທີ່ຈະຖາມຕົວເອງໃນຄຳຖາມອີງຕາມສິ່ງທີ່ທ່ານພົບເຫັນ, ດັ່ງເຊັ່ນ “ເຮົາເປັນຕົວຢ່າງເຖິງສິ່ງທີ່ເຮົາຮູ້ບໍ?” (ເບິ່ງ 1 ເທສະໂລນິກ 1:7).
“ຈະເລີນຂຶ້ນ ແລະ ລົ້ນເຫລືອໄປດ້ວຍຄວາມຮັກ.”
ໂປໂລໄດ້ປິຕິຍິນດີໃນຄວາມຊື່ສັດຂອງໄພ່ພົນຊາວເທສະໂລນິກ (ເບິ່ງ 1 ເທສະໂລນິກ 3:7–9). ແຕ່ເພິ່ນກໍຢາກໃຫ້ພວກເຂົາມີສັດທານັ້ນ “ຫລາຍກວ່າເກົ່າ” (1 ເທສະໂລນິກ 4:1). ຂະນະທີ່ທ່ານອ່ານ 1 ເທສະໂລນິກ 3:7–13; 4:1–12, ໃຫ້ໄຕ່ຕອງວິທີທີ່ທ່ານສາມາດເຮັດດັ່ງນັ້ນ “ຫລາຍກວ່າເກົ່າ” ທາງວິນຍານແນວໃດ (1 ເທສະໂລນິກ 4:10). ຍົກຕົວຢ່າງ, ໃຫ້ສັງເກດເບິ່ງວ່າໂປໂລໄດ້ໃຊ້ຖ້ອຍຄຳເຊັ່ນ “ບໍລິສຸດ” ແລະ “ໃນທາງບໍລິສຸດ.” ທ່ານຮຽນຮູ້ຫຍັງແດ່ຈາກການຂຽນຂອງໂປໂລກ່ຽວກັບຄວາມໝາຍຂອງຖ້ອຍຄຳເຫລົ່ານີ້? ພຣະຜູ້ຊ່ວຍໃຫ້ລອດສາມາດຊ່ວຍທ່ານໃຫ້ກາຍເປັນຜູ້ບໍລິສຸດ ແລະ ສະອາດຫລາຍຂຶ້ນແນວໃດ?
ເບິ່ງ ຄູ່ມືພຣະຄຳພີ, “ບໍລິສຸດ,” “ການຊຳລະໃຫ້ບໍລິສຸດ,” scriptures.ChurchofJesusChrist.org ນຳອີກ.
1 ເທສະໂລນິກ 4:16–18; 5:1–10; 2 ເທສະໂລນິກ 1:4–10
ຖ້າຫາກເຮົາຊື່ສັດ ແລະ ລະມັດລະວັງ, ເຮົາຈະກຽມພ້ອມສຳລັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ.
ໃນ 1 ເທສະໂລນິກ 5:1–10, ໂປໂລໄດ້ໃຊ້ຄຳປຽບທຽບຫລາຍຢ່າງເພື່ອສິດສອນກ່ຽວກັບເວລາຕອນທີ່ພຣະເຢຊູຈະສະເດັດກັບຄືນມາສູ່ໂລກ. ຂະນະທີ່ທ່ານສຶກສາຄຳປຽບທຽບເຫລົ່ານີ້, ໃຫ້ຄິດທີ່ຈະຂຽນຄວາມປະທັບໃຈໄວ້ ອັນທີ່ມາສູ່ທ່ານກ່ຽວກັບການສະເດັດມາຄັ້ງທີສອງຂອງພຣະເຢຊູຄຣິດ:
-
“ຂະໂມຍມາໃນເວລາກາງຄືນ”:
-
“ເໝືອນດັ່ງຄວາມເຈັບປວດມາເຖິງຍິງທີ່ມີທ້ອງ”:
-
ຄຳປຽບທຽບອື່ນໆທີ່ທ່ານພົບເຫັນ:
ຄວາມຈິງເພີ່ມເຕີມຢ່າງໃດແດ່ທີ່ທ່ານຮຽນຮູ້ຈາກ 1 ເທສະໂລນິກ 4:16–18; 5:1–10; 2 ເທສະໂລນິກ 1:4–10? ທ່ານໄດ້ຮັບການກະຕຸ້ນໃຫ້ເຮັດສິ່ງໃດ ເພື່ອເຝົ້າລະວັງ ແລະ ກຽມພ້ອມສຳລັບການສະເດັດມາຂອງພຣະຜູ້ຊ່ວຍໃຫ້ລອດ?
ເບິ່ງ D. Todd Christofferson, “Preparing for the Lord’s Return,” Liahona, May 2019, 81–84 ນຳອີກ.
ການປະຖິ້ມຄວາມເຊື່ອ, ຫລື ການໜີຈາກຄວາມຈິງ, ໄດ້ຖືກທຳນາຍໄວ້ວ່າ ຈະເກີດຂຶ້ນກ່ອນການສະເດັດມາຄັ້ງທີສອງ.
ທ່າມກາງການຂົ່ມເຫັງທີ່ມີຫລາຍຂຶ້ນ, ໄພ່ພົນຊາວເທສະໂລນິກໄດ້ເຊື່ອວ່າ ການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ ຄົງໃກ້ຈະມາເຖິງໄວໆນັ້ນ. ແຕ່ໂປໂລຮູ້ວ່າ ກ່ອນພຣະເຢຊູສະເດັດກັບຄືນມາສູ່ໂລກ ຈະມີການປະຖິ້ມຄວາມເຊື່ອ—ການກະບົດ ຫລື “[ການໜີໄປ]” ຈາກຄວາມຈິງເສຍກ່ອນ (ເບິ່ງ 2 ເທສະໂລນິກ 2:1–4). ທ່ານສາມາດເຮັດໃຫ້ຄວາມເຂົ້າໃຈຂອງທ່ານເລິກເຊິ່ງເລື່ອງການປະຖິ້ມຄວາມເຊື່ອຄັ້ງຍິ່ງໃຫຍ່—ແລະ ຄວາມຂອບໃຈຂອງທ່ານສຳລັບການຟື້ນຟູ—ໂດຍການໄຕ່ຕອງບາງຢ່າງດັ່ງຕໍ່ໄປນີ້:
-
ຂໍ້ພຣະຄຳພີທີ່ບອກລ່ວງໜ້າເຖິງການປະຖິ້ມຄວາມເຊື່ອ: ເອຊາຢາ 24:5; ອາໂມດ 8:11–12; ມັດທາຍ 24:4–14; 2 ຕີໂມທຽວ 4:3–4
-
ຂໍ້ພຣະຄຳພີທີ່ສະແດງໃຫ້ເຫັນວ່າ ການປະຖິ້ມຄວາມເຊື່ອໄດ້ເລີ່ມຕົ້ນແລ້ວໃນສະໄໝຂອງໂປໂລ: ກິດຈະການ 20:28–30; ຄາລາເຕຍ 1:6–7; 1 ຕີໂມທຽວ 1:5–7
-
ການສັງເກດເບິ່ງການປະຖິ້ມຄວາມເຊື່ອຄັ້ງຍິ່ງໃຫຍ່ໂດຍນັກປະຕິຮູບຊາວຄຣິດສະຕຽນ:
ມາຕິນ ລູເຕີ: “ຂ້າພະເຈົ້າບໍ່ໄດ້ສະແຫວງຫາສິ່ງໃດທີ່ເກີນໄປກວ່າການປະຕິຮູບສາດສະໜາຈັກ ຕາມພຣະຄຳພີສັກສິດ. … ຂ້າພະເຈົ້າເວົ້າງ່າຍໆວ່າ ສາດສະໜາພຣະຄຣິດບໍ່ມີຢູ່ໃນທ່າມກາງຜູ້ທີ່ຄວນຮັກສາມັນໄວ້” (ໃນ E. G. Schweibert, Luther and His Times: The Reformation from a New Perspective [1950], 590).
ຣໍເຈີ ວິວລຽມສ໌ ໄດ້ກ່າວວ່າ: “ການປະຖິ້ມຄວາມເຊື່ອ … ໄດ້ເຮັດໃຫ້ທຸກສິ່ງເສື່ອມໂຊມຈົນວ່າບໍ່ສາມາດຟື້ນຈາກການປະຖິ້ມຄວາມເຊື່ອນັ້ນໄດ້ ຈົນກວ່າພຣະຄຣິດຈະສົ່ງອັກຄະສາວົກໃໝ່ອອກໄປ ເພື່ອສ້າງຕັ້ງສາດສະໜາຈັກໃໝ່” (ໃນ Philip Schaff, The Creeds of Christendom [1877], 851).
ເບິ່ງ 2 ນີໄຟ 28; Gospel Topics, “Apostasy,” topics.ChurchofJesusChrist.org ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
1 ເທສະໂລນິກ 3:9–13.ແມ່ນຫຍັງທີ່ປະທັບໃຈທ່ານກ່ຽວກັບຄວາມຮູ້ສຶກທີ່ໂປໂລມີຕໍ່ໝູ່ເພື່ອນຂອງເພິ່ນ? ເຮົາຈະສາມາດ “ໃຫ້ພວກເຈົ້າຈະເລີນຂຶ້ນ ແລະ ລົ້ນເຫລືອໄປດ້ວຍຄວາມຮັກ ທີ່ມີຕໍ່ກັນແລະກັນ” ແນວໃດ? (ຂໍ້ທີ 12).
-
1 ເທສະໂລນິກ 4:13–18.ວະລີໃດແດ່ໃນຂໍ້ເຫລົ່ານີ້ກ່ຽວກັບການຟື້ນຄືນພຣະຊົນທີ່ປອບໂຍນທ່ານ?
-
1 ເທສະໂລນິກ 5:14–25.ຂະນະທີ່ທ່ານທົບທວນຄຳແນະນຳຂອງໂປໂລໃນ 1 ເທສະໂລນິກ 5:14–25, ໃຫ້ເຊື້ອເຊີນສະມາຊິກໃນຄອບຄົວແຕ່ລະຄົນ ໃຫ້ຊອກຫາວະລີທີ່ຄອບຄົວສາມາດສຸມໃຈໃສ່. ໃຫ້ຊອກຫາວິທີທີ່ສ້າງສັນ ເພື່ອສະແດງວະລີເຫລົ່ານີ້ຢູ່ໃນເຮືອນຂອງທ່ານ ເພື່ອເປັນຄຳເຕືອນ. ຍົກຕົວຢ່າງ, ແຕ່ລະຄົນສາມາດຊອກຫາ ຫລື ແຕ້ມຮູບທີ່ສະແດງ ຫລື ສົ່ງເສີມວະລີທີ່ເຂົາເຈົ້າເລືອກ.
-
2 ເທສະໂລນິກ 3:13.ເຮົາເຄີຍຮູ້ສຶກວ່າ “ອິດເມື່ອຍທີ່ຈະເຮັດຄວາມດີ” ບໍ—ບາງທີ, ຖືກກົດດັນກັບການເປັນສານຸສິດ? ແມ່ນຫຍັງທີ່ຊ່ວຍເຮົາ ເວລາເຮົາຮູ້ສຶກໃນທາງນີ້? (ເບິ່ງ ຄາລາເຕຍ 6:9; ຄຳສອນ ແລະ ພັນທະສັນຍາ 64:33.) ເຮົາຈະສະໜັບສະໜູນກັນແລະກັນເມື່ອສິ່ງນີ້ເກີດຂຶ້ນໄດ້ແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.
ການປັບປຸງການສຶກສາສ່ວນຕົວ
ສະແຫວງຫາການເປີດເຜີຍທຸກວັນ. “ການເປີດເຜີຍຈະມີມາເທື່ອລະ ‘ບັນທັດ’ (2 ນີໄຟ 28:30), ບໍ່ແມ່ນພ້ອມກັນບາດດຽວ. … ຢ່າຄິດວ່າ [ການສຶກສາພຣະກິດຕິຄຸນ] ເປັນສິ່ງທີ່ທ່ານຕ້ອງຫາເວລາໃຫ້ກັບມັນ ແຕ່ໃຫ້ເປັນບາງສິ່ງທີ່ທ່ານເຮັດຢູ່ສະເໝີ” (Teaching in the Savior’s Way, 12).
Resurrected Christ [ພຣະຄຣິດທີ່ຟື້ນຄືນພຣະຊົນແລ້ວ], ໂດຍ ຣໍເບີດ ທີ ແບແຣັດ