“ວັນທີ 18–24 ເດືອນທັນວາ. ຄຣິດສະມາດ: ‘ຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 18–24 ເດືອນທັນວາ. ຄຣິດສະມາດ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ກຸມມານນ້ອຍ

Little Lamb [ພຣະເມສານ້ອຍ], ໂດຍ ເຈເນດີ ເພດຈ໌

ວັນທີ 18–24 ເດືອນທັນວາ

ຄຣິດສະມາດ

“ຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່”

ໃຫ້ພິຈາລະນາວ່າ ການໄຕ່ຕອງການກຳເນີດ ແລະ ພາລະກິດຂອງພຣະຜູ້ຊ່ວຍໃຫ້ລອດ ສາມາດຊ່ວຍນຳວິນຍານແຫ່ງສັນຕິສຸກ ແລະ ຄວາມສັກສິດມາສູ່ເທດສະການຄຣິດສະມາດໄດ້ແນວໃດ.

ບັນທຶກຄວາມປະທັບໃຈຂອງທ່ານ

ເປັນຫຍັງການກຳເນີດຂອງກຸມມານນ້ອຍຈຶ່ງນຳຄວາມຊື່ນຊົມທີ່ຍິ່ງໃຫຍ່ເຊັ່ນນັ້ນມາໃຫ້? ບາງທີເປັນເພາະກຸມມານນ້ອຍສາມາດເປັນສັນຍາລັກຂອງຄວາມຫວັງ. ມີບາງສິ່ງກ່ຽວກັບຊີວິດໃໝ່ອ່ຽມທີ່ເຕັມໄປດ້ວຍຄວາມເປັນໄປໄດ້ ທີ່ເຊື້ອເຊີນເຮົາໃຫ້ໄຕ່ຕອງວ່າ ຊີວິດຈະເປັນແນວໃດສຳລັບເດັກຄົນນັ້ນ ແລະ ສິ່ງທີ່ດີເລີດທີ່ເຂົາຈະບັນລຸ. ສິ່ງນີ້ບໍ່ເຄີຍເປັນຈິງເທົ່າກັບການກຳເນີດຂອງພຣະບຸດຂອງພຣະເຈົ້າ ພຣະເຢຊູຄຣິດ. ບໍ່ເຄີຍມີຄວາມຫວັງໃນຕົວເດັກຫລາຍໄປກວ່ານີ້, ແລະ ບໍ່ເຄີຍມີຄົນໃດເກີດມາພ້ອມກັບຄຳສັນຍາຫລາຍກວ່ານີ້.

ເມື່ອທູດອົງໜຶ່ງໄດ້ເຊື້ອເຊີນພວກຜູ້ລ້ຽງແກະໃຫ້ໄປຊອກຫາກຸມມານນ້ອຍຢູ່ໃນຮາງຫຍ້າ, ເພິ່ນກໍໄດ້ບອກຂ່າວສານກ່ຽວກັບກຸມມານນ້ອຍນຳອີກ. ມັນແມ່ນຂ່າວສານແຫ່ງຄວາມຫວັງ—ວ່າກຸມມານນ້ອຍຜູ້ນີ້ໄດ້ມາສູ່ໂລກເພື່ອບັນລຸພາລະກິດທີ່ສັກສິດ. ພວກຜູ້ລ້ຽງແກະໄດ້ “ເລົ່າເລື່ອງ … ແລະ ທຸກຄົນທີ່ໄດ້ຟັງພວກຜູ້ລ້ຽງແກະເລົ່າ ຕ່າງກໍປະຫລາດໃຈຕໍ່ສິ່ງທີ່ພວກຜູ້ລ້ຽງແກະໄດ້ເລົ່ານັ້ນ. ຝ່າຍມາຣີກໍຈົດຈຳເລື່ອງເຫລົ່ານີ້ທັງໝົດໄວ້, ແລະ ຄິດຮ່ຳເພິງຢູ່ໃນໃຈ” (ລູກາ 2:17–19). ບາງທີມັນຄົງເປັນສິ່ງດີທີ່ຈະເຮັດຕາມຕົວຢ່າງຂອງນາງມາຣີໃນຍາມຄຣິດສະມາດນີ້: ຄິດຮ່ຳເພິງໃນໃຈເຖິງສິ່ງທີ່ທ່ານໄດ້ຮຽນຮູ້ກ່ຽວກັບພຣະຜູ້ຊ່ວຍໃຫ້ລອດໃນປີນີ້. ພຣະອົງໄດ້ບັນລຸພາລະກິດແຫ່ງການໄຖ່ຂອງພຣະອົງ ໃນເລື່ອງລາວທີ່ທ່ານໄດ້ອ່ານແນວໃດ? ແລະ ສຳຄັນກວ່ານັ້ນ, ພາລະກິດຂອງພຣະອົງໄດ້ປ່ຽນຊີວິດຂອງທ່ານແນວໃດ? ແລ້ວທ່ານອາດຮູ້ສຶກໄດ້ຮັບການດົນໃຈໃຫ້ເຮັດຕາມຕົວຢ່າງຂອງພວກຜູ້ລ້ຽງແກະ: ທ່ານຈະ “ເລົ່າເລື່ອງ” ວ່າພຣະເຢຊູຄຣິດໄດ້ເຮັດສິ່ງໃດເພື່ອທ່ານ?

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມັດທາຍ 1:18–25; 2:1–12; ລູກາ 1:26–38; 2:1–20

ພຣະເຢຊູຄຣິດຖ່ອມຕົວຫລາຍທີ່ໄດ້ມາກຳເນີດທ່າມກາງເຮົາຢູ່ເທິງແຜ່ນດິນໂລກ.

ເຖິງແມ່ນທ່ານໄດ້ອ່ານ ຫລື ໄດ້ຍິນເລື່ອງລາວເຖິງການກຳເນີດຂອງພຣະເຢຊູຄຣິດຫລາຍໆເທື່ອ, ແຕ່ການສຶກສາກ່ຽວກັບເລື່ອງລາວຂອງພຣະອົງໃນເທື່ອນີ້ ພ້ອມດ້ວຍການພິຈາລະນາດັ່ງນີ້: “ເທດສະການຄຣິດສະມາດບໍ່ພຽງແຕ່ເປັນການສະຫລອງ ວິທີ ທີ່ພຣະເຢຊູໄດ້ມາສູ່ໂລກເທົ່ານັ້ນ ແຕ່ຍັງເປັນການຮັບຮູ້ວ່າ ພຣະອົງ ເປັນໃຜນຳອີກ—ເປັນພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ ພຣະເຢຊູຄຣິດ—ແລະ ວ່າ ເປັນຫຍັງ ພຣະອົງຈຶ່ງມາສູ່ໂລກນີ້” (ຄະເລກ ຊີ ຄຣິສເຕັນເຊັນ, “ເລື່ອງລາວທັງໝົດກ່ຽວກັບຄຣິດສະມາດ” [ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ, ວັນທີ 4 ເດືອນທັນວາ, 2016], broadcasts.ChurchofJesusChrist.org).

ທ່ານຮູ້ຈັກສິ່ງໃດແດ່ກ່ຽວກັບພຣະເຢຊູຄຣິດວ່າເປັນໃຜ ກ່ອນພຣະອົງໄດ້ມາກຳເນີດ? (ເບິ່ງ, ສຳລັບຕົວຢ່າງ, ໂຢຮັນ 17:5; ໂມໄຊຢາ 3:5; ຄຳສອນ ແລະ ພັນທະສັນຍາ 76:13–14, 20–24; ໂມເຊ 4:2). ຄວາມຮູ້ນີ້ມີຜົນກະທົບຕໍ່ວິທີທີ່ທ່ານຮູ້ສຶກ ເມື່ອທ່ານອ່ານກ່ຽວກັບການກຳເນີດຂອງພຣະອົງແນວໃດ?

ທ່ານຮູ້ຈັກຫຍັງແດ່ກ່ຽວກັບວ່າ ເປັນຫຍັງພຣະເຢຊູຄຣິດຈຶ່ງສະເດັດມາສູ່ໂລກ? (ເບິ່ງ, ສຳລັບຕົວຢ່າງ, ລູກາ 4:16–21; ໂຢຮັນ 3:16–17; 3 ນີໄຟ 27:13–16; ຄຳສອນ ແລະ ພັນທະສັນຍາ 20:20–28). ຄວາມຮູ້ນີ້ມີຜົນກະທົບຕໍ່ວິທີທີ່ທ່ານຮູ້ສຶກກ່ຽວກັບພຣະຜູ້ຊ່ວຍໃຫ້ລອດແນວໃດ? ຄວາມຮູ້ນີ້ສາມາດມີຜົນກະທົບຕໍ່ວິທີທີ່ທ່ານດຳລົງຊີວິດແນວໃດ?

ເບິ່ງ 2 ໂກຣິນໂທ 8:9; ເຮັບເຣີ 2:7–18; 1 ນີໄຟ 11:13–33; ແອວມາ 7:10–13; “The Nativity” (ວິດີໂອ), ChurchofJesusChrist.org ນຳອີກ.

1 ໂກຣິນໂທ 15:21–26; ໂກໂລຊາຍ 1:12–22; 1 ເປໂຕ 2:21–25

ພຣະເຢຊູຄຣິດໄດ້ບັນລຸພາລະກິດຂອງພຣະອົງ ແລະ ໄດ້ເຮັດໃຫ້ມັນເປັນໄປໄດ້ສຳລັບເຮົາທີ່ຈະໄດ້ຮັບຊີວິດນິລັນດອນ.

ເຖິງແມ່ນວ່າເລື່ອງລາວການກຳເນີດຂອງພຣະຄຣິດເຕັມໄປດ້ວຍເຫດການທີ່ໜ້າອັດສະຈັນ, ແຕ່ການກຳເນີດຂອງພຣະອົງຄົງຈະເປັນພຽງການເກີດຂອງບຸກຄົນໜຶ່ງເທົ່ານັ້ນ ຖ້າຫາກບໍ່ແມ່ນຍ້ອນວຽກງານອັນຍິ່ງໃຫຍ່ທີ່ພຣະອົງໄດ້ເຮັດສຳເລັດໃນພາຍຫລັງ ໃນພຣະຊົນຊີບຂອງພຣະອົງ. ດັ່ງທີ່ປະທານກໍດອນ ບີ ຮິງລີ ໄດ້ກ່າວວ່າ, “ກຸມມານນ້ອຍເຢຊູແຫ່ງເບັດເລເຮັມຈະເປັນພຽງແຕ່ແອນ້ອຍຄົນໜຶ່ງເທົ່ານັ້ນ ຖ້າປາດສະຈາກພຣະຄຣິດຜູ້ໄຖ່ແຫ່ງເຄັດເຊມາເນ ແລະ ຄາວາຣີ, ແລະ ຄວາມຈິງອັນເປັນໄຊຊະນະຂອງການຟື້ນຄືນພຣະຊົນ” (“The Wondrous and True Story of Christmas,” Ensign, Dec. 2000, 5).

Gethsemane [ເຄັດເຊມາເນ], ໂດຍ ເຈ ເຄີກ ຣິເຈີດສ໌

ຫລັກຖານຂອງພາລະກິດອັນສູງສົ່ງຂອງພຣະຜູ້ຊ່ວຍໃຫ້ລອດ ແລະ ຄວາມຮັກທີ່ມີພະລັງຂອງພຣະອົງສຳລັບຄົນອື່ນ ມີຢູ່ທົ່ວພຣະຄຳພີໃໝ່. ຂໍ້ພຣະຄຳພີໃດ ຫລື ເລື່ອງລາວໃດທີ່ມາສູ່ຈິດໃຈທ່ານ? ທ່ານອາດກັບຄືນໄປເບິ່ງແຫລ່ງນີ້ ຫລື ປຶ້ມບັນທຶກການສຶກສາຂອງທ່ານ ແລະ ທົບທວນຄວາມປະທັບໃຈບາງຢ່າງ ທີ່ທ່ານໄດ້ບັນທຶກໄວ້. ທ່ານກໍສາມາດອ່ານ 1 ໂກຣິນໂທ 15:21–26; ໂກໂລຊາຍ 1:12–22; 1 ເປໂຕ 2:21–25 ນຳອີກ ແລະ ໄຕ່ຕອງວ່າ ພຣະຜູ້ຊ່ວຍໃຫ້ລອດ ແລະ ວຽກງານຂອງພຣະອົງເປັນພອນໃຫ້ແກ່ຊີວິດຂອງທ່ານແນວໃດ. ທ່ານຮູ້ສຶກຖືກດົນໃຈໃຫ້ປ່ຽນແປງສິ່ງໃດ ໃນຊີວິດຂອງທ່ານ? ທ່ານຈະເຂົ້າເຖິງອຳນາດຂອງພຣະຜູ້ຊ່ວຍໃຫ້ລອດໄດ້ແນວໃດ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 1:18–25; 2:1–12; ລູກາ 1:26–38; 2:1–20.ທ່ານຈະສາມາດສະເຫລີມສະຫລອງການກຳເນີດຂອງພຣະເຢຊູຄຣິດກັບຄອບຄົວຂອງທ່ານແນວໃດ? ຕໍ່ໄປນີ້ແມ່ນແນວຄິດສອງສາມຢ່າງ, ຫລື ທ່ານສາມາດຄິດເອົາເອງກໍໄດ້:

ອ່ານ ຫລື ສະແດງຕາມເລື່ອງລາວການກຳເນີດບາງຕອນນຳກັນ.
ເບິ່ງວິດີໂອ “The Christ Child” (ChurchofJesusChrist.org).
ຊອກຫາແຫລ່ງຂໍ້ມູນໃນ “ພຣະເຢຊູຄຣິດ” ຈາກຫ້ອງສະໝຸດພຣະກິດຕິຄຸນ, ໂດຍສະເພາະ ພາກຫົວຂໍ້ “ການກຳເນີດຂອງພຣະອົງ (ຄຣິດສະມາດ).”
ເບິ່ງລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ (broadcasts.ChurchofJesusChrist.org).
ຮ້ອງເພງຄຣິດສະມາດ ຈາກປຶ້ມເພງສວດນຳກັນ, ຫລື ເລືອກເພື່ອນບ້ານ ຫລື ໝູ່ເພື່ອນທີ່ຈະໄປແວ່ຢາມ ແລະ ຮ້ອງເພງໃຫ້ເຂົາເຈົ້າຟັງ (ເບິ່ງ Hymns, ເລກທີ 201–14).
ເຮັດການຮັບໃຊ້.
ຂໍໃຫ້ສະມາຊິກໃນຄອບຄົວຊອກຫາລາຍລະອຽດກ່ຽວກັບເລື່ອງລາວການກຳເນີດ ທີ່ຊ່ວຍໃຫ້ເຂົາເຈົ້າມີແນວຄິດທີ່ຈະເລືອກເຄື່ອງປະດັບ ຫລື ການຕົກແຕ່ງທີ່ເຕືອນໃຈເຂົາເຈົ້າເຖິງພຣະເຢຊູຄຣິດ.

1 ໂກຣິນໂທ 15:21–26; ໂກໂລຊາຍ 1:12–22; 1 ເປໂຕ 2:21–25.ເປັນຫຍັງເຮົາຈຶ່ງກະຕັນຍູທີ່ພຣະເຢຊູຄຣິດໄດ້ມາກຳເນີດ? ຂອງປະທານຢ່າງໃດແດ່ທີ່ພຣະອົງໄດ້ມອບໃຫ້ເຮົາ? ເຮົາຈະສາມາດສະແດງຄວາມຮູ້ບຸນຄຸນຕໍ່ພຣະອົງໄດ້ແນວໃດ? ຄອບຄົວຂອງທ່ານສາມາດຮ້ອງເພງທີ່ສິດສອນກ່ຽວກັບພາລະກິດຂອງພຣະອົງ, ດັ່ງເຊັ່ນ “ພຣະຜູ້ຊ່ວຍດ້ວຍຄວາມຖ່ອມ” (ເພງສວດ ແລະ ເພງຂອງເດັກນ້ອຍ, 28).

“ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ.”ຖ້າຫາກທ່ານຢາກຊ່ວຍຄອບຄົວຂອງທ່ານໃຫ້ສຸມໃຈໃສ່ພຣະຜູ້ຊ່ວຍໃຫ້ລອດໃນຊ່ວງບຸນຄຣິດສະມາດ, ບາງທີພວກທ່ານສາມາດໃຊ້ເວລາອ່ານ ຫລື ສຶກສາ “ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ” (ChurchofJesusChrist.org) ນຳກັນ. ບາງທີພວກທ່ານສາມາດທ່ອງຈຳຂໍ້ພຣະຄຳພີຈາກ “ພຣະຄຣິດທີ່ຊົງພຣະຊົນ” ຫລື ຄຳອະທິບາຍກ່ຽວກັບພຣະຊົນຊີບຂອງພຣະຜູ້ຊ່ວຍໃຫ້ລອດ ໃນພຣະຄຳພີໃໝ່ ທີ່ສະໜັບສະໜູນການປະກາດໃນນັ້ນ. ທ່ານກໍສາມາດເຊື້ອເຊີນສະມາຊິກໃນຄອບຄົວແຕ່ລະຄົນໃຫ້ຂຽນປະຈັກພະຍານຂອງຕົນເຖິງພຣະເຢຊູຄຣິດ ແລະ, ຖ້າໄດ້ຮັບການກະຕຸ້ນ, ໃຫ້ອ່ານມັນໃຫ້ຄອບຄົວຟັງ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ຄັ້ງໜຶ່ງເຢຊູເກີດຕ່ຳຕ້ອຍ,” ເພງສວດ ແລະ ເພງຂອງເດັກນ້ອຍ, 22.

ການປັບປຸງການສຶກສາສ່ວນຕົວ

ຊອກຫາພຣະເຢຊູຄຣິດ. ພຣະຄຳພີສິດສອນເຮົາວ່າ ທຸກສິ່ງເປັນພະຍານເຖິງພຣະເຢຊູຄຣິດ (ເບິ່ງ ໂມເຊ 6:62–63), ສະນັ້ນເຮົາຄວນສະແຫວງຫາພຣະອົງໃນທຸກສິ່ງ. ຂະນະທີ່ທ່ານອ່ານພຣະຄຳພີ, ໃຫ້ຄິດທີ່ຈະໝາຍເຫດ ຫລື ໝາຍຂໍ້ທີ່ສິດສອນທ່ານກ່ຽວກັບພຣະອົງ. ໃຫ້ໃຊ້ເວລາໃນຊ່ວງໄລຍະກ່ອນເຖິງວັນຄຣິດສະມາດ ເພື່ອຊອກຫາສິ່ງຕ່າງໆທີ່ຢູ່ອ້ອມຮອບທ່ານ ທີ່ເປັນພະຍານເຖິງພຣະເຢຊູຄຣິດ.