“ວັນທີ 20–26 ເດືອນພະຈິກ. 1 ແລະ 2 ເປໂຕ: ‘ຊື່ນຊົມຍິນດີ ດ້ວຍຄວາມຍິນດີອັນຮຸ່ງເຮືອງ ຊຶ່ງເຫລືອທີ່ຈະອະທິບາຍໄດ້,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 20–26 ເດືອນພະຈິກ. 1 ແລະ 2 ເປໂຕ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ພຣະເຢຊູຄຣິດກຳລັງສັ່ງສອນພຣະກິດຕິຄຸນຢູ່ໃນໂລກວິນຍານ

Christ Preaching in the Spirit World [ພຣະຄຣິດກຳລັງສັ່ງສອນພຣະກິດຕິຄຸນຢູ່ໃນໂລກວິນຍານ], ໂດຍ ຣໍເບີດ ທີ ແບແຣັດ

ວັນທີ 20–26 ເດືອນພະຈິກ

1 ແລະ 2 ເປໂຕ

“ຊື່ນຊົມຍິນດີ ດ້ວຍຄວາມຍິນດີອັນຮຸ່ງເຮືອງ ຊຶ່ງເຫລືອທີ່ຈະອະທິບາຍໄດ້”

ຂະນະທີ່ທ່ານອ່ານ ສານຂອງເປໂຕ, ທ່ານອາດໄດ້ຮັບຄວາມປະທັບໃຈທາງວິນຍານ. ໃຫ້ບັນທຶກມັນໄວ້ຢ່າງໄວ ຂະນະທີ່ທ່ານ “ຍັງຢູ່ໃນພຣະວິນຍານ” (ຄຳສອນ ແລະ ພັນທະສັນຍາ 76:80) ເພື່ອວ່າທ່ານຈະສາມາດເກັບກຳສິ່ງທີ່ພຣະເຈົ້າສິດສອນທ່ານໄວ້ຢ່າງຖືກຕ້ອງ.

ບັນທຶກຄວາມປະທັບໃຈຂອງທ່ານ

ບໍ່ດົນຫລັງຈາກການຟື້ນຄືນພຣະຊົນຂອງພຣະອົງ, ພຣະຜູ້ຊ່ວຍໃຫ້ລອດໄດ້ທຳນາຍ ຊຶ່ງຄົງເຮັດໃຫ້ເປໂຕເກີດຄວາມບໍ່ສະບາຍໃຈ. ພຣະອົງໄດ້ທຳນາຍວ່າ ເປໂຕຈະຖືກຂ້າຍ້ອນຄວາມເຊື່ອຂອງເພິ່ນ, ຈະຖືກ “ພາ [ເພິ່ນ] ໄປບ່ອນທີ່ເພິ່ນບໍ່ຢາກໄປ … , ໝາຍເຖິງວິທີທີ່ເປໂຕຈະຕາຍ ແລະ ຈະນຳກຽດຕິຍົດມາສູ່ພຣະເຈົ້າ” (ໂຢຮັນ 21:18–19). ຫລາຍປີຕໍ່ມາ, ເມື່ອເປໂຕໄດ້ຂຽນສານຂອງເພິ່ນ, ເພິ່ນຮູ້ວ່າ ຄຳທຳນາຍເລື່ອງການຖືກຂ້າຂອງເພິ່ນໃກ້ຈະມາເຖິງແລ້ວ: “ອີກບໍ່ດົນຂ້າພະເຈົ້າກໍຈະປະຖິ້ມຮ່າງກາຍນີ້ເສຍ, ເໝືອນດັ່ງທີ່ອົງພຣະເຢຊູຄຣິດເຈົ້າຂອງພວກເຮົາ ໄດ້ສະແດງແກ່ຂ້າພະເຈົ້າແລ້ວ” (2 ເປໂຕ 1:14). ແລະ ຖ້ອຍຄຳຂອງເປໂຕບໍ່ໄດ້ເຕັມໄປດ້ວຍຄວາມຢ້ານກົວ ຫລື ມອງໂລກໃນແງ່ຮ້າຍ. ກົງກັນຂ້າມ, ເພິ່ນໄດ້ສິດສອນໄພ່ພົນໃຫ້ “ຊົມຊື່ນຍິນດີຫລາຍ,” ເຖິງແມ່ນພວກເຂົາ “ຖືກທົດລອງຕ່າງໆໃນໄລຍະເວລາໜຶ່ງ.” ເພິ່ນໄດ້ແນະນຳພວກເຂົາໃຫ້ຈື່ຈຳວ່າ “ສັດທາຂອງ [ພວກເຂົາ]” ຈະນຳໄປສູ່ “ຄຳສັນລະເສີນ ແລະ ກຽດຕິຍົດ ແລະ ສະຫງ່າລາສີ ໃນເວລາທີ່ພຣະເຢຊູຄຣິດສະເດັດມາປະກົດ” ແລະ “ຈິດວິນຍານ [ຂອງພວກເຂົາ] ຈະໄດ້ລອດພົ້ນ” (1 ເປໂຕ 1:6–7, 9). ສັດທາຂອງເປໂຕຄົງຊ່ວຍປອບໂຍນໄພ່ພົນສະໄໝບູຮານເຫລົ່ານັ້ນ, ດັ່ງທີ່ໄດ້ຊຸກຍູ້ໄພ່ພົນໃນປະຈຸບັນ, ຜູ້ທີ່ “ມີສ່ວນຮ່ວມໃນຄວາມທຸກທໍລະມານຂອງພຣະຄຣິດ; ເພື່ອວ່າ, ເມື່ອສະຫງ່າລາສີຂອງພຣະອົງປະກົດຂຶ້ນ, [ເຮົາ] ກໍຈະໄດ້ຊົມຊື່ນຍິນດີຢ່າງຫລວງຫລາຍເໝືອນກັນ” (1 ເປໂຕ 4:13).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

1 ເປໂຕ 1:3–9; 2:19–24; 3:14–17; 4:12–19

ເຮົາສາມາດພົບຄວາມຊື່ນຊົມລະຫວ່າງເວລາທີ່ມີການທົດລອງ ແລະ ທຸກທໍລະມານ.

ຊ່ວງໄລຍະຫລັງຈາກການຄຶງພຣະຄຣິດ ບໍ່ໄດ້ເປັນເວລາທີ່ສະບາຍສຳລັບຊາວຄຣິດ, ແລະ ສານສະບັບທຳອິດຂອງເປໂຕກໍຮັບຮູ້ສິ່ງນີ້. ໃນສີ່ບົດທຳອິດ, ເຮົາຈະສັງເກດເຫັນຖ້ອຍຄຳ ແລະ ວະລີທີ່ບັນຍາຍເຖິງຄວາມຍາກລຳບາກ: ຄວາມທຸກໂສກ, ການຖືກທົດລອງ, ຄວາມທຸກລຳບາກ, ຖືກລອງເບິ່ງດ້ວຍໄຟ, ແລະ ຄວາມທຸກທໍລະມານ (ເບິ່ງ 1 ເປໂຕ 1:6; 2:19; 4:12–13). ແຕ່ທ່ານກໍຈະສັງເກດເຫັນຂໍ້ຄວາມທີ່ຊື່ນຊົມນຳອີກ—ທ່ານຄວນຂຽນສິ່ງທີ່ທ່ານພົບເຫັນລົງໄວ້. ຍົກຕົວຢ່າງ, ຂະນະທີ່ທ່ານອ່ານ 1 ເປໂຕ 1:3–9; 2:19–24; 3:14–17; ແລະ 4:12–19, ແມ່ນຫຍັງທີ່ໃຫ້ຄວາມຫວັງທີ່ທ່ານສາມາດພົບເຫັນຄວາມຊື່ນຊົມ ແມ່ນແຕ່ໃນທ່າມກາງສະຖານະການທີ່ຫຍຸ້ງຍາກ?

ທ່ານກໍຄວນອ່ານຂ່າວສານຂອງປະທານຣະໂຊ ເອັມ ແນວສັນ ນຳອີກ “Joy and Spiritual Survival” (Liahona, Nov. 2016, 81–84) ແລະ ຊອກຫາຄວາມຄ້າຍຄຽງລະຫວ່າງສິ່ງທີ່ເປໂຕໄດ້ສິດສອນ ແລະ ສິ່ງທີ່ປະທານແນວສັນໄດ້ສິດສອນ. ແມ່ນຫຍັງກ່ຽວກັບແຜນແຫ່ງຄວາມລອດ ແລະ ພຣະກິດຕິຄຸນຂອງພຣະເຢຊູຄຣິດທີ່ໃຫ້ຄວາມຊື່ນຊົມແກ່ທ່ານ?

ເບິ່ງ Ricardo P. Giménez, “Finding Refuge from the Storms of Life,” Liahona, May 2020, 101–3 ແນວໃດ.

1 ເປໂຕ 3:18–20; 4:1–6

ພຣະກິດຕິຄຸນຖືກສັ່ງສອນໃຫ້ແກ່ຄົນຕາຍ ເພື່ອວ່າພວກເຂົາຈະສາມາດຮັບການພິພາກສາຢ່າງຍຸດຕິທຳ.

ໃນມື້ໜຶ່ງທຸກຄົນຈະຢືນຢູ່ຕໍ່ໜ້າບັນລັງພິພາກສາ ແລະ “ລາຍງານການກະທຳຂອງພວກຕົນ ຕໍ່ພຣະເຈົ້າຜູ້ທີ່ຕຽມພ້ອມແລ້ວ ເພື່ອຈະຕັດສິນທັງຄົນເປັນ ແລະ ຄົນຕາຍ” (1 ເປໂຕ 4:5). ພຣະເຈົ້າຈະພິພາກສາທຸກຄົນຢ່າງຍຸດຕິທຳໄດ້ແນວໃດ ໃນເມື່ອໂອກາດທີ່ຈະເຂົ້າໃຈ ແລະ ດຳລົງຊີວິດຕາມພຣະກິດຕິຄຸນນັ້ນແຕກຕ່າງກັນຫລາຍ? ໃຫ້ສັງເກດເບິ່ງຄຳສອນທີ່ເປໂຕໄດ້ສິດສອນຢູ່ໃນ 1 ເປໂຕ 3:18–20; 4:6 ຊ່ວຍຕອບຄຳຖາມນີ້ແນວໃດ. ຂໍ້ເຫລົ່ານີ້ໃຫ້ຄວາມເຂັ້ມແຂງແກ່ສັດທາຂອງທ່ານແນວໃດ ໃນຄວາມຖືກຕ້ອງ ແລະ ຍຸດຕິທຳຂອງພຣະເຈົ້າ?

ເພື່ອຄົ້ນຄວ້າຄຳສອນນີ້ຕື່ມອີກ, ໃຫ້ສຶກສາ ຄຳສອນ ແລະ ພັນທະສັນຍາ 138, ການເປີດເຜີຍທີ່ປະທານໂຈເຊັບ ແອັຟ ສະມິດ ໄດ້ຮັບ ຂະນະທີ່ເພິ່ນໄຕ່ຕອງການຂຽນເຫລົ່ານີ້ຂອງເປໂຕ. ຄວາມຈິງເພີ່ມເຕີມຢ່າງໃດແດ່ທີ່ປະທານສະມິດຮຽນຮູ້?

ເບິ່ງ Gospel Topics, “Baptisms for the Dead,” topics.ChurchofJesusChrist.org ນຳອີກ.

2 ເປໂຕ 1:1–11

ຜ່ານທາງອຳນາດຂອງພຣະເຢຊູຄຣິດ, ເຮົາສາມາດພັດທະນາທຳມະຊາດແຫ່ງສະຫວັນຂອງເຮົາ.

ທ່ານເຄີຍຮູ້ສຶກຢູ່ບໍ ວ່າການກາຍເປັນເໝືອນດັ່ງພຣະເຢຊູຄຣິດ ແລະ ການພັດທະນາຄຸນລັກສະນະຂອງພຣະອົງນັ້ນເປັນໄປບໍ່ໄດ້? ແອວເດີ ຣໍເບີດ ດີ ແຮວສ໌ ໄດ້ສະເໜີມອບຄວາມຄິດທີ່ເຊີດຊູໃຈນີ້ກ່ຽວກັບວິທີທີ່ເຮົາສາມາດພັດທະນາຄຸນລັກສະນະຢ່າງພຣະຄຣິດ ດັ່ງນີ້: “ຄຸນລັກສະນະຂອງພຣະຜູ້ຊ່ວຍໃຫ້ລອດ … ກ້ຽວພັນບຸກຄະລິກລັກສະນະເຂົ້າກັນ, ຕື່ມແຕ່ລະຢ່າງເຂົ້າກັນ, ຊຶ່ງພັດທະນາໃນຕົວເຮົາ ໃນທາງທີ່ມີປະຕິກິລິຍາຕໍ່ກັນ. ໃນອີກຄຳໜຶ່ງ, ເຮົາບໍ່ສາມາດມີບຸກຄະລິກລັກສະນະຢ່າງໜຶ່ງຂອງພຣະຄຣິດໄດ້ ປາດສະຈາກການໄດ້ຮັບ ແລະ ມີອິດທິພົນຕໍ່ບຸກຄະລິກລັກສະນະຢ່າງອື່ນໆດ້ວຍ. ເມື່ອບຸກຄະລິກລັກສະນະຢ່າງໜຶ່ງເຂັ້ມແຂງຂຶ້ນ, ຫລາຍຢ່າງກໍເຂັ້ມແຂງຂຶ້ນຄືກັນ” (“Becoming a Disciple of Our Lord Jesus Christ,” Liahona, May 2017, 46).

ຄຸນສົມບັດຢ່າງພຣະຄຣິດແຕ່ລະຢ່າງທີ່ເຮົາພັດທະນາ ຊ່ວຍໃຫ້ເຮົາຖັກແສ່ວທາງວິນຍານຂອງການເປັນສານຸສິດ.

ຂະນະທີ່ທ່ານອ່ານ 2 ເປໂຕ 1:1–11, ໃຫ້ໄຕ່ຕອງຄຸນລັກສະນະ “ຂອງທຳມະຊາດແຫ່ງສະຫວັນ” ທີ່ລະບຸຢູ່ໃນຂໍ້ເຫລົ່ານີ້. ໃນປະສົບການຂອງທ່ານ, ມັນ “ກ້ຽວພັນ,” ເຂົ້າກັນດັ່ງທີ່ແອວເດີ ແຮວສ໌ ໄດ້ບັນຍາຍແນວໃດ? ມັນກໍ່ສ້າງກັນແລະກັນແນວໃດ? ທ່ານຮຽນຮູ້ຫຍັງອີກແດ່ຈາກຂໍ້ເຫລົ່ານີ້ກ່ຽວກັບຂັ້ນຕອນຂອງການກາຍເປັນເໝືອນດັ່ງພຣະຄຣິດ?

ທ່ານສາມາດໄຕ່ຕອງນຳອີກເຖິງ “ຄຳສັນຍາປະເສີດອັນໃຫຍ່ຫລວງ” ທີ່ພຣະເຈົ້າໄດ້ປະທານໃຫ້ໄພ່ພົນຂອງພຣະອົງ—ລວມທັງທ່ານ (2 ເປໂຕ 1:4). ຂ່າວສານຂອງແອວເດີ ເດວິດ ເອ ແບ໊ດນາ “Exceeding Great and Precious Promises” (Liahona, Nov. 2017, 90–93) ສາມາດຊ່ວຍທ່ານໃຫ້ເຂົ້າໃຈວ່າ ຄຳສັນຍາເຫລົ່ານັ້ນແມ່ນຫຍັງ ແລະ ໄດ້ຮັບມັນໄດ້ແນວໃດ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

1 ເປໂຕ 2:5–10.ຂະນະທີ່ທ່ານອ່ານຂໍ້ເຫລົ່ານີ້ກັບຄອບຄົວຂອງທ່ານ, ໃຫ້ຄິດທີ່ຈະໃຊ້ກ້ອນຫີນ ເພື່ອຊ່ວຍສະມາຊິກໃນຄອບຄົວໃຫ້ວາດພາບເຫັນຄຳສອນຂອງເປໂຕ ທີ່ວ່າພຣະຜູ້ຊ່ວຍໃຫ້ລອດເປັນ “ຫີນເສົາເອກ” ຂອງເຮົາແນວໃດ. ເຮົາເປັນຄືກັນກັບ “ຫີນທີ່ມີຊີວິດຢູ່” ທີ່ພຣະເຈົ້າໃຊ້ເພື່ອສ້າງສາອານາຈັກຂອງພຣະອົງແນວໃດ? ເຮົາຮຽນຮູ້ຫຍັງແດ່ຈາກເປໂຕ ກ່ຽວກັບພຣະຜູ້ຊ່ວຍໃຫ້ລອດ ແລະ ບົດບາດຂອງເຮົາໃນອານາຈັກຂອງພຣະອົງ? ຂ່າວສານຂອງເປໂຕເຖິງຄອບຄົວທ່ານຄືຫຍັງ?

1 ເປໂຕ 3:8–17.ເຮົາຈະສາມາດ “ມີໃຈພ້ອມຢູ່ສະເໝີ ເພື່ອ … ຈະສາມາດຕອບ” ຜູ້ທີ່ຖາມເຮົາກ່ຽວກັບສັດທາຂອງເຮົາແນວໃດ? ຄອບຄົວຂອງທ່ານອາດມັກຫລິ້ນລະຄອນກ້ອມຕາມສະຖານະການ ຊຶ່ງໃນນັ້ນບາງຄົນຍ່າງເຂົ້າມາຫາເຂົາເຈົ້າ ແລະ ຖາມເລື່ອງພຣະກິດຕິຄຸນ.

1 ເປໂຕ 3:18–20; 4:6.ຄອບຄົວຂອງທ່ານຈະເຮັດຢ່າງໃດ ເພື່ອຈະຮູ້ສຶກເຊື່ອມໂຍງເຂົ້າກັບບັນພະບຸລຸດຂອງພວກທ່ານ? ບາງທີທ່ານສາມາດສະຫລອງວັນເກີດຂອງບັນພະບຸລຸດທີ່ລ່ວງລັບໄປແລ້ວ ໂດຍການເຮັດອາຫານທີ່ເຂົາເຈົ້າມັກ, ເບິ່ງຮູບຖ່າຍ, ຫລື ເລົ່າເລື່ອງຈາກຊີວິດຂອງເຂົາເຈົ້າ. ຖ້າເປັນໄປໄດ້, ພວກທ່ານສາມາດວາງແຜນໄປຮັບເອົາພິທີການແທນບັນພະບຸລຸດຂອງພວກທ່ານ ຢູ່ໃນພຣະວິຫານ (ຖ້າຕ້ອງການຄວາມຊ່ວຍເຫລືອ, ໃຫ້ເປີດເບິ່ງ FamilySearch.org ).

2 ເປໂຕ 1:16–21.ໃນຂໍ້ເຫລົ່ານີ້, ເປໂຕໄດ້ເຕືອນໄພ່ພົນເຖິງປະສົບການຂອງເພິ່ນ ຢູ່ເທິງພູແຫ່ງການປ່ຽນສະພາບ (ເບິ່ງ ມັດທາຍ 17:1–9 ນຳອີກ). ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບຄຳສອນຂອງສາດສະດາ? (ເບິ່ງ ຄຳສອນ ແລະ ພັນທະສັນຍາ 1:38 ນຳອີກ). ແມ່ນຫຍັງໃຫ້ຄວາມໝັ້ນໃຈແກ່ເຮົາ ທີ່ຈະເຮັດຕາມສາດສະດາທີ່ມີຊີວິດຢູ່ໃນປະຈຸບັນ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68.

ການປັບປຸງການສິດສອນຂອງເຮົາ

“ຈົ່ງມີໃຈພ້ອມຢູ່ສະເໝີ.” ຊ່ວງເວລາແຫ່ງການສິດສອນແບບເປັນກັນເອງຢູ່ທີ່ບ້ານຈະມາເຖິງ ແລະ ຜ່ານໄປຢ່າງໄວ, ສະນັ້ນ ຕ້ອງສວຍໂອກາດ ເມື່ອໄດ້ຈັງຫວະ. ທ່ານຈະພະຍາຍາມ “ມີໃຈພ້ອມຢູ່ສະເໝີ” ເພື່ອສິດສອນສະມາຊິກໃນຄອບຄົວຂອງທ່ານເຖິງຄວາມຈິງຂອງພຣະກິດຕິຄຸນ ແລະ ແບ່ງປັນ “ຄວາມຫວັງ [ທີ່ມີຢູ່ໃນພວກທ່ານ]” (1 ເປໂຕ 3:15) ເມື່ອເວລາແຫ່ງການສິດສອນມາເຖິງໄດ້ແນວໃດ? (ເບິ່ງ Teaching in the Savior’s Way, 16.)