“ວັນທີ 9–15 ເດືອນຕຸລາ. ຟີລິບປອຍ; ໂກໂລຊາຍ: ‘ເຮົາສາມາດສູ້ກັບທຸກສິ່ງໄດ້ໂດຍພຣະອົງຜູ້ຊົງຊູກຳລັງເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 9–15 ເດືອນຕຸລາ. ຟີລິບປອຍ; ໂກໂລຊາຍ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ໂປໂລກຳລັງໃຫ້ຄົນຂຽນຈົດໝາຍໃຫ້ເພິ່ນຈາກຄຸກ

ວັນທີ 9–15 ເດືອນຕຸລາ

ຟີລິບປອຍ; ໂກໂລຊາຍ

“ເຮົາສາມາດສູ້ກັບທຸກສິ່ງໄດ້ໂດຍພຣະອົງຜູ້ຊົງຊູກຳລັງເຮົາ”

ເທື່ອສຸດທ້າຍທີ່ທ່ານໄດ້ອ່ານຄວາມປະທັບໃຈທາງວິນຍານ ທີ່ທ່ານໄດ້ບັນທຶກໄວ້ລະຫວ່າງການສຶກສາຂອງທ່ານກ່ຽວກັບພຣະຄຳພີໃໝ່ ແມ່ນດົນປານໃດແລ້ວ? ມັນອາດເປັນປະໂຫຍດທີ່ຈະທົບທວນການກະຕຸ້ນທີ່ທ່ານໄດ້ຮັບ.

ບັນທຶກຄວາມປະທັບໃຈຂອງທ່ານ

ໂປໂລໄດ້ຂຽນສານຂອງເພິ່ນເຖິງຊາວຟີລິບປອຍ ແລະ ຊາວໂກໂລຊາຍ ຂະນະທີ່ເພິ່ນຢູ່ໃນຄຸກ ໃນກຸງໂຣມ. ແຕ່ຈົດໝາຍເຫລົ່ານີ້ບໍ່ມີນ້ຳສຽງທີ່ທ່ານຄາດໝາຍຈາກບາງຄົນທີ່ຢູ່ໃນຄຸກ. ໂປໂລໄດ້ກ່າວຕື່ມອີກກ່ຽວກັບຄວາມສຸກ, ຄວາມຊົມຊື່ນຍິນດີ, ແລະ ຄວາມຂອບພຣະໄທ ຫລາຍກວ່າຄວາມທຸກທໍລະມານ ແລະ ການທົດລອງຂອງເພິ່ນ: “ເຂົາປະກາດເລື່ອງພຣະຄຣິດ,” ເພິ່ນກ່າວ, “ໃນການນີ້ເຮົາກໍມີຄວາມຍິນດີ, ແລະ ຄົງຈະມີຄວາມຍິນດີຕໍ່ໄປ” (ຟີລິບປອຍ 1:18). ແລະ “ເຖິງແມ່ນຕົວຂອງເຮົາບໍ່ຢູ່ນຳເຈົ້າທັງຫລາຍ, ແຕ່ຈິດໃຈຂອງເຮົາກໍຢູ່ນຳພວກເຈົ້າ, ແລະ ມີຄວາມຊົມຊື່ນຍິນດີ … ເຫັນ [ສັດທາ] ອັນໝັ້ນຄົງຂອງເຈົ້າທັງຫລາຍໃນພຣະຄຣິດ” (ໂກໂລຊາຍ 2:5). ແນ່ນອນ, “ສັນຕິສຸກອັນມາແຕ່ພຣະເຈົ້າ” ທີ່ໂປໂລໄດ້ປະສົບໃນສະພາບທີ່ຫຍຸ້ງຍາກຂອງເພິ່ນ ແມ່ນ “ເກີນຄວາມເຂົ້າໃຈທັງຫລາຍ” (ຟີລິບປອຍ 4:7), ແຕ່ເຖິງຢ່າງໃດກໍຕາມ ມັນກໍເປັນຄວາມຈິງ. ໃນການທົດລອງຂອງເຮົາເອງ, ເຮົາສາມາດຮູ້ສຶກເຖິງຄວາມສະຫງົບຢ່າງດຽວກັນນັ້ນ ແລະ “ຈົ່ງຊົມຊື່ນຍິນດີໃນພຣະຜູ້ເປັນເຈົ້າທຸກເວລາ” (ຟີລິບປອຍ 4:4). ເຮົາສາມາດ, ດັ່ງທີ່ໂປໂລໄດ້ເຮັດ, ເພິ່ງອາໄສພຣະເຢຊູຄຣິດຢ່າງເຕັມທີ່, “ໂດຍ [ພຣະອົງ] ພວກເຮົາຈຶ່ງໄດ້ຮັບການໄຖ່” (ໂກໂລຊາຍ 1:14). ເຮົາສາມາດເວົ້າ, ດັ່ງທີ່ໂປໂລໄດ້ເຮັດ “ເຮົາສາມາດສູ້ກັບທຸກສິ່ງໄດ້ໂດຍພຣະອົງຜູ້ຊົງຊູກຳລັງເຮົາ” (ຟີລິບປອຍ 4:13; ເບິ່ງ ໂກໂລຊາຍ 1:11 ນຳອີກ).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຟີລິບປອຍ 2:5–11; ໂກໂລຊາຍ 1:12–23

ສັດທາຂອງເຮົາຕັ້ງຢູ່ເທິງພຣະເຢຊູຄຣິດ.

ປະທານຣະໂຊ ເອັມ ແນວສັນ ໄດ້ກ່າວວ່າ ເມື່ອເພິ່ນເອົາໃຈໃສ່ຕໍ່ການສຶກສາພຣະຄຳພີຂອງເພິ່ນ ໃນຂໍ້ທີ່ກ່ຽວກັບພຣະເຢຊູຄຣິດ, ມັນຈະມີຜົນກະທົບຕໍ່ເພິ່ນ ຊຶ່ງເພິ່ນຮູ້ສຶກຄືກັບວ່າ “ເປັນຄົນໃໝ່!” (“Drawing the Power of Jesus Christ into Our Lives,” Liahona, May 2017, 39). ໃຫ້ພິຈາລະນາຕົວຢ່າງຂອງເພິ່ນດັ່ງຕໍ່ໄປນີ້ ຂະນະທີ່ທ່ານອ່ານ ຟີລິບປອຍ ແລະ ໂກໂລຊາຍ (ເບິ່ງ ໂດຍສະເພາະ ຟີລິບປອຍ 2:5–11; ໂກໂລຊາຍ 1:12–23). ທ່ານຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ? ຄວາມຈິງເຫລົ່ານີ້ສາມາດຊ່ວຍທ່ານໃຫ້ກາຍເປັນ “ຄົນໃໝ່” ໄດ້ແນວໃດ?

ຟີລິບປອຍ 2:12–13

ເຮົາຈະ “ພະຍາຍາມ … ໃຫ້ໄດ້ [ຄວາມລອດຂອງຕົນ]” ໄດ້ແນວໃດ?

ບາງຄົນໃຊ້ວະລີທີ່ວ່າ “ພະຍາຍາມ … ໃຫ້ໄດ້ [ຄວາມລອດຂອງຕົນ]” (ຟີລິບປອຍ 2:12) ເພື່ອສົ່ງເສີມແນວຄິດທີ່ເຮົາໄດ້ຖືກໂຜດໃຫ້ລອດ ພຽງແຕ່ໂດຍຄວາມພະຍາຍາມຂອງເຮົາເທົ່ານັ້ນ. ບາງຄົນກໍໃຊ້ຄຳສອນຂອງໂປໂລ ທີ່ວ່າ “ເຈົ້າທັງຫລາຍໄດ້ຖືກ [ໂຜດໃຫ້ລອດ] ກໍຍ້ອນພຣະຄຸນ” (ເອເຟໂຊ 2:8) ເພື່ອປະກາດວ່າ ບໍ່ຈຳເປັນຕ້ອງທຳງານເພື່ອຄວາມລອດ. ເຖິງຢ່າງໃດກໍຕາມ, ພຣະຄຳພີ, ລວມທັງການຂຽນຂອງໂປໂລສິດສອນຢ່າງແຈ່ມແຈ້ງເຖິງຄວາມຈຳເປັນທີ່ຕ້ອງມີພຣະຄຸນຂອງພຣະເຢຊູຄຣິດ ແລະ ຄວາມພະຍາຍາມສ່ວນຕົວຂອງບຸກຄົນ ທັງສອງຢ່າງ ກ່ອນຈະໄດ້ຮັບຄວາມລອດ. ແລະ ແມ່ນແຕ່ໃນຄວາມພະຍາຍາມທີ່ດີທີ່ສຸດຂອງເຮົາ ເພື່ອຈະໄດ້ຮັບຄວາມລອດຂອງເຮົາ, “ແມ່ນພຣະເຈົ້າ ເປັນຜູ້ຊົງກະທຳການຢູ່ພາຍໃນເຈົ້າທັງຫລາຍ” (ຟີລິບປອຍ 2:13; ເບິ່ງ ຟີລິບປອຍ 1:6; 2 ນີໄຟ 25:23; Bible Dictionary, “Grace” ນຳອີກ).

ຟີລິບປອຍ 3:4–14

ພຣະກິດຕິຄຸນຂອງພຣະເຢຊູຄຣິດແມ່ນກຸ້ມຄ່າທີ່ຈະເສຍສະລະທຸກຢ່າງ.

ໂປໂລໄດ້ສະລະຫລາຍທີ່ສຸດເມື່ອເພິ່ນປ່ຽນໃຈເຫລື້ອມໃສໃນພຣະກິດຕິຄຸນຂອງພຣະເຢຊູຄຣິດ, ລວມທັງອິດທິພົນທີ່ເພິ່ນມີໃນສັງຄົມຊາວຢິວ ໃນຖານະຄົນຟາຣີຊາຍ. ໃນ ຟີລິບປອຍ 3:4–14, ໃຫ້ຊອກຫາສິ່ງທີ່ໂປໂລໄດ້ຮັບ ເພາະເພິ່ນເຕັມໃຈທີ່ຈະເສຍສະລະສຳລັບພຣະກິດຕິຄຸນ. ເພິ່ນຮູ້ສຶກແນວໃດກ່ຽວກັບການເສຍສະລະຂອງເພິ່ນ?

ແລ້ວໃຫ້ພິຈາລະນາຄວາມເປັນສານຸສິດຂອງທ່ານ. ທ່ານໄດ້ເສຍສະລະຫຍັງແດ່ສຳລັບພຣະກິດຕິຄຸນຂອງພຣະເຢຊູຄຣິດ? ທ່ານໄດ້ຮັບຫຍັງແດ່? ມີການເສຍສະລະເພີ່ມເຕີມຢ່າງໃດບໍທີ່ທ່ານຮູ້ສຶກວ່າ ທ່ານຕ້ອງໄດ້ເຮັດ ເພື່ອຈະກາຍເປັນສານຸສິດທີ່ອຸທິດຕົນຂອງພຣະຜູ້ຊ່ວຍໃຫ້ລອດຫລາຍກວ່າເກົ່າ?

ເບິ່ງ 3 ນີໄຟ 9:19–20; ຄຳສອນ ແລະ ພັນທະສັນຍາ 58:2–5; Taylor G. Godoy, “One More Day,” Liahona, May 2018, 34–36 ນຳອີກ.

ຟີລິບປອຍ 4:1–13

ເຮົາສາມາດພົບຄວາມສຸກໃນພຣະຄຣິດ ບໍ່ວ່າສະຖານະການຂອງເຮົາຈະເປັນແນວໃດກໍຕາມ.

ຊີວິດຂອງໂປໂລໄດ້ສະແດງໃຫ້ເຫັນຢ່າງແຈ່ມແຈ້ງ ເຖິງຄວາມຈິງທີ່ກ່າວໂດຍປະທານຣະໂຊ ເອັມ ແນວສັນ ທີ່ວ່າ: “ເມື່ອເຮົາໃຫ້ຊີວິດຂອງເຮົາເອົາໃຈໃສ່ຕໍ່ … ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ, ເຮົາສາມາດຮູ້ສຶກເຖິງຄວາມສຸກໄດ້ ບໍ່ວ່າແມ່ນຫຍັງຈະເກີດ—ຫລື ບໍ່ເກີດຂຶ້ນກໍຕາມ—ໃນຊີວິດຂອງເຮົາ. ຄວາມສຸກມາຈາກພຣະອົງ ແລະ ເພາະພຣະອົງ” (“Joy and Spiritual Survival,” Liahona, Nov. 2016, 82).

ຂະນະທີ່ທ່ານອ່ານຟີລິບປອຍ—ໂດຍສະເພາະ ບົດທີ 4—ໃຫ້ຊອກຫາບົດຄວາມທີ່ສາມາດຊ່ວຍທ່ານພົບເຫັນຄວາມສຸກໃນທຸກສະຖານະການໃນຊີວິດຂອງທ່ານ. ທ່ານເຄີຍປະສົບກັບ “ສັນຕິສຸກອັນມາແຕ່ພຣະເຈົ້າ” ໃນເວລາທີ່ມີການທ້າທາຍເມື່ອໃດ? (ຂໍ້ທີ 7). ທ່ານໄດ້ພົບເຫັນຄວາມເຂັ້ມແຂງ “[ຜ່ານທາງພຣະຄຣິດ] ເມື່ອໃດ? (ຂໍ້ທີ 13). ທ່ານຄິດວ່າ ເປັນຫຍັງມັນຈຶ່ງສຳຄັນທີ່ຈະ “ພໍໃຈ” ໃນທຸກສະຖານະການ? (ຂໍ້ທີ 11). ການໃຊ້ຄຸນລັກສະນະໃນ ຂໍ້ທີ 8 ຊ່ວຍທ່ານພົບເຫັນຄວາມສຸກໃນສະຖານະການຂອງທ່ານແນວໃດ?

ເບິ່ງ ແອວມາ 33:23; Dieter F. Uchtdorf, “Grateful in Any Circumstances,” Liahona, May 2014, 70–77.

ໂກໂລຊາຍ 3:1–17

ສານຸສິດຂອງພຣະເຢຊູຄຣິດກາຍເປັນ “ຄົນໃໝ່” ຂະນະທີ່ພວກເຂົາດຳລົງຊີວິດຕາມພຣະກິດຕິຄຸນຂອງພຣະອົງ.

ທ່ານຈະສາມາດບອກວ່າພຣະເຢຊູຄຣິດກຳລັງຊ່ວຍທ່ານໃຫ້ກາຍເປັນ “ຄົນໃໝ່” ໄດ້ແນວໃດ? ວິທີໜຶ່ງທີ່ຈະໄຕ່ຕອງສິ່ງນີ້ ຄືການຄົ້ນຄວ້າ ໂກໂລຊາຍ 3:1–17 ແລະ ຂຽນທັດສະນະຄະຕິ, ຄຸນລັກສະນະ, ແລະ ການກະທຳຂອງ “ຄົນເກົ່າ” ລົງໄວ້ແຖວໜຶ່ງ ແລະ ໃຫ້ຂຽນທັດສະນະຄະຕິ, ຄຸນລັກສະນະ, ແລະ ການກະທຳຂອງ “ຄົນໃໝ່” ໃສ່ອີກແຖວໜຶ່ງ.

ໃຫ້ບັນທຶກຄວາມຄິດຂອງທ່ານກ່ຽວກັບວິທີທີ່ພຣະຜູ້ຊ່ວຍໃຫ້ລອດກຳລັງທ້າທາຍທ່ານ, ເພື່ອວ່າທ່ານຈະສາມາດທົບທວນມັນໃນອະນາຄົດ ແລະ ໄຕ່ຕອງຄວາມກ້າວໜ້າຂອງທ່ານ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຟີລິບປອຍ.ຄອບຄົວຂອງທ່ານອາດສັງເກດເຫັນຄຳວ່າ ຄວາມສຸກ ຫລື ຄວາມຊົມຊື່ນຍິນດີ ຖືກກ່າວເລື້ອຍໆ ໃນຟີລິບປອຍ. ທຸກເທື່ອທີ່ທ່ານອ່ານຄຳເຫລົ່ານີ້, ທ່ານສາມາດຢຸດ ແລະ ສົນທະນາສິ່ງທີ່ໂປໂລໄດ້ສິດສອນກ່ຽວກັບວ່າ ຈະຊອກຫາຄວາມສຸກໄດ້ຢູ່ໃສ.

ຟີລິບປອຍ 2:14–16.ເຮົາຈະສາມາດ “ສ່ອງແຈ້ງຢູ່ໃນທ່າມກາງ [ໂລກ]” ແນວໃດ?

ຟີລິບປອຍ 4:8.ສະມາຊິກໃນຄອບຄົວສາມາດຊີ້ບອກບາງສິ່ງທີ່ “ພິຈາລະນາເຖິງສິ່ງເຫລົ່ານັ້ນ” ທີ່ເຂົ້າກັບການບັນຍາຍຢູ່ໃນຂໍ້ນີ້ (ເບິ່ງ ຫລັກແຫ່ງຄວາມເຊື່ອ 1:13 ນຳອີກ). ຄອບຄົວຂອງທ່ານຈະໄດ້ຮັບພອນໂດຍການເຮັດຕາມຄຳແນະນຳຂອງໂປໂລໄດ້ແນວໃດ?

ໂກໂລຊາຍ 1:23; 2:7.ບາງທີຄອບຄົວຂອງທ່ານສາມາດອ່ານຂໍ້ເຫລົ່ານີ້ ຂະນະທີ່ນັ່ງອ້ອມຕົ້ນໄມ້ ຫລື ຫລຽວເບິ່ງຮູບຕົ້ນໄມ້ນຳກັນ (ດັ່ງເຊັ່ນ ຮູບທີ່ຢູ່ໃນໂຄງຮ່າງນີ້). ຄຳວ່າ “ຕັ້ງໝັ້ນ” ແລະ “ຢັ່ງຮາກ” ໃນພຣະຄຣິດໝາຍຄວາມວ່າແນວໃດ? ເຮົາຈະສາມາດຊ່ວຍກັນແລະກັນເພີ່ມຄວາມເຂັ້ມແຂງໃຫ້ແກ່ຮາກທາງວິນຍານຂອງເຮົາໄດ້ແນວໃດ?

ໂກໂລຊາຍ 2:2–3.ຄອບຄົວຂອງທ່ານອາດມັກເອົາສິ່ງຂອງໃສ່ໄວ້ໃນ “ຫີບຊັບສົມບັດ” ທີ່ເປັນຕົວແທນໃຫ້ແກ່ “ຄວາມຮັ່ງມີ” ແລະ “ຊັບສົມບັດແຫ່ງສະຕິປັນຍາ” ທີ່ພວກທ່ານພົບເຫັນໃນພຣະກິດຕິຄຸນ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງສວດແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.

ການປັບປຸງການສິດສອນຂອງເຮົາ

ດຳເນີນຊີວິດຕາມປະຈັກພະຍານຂອງທ່ານ. “ທ່ານສອນສິ່ງທີ່ທ່ານເປັນ,” ແອວເດີ ນຽວ ເອ ແມ໊ກສະແວວ ໄດ້ສິດສອນ. “ລັກສະນະນິໄສຂອງທ່ານຈະເປັນສິ່ງໜ້າຊົງຈຳຫລາຍກວ່າ … ຄວາມຈິງໃດໜຶ່ງ ຢູ່ໃນບົດຮຽນໃດໜຶ່ງ” (ໃນ Teaching in the Savior’s Way, 13).