« ការបង្រៀនដល់កុមារតូចៗ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ការបង្រៀនដល់កុមារតូចៗ » ចូរមកតាមខ្ញុំ—សម្រាប់បុគ្គលម្នាក់ៗ និង ក្រុមគ្រួសារ ៖ ឆ្នាំ ២០២៣

ការបង្រៀនដល់កុមារតូចៗ

ប្រសិនបើបងប្អូនមានកូនតូចៗនៅក្នុងគ្រួសាររបស់បងប្អូន ទាំងនេះគឺជាសកម្មភាពមួយចំនួនដែលអាចជួយពួកគេឲ្យរៀន ៖

ច្រៀង ។ ទំនុកតម្កើង និងចម្រៀងចេញមកពី សៀវភៅចម្រៀងកុមារ បង្រៀនអំពីគោលលទ្ធិយ៉ាងមានអានុភាព ។ សូមប្រើ លិបិក្រមប្រធានបទ នៅខាងក្រោយ សៀវភៅចម្រៀងកុមារ ដើម្បីរកមើលចម្រៀងដែលទាក់ទងនឹងគោលការណ៍ដំណឹងល្អដែលបងប្អូនកំពុងបង្រៀន ។ សូមជួយកូនៗរបស់បងប្អូនឲ្យភ្ជាប់សារលិខិតនៃចម្រៀងនោះទៅនឹងជីវិតរបស់ពួកគេ ។ ( សូមមើលផងដែរ « ការបញ្ចូលតន្រ្តីពិសិដ្ឋនៅក្នុងការរៀនសូត្រដំណឹងល្អរបស់បងប្អូន » នៅក្នុងធនធាននេះ ) ។
ស្ដាប់ ឬសម្ដែងរឿង ។ កុមារតូចៗចូលចិត្តរឿងនិទាន—ចេញមកពីព្រះគម្ពីរ ចេញមកពីជីវិតរបស់បងប្អូន ចេញមកពីប្រវត្តិសាស្ត្រសាសនាចក្រ ឬប្រវត្តិគ្រួសាររបស់បងប្អូន និងមកពី ទស្សនាវដ្តីសាសនាចក្រ ។ សូមស្វែងរកមើលនូវវិធីនានាដើម្បីឲ្យពួកគេចូលរួមនៅក្នុងការនិយាយប្រាប់រឿងនិទានទាំងឡាយ ។ ពួកគេអាចកាន់រូបភាព ឬវត្ថុអ្វីមួយ គូររូបភាពអំពីអ្វីដែលពួកគេស្ដាប់ឮ សម្ដែងរឿង ឬជួយនិទានរឿង ។ សូមជួយកូនៗរបស់បងប្អូនឲ្យស្គាល់សេចក្ដីពិតនៃដំណឹងល្អនៅក្នុងរឿងដែលបងប្អូនចែកចាយ ។
អានបទគម្ពីរ ។ កុមារតូចៗពុំអាចអានបានច្រើនទេ ប៉ុន្តែបងប្អូននៅតែអាចឲ្យពួកគេចូលរួមនៅក្នុងការរៀនសូត្រចេញមកពីបទគម្ពីរបានដដែល ។ បងប្អូនអាចចាំបាច់ត្រូវផ្ដោតទៅលើខគម្ពីរមួយ ឃ្លាគន្លឹះ ឬពាក្យគន្លឹះមួយ ។ កុមារថែមទាំងអាចទន្ទេញឃ្លាខ្លីៗចេញពីបទគម្ពីរទៀតផង ប្រសិនបើពួកគេនិយាយវាឡើងវិញពីរបីដង ។ នៅពេលពួកគេស្ដាប់ឮព្រះបន្ទូលរបស់ព្រះ នោះពួកគេនឹងទទួលអារម្មណ៍ពីព្រះវិញ្ញាណ ។
មើលទៅរូបភាព ឬមើលវីដេអូមួយ ។ នៅពេលបងប្អូនបង្ហាញដល់កូនៗរបស់បងប្អូននូវរូបភាព ឬវីដេអូមួយដែលទាក់ទងនឹងគោលការណ៍ដំណឹងល្អ ឬដំណើររឿងក្នុងបទគម្ពីរ សូមសួរពួកគេនូវសំណួរទាំងឡាយដែលជួយពួកគេឲ្យរៀនមកពីអ្វីដែលពួកគេកំពុងមើលនោះ ។ ឧទាហរណ៍ បងប្អូនអាចសួរថា « តើមានរឿងអ្វីកើតឡើងនៅក្នុងរូបភាព ឬវីដេអូនេះ ? តើរឿងនោះធ្វើឲ្យកូនមានអារម្មណ៍យ៉ាងណា ? កម្មវិធី Gospel Media នៅលើគេហទំព័រ GospelMedia.ChurchofJesusChrist.org និង children.ChurchofJesusChrist.org គឺជាកន្លែងដ៏ល្អដើម្បីរកមើលរូបភាព និងវីដេអូផ្សេងៗ ។
ច្នៃប្រឌិត ។ កុមារតូចៗអាចសង់ គូរ ឬផាត់ពណ៌អ្វីមួយដែលទាក់ទងនឹងរឿង ឬគោលការណ៍ដែលពួកគេកំពុងរៀននោះ ។
ចូលរួមក្នុងមេរៀនដែលប្រើវត្ថុ ។ មេរៀនដែលប្រើវត្ថុដ៏សាមញ្ញមួយ អាចជួយកូនៗរបស់បងប្អូនឲ្យយល់គោលការណ៍ដំណឹងល្អមួយដែលពិបាកយល់បាន ។ នៅពេលប្រើមេរៀនដែលប្រើវត្ថុ សូមរកវិធីដើម្បីឲ្យកូនៗរបស់បងប្អូនចូលរួម ។ ពួកគេនឹងរៀនបានកាន់តែច្រើនចេញមកពីបទពិសោធន៍ប្រាស្រ័យទាក់ទងគ្នា ជាជាងគ្រាន់តែមើលការបង្ហាញ ។
សម្ដែងរឿង ។ នៅពេលកុមារតូចៗដើរតួសម្តែងអំពីស្ថានភាពមួយ ដែលពួកគេប្រហែលជាជួបក្នុងជីវិតពិត នោះពួកគេនឹងអាចយល់បានកាន់តែច្បាស់អំពីរបៀបដែលគោលការណ៍នៃដំណឹងល្អមួយអាចអនុវត្តបាននៅក្នុងជីវិតរបស់ពួកគេ ។
ធ្វើសកម្មភាពសាឡើងវិញ ។ កុមារតូចៗអាចនឹងត្រូវការស្ដាប់អំពីគំនិតនានាឲ្យបានច្រើនដងដើម្បីយល់ពីគំនិតនោះ ។ សូមកុំខ្លាចនឹងនិយាយរឿង ឬធ្វើសកម្មភាពឡើងវិញឲ្យបានញឹកញាប់ឡើយ ។ ឧទាហរណ៍ បងប្អូនអាចចែកចាយដំណើររឿងក្នុងបទគម្ពីរមួយច្រើនដងតាមរបៀបផ្សេងៗគ្នា—ដោយអានចេញមកពីបទគម្ពីរ សង្ខេបតាមសម្ដីរបស់បងប្អូនផ្ទាល់ បង្ហាញវីដេអូ អនុញ្ញាតឲ្យកូនៗរបស់បងប្អូនជួយនិទានរឿង និងអញ្ជើញពួកគេឲ្យសម្ដែងរឿងជាដើម ។