“ວັນທີ 27 ເດືອນພະຈິກ–ວັນທີ 3 ເດືອນທັນວາ. 1–3 ໂຢຮັນ; ຢູດາ: ‘ພຣະເຈົ້າຊົງເປັນຄວາມຮັກ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 27 ເດືອນພະຈິກ–ວັນທີ 3 ເດືອນທັນວາ. 1–3 ໂຢຮັນ; ຢູດາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ພຣະເຢຊູຄຣິດຍິ້ມຂະນະທີ່ນັ່ງຢູ່ກັບພວກເດັກນ້ອຍທີ່ຍິ້ມແຍ້ມ

Perfect Love [ຄວາມຮັກອັນບໍລິບູນ], ໂດຍ ແດວ ພາສັນ

ວັນທີ 27 ເດືອນພະຈິກ–ວັນທີ 3 ເດືອນທັນວາ

1–3 ໂຢຮັນ; ຢູດາ

“ພຣະເຈົ້າຊົງເປັນຄວາມຮັກ”

ຂະນະທີ່ທ່ານອ່ານສານຂອງໂຢຮັນ ແລະ ຢູດາ, ໃຫ້ສະແຫວງຫາການດົນໃຈກ່ຽວກັບວິທີທີ່ທ່ານສາມາດສະແດງຄວາມຮັກຂອງທ່ານຕໍ່ພຣະເຈົ້າແນວໃດ. ໃຫ້ບັນທຶກຄວາມປະທັບໃຈເຫລົ່ານີ້ ແລະ ປະຕິບັດຕາມນັ້ນ.

ບັນທຶກຄວາມປະທັບໃຈຂອງທ່ານ

ເມື່ອໂຢຮັນ ແລະ ຢູດາ ໄດ້ຂຽນສານຂອງພວກເພິ່ນ, ຄຳສອນປອມໄດ້ເລີ່ມຕົ້ນນຳພາໄພ່ພົນຫລາຍຄົນໃຫ້ປະຖິ້ມຄວາມເຊື່ອແລ້ວ. ຄູສອນປອມບາງຄົນໄດ້ສົງໄສວ່າພຣະເຢຊູຄຣິດໄດ້ມາປະກົດ “ໃນເນື້ອໜັງ” ແທ້ໆບໍ (ເບິ່ງ, ສຳລັບຕົວຢ່າງ, 1 ໂຢຮັນ 4:1–3; 2 ໂຢຮັນ 1:7). ຜູ້ນຳໃນສາດສະໜາຈັກສາມາດເຮັດຫຍັງແດ່ໃນສະຖານະການເຊັ່ນນັ້ນ? ອັກຄະສາວົກໂຢຮັນໄດ້ຕອບໂຕ້ໂດຍການແບ່ງປັນການເປັນພະຍານສ່ວນຕົວຂອງເພິ່ນ ເຖິງພຣະຜູ້ເປັນເຈົ້າ ດັ່ງນີ້: “ຊຶ່ງມີຢູ່ແຕ່ປະຖົມມະການ ຊຶ່ງເຮົາໄດ້ຍິນ ຊຶ່ງເຮົາໄດ້ເຫັນກັບຕາ ຊຶ່ງເຮົາໄດ້ພິຈາລະນາເບິ່ງ ແລະ ມືຂອງເຮົາໄດ້ຈັບຕ້ອງນັ້ນກ່ຽວກັບພຣະທຳອັນຊົງຊີວິດ” (ການແປຂອງໂຈເຊັບ ສະມິດ, 1 ໂຢຮັນ 1:1 [ໃນ 1 ໂຢຮັນ 1:1, ໝາຍເຫດຢູ່ທາງລຸ່ມໜ້າປຶ້ມ ກ]). ແລະ ແລ້ວໂຢຮັນໄດ້ສິດສອນກ່ຽວກັບຄວາມຮັກ: ຄວາມຮັກຂອງພຣະເຈົ້າສຳລັບເຮົາ ແລະ ຄວາມຮັກທີ່ເຮົາຄວນມີຕໍ່ພຣະອົງ ແລະ ຕໍ່ລູກໆຂອງພຣະອົງ. ເຖິງແນວໃດ, ໂຢຮັນກໍເປັນພະຍານຄົນໜຶ່ງເຖິງເລື່ອງນັ້ນ, ເໝືອນກັນ. ເພິ່ນໄດ້ມີປະສົບການສ່ວນຕົວເຖິງຄວາມຮັກຂອງພຣະຜູ້ເປັນເຈົ້າ (ເບິ່ງ ໂຢຮັນ 13:23; 20:2), ແລະ ເພິ່ນຢາກໃຫ້ໄພ່ພົນຮູ້ສຶກເຖິງຄວາມຮັກແບບດຽວກັນນັ້ນ. ປະຈັກພະຍານ ແລະ ຄຳສອນຂອງໂຢຮັນກ່ຽວກັບຄວາມຮັກ ແມ່ນຕ້ອງການຫລາຍໃນປະຈຸບັນຄືກັນ, ເມື່ອສັດທາໃນພຣະເຢຊູຄຣິດຖືກສົງໄສ ແລະ ຄຳສອນປອມກໍມີຢູ່ອ້ອມຮອບ. ການອ່ານສານຂອງໂຢຮັນສາມາດຊ່ວຍເຮົາໃຫ້ປະເຊີນກັບຄວາມຍາກລຳບາກໃນປະຈຸບັນດ້ວຍຄວາມກ້າຫານ, ເພາະ “ໃນຄວາມຮັກນັ້ນບໍ່ມີຄວາມຢ້ານ; ຄວາມຮັກອັນຄົບບໍລິບູນກໍຂັບໄລ່ຄວາມຢ້ານທຸກຢ່າງອອກໄປ” (1 ໂຢຮັນ 4:18).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

1 ໂຢຮັນ; 2 ໂຢຮັນ

ພຣະເຈົ້າຊົງເປັນຄວາມສະຫວ່າງ, ແລະ ພຣະເຈົ້າຊົງເປັນຄວາມຮັກ.

ຖ້າຫາກທ່ານຕ້ອງເລືອກຄຳໜຶ່ງ ຫລື ສອງຄຳ ເພື່ອບັນຍາຍພຣະເຈົ້າ, ຄຳເຫລົ່ານັ້ນຈະແມ່ນຫຍັງ? ໃນສານຂອງເພິ່ນ, ໂຢຮັນມັກຈະໃຊ້ຄຳວ່າ “ຄວາມສະຫວ່າງ” ແລະ “ຄວາມຮັກ” (ເບິ່ງ, ສຳລັບຕົວຢ່າງ, 1 ໂຢຮັນ 1:5; 2:8–11; 3:16, 23–24; 4:7–21). ຂະນະທີ່ທ່ານອ່ານສານສອງສະບັບທຳອິດຂອງໂຢຮັນ, ໃຫ້ໄຕ່ຕອງປະສົບການທີ່ໂຢຮັນມີກັບຄວາມສະຫວ່າງ ແລະ ຄວາມຮັກຂອງພຣະຜູ້ຊ່ວຍໃຫ້ລອດ. ຍົກຕົວຢ່າງ, ໃຫ້ພິຈາລະນາສິ່ງທີ່ໂຢຮັນໄດ້ຮຽນຮູ້ຈາກຄຳສອນຂອງພຣະເຢຊູໃນ ໂຢຮັນ 3:16–17; 12:35–36, 46; 15:9–14; 19:25–27. ທ່ານເຫັນຄວາມຄ້າຍຄຽງລະຫວ່າງຄຳສອນເຫລົ່ານີ້ ແລະ ສິ່ງທີ່ 1 ໂຢຮັນ ສິດສອນກ່ຽວກັບຄວາມສະຫວ່າງ ແລະ ຄວາມຮັກຂອງພຣະເຈົ້າບໍ? ມີປະສົບການຢ່າງໃດແດ່ທີ່ສິດສອນທ່ານວ່າ ພຣະເຈົ້າຊົງເປັນຄວາມສະຫວ່າງ ແລະ ຄວາມຮັກ?

1 ໂຢຮັນ 2–4; 2 ໂຢຮັນ

“ຖ້າເຮົາທັງຫລາຍຮັກຊຶ່ງກັນແລະກັນ, ພຣະເຈົ້າກໍຊົງສະຖິດຢູ່ໃນເຮົາທັງຫລາຍ.”

ທ່ານຈະພົບເຫັນຄຳເຊັ່ນ “ຕັ້ງໝັ້ນຄົງ” ແລະ “ຢູ່” ນຳ ຊ້ຳຫລາຍເທື່ອຢູ່ທົ່ວໄປໃນສານຂອງໂຢຮັນ. ໃຫ້ຊອກຫາຄຳເຫລົ່ານີ້, ໂດຍສະເພາະຂະນະທີ່ທ່ານອ່ານ 1 ໂຢຮັນ 2–4 ແລະ 2 ໂຢຮັນ. ທ່ານຄິດວ່າ ການ “ຕັ້ງໝັ້ນຄົງ” ຫລື “ຢູ່” ໃນພຣະເຈົ້າ ແລະ ໃນຄຳສອນຂອງພຣະອົງໝາຍຄວາມວ່າແນວໃດ? (ເບິ່ງ 2 ໂຢຮັນ 1:9). ການມີພຣະເຈົ້າ “ຕັ້ງໝັ້ນຄົງ” ຫລື “ຢູ່” ໃນທ່ານໝາຍຄວາມວ່າແນວໃດ?

1 ໂຢຮັນ 2:24–3:3

ເຮົາສາມາດກາຍເປັນເໝືອນດັ່ງພຣະເຢຊູຄຣິດ.

ເປົ້າໝາຍຂອງການກາຍເປັນເໝືອນດັ່ງພຣະຄຣິດເບິ່ງຄືວ່າສູງເກີນໄປສຳລັບທ່ານບໍ? ໃຫ້ພິຈາລະນາຄຳແນະນຳທີ່ໃຫ້ກຳລັງໃຈຂອງໂຢຮັນທີ່ວ່າ: “ລູກນ້ອຍທັງຫລາຍເອີຍ, ຈົ່ງຕັ້ງໝັ້ນຢູ່ໃນພຣະອົງເພື່ອວ່າ, ເມື່ອພຣະອົງຊົງສະເດັດມາປະກົດ, ເຮົາທັງຫລາຍຈະໄດ້ມີໃຈກ້າ … [ແລະ] ເຮົາຈະເປັນເໝືອນດັ່ງພຣະອົງ” (1 ໂຢຮັນ 2:28; 3:2). ທ່ານພົບເຫັນຫຍັງແດ່ຢູ່ໃນ 1 ໂຢຮັນ 2:24–3:3 ທີ່ໃຫ້ຄວາມໝັ້ນໃຈ ແລະ ການປອບໂຍນແກ່ທ່ານ ໃນຖານະສານຸສິດຂອງພຣະເຢຊູຄຣິດ? ຂະນະທີ່ທ່ານສຶກສາສານຂອງໂຢຮັນ, ໃຫ້ຊອກຫາຫລັກທຳ ຫລື ຄຳສອນທີ່ສາມາດຊ່ວຍທ່ານໃນຄວາມພະຍາຍາມທີ່ຈະກາຍເປັນເໝືອນດັ່ງພຣະຄຣິດຫລາຍຂຶ້ນ.

ເບິ່ງ ໂມໂຣໄນ 7:48; ຄຳສອນ ແລະ ພັນທະສັນຍາ 88:67–68; Scott D. Whiting, “Becoming like Him,” Liahona, Nov. 2020, 12–14 ນຳອີກ.

1 ໂຢຮັນ 4:12

“ບໍ່ມີຜູ້ໃດ … ໄດ້ເຫັນພຣະເຈົ້າຈັກເທື່ອ” ບໍ?

ການແປຂອງໂຈເຊັບ ສະມິດ, 1 ໂຢຮັນ 4:12 ໃຫ້ຄວາມແຈ່ມແຈ້ງວ່າ “ບໍ່ເຄີຍມີມະນຸດຄົນໃດເຄີຍເຫັນພຣະເຈົ້າ ບໍ່ວ່າຈະເປັນເວລາໃດ, ຍົກເວັ້ນແຕ່ຜູ້ທີ່ເຊື່ອ” (ໃນ 1 ໂຢຮັນ 4:12, ໝາຍເຫດຢູ່ທາງລຸ່ມໜ້າປຶ້ມ ກ; ເບິ່ງ ໂຢຮັນ 6:46; 3 ໂຢຮັນ 1:11 ນຳອີກ). ພຣະຄຳພີບັນທຶກຫລາຍໂອກາດຕອນທີ່ພຣະເຈົ້າອົງເປັນພຣະບິດາໄດ້ສະແດງຕົວເອງໃຫ້ປະຈັກແກ່ບຸກຄົນທີ່ຊື່ສັດ, ລວມທັງໂຢຮັນເອງ (ເບິ່ງ ພຣະນິມິດ 4; ເບິ່ງ ກິດຈະການ 7:55–56; 1 ນີໄຟ 1:8; ຄຳສອນ ແລະ ພັນທະສັນຍາ 76:23; ໂຈເຊັບ ສະມິດ—ປະຫວັດ 1:16–17 ນຳອີກ).

1 ໂຢຮັນ 5

ເມື່ອເຮົາໃຊ້ສັດທາໃນພຣະເຢຊູຄຣິດ ແລະ ເກີດໃໝ່, ເຮົາສາມາດເອົາຊະນະໂລກໄດ້.

ຂະນະທີ່ທ່ານອ່ານ 1 ໂຢຮັນ 5, ໃຫ້ຊອກຫາສິ່ງທີ່ເຮົາຕ້ອງເຮັດເພື່ອເອົາຊະນະໂລກ ແລະ ໄດ້ຮັບຊີວິດນິລັນດອນ. ການເອົາຊະນະໂລກເບິ່ງຄືແນວໃດໃນຊີວິດຂອງທ່ານ? ທ່ານກໍສາມາດພົບຄຳຕອບ ແລະ ຄວາມຮູ້ຢູ່ໃນຂ່າວສານຂອງແອວເດີ ນຽວ ແອວ ແອນເດີເຊັນ ນຳອີກ “Overcoming the World” (Liahona, May 2017, 58–62).

ຢູດາ 1

“ຈົ່ງສ້າງຕົວເອງຂຶ້ນເທິງ [ສັດທາ] ອັນບໍລິສຸດ [ທີ່ສຸດ] ຂອງພວກເຈົ້າ.”

ຢູດາ 1:10–19 ສິດສອນທ່ານຫຍັງແດ່ກ່ຽວກັບຜູ້ທີ່ຕໍ່ຕ້ານພຣະເຈົ້າ ແລະ ວຽກງານຂອງພຣະອົງ? ທ່ານຮຽນຮູ້ຫຍັງແດ່ຈາກຂໍ້ທີ 20–25 ກ່ຽວກັບວິທີທີ່ຈະຮັກສາສັດທາຂອງທ່ານໃນພຣະເຢຊູຄຣິດ ໃຫ້ເຂັ້ມແຂງຂຶ້ນ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

1 ໂຢຮັນ 2:8–11.ເພື່ອຊ່ວຍຄອບຄົວຂອງທ່ານໃຫ້ໄຕ່ຕອງຄຳສອນຂອງໂຢຮັນ, ໃຫ້ເຕົ້າໂຮມກັນຢູ່ໃນຫ້ອງມືດ ເພື່ອວ່າສະມາຊິກໃນຄອບຄົວຈະສາມາດມີປະສົບການກັບຄວາມແຕກຕ່າງລະຫວ່າງການຍ່າງຢູ່ “ໃນຄວາມມືດ” ແລະ ເດີນໄປ “ໃນຄວາມສະຫວ່າງ.” ຄວາມກຽດຊັງເຮັດໃຫ້ເຮົາຍ່າງຢູ່ໃນຄວາມມືດ ແລະ ສະດຸດລົ້ມແນວໃດ? ການຮັກກັນແລະກັນນຳຄວາມສະຫວ່າງມາສູ່ຊີວິດຂອງເຮົາແນວໃດ?

1 ໂຢຮັນ 3:21–22.ແມ່ນຫຍັງຢູ່ໃນຂໍ້ເຫລົ່ານີ້ທີ່ເພີ່ມ “ໃຈກ້າ” ໃຫ້ເຮົາໃນພຣະເຈົ້າ ແລະ ໃນຄວາມສາມາດຂອງເຮົາທີ່ຈະຮັບເອົາຄຳຕອບໃຫ້ກັບຄຳອະທິຖານຂອງເຮົາ?

ການຮັກສາພຣະບັນຍັດຂອງພຣະເຈົ້າຊ່ວຍເຮົາເອົາຊະນະໂລກໄດ້ແນວໃດ.

1 ໂຢຮັນ 5:2–3.ມີພຣະບັນຍັດຂໍ້ໃດບໍທີ່ເຮົາຄິດວ່າ “ໜັກເກີນໄປ” ຫລື ຍາກເກີນໄປທີ່ຈະປະຕິບັດຕາມ? ຄວາມຮັກຂອງເຮົາຕໍ່ພຣະເຈົ້າປ່ຽນແປງວິທີທາງທີ່ເຮົາຮູ້ສຶກກ່ຽວກັບພຣະບັນຍັດຂອງພຣະອົງແນວໃດ?

3 ໂຢຮັນ 1:4.ການ “ເດີນໄປໃນຄວາມຈິງ” ໝາຍຄວາມວ່າແນວໃດ? ທ່ານສາມາດໃຊ້ໂອກາດນີ້ເພື່ອບອກສະມາຊິກໃນຄອບຄົວ ເຖິງວິທີທີ່ທ່ານໄດ້ເຫັນເຂົາເຈົ້າເດີນໄປໃນຄວາມຈິງ ແລະ ເວົ້າລົມກ່ຽວກັບຄວາມຊື່ນຊົມທີ່ສິ່ງນີ້ນຳມາໃຫ້ພວກທ່ານແນວໃດ. ສະມາຊິກໃນຄອບຄົວອາດມັກຂຽນ ຫລື ແຕ້ມຄວາມຈິງທີ່ເຂົາເຈົ້າໄດ້ຮຽນຮູ້ ໃສ່ໃນເຈ້ຍຮູບຮອຍຕີນ ແລະ ໃຊ້ມັນເພື່ອເຮັດເປັນເສັ້ນທາງ ໃຫ້ຄອບຄົວຂອງທ່ານຍ່າງຕາມໄປນຳກັນ.

ຢູດາ 1:3–4.ມີອັນຕະລາຍທາງວິນຍານແນວໃດບໍ ທີ່ “ແອບແຝງເຂົ້າມາ” ໃນຊີວິດຂອງເຮົາ ແລະ ຄອບຄົວຂອງເຮົາ? (ຢູດາ 1:4). ເຮົາຈະສາມາດເຮັດຕາມຄຳແນະນຳຂອງຢູດາ ທີ່ຈະ “ໃຫ້ຕໍ່ສູ້ເພື່ອ [ສັດທາຢ່າງພາກພຽນ]” ແລະ ຕ້ານທານອັນຕະລາຍເຫລົ່ານີ້ໄດ້ແນວໃດ? (ຢູດາ 1:3). ເຮົາຈະເຮັດສິ່ງໃດແດ່ ເພື່ອໃຫ້ແນ່ໃຈວ່າ “ສັນຕິສຸກ, ແລະ ຄວາມຮັກ, ມີເພີ່ມທະວີຄູນ” ໃນຄອບຄົວຂອງເຮົາ? (ຢູດາ 1:2).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ຮັກທີ່ບ້ານ,” ເພງສວດ ແລະ ເພງຂອງເດັກນ້ອຍ, 48.

ການປັບປຸງການສຶກສາສ່ວນຕົວ

ຊອກຫາຄວາມຮັກຂອງພຣະເຈົ້າ. ປະທານເອັມ ຣະໂຊ ບາເລີດ ໄດ້ສິດສອນວ່າ, “ພຣະກິດຕິຄຸນນີ້ເປັນພຣະກິດຕິຄຸນແຫ່ງຄວາມຮັກ—ຄວາມຮັກສຳລັບພຣະເຈົ້າ ແລະ ຄວາມຮັກສຳລັບກັນແລະກັນ” (“God’s Love for His Children,” Ensign, May 1988, 59). ຂະນະທີ່ທ່ານອ່ານພຣະຄຳພີ, ໃຫ້ຄິດທີ່ຈະຂຽນຫລັກຖານເຖິງຄວາມຮັກຂອງພຣະເຈົ້າໄວ້.