“ວັນທີ 11–17 ເດືອນທັນວາ. ພຣະນິມິດ 6–14: ‘ພວກເຂົາເຫລົ່ານັ້ນໄດ້ໄຊຊະນະ … ໂດຍໂລຫິດຂອງພຣະເມສານ້ອຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 11–17 ເດືອນທັນວາ. ພຣະນິມິດ 6–14,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ພຣະເຢຊູກຳລັງຢືນຢູ່ທ່າມກາງໝູ່ດວງດາວ

ສິລະປະປະກອບໂດຍ ແອຣິກ ຈອນສັນ: The Grand Council [ສະພາມະຫາສານ], ໂດຍ ຣໍເບີດ ທີ ແບແຣັດ; ໝູ່ດວງດາວ ໄດ້ຮັບອະນຸຍາດຈາກ European Space Agency [ອົງການອາວະກາດເອີຣົບ]

ວັນທີ 11–17 ເດືອນທັນວາ

ພຣະນິມິດ 6–14

“ພວກເຂົາເຫລົ່ານັ້ນໄດ້ໄຊຊະນະ … ໂດຍໂລຫິດຂອງພຣະເມສານ້ອຍ”

ປະທານບອຍ ເຄ ແພ໊ກເກີ ໄດ້ແນະນຳວ່າ: “ຖ້າຫາກວ່າພາສາຂອງພຣະຄຳພີເບິ່ງຄືວ່າແປກໆສຳລັບທ່ານໃນຕອນຕົ້ນ, ໃຫ້ອ່ານຕໍ່ໄປ. ອີກບໍ່ດົນທ່ານກໍຈະຮັບຮູ້ກັບຄວາມສວຍງາມ ແລະ ອຳນາດ ທີ່ພົບເຫັນຢູ່ໃນພຣະຄຳເຫລົ່ານັ້ນ” (“The Key to Spiritual Protection,” Liahona, Nov. 2013, 27).

ບັນທຶກຄວາມປະທັບໃຈຂອງທ່ານ

ໃຫ້ວາດພາບເຫັນແມ່ຍິງຄົນໜຶ່ງ “ມີທ້ອງ, ແລະ ຮ້ອງຄາງເຈັບປວດຢູ່ ກຳລັງຈະເກີດລູກ.” ບັດນີ້ໃຫ້ວາດພາບເຫັນ “ພະຍານາກໃຫຍ່ສີແດງໂຕໜຶ່ງ, ມີເຈັດຫົວສິບເຂົາ” ບິນເຊີ່ນຢູ່ເທິງຫົວແມ່ຍິງຄົນນັ້ນ, ຕັ້ງໃຈທີ່ “ຈະກິນລູກນັ້ນເມື່ອເກີດແລ້ວ” (ພຣະນິມິດ 12:2–4). ເພື່ອທີ່ຈະເຂົ້າໃຈຂໍ້ເຫລົ່ານີ້ໃນພາບນິມິດຂອງໂຢຮັນ, ໃຫ້ຈື່ຈຳວ່າພາບເຫລົ່ານີ້ເປັນຕົວແທນໃຫ້ແກ່ສາດສະໜາຈັກ ແລະ ອານາຈັກຂອງພຣະເຈົ້າ ແລະ ໄພອັນຕະລາຍທີ່ສາດສະໜາຈັກ ແລະ ອານາຈັກຈະປະເຊີນ. ສຳລັບໄພ່ພົນຜູ້ໄດ້ປະເຊີນກັບການຂົ່ມເຫັງຢ່າງໜັກໃນສະໄໝຂອງໂຢຮັນ, ການເອົາຊະນະຄວາມຊົ່ວຮ້າຍອາດເບິ່ງຄືວ່າເປັນໄປບໍ່ໄດ້. ໄຊຊະນະນີ້ກໍຍາກທີ່ຈະບອກລ່ວງໜ້າໄດ້ໃນສະໄໝຂອງເຮົາຄືກັນ, ເມື່ອຜູ້ປໍລະປັກ “ສູ້ຮົບກັບບັນດາໄພ່ພົນ” ແລະ ມີ “ອຳນາດເໜືອທຸກຕະກຸນ … ທຸກພາສາ, ແລະ ທຸກປະເທດ” (ພຣະນິມິດ 13:7). ແຕ່ໃນທີ່ສຸດການເປີດເຜີຍທີ່ຮຸ່ງໂລດຂອງໂຢຮັນໄດ້ສະແດງໃຫ້ເຫັນຢ່າງສະຫງ່າລາສີວ່າ ຄວາມດີຈະໄຊຊະນະຄວາມຊົ່ວຮ້າຍ. ບາບີໂລນຈະພັງທະລາຍ. ແລະ ໄພ່ພົນຈະອອກມາ “ຜ່ານການຖືກຂົ່ມເຫັງ” ດ້ວຍເສື້ອລ່າມທີ່ຂາວສະອາດ—ບໍ່ແມ່ນຍ້ອນວ່າ ເສື້ອລ່າມຂອງພວກເຂົາບໍ່ເຄີຍມີຮອຍດ່າງພ້ອຍ ແຕ່ຍ້ອນວ່າໄພ່ພົນຈະ “ຊຳລະເສື້ອລ່າມຂອງພວກເຂົາໃຫ້ສະອາດດ້ວຍເລືອດຂອງພຣະເມສານ້ອຍ” (ພຣະນິມິດ 7:14).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ພຣະນິມິດ 6–11

ໂຢຮັນໄດ້ເຫັນເຫດການຫລາຍຢ່າງໃນປະຫວັດສາດຂອງແຜ່ນດິນໂລກ, ໂດຍສະເພາະຜູ້ທີ່ເປັນໄພ່ພົນຍຸກສຸດທ້າຍ.

ໃນບົດເຫລົ່ານີ້ ທ່ານຈະອ່ານກ່ຽວກັບໜັງສືມ້ວນໜຶ່ງທີ່ມີຕາປະທັບໄວ້ເຈັດດວງ. ຖ້າຫາກທ່ານສົງໄສວ່າ ມັນໝາຍຄວາມວ່າແນວໃດ, ທ່ານກໍບໍ່ແມ່ນຄົນດຽວ. ສາດສະດາໂຈເຊັບ ສະມິດ ກໍສົງໄສຄືກັນ. ພຣະຜູ້ເປັນເຈົ້າໄດ້ເປີດເຜີຍຕໍ່ໂຈເຊັບວ່າ ໜັງສືມ້ວນນີ້ ແລະ ຕາປະທັບເຈັດດວງຂອງມັນ ເປັນຕົວແທນໃຫ້ແກ່ເລື່ອງລາວຂອງການ “ເປັນຢູ່ທາງຝ່າຍໂລກ” ຂອງແຜ່ນດິນໂລກ, ພ້ອມດ້ວຍຕາປະທັບ ຊຶ່ງແຕ່ລະດວງເປັນຕົວແທນໃຫ້ໜຶ່ງພັນປີ (ເບິ່ງ ຄຳສອນ ແລະ ພັນທະສັນຍາ 77:6–7). ທ່ານອາດສົນໃຈທີ່ຈະຮູ້ວ່າ ເຫດການຂອງຕາປະທັບສີ່ດວງ ຖືກສະຫລຸບຢູ່ໃນພາບນິມິດຂອງໂຢຮັນ ໃນແປດຂໍ້ເທົ່ານັ້ນ (ພຣະນິມິດ 6:1–8). ສາມຂໍ້ຕໍ່ໄປບັນຍາຍກ່ຽວກັບຕາປະທັບດວງທີຫ້າ (ຂໍ້ທີ 9–11). ສ່ວນທີ່ເຫລືອຂອງພຣະທຳ ພຣະນິມິດ ແມ່ນກ່ຽວກັບເຫດການຂອງຕາປະທັບສອງດວງສຸດທ້າຍ. ໃນອີກຄຳໜຶ່ງ, ຈຸດສຸມຕົ້ນຕໍໃນພາບນິມິດຂອງໂຢຮັນ ແມ່ນກ່ຽວກັບຍຸກສຸດທ້າຍ—ສະໄໝຂອງເຮົາ. ຂະນະທີ່ທ່ານອ່ານ, ໃຫ້ໄຕ່ຕອງວ່າເປັນຫຍັງມັນຈຶ່ງມີຄ່າທີ່ຈະຮູ້ເຖິງສິ່ງທີ່ໂຢຮັນໄດ້ຂຽນກ່ຽວກັບຍຸກສຸດທ້າຍ.

ຂະນະທີ່ທ່ານອ່ານກ່ຽວກັບເຫດການທີ່ໂຢຮັນໄດ້ທຳນາຍ, ໃຫ້ພິຈາລະນາຄຳແນະນຳ ແລະ ຄຳຖາມດັ່ງຕໍ່ໄປນີ້:

ໃຫ້ອ່ານ ພຣະນິມິດ 7 ດ້ວຍການພິຈາລະນາກ່ຽວກັບການເຕົ້າໂຮມອິດສະຣາເອນ. ທ່ານມີຄວາມຄິດໃດແດ່ກ່ຽວກັບວຽກງານນີ້? (ເບິ່ງ ຄຳສອນ ແລະ ພັນທະສັນຍາ 77:8–11 ນຳອີກ). ທ່ານຮຽນຮູ້ຫຍັງແດ່ຈາກ ຂໍ້ທີ 13–17 ກ່ຽວກັບພຣະເຢຊູຄຣິດ ແລະ ຜູ້ທີ່ມາຫາພຣະອົງ?
ບົດທີ 8; 9; ແລະ 11 ສິດສອນທ່ານຫຍັງແດ່ກ່ຽວກັບເຫດການຂອງຍຸກສຸດທ້າຍ? (ເບິ່ງ ຄຳສອນ ແລະ ພັນທະສັນຍາ 77:12–13, 15 ນຳອີກ). ເຮົາຈະກຽມພ້ອມທາງວິນຍານສຳລັບເຫດການເຫລົ່ານີ້ແນວໃດ?
ພຣະນິມິດ 10 ບອກເຖິງໜັງສືມ້ວນໜຶ່ງທີ່ທູດອົງໜຶ່ງໄດ້ມອບໃຫ້ແກ່ໂຢຮັນ ແລະ ບັນຊາໃຫ້ເພິ່ນກິນມັນ. ມັນເປັນສັນຍາລັກໃຫ້ສິ່ງໃດ? (ເບິ່ງ ຄຳສອນ ແລະ ພັນທະສັນຍາ 77:14).

ພຣະນິມິດ 12–13

ສົງຄາມໃນສະຫວັນສືບຕໍ່ຢູ່ເທິງແຜ່ນດິນໂລກ.

ເຮົາບໍ່ຮູ້ຫຍັງຫລາຍກ່ຽວກັບສົງຄາມໃນສະຫວັນ, ແຕ່ມັນກໍຖືກບັນຍາຍໜ້ອຍໜຶ່ງຢ່າງແຈ່ມແຈ້ງຢູ່ໃນ ພຣະນິມິດ 12:7–11. ຂະນະທີ່ທ່ານອ່ານຂໍ້ເຫລົ່ານີ້, ໃຫ້ວາດພາບເຫັນຕົວເອງມີພາກສ່ວນໃນການຂັດແຍ້ງຢູ່ໃນໂລກກ່ອນເກີດ. ທ່ານຮຽນຮູ້ຫຍັງແດ່ກ່ຽວກັບວິທີທີ່ຊາຕານຖືກເອົາຊະນະ? (ເບິ່ງ ຂໍ້ທີ 11).

ສົງຄາມທີ່ໄດ້ເລີ່ມຕົ້ນໃນສະຫວັນສືບຕໍ່ຢູ່ເທິງແຜ່ນດິນໂລກ, ໂດຍທີ່ຊາຕານຍຶດໝັ້ນທີ່ຈະ “ຕໍ່ສູ້ກັບ [ຜູ້ທີ່] ຍຶດຖືຄຳພະຍານຝ່າຍພຣະເຢຊູຄຣິດ” (ພຣະນິມິດ 12:17). ທ່ານຮຽນຮູ້ຫຍັງແດ່ຈາກ ພຣະນິມິດ 13 ກ່ຽວກັບວິທີທີ່ມັນກຳລັງເຮັດສົງຄາມໃນປະຈຸບັນ? “ໂລຫິດຂອງພຣະເມສານ້ອຍ” ແລະ “ຄຳພະຍານຂອງ [ທ່ານ] ເອງ” (ພຣະນິມິດ 12:11) ສືບຕໍ່ຊ່ວຍເຮົາໃນສົງຄາມນີ້ແນວໃດ?

ເບິ່ງ 1 ນີໄຟ 14:12–14; ໂມໂຣໄນ 7:12–13; ໂມເຊ 4:1–4; ຄຳສອນ ແລະ ພັນທະສັນຍາ 29:36–37; Gospel Topics, “War in Heaven,” topics.ChurchofJesusChrist.org ນຳອີກ.

ພຣະນິມິດ 14:6–7

“ຂ້າພະເຈົ້າໄດ້ເຫັນ [ທູດອົງໜຶ່ງ] … ມີຂ່າວປະເສີດນິລັນດອນ.”

ຄຳທຳນາຍຂໍ້ໜຶ່ງທີ່ສຳເລັດຄົບຖ້ວນໃນຂໍ້ເຫລົ່ານີ້ໄດ້ເກີດຂຶ້ນເມື່ອໂມໂຣໄນໄດ້ມາປະກົດຕົວຕໍ່ໂຈເຊັບ ສະມິດ ແລະ ພາເພິ່ນໄປຫາແຜ່ນຈາລຶກ ທີ່ເພິ່ນໄດ້ແປ ແລະ ຈັດພິມເປັນພຣະຄຳພີມໍມອນ. ໜັງສືມ້ວນນີ້ບັນຈຸ “ຂ່າວປະເສີດນິລັນດອນ” ທີ່ເຮົາຖືກສັ່ງໃຫ້ສັ່ງສອນແກ່ “ທຸກປະເທດ, ທຸກຊົນເຜົ່າ, ທຸກພາສາ, ແລະ ທຸກຊົນຊາດ” (ພຣະນິມິດ 14:6).

ເພື່ອຮຽນຮູ້ກ່ຽວກັບທູດອົງອື່ນໆ ຜູ້ໄດ້ມີສ່ວນຮ່ວມໃນການຟື້ນຟູຂ່າວປະເສີດນິລັນດອນ, ໃຫ້ເບິ່ງ ຄຳສອນ ແລະ ພັນທະສັນຍາ 13; 27:5–13; 110:11–16; 128:20–21.

ເບິ່ງ “ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ: ການປະກາດຕໍ່ໂລກເນື່ອງໃນວາລະຄົບຮອບສອງຮ້ອຍປີ,” ChurchofJesusChrist.org ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ພຣະນິມິດ 7:9, 13–15.ຂໍ້ເຫລົ່ານີ້ສິດສອນເຮົາຫຍັງແດ່ກ່ຽວກັບວ່າ ເປັນຫຍັງເຮົາຈຶ່ງນຸ່ງເຄື່ອງສີຂາວສຳລັບການບັບຕິສະມາ ແລະ ພິທີການຢູ່ໃນພຣະວິຫານ?

ພຣະນິມິດ 7:14–17.ໃຫ້ຄິດທີ່ຈະເຊື້ອເຊີນສະມາຊິກໃນຄອບຄົວໃຫ້ແບ່ງປັນຄວາມຮູ້ສຶກຂອງເຂົາເຈົ້າກ່ຽວກັບຄຳສັນຍາຂອງພຣະຜູ້ເປັນເຈົ້າໃນຂໍ້ເຫລົ່ານີ້. ຄຳສັນຍາຂອງພຣະອົງສາມາດຊ່ວຍເຮົາໃນເວລາທີ່ເຮົາກຳລັງ “ຜ່ານການຖືກຂົ່ມເຫັງຢ່າງໜັກ” ໄດ້ແນວໃດ? (ຂໍ້ທີ 14).

ພຣະນິມິດ 12:7–11; 14:6.ສະມາຊິກບາງຄົນໃນຄອບຄົວອາດມັກແຕ້ມຮູບພາບນິມິດທີ່ບັນຍາຍຢູ່ໃນ ພຣະນິມິດ. ຍົກຕົວຢ່າງ, ການແຕ້ມຮູບອີງຕາມ ພຣະນິມິດ 12 ສາມາດນຳໄປສູ່ການສົນທະນາກ່ຽວກັບສົງຄາມໃນສະຫວັນໄດ້ (ເບິ່ງ ຂໍ້ທີ 7–11). ຮູບພາບອີງຕາມ ພຣະນິມິດ 14:6 ສາມາດນຳໄປສູ່ການສົນທະນາກ່ຽວກັບການຟື້ນຟູພຣະກິດຕິຄຸນ.

ຫລັງຈາກການອ່ານ ພຣະນິມິດ 14:6 ນຳກັນ, ໃຫ້ຄິດທີ່ຈະສະແດງຮູບພາບຂອງທູດໂມໂຣໄນ ແລະ ທູດອົງອື່ນໆ ຜູ້ໄດ້ຊ່ວຍຟື້ນຟູພຣະກິດຕິຄຸນໃນສະໄໝຂອງເຮົາ (ເບິ່ງ ຮູບພາບຢູ່ໃນທ້າຍໂຄງຮ່າງນີ້). ບາງທີສະມາຊິກໃນຄອບຄົວສາມາດປ່ຽນຜຽນກັນຈັບຮູບ ແລະ ແບ່ງປັນເຫດຜົນທີ່ເຂົາເຈົ້າກະຕັນຍູ ທີ່ບັນດາທູດໄດ້ມາ ໂດຍ “ມີຂ່າວປະເສີດນິລັນດອນ ນຳໄປປະກາດແກ່ [ເຮົາ].”

ພຣະນິມິດ 12:11.ວະລີທີ່ວ່າ “ຄຳພະຍານຂອງພວກເຂົາ” ໝາຍຄວາມວ່າແນວໃດ? ປະຈັກພະຍານຂອງເຮົາເຖິງພຣະເຢຊູຄຣິດຊ່ວຍເຮົາ ແລະ ຄົນອື່ນໆໃຫ້ເອົາຊະນະຊານຕານແນວໃດ?

ພຣະນິມິດ 13:11–14.ສະມາຊິກໃນຄອບຄົວຂອງທ່ານມີຄວາມຄິດແນວໃດກ່ຽວກັບສັດຮ້າຍທີ່ຫລອກລວງ? ເຮົາຈະຮູ້ຈັກ ແລະ ຫລີກລ້ຽງຈາກການຖືກຫລອກລວງ ທີ່ເຮົາເຫັນໃນໂລກທຸກວັນນີ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ເຮົາຈະໄປທີ່ພຣະອົງບັນຊາ,” ເພງສວດ ແລະ ເພງຂອງເດັກນ້ອຍ, 50.

ການປັບປຸງການສຶກສາສ່ວນຕົວ

ເອົາຕົວເຂົ້າຫາພຣະຄຳພີ. ປະທານຣະໂຊ ເອັມ ແນວສັນ ໄດ້ສິດສອນວ່າ, “ການເຂົ້າຫາພຣະຄຳຂອງພຣະເຈົ້າທຸກວັນ ເປັນສິ່ງຈຳເປັນຕໍ່ການຢູ່ລອດທາງຈິດວິນຍານ, ໂດຍສະເພາະໃນວັນເວລາທີ່ຫຍຸ້ງຍາກຫລາຍຂຶ້ນເລື້ອຍໆເຫລົ່ານີ້” (“Hear Him,” Liahona, May 2020, 89). “ການເຂົ້າຫາພຣະຄຳຂອງພຣະເຈົ້າ” ໝາຍຄວາມວ່າແນວໃດຕໍ່ທ່ານ?