“ວັນທີ 4–10 ເດືອນທັນວາ. ພຣະນິມິດ 1–5: ‘ສະຫງ່າລາສີ, ແລະ ລິດທານຸພາບ, ຈົ່ງມີແດ່ … ພຣະເມສານ້ອຍຕະຫລອດຊົ່ວນິລັນດອນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 4–10 ເດືອນທັນວາ. ພຣະນິມິດ 1–5,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
ວັນທີ 4–10 ເດືອນທັນວາ
ພຣະນິມິດ 1–5
“ສະຫງ່າລາສີ, ແລະ ລິດທານຸພາບ, ຈົ່ງມີແດ່ … ພຣະເມສານ້ອຍຕະຫລອດຊົ່ວນິລັນດອນ”
ໃຫ້ຄິດທີ່ຈະຂຽນຄຳຖາມທີ່ທ່ານມີກ່ຽວກັບສິ່ງທີ່ທ່ານໄດ້ອ່ານໃນ ພຣະນິມິດ. ແລ້ວທ່ານສາມາດຊອກຫາຄຳຕອບໃຫ້ກັບຄຳຖາມຂອງທ່ານ ຫລື ສົນທະນາມັນກັບສະມາຊິກໃນຄອບຄົວ ຫລື ໃນຫ້ອງຮຽນຂອງສາດສະໜາຈັກ.
ບັນທຶກຄວາມປະທັບໃຈຂອງທ່ານ
ທ່ານເຄີຍມີບັນຫາທີ່ຈະບອກຄົນອື່ນເຖິງຄວາມຮູ້ສຶກຂອງທ່ານລະຫວ່າງປະສົບການທາງວິນຍານທີ່ມີພະລັງຫລືບໍ່? ພາສາໃນຊີວິດປະຈຳວັນ ອາດຮູ້ສຶກບໍ່ພຽບພ້ອມທີ່ຈະບັນຍາຍຄວາມຮູ້ສຶກ ແລະ ຄວາມປະທັບໃຈທາງວິນຍານ. ບາງທີ ນີ້ຄືສາເຫດທີ່ໂຢຮັນໄດ້ໃຊ້ສັນຍາລັກ ແລະ ຮູບພາບທີ່ມີຄວາມໝາຍຫລາຍຢ່າງ ເພື່ອບັນຍາຍການເປີດເຜີຍທີ່ສະຫງ່າງາມຂອງເພິ່ນ. ເພິ່ນສາມາດພຽງແຕ່ກ່າວວ່າເພິ່ນໄດ້ເຫັນພຣະເຢຊູຄຣິດ, ແຕ່ເພື່ອຊ່ວຍເຮົາໃຫ້ເຂົ້າໃຈປະສົບການຂອງເພິ່ນ, ເພິ່ນຈຶ່ງໄດ້ບັນຍາຍພຣະຜູ້ຊ່ວຍໃຫ້ລອດ ໂດຍການໃຊ້ຄຳເວົ້າເຊັ່ນດັ່ງຕໍ່ໄປນີ້: “ຕາຂອງພຣະອົງເໝືອນດັ່ງແປວໄຟ,” “ມີດາບສອງຄົມອອກມາຈາກປາກຂອງພຣະອົງ,” ແລະ “ໃບໜ້າຂອງພຣະອົງເຫລື້ອມເໝືອນດັ່ງດວງຕາເວັນທີ່ສ່ອງແສງກ້າ” (ພຣະນິມິດ 1:14–16). ຂະນະທີ່ທ່ານອ່ານພຣະທຳ ພຣະນິມິດ, ໃຫ້ພະຍາຍາມຄົ້ນຫາຂ່າວສານທີ່ໂຢຮັນຢາກໃຫ້ທ່ານຮຽນຮູ້ ແລະ ຮູ້ສຶກ, ແມ່ນແຕ່ຖ້າຫາກທ່ານບໍ່ເຂົ້າໃຈຄວາມໝາຍຂອງສັນຍາລັກທຸກຢ່າງກໍຕາມ. ເປັນຫຍັງເພິ່ນຈຶ່ງປຽບທຽບສະມາຊິກຂອງສາດສະໜາຈັກໃສ່ກັບໂຄມໄຟ, ຊາຕານໃສ່ກັບພະຍານາກ, ແລະ ພຣະເຢຊູຄຣິດໃສ່ກັບລູກແກະ? ໃນທີ່ສຸດ, ທ່ານບໍ່ຈຳເປັນຕ້ອງເຂົ້າໃຈທຸກສັນຍາລັກໃນ ພຣະນິມິດ ກ່ອນຈະເຂົ້າໃຈເຖິງຫົວຂໍ້ທີ່ສຳຄັນຂອງມັນ, ລວມທັງຫົວຂໍ້ທີ່ໂດດເດັ່ນຂອງມັນ: ພຣະເຢຊູຄຣິດ ແລະ ຜູ້ຕິດຕາມຂອງພຣະອົງຈະໄຊຊະນະເໜືອມະນຸດ ແລະ ຊາຕານ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພາບນິມິດຂອງໂຢຮັນສິດສອນກ່ຽວກັບແຜນຂອງພຣະບິດາເທິງສະຫວັນ ເພື່ອຊ່ວຍລູກໆຂອງພຣະອົງໃຫ້ລອດ.
ພຣະທຳ ພຣະນິມິດ ກໍຍາກທີ່ຈະເຂົ້າໃຈໄດ້, ແຕ່ຢ່າທໍ້ແທ້. ຄຳສັນຍາຂອງໂຢຮັນອາດດົນໃຈທ່ານ ເພື່ອໃຫ້ພະຍາຍາມຕໍ່ໄປ: “ຜູ້ທີ່ໄດ້ ອ່ານ, ແລະ ຜູ້ທີ່ ໄດ້ຍິນ ແລະ ເຂົ້າໃຈ ຖ້ອຍຄຳແຫ່ງຄຳທຳນາຍນີ້, ແລະ ປະຕິບັດ ຕາມຂໍ້ຄວາມທີ່ມີຂຽນໄວ້ ກໍເປັນສຸກແລ້ວ, ເພາະເວລາແຫ່ງການສະເດັດມາຂອງພຣະຜູ້ເປັນເຈົ້າ ກໍໃກ້ເຂົ້າມາແລ້ວ” (ການແປຂອງໂຈເຊັບ ສະມິດ, ພຣະນິມິດ 1:3 [ໃນ ພຣະຄຣິສຕະທຳຄຳພີ ພາກຫ້ອຍທ້າຍ], ເນັ້ນຄຳເນີ້ງ).
ວິທີໜຶ່ງໃນການສຶກສາ ພຣະນິມິດ ແມ່ນການຊອກຫາຄວາມເຊື່ອມໂຍງເຂົ້າກັບແຜນແຫ່ງຄວາມລອດ. ພາບລວມທົ່ວໄປນີ້ອາດຊ່ວຍທ່ານໄດ້:
-
ບົດທີ 6–11, 13–14, 16–19 ບັນຍາຍຊີວິດມະຕະ ແລະ ເຫດການໃນປະຫວັດສາດຂອງແຜ່ນດິນໂລກ.
-
ບົດທີ 2–3, 15, 20–22 ບັນຍາຍການພິພາກສາຄັ້ງສຸດທ້າຍ ແລະ ລັດສະໝີພາບທີ່ລໍຖ້າຄົນຊອບທຳ.
ຂະນະທີ່ທ່ານອ່ານ, ໃຫ້ຖາມຕົວເອງວ່າ, “ສິ່ງນີ້ສິດສອນເຮົາຫຍັງແດ່ກ່ຽວກັບແຜນຂອງພຣະເຈົ້າ? ພຣະເຈົ້າໄດ້ເຮັດຫຍັງແດ່ເພື່ອຊ່ວຍເຮົາໃຫ້ເອົາຊະນະສິ່ງຊົ່ວຮ້າຍ ແລະ ຫັນມາຫາພຣະອົງ? ພຣະອົງໄດ້ສັນຍາຫຍັງແດ່ກັບຄົນຊອບທຳ?”
ມັນກໍຍັງເປັນປະໂຫຍດທີ່ຈະຮູ້ວ່າ ຄຳສອນ ແລະ ພັນທະສັນຍາ 77 ອະທິບາຍສັນຍາລັກບາງຢ່າງໃນ ພຣະນິມິດ. ນອກເໜືອຈາກນັ້ນ, ການແປຂອງໂຈເຊັບ ສະມິດ ກໍໄດ້ອະທິບາຍຂໍ້ພຣະຄຳພີຢ່າງແຈ່ມແຈ້ງໃນ ພຣະນິມິດ, ສະນັ້ນ ໃຫ້ກວດກາເບິ່ງຂໍ້ຄວາມທີ່ຢູ່ລຸ່ມໜ້າປຶ້ມ ແລະ ພຣະຄຣິສຕະທຳຄຳພີ ພາກຫ້ອຍທ້າຍເປັນປະຈຳ.
ເບິ່ງ Bible Dictionary, “John,” “Revelation of John” ນຳອີກ.
ພຣະເຢຊູຄຣິດເປັນພຣະບຸດທີ່ຊົງພຣະຊົນຂອງພຣະເຈົ້າທີ່ຊົງພຣະຊົນຢູ່.
ບົດທຳອິດຂອງ ພຣະນິມິດ ບັນຍາຍເຖິງການປະກົດຕົວຂອງພຣະເຢຊູຄຣິດຕໍ່ໂຢຮັນໃນພາບນິມິດ. ບາງທີທ່ານສາມາດຂຽນທຸກສິ່ງທີ່ບົດນີ້ກ່າວກ່ຽວກັບພຣະເຢຊູຄຣິດ, ລວມທັງຜູ້ທີ່ພຣະອົງເປັນ, ສິ່ງທີ່ພຣະອົງກະທຳເພື່ອເຮົາ, ແລະ ສິ່ງທີ່ພຣະອົງປຽບເໝືອນ.
ບາງສິ່ງທີ່ທ່ານຮຽນຮູ້ຈະມາຈາກສັນຍາລັກ. ໃຫ້ໄຕ່ຕອງສິ່ງທີ່ພຣະຜູ້ເປັນເຈົ້າອາດພະຍາຍາມສິດສອນທ່ານກ່ຽວກັບພຣະອົງເອງ ຜ່ານທາງສັນຍາລັກເຫລົ່ານີ້. ຍົກຕົວຢ່າງ, ໃຫ້ສັງເກດເບິ່ງວ່າພຣະຜູ້ຊ່ວຍໃຫ້ລອດເອີ້ນພຣະອົງເອງວ່າ “ເປັນຕອນຕົ້ນ ແລະ ທີ່ສຸດ” ແລະ “ເປັນທຳອິດ ແລະ ສຸດທ້າຍ.” ທ່ານຄິດວ່າເປັນຫຍັງນາມຊື່ຈຶ່ງສຳຄັນ? ນາມຊື່ເຫລົ່ານີ້ສິດສອນທ່ານຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ?
ພຣະເຢຊູຄຣິດຮູ້ຈັກເຮົາເປັນສ່ວນຕົວ ແລະ ຈະຊ່ວຍເຮົາໃຫ້ເອົາຊະນະການທ້າທາຍຂອງເຮົາ.
ພຣະຄຳຂອງພຣະຜູ້ຊ່ວຍໃຫ້ລອດໃນ ພຣະນິມິດ 2–3 ເປີດເຜີຍວ່າ ພຣະອົງເຂົ້າໃຈຄວາມສຳເລັດຜົນ ແລະ ການດີ້ນລົນທີ່ແຕກຕ່າງຂອງແຕ່ລະສາຂາຂອງສາດສະໜາຈັກໃນສະໄໝຂອງໂຢຮັນ. ພຣະອົງໄດ້ສັນລະເສີນຄວາມພະຍາຍາມຂອງໄພ່ພົນ ແລະ ກໍເຕືອນພວກເຂົາໃນສິ່ງທີ່ພວກເຂົາຕ້ອງປ່ຽນແປງ. ທ່ານຮຽນຮູ້ຫຍັງແດ່ຈາກຄຳຍ້ອງຍໍ ແລະ ຄຳເຕືອນຂອງພຣະຜູ້ຊ່ວຍໃຫ້ລອດ?
ພຣະຜູ້ຊ່ວຍໃຫ້ລອດກໍເຂົ້າໃຈອີກເຖິງຄວາມສຳເລັດ ແລະ ການດີ້ນລົນ ຂອງທ່ານ ແລະ ພຣະອົງຢາກຊ່ວຍເຫລືອທ່ານ. ໃຫ້ສັງເກດເບິ່ງຄຳສັນຍາເລື້ອຍໆທີ່ພຣະອົງໄດ້ສະເໜີມອບໃຫ້ຜູ້ທີ່ເອົາຊະນະ. ແມ່ນຫຍັງທີ່ປະທັບໃຈທ່ານກ່ຽວກັບຄຳສັນຍາເຫລົ່ານີ້? ພຣະຜູ້ເປັນເຈົ້າຢາກໃຫ້ທ່ານເອົາຊະນະສິ່ງໃດ? ທ່ານສາມາດເຮັດຫຍັງແດ່ເພື່ອຮັບເອົາຄວາມຊ່ວຍເຫລືອຂອງພຣະອົງ?
ພຽງແຕ່ພຣະເຢຊູຄຣິດເທົ່ານັ້ນ ທີ່ສາມາດເຮັດໃຫ້ແຜນຂອງພຣະບິດາເທິງສະຫວັນເປັນໄປໄດ້.
ທ່ານຮຽນຮູ້ຫຍັງແດ່ກ່ຽວກັບພຣະບິດາເທິງສະຫວັນຈາກ ພຣະນິມິດ 4 ແລະ ກ່ຽວກັບພຣະເຢຊູຄຣິດຈາກ ພຣະນິມິດ 5? ໃຫ້ພິຈາລະນາວ່າ ມັນຄົງເປັນແນວໃດ ເມື່ອເຮົາຮັບຮູ້ວ່າພຣະເຢຊູຄຣິດ (“ພຣະເມສານ້ອຍ”) ຈະເຮັດໃຫ້ແຜນຂອງພຣະບິດາເທິງສະຫວັນເປັນໄປໄດ້ (ພຣະຜູ້ຊ່ວຍໃຫ້ລອດສາມາດ “ແກະຕາປະທັບທັງເຈັດ, ແລະ … ມາຍໜັງສືມ້ວນນັ້ນອອກໄດ້” [ພຣະນິມິດ 5:5]). ເປັນຫຍັງພຣະເຢຊູຄຣິດພຽງຜູ້ດຽວທີ່ສາມາດເຮັດສິ່ງນີ້ໄດ້? ທ່ານຈະສາມາດສະແດງໃຫ້ເຫັນເຖິງສັດທາຂອງທ່ານໃນພຣະອົງ ໃນຖານະພຣະຜູ້ຊ່ວຍໃຫ້ລອດຂອງທ່ານໄດ້ແນວໃດ?
ເບິ່ງ ໂຢບ 38:4–7; ຄຳສອນ ແລະ ພັນທະສັນຍາ 77:1–7 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ພຣະນິມິດ 1:20.ເປັນຫຍັງພຣະເຢຊູຈຶ່ງປຽບທຽບສາດສະໜາຈັກຂອງພຣະອົງໃສ່ກັບໂຄມໄຟ? (ເບິ່ງ ມັດທາຍ 5:14–16). ໃຫ້ຮ້ອງເພງກ່ຽວກັບວິທີທີ່ເຮົາສາມາດເປັນແສງສະຫວ່າງຂອງໂຄມໄຟ, ດັ່ງເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72).
-
ພຣະນິມິດ 2–3.ໃຫ້ທຳທ່າວ່າໂຢຮັນຖືກຂໍໃຫ້ມອບຂ່າວສານໃຫ້ແກ່ຄອບຄົວຂອງທ່ານ ເໝືອນດັ່ງເພິ່ນໄດ້ມອບໃຫ້ສາດສະໜາຈັກໃນສະໄໝຂອງເພິ່ນ. ເພິ່ນຈະວ່າສິ່ງໃດທີ່ດຳເນີນໄປດ້ວຍດີ? ທ່ານຈະດັດແປງໃຫ້ດີຂຶ້ນແນວໃດ?
-
ພຣະນິມິດ 3:15–16.ຫລັງຈາກໄດ້ອ່ານຂໍ້ເຫລົ່ານີ້ແລ້ວ, ຄອບຄົວຂອງທ່ານສາມາດດື່ມສິ່ງໃດສິ່ງໜຶ່ງທີ່ອຸ່ນໆ ຊຶ່ງຈະດີກວ່າຖ້າມັນຮ້ອນ ຫລື ເຢັນ. ການເປັນຄົນອຸ່ນໆທາງວິນຍານໝາຍຄວາມວ່າແນວໃດ?
-
ພຣະນິມິດ 3:20.ໃຫ້ສະແດງຮູບພຣະຜູ້ຊ່ວຍໃຫ້ລອດຢືນເຄາະຢູ່ທີ່ປະຕູ (ເບິ່ງທ້າຍຂອງໂຄງຮ່າງນີ້) ຂະນະທີ່ຄອບຄົວຂອງທ່ານອ່ານ ພຣະນິມິດ 3:20. ເປັນຫຍັງພຣະເຢຊູຈຶ່ງເຄາະປະຕູ ແທນທີ່ຈະຍ່າງເຂົ້າໄປໂລດ? ສະມາຊິກໃນຄອບຄົວສາມາດປ່ຽນຜຽນກັນເຄາະປະຕູ. ແລ້ວຄົນໜຶ່ງອີກໃນຄອບຄົວສາມາດແນະນຳວິທີທີ່ເຮົາຈະ “ໄຂປະຕູ” ໃຫ້ພຣະຜູ້ຊ່ວຍໃຫ້ລອດ ແລະ ປ່ອຍໃຫ້ສະມາຊິກໃນຄອບຄົວຂອງເຮົາເຂົ້າມາ. ຈະຮູ້ສຶກແນວໃດທີ່ມີພຣະຜູ້ຊ່ວຍໃຫ້ລອດຢູ່ໃນເຮືອນຂອງເຮົາ?
-
ພຣະນິມິດ 4:10–11.ການນະມັດສະການພຣະບິດາເທິງສະຫວັນ ໝາຍຄວາມວ່າແນວໃດ? ເຮົາຮູ້ຈັກຫຍັງແດ່ກ່ຽວກັບພຣະອົງ ທີ່ເຮັດໃຫ້ເຮົາຢາກນະມັດສະການພຣະອົງ?
-
ພຣະນິມິດ 5:6, 12–13.ເປັນຫຍັງພຣະເຢຊູຄຣິດຈຶ່ງຖືກເອີ້ນວ່າ “ພຣະເມສານ້ອຍ”? ນາມຊື່ນີ້ສິດສອນເຮົາຫຍັງແດ່ກ່ຽວກັບພຣະອົງ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງສວດແນະນຳ: “ພຣະຜູ້ຊ່ວຍດ້ວຍຄວາມຖ່ອມ,” ເພງສວດ ແລະ ເພງຂອງເດັກນ້ອຍ, 28.
ການປັບປຸງການສິດສອນຂອງເຮົາ
ຊຸກຍູ້ໃຫ້ຖາມຄຳຖາມ. ຄຳຖາມບົ່ງບອກວ່າສະມາຊິກໃນຄອບຄົວພ້ອມທີ່ຈະຮຽນ ແລະ ໃຫ້ຄວາມຮູ້ເຖິງວິທີທີ່ເຂົາເຈົ້າຕອບຮັບສິ່ງທີ່ເຂົາເຈົ້າກຳລັງຖືກສິດສອນ. ຈົ່ງສິດສອນຄອບຄົວຂອງທ່ານໃຫ້ຮູ້ຈັກວິທີຊອກຫາຄຳຕອບຢູ່ໃນພຣະຄຳພີ. (ເບິ່ງ Teaching in the Savior’s Way, 25–26.)
Let Him In [ຈົ່ງໃຫ້ພຣະອົງເຂົ້າມາ], ໂດຍ ກະເຣກ ເຄ ອໍສັນ