“ວັນທີ 2–8 ເດືອນຕຸລາ. ເອເຟໂຊ: ‘ເພື່ອຈັດຕຽມໄພ່ພົນທັງຫລາຍຂອງພຣະອົງ ໃຫ້ເປັນຜູ້ຮັບໃຊ້ທີ່ເໝາະສົມ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 2–8 ເດືອນຕຸລາ. ເອເຟໂຊ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ວັນທີ 2–8 ເດືອນຕຸລາ

ເອເຟໂຊ

“ເພື່ອຈັດຕຽມໄພ່ພົນທັງຫລາຍຂອງພຣະອົງ ໃຫ້ເປັນຜູ້ຮັບໃຊ້ທີ່ເໝາະສົມ”

ທ່ານເຫັນການເຊື່ອມໂຍງລະຫວ່າງຂ່າວສານໃນກອງປະຊຸມໃຫຍ່ສາມັນ ແລະ ສານຂອງໂປໂລເຖິງຊາວເອເຟໂຊບໍ?

ບັນທຶກຄວາມປະທັບໃຈຂອງທ່ານ

ເມື່ອພຣະກິດຕິຄຸນເລີ່ມແຜ່ຜາຍໃນເມືອງເອເຟໂຊ, ມັນເຮັດໃຫ້ “ມີການວຸ້ນວາຍອັນໃຫຍ່” (ກິດຈະການ 19:23) ໃນບັນດາຊາວເອເຟໂຊ. ພວກນາຍຊ່າງໃນທ້ອງຖິ່ນຜູ້ທີ່ໄດ້ສ້າງແທ່ນບູຊາໃຫ້ເທບທິດາເພເກັນ ເຫັນວ່າຊາວຄຣິດເປັນໄພຕໍ່ການທຳມາຫາກິນຂອງພວກເຂົາ, ແລະ ບໍ່ດົນ “ກໍຄຽດແຄ້ນ, … ແລ້ວຄວາມວຸ້ນວາຍກໍໄດ້ລາມໄປທົ່ວທັງເມືອງ” (ເບິ່ງ ກິດຈະການ 19:27–29). ໃຫ້ຈິນຕະນາການວ່າ ການເປັນຜູ້ປ່ຽນໃຈເຫລື້ອມໃສໃໝ່ໃນພຣະກິດຕິຄຸນ ໃນສະພາບແວດລ້ອມເຊັ່ນນັ້ນ ຈະເປັນຈັ່ງໃດ. ຊາວເອເຟໂຊຫລາຍຄົນບໍ່ໄດ້ຍອມຮັບ ແລະ ດຳລົງຊີວິດຕາມພຣະກິດຕິຄຸນ ໃນທ່າມກາງ “ຄວາມວຸ້ນວາຍ” ນີ້ (ກິດຈະການ 19:40), ແລະ ໂປໂລໄດ້ໃຫ້ພວກເຂົາແນ່ໃຈໄດ້ວ່າ “ພຣະຄຣິດ … ເປັນອົງສັນຕິລາດ” (ເອເຟໂຊ 2:13–14). ຖ້ອຍຄຳເຫລົ່ານີ້, ພ້ອມທັງຄຳເຊື້ອເຊີນຂອງເພິ່ນໃຫ້ “ໃຈຂົມຂື່ນ, ໃຈໂມໂຫໂທໂສ, ໃຈຄຽດຮ້າຍນັ້ນ, ຢ່າສູ່ໃຫ້ຢູ່ໃກ້ພວກເຈົ້າ ການອຶກກະທຶກຜິດຖຽງກັນ ແລະ ການກ່າວສຽດສີກັນກໍຢ່າໃຫ້ມີ ຈົ່ງຫລີກເວັ້ນຈາກການປອງຮ້າຍທຸກຮອບແບບ” (ເອເຟໂຊ 4:31), ເບິ່ງຄືວ່າທັນເວລາພໍດີ ແລະ ໃຫ້ການປອບໂຍນໃນເວລານີ້ ຄືກັນກັບໃນເມື່ອກ່ອນ. ສຳລັບຊາວເອເຟໂຊ, ສຳລັບເຮົາແຕ່ລະຄົນ, ຄວາມເຂັ້ມແຂງທີ່ຈະປະເຊີນກັບຄວາມຍາກລຳບາກມີມາ “ໃນພຣະຜູ້ເປັນເຈົ້າ, ແລະ ໃນລິດເດດອັນແກ່ກ້າຂອງພຣະອົງ” (ເບິ່ງ ເອເຟໂຊ 6:10–13).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ເອເຟໂຊ 1:4–11, 17–19

ພຣະເຈົ້າໄດ້ເລືອກ, ຫລື ແຕ່ງຕັ້ງ, ເຮົາລ່ວງໜ້າ ເພື່ອເຮັດໜ້າທີ່ຮັບຜິດຊອບໃດໜຶ່ງໂດຍສະເພາະ ຢູ່ເທິງແຜ່ນດິນໂລກ.

ໂປໂລໄດ້ກ່າວເຖິງໄພ່ພົນຖືກ “ຄາດໝາຍ” ໂດຍພຣະເຈົ້າ ແລະ ຖືກ “ເລືອກ … ກ່ອນທີ່ຈະຊົງວາງຮາກສ້າງໂລກ” ເພື່ອໃຫ້ເປັນຜູ້ຄົນຂອງພຣະອົງ. ເຖິງຢ່າງໃດກໍຕາມ, ດັ່ງທີ່ປະທານເຮັນຣີ ບີ ໄອຣິງ ໄດ້ສັງເກດ, ສິ່ງນີ້ບໍ່ໄດ້ໝາຍຄວາມວ່າ “ພຣະເຈົ້າຄົງໄດ້ພິຈາລະນາໄວ້ລ່ວງໜ້າແລ້ວວ່າ ລູກໆຂອງພຣະອົງຄົນໃດ ທີ່ພຣະອົງຈະຊ່ວຍໃຫ້ລອດ ແລະ ໃຫ້ໄດ້ຮັບພຣະກິດຕິຄຸນ, ໃນຂະນະທີ່ຄົນອື່ນໆ ຜູ້ບໍ່ເຄີຍໄດ້ຍິນພຣະກິດຕິຄຸນ ບໍ່ໄດ້ ‘ຖືກເລືອກ.’ … ແຜນຂອງພຣະເຈົ້າຈຶ່ງດີ ແລະ ທ່ຽງທຳຫລາຍກວ່ານີ້. ພຣະບິດາເທິງສະຫວັນຂອງເຮົາຮີບຮ້ອນທີ່ຈະເຕົ້າໂຮມ ແລະ ໃຫ້ພອນທຸກຄົນໃນຄອບຄົວຂອງພຣະອົງ” (“Gathering the Family of God,” Liahona, May 2017, 20–21). ລູກໆຂອງພຣະເຈົ້າທຸກຄົນສາມາດຮັບເອົາພຣະກິດຕິຄຸນ ແລະ ພິທີການຂອງມັນ ເພາະວຽກງານທີ່ປະຕິບັດແທນຄົນຕາຍ ຢູ່ໃນພຣະວິຫານສັກສິດ.

ເຖິງແມ່ນວ່າບໍ່ມີໃຜຖືກກຳນົດໃຫ້ລອດ ຫລື ບໍ່ລອດ, ແຕ່ການເປີດເຜີຍສະໄໝໃໝ່ສິດສອນວ່າ ລູກໆຂອງພຣະເຈົ້າບາງຈຳນວນໄດ້ຖືກເລືອກ, ຫລື ຖືກ “ແຕ່ງຕັ້ງລ່ວງໜ້າ,” ໃນໂລກກ່ອນເກີດ ເພື່ອເຮັດໜ້າທີ່ຮັບຜິດຊອບໃດໜຶ່ງໂດຍສະເພາະ ໃນການບັນລຸຈຸດປະສົງຂອງພຣະເຈົ້າຢູ່ເທິງແຜ່ນດິນໂລກ. ຂະນະທີ່ທ່ານອ່ານ ເອເຟໂຊ 1 ແລະ Gospel Topics, “Foreordination” (topics.ChurchofJesusChrist.org), ໃຫ້ໄຕ່ຕອງວ່າ ຄວາມຈິງນີ້ກ່ຽວຂ້ອງກັບທ່ານແນວໃດ.

ເອເຟໂຊ 1:10

ພຣະເຈົ້າຈະ “ຮວບຮວມສິ່ງສາລະພັດ … ໄວ້ໃນພຣະຄຣິດ.”

ທ່ານຄິດວ່າເປັນຫຍັງສະໄໝຂອງເຮົາຈຶ່ງຖືກເອີ້ນວ່າ “ເວລາກຳນົດຄົບບໍລິບູນ”? ຄຳວ່າ “ຮວບຮວມສິ່ງສາລະພັດ … ໄວ້ໃນພຣະຄຣິດ” ໝາຍຄວາມວ່າແນວໃດ? ຂະນະທີ່ທ່ານໄຕ່ຕອງວະລີເຫລົ່ານີ້, ໃຫ້ອ່ານຂໍ້ພຣະຄຳພີດັ່ງຕໍ່ໄປນີ້: ເອເຟໂຊ 4:13; 2 ນີໄຟ 30:7–8; ຄຳສອນ ແລະ ພັນທະສັນຍາ 110:11–16; 112:30–32; 128:18–21. ທ່ານອາດຮູ້ສຶກໄດ້ຮັບການດົນໃຈໃຫ້ຂຽນຄຳອະທິບາຍຂອງທ່ານເອງກ່ຽວກັບວະລີເຫລົ່ານີ້.

ເບິ່ງ David A. Bednar, “Gather Together in One All Things in Christ,” Liahona, Nov. 2018, 21–24 ນຳອີກ.

ເອເຟໂຊ 2:19–22; 3:1–7; 4:11–16

ສາດສະໜາຈັກຖືກສ້າງຕັ້ງຂຶ້ນຢູ່ເທິງອັກຄະສາວົກ ແລະ ສາດສະດາ, ແລະ ພຣະເຢຊູຄຣິດເປັນຫີນເສົາເອກ.

ອີງຕາມ ເອເຟໂຊ 2:19–22; 3:1–7; 4:11–16, ເປັນຫຍັງເຮົາຈຶ່ງມີສາດສະດາ ແລະ ອັກຄະສາວົກ? ໃຫ້ຄິດກ່ຽວກັບຂ່າວສານຈາກສາດສະດາ ແລະ ອັກຄະສາວົກ ທີ່ທ່ານໄດ້ຍິນລະຫວ່າງກອງປະຊຸມໃຫຍ່ສາມັນ. ຄຳສອນຂອງພວກເພິ່ນບັນລຸຈຸດປະສົງທີ່ໂປໂລໄດ້ບັນຍາຍແນວໃດ? ຍົກຕົວຢ່າງ, ຄຳສອນເຫລົ່ານີ້ຊ່ວຍທ່ານບໍ່ໃຫ້ “ຫັນເຫໄປມາດ້ວຍລົມປາກແຫ່ງຄຳສັ່ງສອນທຸກຢ່າງ” ແນວໃດ?

ພຣະເຢຊູຄຣິດເປັນເໝືອນດັ່ງຫີນເສົາເອກສຳລັບສາດສະໜາຈັກແນວໃດ? ພຣະອົງເປັນເໝືອນດັ່ງຫີນເສົາເອກສຳລັບຊີວິດຂອງທ່ານແນວໃດ?

ເບິ່ງ ກິດຈະການ 4:10–12 ນຳອີກ.

ຫີນເສົາເອກຂອງອາຄານ — ພຣະເຢຊູຄຣິດຄືຫີນເສົາເອກຂອງສາດສະໜາຈັກ.

ເອເຟໂຊ 5:21–6:4

ການເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດ ສາມາດເພີ່ມຄວາມເຂັ້ມແຂງໃຫ້ແກ່ຄວາມສຳພັນຂອງຄອບຄົວເຮົາໄດ້.

ຂະນະທີ່ທ່ານອ່ານ ເອເຟໂຊ 5:21–6:4, ໃຫ້ຄິດກ່ຽວກັບວິທີທີ່ຄຳແນະນຳໃນຂໍ້ເຫລົ່ານີ້ສາມາດເພີ່ມຄວາມເຂັ້ມແຂງໃຫ້ແກ່ຄວາມສຳພັນຂອງຄອບຄົວທ່ານແນວໃດ.

ມັນສຳຄັນທີ່ຈະສັງເກດເບິ່ງຖ້ອຍຄຳຂອງໂປໂລໃນ ເອເຟໂຊ 5:22–24 ໄດ້ຖືກຂຽນຕາມສະພາບການຂອງຮີດຄອງປະເພນີໃນຍຸກຂອງເພິ່ນ. ສາດສະດາ ແລະ ອັກຄະສາວົກໃນປະຈຸບັນ ສິດສອນວ່າ ຜູ້ຊາຍບໍ່ໄດ້ເໜືອກວ່າຜູ້ຍິງ ແລະ ວ່າຄູ່ແຕ່ງງານໝາຍເຖິງການເປັນ “ຫຸ້ນສ່ວນທີ່ເທົ່າທຽມກັນ” (ເບິ່ງ “ຄອບຄົວ: ການປະກາດຕໍ່ໂລກ,” ChurchofJesusChrist.org). ເຖິງແມ່ນເຊັ່ນນັ້ນ, ທ່ານຍັງສາມາດຊອກຫາຄຳແນະນຳທີ່ກ່ຽວຂ້ອງຢູ່ໃນ ເອເຟໂຊ 5:25–33 ໄດ້. ຍົກຕົວຢ່າງ, ພຣະຄຣິດໄດ້ສະແດງຄວາມຮັກຂອງພຣະອົງຕໍ່ໄພ່ພົນແນວໃດ? ສິ່ງນີ້ບົ່ງບອກກ່ຽວກັບວິທີທີ່ຄູ່ແຕ່ງງານ, ຊຶ່ງເປັນຫຸ້ນສ່ວນທີ່ເທົ່າທຽມກັນ, ຄວນປະຕິບັດຕໍ່ກັນແນວໃດ? ຂ່າວສານໃດແດ່ທີ່ທ່ານພົບເຫັນສຳລັບຕົວເອງ ຢູ່ໃນຂໍ້ເຫລົ່ານີ້?

ເອເຟໂຊ 6:10–18

ຍຸດທະພັນຂອງພຣະເຈົ້າຈະຊ່ວຍປົກປ້ອງເຮົາຈາກຄວາມຊົ່ວຮ້າຍ.

ຂະນະທີ່ທ່ານອ່ານ ເອເຟໂຊ 6:10–18, ໃຫ້ພິຈາລະນາວ່າ ເປັນຫຍັງໂປໂລຈຶ່ງເອີ້ນຊື່ຍຸດທະພັນແຕ່ລະຢ່າງ ດັ່ງທີ່ເພິ່ນໄດ້ເຮັດ. “ຍຸດທະພັນຄົບຊຸດ [ຂອງ] ພຣະເຈົ້າ” ປົກປ້ອງທ່ານຈາກສິ່ງໃດ? ທ່ານຈະເຮັດສິ່ງໃດ ເພື່ອຈະໄດ້ສວມຍຸດທະພັນແຕ່ລະຢ່າງໃຫ້ເຕັມທີ່ຫລາຍຂຶ້ນໃນແຕ່ລະວັນ?

ເບິ່ງ 2 ນີໄຟ 1:23; ຄຳສອນ ແລະ ພັນທະສັນຍາ 27:15–18 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ເອເຟໂຊ 1:10.ເພື່ອສິດສອນກ່ຽວກັບຂໍ້ນີ້, ແອວເດີ ເດວິດ ເອ ແບ໊ດນາ ໄດ້ໃຊ້ຕົວຢ່າງກ່ຽວກັບເຊືອກ (ເບິ່ງ “Gather Together in One All Things in Christ”). ໃຫ້ຄິດທີ່ຈະສະແດງເຊືອກໃຫ້ສະມາຊິກໃນຄອບຄົວເບິ່ງ ແລະ ໃຫ້ເຂົາເຈົ້າຈັບກວດເບິ່ງມັນ ຂະນະທີ່ທ່ານແບ່ງປັນຂ່າວສານບາງພາກສ່ວນຂອງແອວເດີ ແບ໊ດນາ. ພຣະເຈົ້າຮວບຮວມສິ່ງສາລະພັດໄວ້ໃນພຣະຄຣິດແນວໃດ? ເຮົາໄດ້ຮັບພອນຍ້ອນການຮວບຮວມນີ້ແນວໃດ?

ເອເຟໂຊ 2:4–10; 3:14–21.ເຊື້ອເຊີນສະມາຊິກໃນຄອບຄົວໃຫ້ແບ່ງປັນປະສົບການ ຊຶ່ງໃນນັ້ນເຂົາເຈົ້າຮູ້ສຶກເຖິງຄວາມຮັກ ແລະ ຄວາມເມດຕາຂອງພຣະເຈົ້າ ແລະ ພຣະເຢຊູຄຣິດ ຊຶ່ງບັນຍາຍຢູ່ໃນຂໍ້ເຫລົ່ານີ້.

ເອເຟໂຊ 2:12–19.ຄອບຄົວຂອງທ່ານອາດມັກການສ້າງກຳແພງໂດຍໃຊ້ໝອນ ຫລື ສິ່ງຂອງອື່ນໆຢູ່ໃນເຮືອນ ແລະ ແລ້ວໃຫ້ພັງມັນລົງ. ຂະນະທີ່ໂປໂລກ່າວເຖິງ “ກຳແພງ” ລະຫວ່າງຄົນຕ່າງຊາດ ແລະ ຊາວຢິວ, ແມ່ນຫຍັງຄືກຳແພງທີ່ແຍກຜູ້ຄົນໃນທຸກວັນນີ້? ພຣະເຢຊູຄຣິດໄດ້ “ຮື້” ກຳແພງເຫລົ່ານີ້ແນວໃດ? ພຣະອົງໄດ້ “ເຮັດໃຫ້ [ເຮົາ] ຄືນດີກັນກັບພຣະເຈົ້າ” ແນວໃດ? (ຂໍ້ທີ 16).

ເອເຟໂຊ 6:10–18.ຄອບຄົວຂອງທ່ານສາມາດສ້າງ “ຍຸດທະພັນ [ຂອງ] ພຣະເຈົ້າ” ໂດຍການໃຊ້ສິ່ງຂອງຢູ່ໃນເຮືອນ. ວິດີໂອ “The Armour of God” (ChurchofJesusChrist.org) ສາມາດຊ່ວຍສະມາຊິກໃນຄອບຄົວໃຫ້ວາດພາບເຫັນຍຸດທະພັນໄດ້, ແລະ ເຂົາເຈົ້າສາມາດພົບເຫັນຄຳອະທິບາຍຢູ່ໃນ “The Whole Armor of God” (Friend, June 2016, 24–25). ຍຸດທະພັນແຕ່ລະຢ່າງປົກປ້ອງເຮົາທາງວິນຍານແນວໃດ? ເຮົາສາມາດເຮັດຫຍັງໄດ້ແດ່ ເພື່ອຊ່ວຍກັນແລະກັນ “ໃສ່ຍຸດທະພັນຄົບຊຸດ [ຂອງ] ພຣະເຈົ້າ” (ເອເຟໂຊ 6:11) ໃນແຕ່ລະວັນ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.

ການປັບປຸງການສຶກສາສ່ວນຕົວ

ປ່ອຍໃຫ້ພຣະວິນຍານຊົງນຳການສຶກສາຂອງທ່ານ. ໃຫ້ມີຄວາມຮູ້ສຶກໄວຕໍ່ພຣະວິນຍານ ຂະນະທີ່ພຣະອົງນຳພາທ່ານໄປຫາສິ່ງທີ່ທ່ານຕ້ອງການທີ່ຈະຮຽນຮູ້ໃນທຸກວັນ, ແມ່ນແຕ່ຖ້າຫາກວ່າສິ່ງນີ້ນຳພາທ່ານໄປສຶກສາຫົວຂໍ້ທີ່ທ່ານບໍ່ໄດ້ວາງແຜນໃນຕອນຕົ້ນກໍຕາມ.

ຜູ້ຊາຍໃສ່ຍຸດທະພັນໃນຍຸກພຣະຄຳພີໃໝ່ — ການໃສ່ຍຸດທະພັນຄົບຊຸດຂອງພຣະເຈົ້າສາມາດປົກປ້ອງເຮົາທາງວິນຍານໄດ້.