“ວັນທີ 13–19 ເດືອນພະຈິກ. ຢາໂກໂບ: ‘ຢ່າພຽງແຕ່ຟັງເທົ່ານັ້ນ, ແຕ່ຈົ່ງປະຕິບັດຕາມພຣະທຳ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 13–19 ເດືອນພະຈິກ. ຢາໂກໂບ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ວັນທີ 13–19 ເດືອນພະຈິກ

ຢາໂກໂບ

“ຢ່າພຽງແຕ່ຟັງເທົ່ານັ້ນ, ແຕ່ຈົ່ງປະຕິບັດຕາມພຣະທຳ”

ຂະນະທີ່ທ່ານອ່ານ ສານຂອງຢາໂກໂບ, ໃຫ້ເອົາໃຈໃສ່ກັບວະລີທີ່ເດັ່ນຕໍ່ທ່ານ. ທ່ານຖືກກະຕຸ້ນໃຫ້ເປັນ “ຜູ້ປະຕິບັດ” ຕາມຄຳເຫລົ່ານີ້ແນວໃດ? (ຢາໂກໂບ 1:22).

ບັນທຶກຄວາມປະທັບໃຈຂອງທ່ານ

ບາງເທື່ອພຽງພຣະຄຳພີຂໍ້ດຽວກໍສາມາດປ່ຽນໂລກໄດ້. ຢາໂກໂບ 1:5 ເບິ່ງຄືວ່າ ເປັນຄຳແນະນຳທີ່ລຽບງ່າຍ—ຖ້າຫາກທ່ານຕ້ອງການສະຕິປັນຍາ, ໃຫ້ທູນຂໍຈາກພຣະເຈົ້າ. ແຕ່ເມື່ອໂຈເຊັບ ສະມິດ ອາຍຸ 14 ປີ ໄດ້ອ່ານຂໍ້ນັ້ນ, “ຂໍ້ຄວາມປະກົດວ່າເຂົ້າເຖິງຄວາມຮູ້ສຶກທຸກຢ່າງຂອງຈິດໃຈ [ຂອງເພິ່ນ]” (ໂຈເຊັບ ສະມິດ—ປະຫວັດ 1:12). ດ້ວຍການດົນໃຈດັ່ງນັ້ນ, ໂຈເຊັບຈຶ່ງໄດ້ເຮັດຕາມຄຳຕັກເຕືອນຂອງຢາໂກໂບ ແລະ ສະແຫວງຫາສະຕິປັນຍາຈາກພຣະເຈົ້າໂດຍການອະທິຖານ. ແລະ ພຣະເຈົ້າກໍໄດ້ປະທານໃຫ້ຢ່າງເປັນອິດສະລະ, ໄດ້ປະທານການມາຢ້ຽມຢາມຂອງພຣະເຈົ້າທີ່ໜ້າອັດສະຈັນທີ່ສຸດ ໃນປະຫວັດສາດຂອງມະນຸດ—ຄືພາບທີ່ມາໃຫ້ເຫັນຄັ້ງທຳອິດ. ພາບນີ້ໄດ້ປ່ຽນວິຖີຊີວິດຂອງໂຈເຊັບ ແລະ ນຳພາໄປສູ່ການຟື້ນຟູສາດສະໜາຈັກຂອງພຣະເຢຊູຄຣິດ ຢູ່ເທິງແຜ່ນດິນໂລກ. ເຮົາທຸກຄົນໄດ້ຮັບພອນທຸກວັນນີ້ ເພາະໂຈເຊັບ ສະມິດ ໄດ້ອ່ານ ແລະ ກະທຳຕາມ ຢາໂກໂບ 1:5.

ທ່ານພົບເຫັນຫຍັງແດ່ ຂະນະທີ່ທ່ານສຶກສາ ສານຂອງຢາໂກໂບ? ບາງທີຂໍ້ໜຶ່ງ ຫລື ສອງຂໍ້ ຈະປ່ຽນຊີວິດຂອງທ່ານ ຫລື ຂອງບາງຄົນທີ່ທ່ານຮັກ. ທ່ານອາດພົບເຫັນການຊີ້ນຳ ຂະນະທີ່ທ່ານສະແຫວງຫາທີ່ຈະບັນລຸພາລະກິດໃນຊີວິດຂອງທ່ານ. ທ່ານອາດພົບເຫັນກຳລັງໃຈທີ່ຈະເວົ້າຈາອ່ອນໂຍນ ຫລື ມີຄວາມອົດທົນຫລາຍຂຶ້ນ. ທ່ານອາດຮູ້ສຶກໄດ້ຮັບການກະຕຸ້ນໃຫ້ ເຮັດໃຫ້ການກະທຳຂອງທ່ານສອດຄ່ອງກັບສັດທາຂອງທ່ານຫລາຍຂຶ້ນ. ບໍ່ວ່າສິ່ງໃດຈະເປັນແຮງດົນໃຈທ່ານກໍຕາມ, ແຕ່ຈົ່ງໃຫ້ຂໍ້ຄວາມເຫລົ່ານີ້ “ເຂົ້າເຖິງຄວາມຮູ້ສຶກທຸກຢ່າງຂອງຈິດໃຈ [ຂອງທ່ານ].” ແລະ ແລ້ວ, ເມື່ອທ່ານ “ນ້ອມໃຈຮັບເອົາພຣະທຳ,” ດັ່ງທີ່ຢາໂກໂບໄດ້ຂຽນ, ຈົ່ງເປັນຄົນປະຕິບັດຕາມພຣະທຳ, ບໍ່ແມ່ນພຽງແຕ່ເປັນຄົນຟັງເທົ່ານັ້ນ (ເບິ່ງ ຢາໂກໂບ 1:21–22).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຢາໂກໂບແມ່ນໃຜ?

ຜູ້ຄົນທົ່ວໄປເຊື່ອວ່າ ຜູ້ຂຽນ ສານຂອງຢາໂກໂບ ແມ່ນລູກຊາຍຄົນໜຶ່ງຂອງນາງມາຣີ, ມານດາຂອງພຣະເຢຊູຄຣິດ, ແລະ ສະນັ້ນ ກໍແມ່ນນ້ອງຊາຍນ້າຂອງພຣະຜູ້ຊ່ວຍໃຫ້ລອດ. ຢາໂກໂບຖືກກ່າວເຖິງຢູ່ໃນ ມັດທາຍ 13:55; ມາຣະໂກ 6:3; ກິດຈະການ 12:17; 15:13; 21:18; ແລະ ຄາລາເຕຍ 1:19; 2:9. ປະກົດວ່າ ຈາກຂໍ້ພຣະຄຳພີເຫລົ່ານີ້ ຢາໂກໂບເປັນຜູ້ນຳຄົນໜຶ່ງຂອງສາດສະໜາຈັກໃນນະຄອນເຢຣູຊາເລັມ ແລະ ຖືກເອີ້ນໃຫ້ເປັນອັກຄະສາວົກ (ເບິ່ງ ຄາລາເຕຍ 1:19).

ຢາໂກໂບ 1:2–4; 5:7–11

ຄວາມອົດທົນຢ່າງພາກພຽນນຳໄປສູ່ຄວາມສົມບູນແບບ.

ຫລັງຈາກການອ່ານ ຢາໂກໂບ 1:2–4; 5:7–11, ທ່ານຈະວ່າແມ່ນຫຍັງຄືຂ່າວສານຕົ້ນຕໍຂອງຢາໂກໂບກ່ຽວກັບຄວາມອົດທົນ? ມັນອາດເປັນປະໂຫຍດທີ່ຈະໄຕ່ຕອງສິ່ງທີ່ຄອບຄົວຂອງແອວເດີ ແຈຣາມີ ອາ ຢາກກີ ໄດ້ຮຽນຮູ້ຈາກຂໍ້ເຫລົ່ານີ້ (ເບິ່ງ “Let Patience Have Her Perfect Work, and Count It All Joy!,” Liahona, Nov. 2020, 99–101). ຄວາມ [ອົດທົນ] ທີ່ “ຍືນຍົງຕະຫລອດໄປ” ໝາຍຄວາມວ່າແນວໃດ? (ຢາໂກໂບ 1:4). ທ່ານຈະສາມາດສະແດງໃຫ້ພຣະຜູ້ເປັນເຈົ້າເຫັນວ່າ ທ່ານເຕັມໃຈທີ່ຈະອົດທົນແນວໃດ?

ຢາໂກໂບ 1:3–8, 21–25; 2:14–26; 4:17

ສັດທາຮຽກຮ້ອງການກະທຳ.

ທ່ານຈະຮູ້ໄດ້ແນວໃດວ່າທ່ານມີສັດທາໃນພຣະເຢຊູຄຣິດ? ວຽກງານຂອງທ່ານສະແດງສັດທາຂອງທ່ານໃນພຣະເຈົ້າແນວໃດ? ໃຫ້ຄິດກ່ຽວກັບຄຳຖາມເຫລົ່ານີ້ ຂະນະທີ່ທ່ານສຶກສາຄຳສອນຂອງຢາໂກໂບກ່ຽວກັບສັດທາ. ມັນອາດເປັນໜ້າສົນໃຈທີ່ຈະອ່ານກ່ຽວກັບອັບຣາຮາມ ແລະ ນາງຣາຮາບນຳອີກ, ສອງຕົວຢ່າງທີ່ຢາໂກໂບໄດ້ກ່າວເຖິງ (ເບິ່ງ ປະຖົມມະການ 22:1–12; ໂຢຊວຍ 2). ພວກເພິ່ນສະແດງໃຫ້ເຫັນວ່າ ພວກເພິ່ນມີສັດທາໃນພຣະເຈົ້າແນວໃດ?

ການອ່ານ ຢາໂກໂບ 1:3–8, 21–25; 2:14–26; 4:17 ອາດຊ່ວຍທ່ານໃຫ້ຄິດຫາວິທີທີ່ທ່ານສາມາດເປັນຄົນປະຕິບັດຕາມຖ້ອຍຄຳໄດ້ດີກວ່າເກົ່າ. ໃຫ້ບັນທຶກຄວາມປະທັບໃຈໃດໆທີ່ທ່ານໄດ້ຮັບ, ແລະ ວາງແຜນທີ່ຈະປະຕິບັດຕາມນັ້ນ.

ເບິ່ງ ແອວມາ 34:27–29; 3 ນີໄຟ 27:21 ນຳອີກ.

ອັບຮາຣາມກຳລັງອະທິຖານຢູ່ນອກຜ້າເຕັ້ນຂອງເພິ່ນ — “ອັບຣາຮາມເຊື່ອພຣະເຈົ້າ, ແລະ ຍ້ອນຄວາມເຊື່ອນັ້ນພຣະອົງຈຶ່ງຊົງຮັບວ່າ ເພິ່ນເປັນຄົນຊອບທຳ” (ຢາໂກໂບ 2:23). Abraham on the Plains of Mamre [ອັບຣາຮາມຢູ່ໃນທົ່ງພຽງມຳເຣ], ໂດຍ ກະແຣ້ນ ຣອມນີ ຄະລໍສັນ

ຢາໂກໂບ 1:26; 3:1–18

ຄຳເວົ້າທີ່ເຮົາກ່າວອອກມາສາມາດທຳຮ້າຍ ຫລື ເປັນພອນໃຫ້ແກ່ຄົນອື່ນໄດ້.

ໃນບັນດາພາບຈິນຕະນາການທີ່ຢາໂກໂບໄດ້ໃຊ້ຕະຫລອດທົ່ວສານຂອງເພິ່ນ, ຖ້ອຍຄຳທີ່ແຈ້ງຊັດທີ່ສຸດຂອງເພິ່ນບັນຈຸຢູ່ໃນຄຳແນະນຳຂອງເພິ່ນ ກ່ຽວກັບ ພາສາ. ໃຫ້ຄິດທີ່ຈະຂຽນວິທີທັງໝົດທີ່ຢາໂກໂບໄດ້ບັນຍາຍກ່ຽວກັບລີ້ນ ແລະ ປາກລົງໄວ້. ການປຽບທຽບ ຫລື ພາບແຕ່ລະຢ່າງ ບົ່ງບອກຫຍັງແດ່ກ່ຽວກັບຄຳທີ່ເຮົາເວົ້າ? ໃຫ້ຄິດກ່ຽວກັບບາງຢ່າງທີ່ທ່ານສາມາດເປັນພອນໃຫ້ແກ່ບາງຄົນ ດ້ວຍຄຳເວົ້າຂອງທ່ານ (ເບິ່ງ ຄຳສອນ ແລະ ພັນທະສັນຍາ 108:7).

ຢາໂກໂບ 2:1–9

ໃນຖານະສານຸສິດຂອງພຣະເຢຊູຄຣິດ, ເຮົາຄວນຮັກທຸກຄົນ, ບໍ່ວ່າສະພາບການຂອງເຂົາຈະເປັນແນວໃດກໍຕາມ.

ຢາໂກໂບໄດ້ເຕືອນໄພ່ພົນ ໂດຍສະເພາະບໍ່ໃຫ້ມັກຊອບຄົນຮັ່ງມີ ແລະ ກຽດຊັງຄົນຍາກຈົນ, ແຕ່ຄຳເຕືອນຂອງເພິ່ນສາມາດນຳໃຊ້ກັບຄວາມລຳອຽງ ຫລື ອະຄະຕິ ທີ່ເຮົາອາດມີຕໍ່ຄົນອື່ນໄດ້. ຂະນະທີ່ທ່ານສຶກສາ ຢາໂກໂບ 2:1–9, ດ້ວຍການອະທິຖານ, ໃຫ້ເບິ່ງໃຈຕົວເອງ ແລະ ເຊື່ອຟັງການກະຕຸ້ນຂອງພຣະວິນຍານບໍລິສຸດ. ມັນອາດເປັນປະໂຫຍດທີ່ຈະປ່ຽນວະລີຢູ່ໃນຂໍ້ເຫລົ່ານີ້, ດັ່ງເຊັ່ນ “ຄົນທຸກຈົນຜູ້ໜຶ່ງນຸ່ງເຄື່ອງເປື້ອນເປິ” (ຂໍ້ທີ 2), ກັບຄຳອື່ນ ຫລື ວະລີອື່ນ ທີ່ບັນຍາຍບາງຄົນທີ່ທ່ານອາດຄິດຢາກຕັດສິນແບບບໍ່ຍຸດຕິທຳ. ທ່ານຮູ້ສຶກວ່າມີສິ່ງໃດບໍທີ່ຕ້ອງປ່ຽນແປງ ກັບວິທີທີ່ທ່ານປະຕິບັດ ຫລື ຄິດກ່ຽວກັບຄົນອື່ນ?

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຢາໂກໂບ 1:5.ຫລັງຈາກການອ່ານ ຢາໂກໂບ 1:5, ຄອບຄົວຂອງທ່ານສາມາດສະຫລຸບເລື່ອງພາບທີ່ມາໃຫ້ເຫັນຄັ້ງທຳອິດ (ເບິ່ງ ໂຈເຊັບ ສະມິດ—ປະຫວັດ 1:8–20) ຫລື ເບິ່ງ ວິດີໂອ “Ask of God: Joseph Smith’s First Vision” (ChurchofJesusChrist.org). ເຊື້ອເຊີນສະມາຊິກໃນຄອບຄົວໃຫ້ແບ່ງປັນປະຈັກພະຍານຂອງເຂົາເຈົ້າກ່ຽວກັບສາດສະດາໂຈເຊັບ ສະມິດ ແລະ ກ່ຽວກັບປະສົບການຕອນທີ່ພຣະບິດາເທິງສະຫວັນໄດ້ຕອບຄຳອະທິຖານຂອງເຂົາເຈົ້າ.

6:35

ຢາໂກໂບ 1:26–27.ໃຫ້ຄິດທີ່ຈະເບິ່ງ ວິດີໂອ “True Christianity” (ChurchofJesusChrist.org). ແລ້ວໃຫ້ອ່ານຄຳອະທິບາຍຂອງຢາໂກໂບກ່ຽວກັບ “ທຳມະທີ່ບໍລິສຸດ” ໃນ ຢາໂກໂບ 1:26–27, ແລະ ສົນທະນາວິທີທີ່ຄອບຄົວຂອງທ່ານສາມາດຝຶກທຳມະທີ່ບໍລິສຸດກວ່າແນວໃດ.

ຢາໂກໂບ 3.ຢາໂກໂບ 3 ບັນລຸພາບຫລາກຫລາຍທີ່ສາມາດດົນໃຈບົດຮຽນດ້ວຍສິ່ງຂອງທີ່ໜ້າຊົງຈຳ ເພື່ອຊ່ວຍຄອບຄົວຂອງທ່ານໃຫ້ຈື່ຈຳທີ່ຈະເວົ້າຄຳອ່ອນໂຍນ. ຍົກຕົວຢ່າງ, ທ່ານສາມາດກໍ່ໄຟນຳກັນ ແລະ ເວົ້າລົມກ່ຽວກັບວ່າ ຄຳເລັກນ້ອຍ ແລະ ບໍ່ອ່ອນໂຍນ ສາມາດກໍ່ໃຫ້ເກີດບັນຫາໃຫຍ່ໄດ້ແນວໃດ (ເບິ່ງ ຂໍ້ທີ 5–6). ຫລື ທ່ານສາມາດເອົາອາຫານສົ້ມໃສ່ໄວ້ໃນພາຊະນະທີ່ໃຊ້ເກັບອາຫານຫວານ—ດັ່ງເຊັ່ນ ເອົານ້ຳໝາກນາວໃສ່ໄວ້ໃນແກ້ວທີ່ເຄີຍໃສ່ນ້ຳເຜິ້ງ. ສິ່ງນີ້ອາດນຳໄປສູ່ການສົນທະນາກ່ຽວກັບການໃຊ້ຂອງຫວານ ແລະ ການໃຊ້ຄຳທີ່ເຊີດຊູ (ເບິ່ງ ຂໍ້ທີ 9–14).

ຢາໂກໂບ 4:5–8.ເປັນຫຍັງເຮົາຈຶ່ງຄວນ “ເຂົ້າໃກ້ພຣະເຈົ້າ” (ຢາໂກໂບ 4:8) ເມື່ອເຮົາປະເຊີນກັບການລໍ້ລວງ?

ຢາໂກໂບ 5:14–16.ປະທານດາລິນ ເອັຈ ໂອກສ໌ ໄດ້ສິດສອນວ່າ “ພໍ່ແມ່ຄວນຊຸກຍູ້ເລື່ອງພອນຂອງຖານະປະໂລຫິດໃຫ້ຫລາຍກວ່າເກົ່າ ໃນຄອບຄົວ” (“The Powers of the Priesthood,” Liahona, May 2018, 67). ບາງທີການອ່ານ ຢາໂກໂບ 5:14–16 ແລະ ການແບ່ງປັນປະສົບການກ່ຽວກັບການໄດ້ຮັບພອນຂອງຖານະປະໂລຫິດ ສາມາດຊຸກຍູ້ສະມາຊິກໃນຄອບຄົວໃຫ້ທູນຂໍພອນ ເມື່ອເຂົາເຈົ້າເຈັບໄຂ້ ຫລື ຕ້ອງການຄວາມເຂັ້ມແຂງທາງວິນຍານ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງສວດແນະນຳ: “ເຮັດແຕ່ຄວາມດີ,” ເພງສວດ ແລະ ເພງຂອງເດັກນ້ອຍ, 38.

ການປັບປຸງການສຶກສາສ່ວນຕົວ

ກະທຳຕາມສິ່ງທີ່ທ່ານຮຽນຮູ້. ຂະນະທີ່ທ່ານສຶກສາ, ໃຫ້ເຮັດຕາມການກະຕຸ້ນຈາກພຣະວິນຍານກ່ຽວກັບວິທີທີ່ທ່ານສາມາດນຳໃຊ້ສິ່ງທີ່ທ່ານຮຽນຮູ້ກັບຊີວິດຂອງທ່ານ. ເຮັດຄຳໝັ້ນສັນຍາວ່າຈະເຮັດຕາມການກະຕຸ້ນເຫລົ່ານີ້ ແລະ ດຳລົງຊີວິດຕາມພຣະກິດຕິຄຸນໃຫ້ເຕັມທີ່ຫລາຍຂຶ້ນ. (ເບິ່ງ Teaching in the Savior’s Way, 35.)

ໂຈເຊັບ ສະມິດ ກຳລັງອ່ານພຣະຄຳພີ — ຄຳຕັກເຕືອນຂອງຢາໂກໂບເພື່ອໃຫ້ “ທູນຂໍຈາກພຣະເຈົ້າ” (ຢາໂກໂບ 1:5) ໄດ້ດົນໃຈໂຈເຊັບ ສະມິດ ໃຫ້ສະແຫວງຫາສະຕິປັນຍາຈາກພຣະເຈົ້າ. ຮູບພາບປະກອບໂດຍ ຄຣິສຕີນາ ສະມິດ.