« ការប្រើសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ការប្រើសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣
ការប្រើសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ
តើធនធាននេះសម្រាប់នរណា ?
ធនធាននេះគឺសម្រាប់បុគ្គលម្នាក់ៗ និងគ្រួសារទាំងអស់នៅក្នុងសាសនាចក្រ ។ វាត្រូវបានរចនាឡើងដើម្បីជួយបងប្អូនឲ្យរៀនដំណឹងល្អ—ទោះជារៀនដោយខ្លួនឯង ឬជាមួយក្រុមគ្រួសារក្ដី ។ ប្រសិនបើបងប្អូនពុំបានសិក្សាដំណឹងល្អជាទៀងទាត់កាលពីមុនៗមកទេ ធនធាននេះអាចជួយបងប្អូនឲ្យចាប់ផ្ដើមបាន ។ ប្រសិនបើបងប្អូនមានទម្លាប់ល្អក្នុងការសិក្សាដំណឹងល្អរួចហើយ នោះធនធាននេះអាចជួយបងប្អូនឲ្យមានបទពិសោធន៍កាន់តែមានអត្ថន័យ ។
តើខ្ញុំគួរតែប្រើបា្រស់ធនធាននេះយ៉ាងដូចម្តេច ?
សូមប្រើធនធាននេះតាមរបៀបដែលជាជំនួយដល់បងប្អូន ។ បងប្អូនអាចរកឃើញថា វាជាជំនួយក្នុងការណែនាំ ឬជាជំនួយបន្ថែមទៅលើការសិក្សាព្រះគម្ពីរផ្ទាល់ខ្លួន និងជាគ្រួសារ ។ បងប្អូនក៏អាចប្រើប្រាស់វាសម្រាប់រាត្រីជួបជុំក្រុមគ្រួសារផងដែរ ។ គម្រោងនេះមានគូសចំណាំគោលការណ៍សំខាន់ៗនៅក្នុងព្រះគម្ពីរសញ្ញាថ្មី យោបល់ចំពោះការសិក្សា និងសកម្មភាពសម្រាប់បុគ្គលម្នាក់ៗ និងក្រុមគ្រួសារ ហើយ ផ្ដល់ជាកន្លែងកត់ត្រាអំពីចំណាប់អារម្មណ៍របស់បងប្អូន ។
សៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ពុំមានបំណងដើម្បីជំនួស ឬប្រជែងនឹងការណ៍ល្អៗផ្សេងទៀតដែលបងប្អូនកំពុងធ្វើក្នុងការរៀនដំណឹងល្អនោះទេ ។ សូមធ្វើតាមការណែនាំរបស់ព្រះវិញ្ញាណ ដើម្បីកំណត់អំពីរបៀបសិក្សាព្រះបន្ទូលរបស់ព្រះដោយផ្ទាល់ខ្លួនរបស់បងប្អូន ។
តើធនធាននេះទាក់ទងនឹងអ្វីដែលបានកើតឡើងនៅក្នុងសាសនាចក្រយ៉ាងដូចម្ដេច ?
គម្រោងមេរៀននៅក្នុងធនធាននេះត្រូវបានរៀបចំឡើងស្របតាមកាលវិភាគអានប្រចាំសប្ដាហ៍ ។ ធនធាន ចូរមកតាមខ្ញុំ សម្រាប់ អង្គការបឋមសិក្សា សម្រាប់ សាលាថ្ងៃអាទិត្យ និងសម្រាប់ កូរ៉ុមបព្វជិតភាពអើរ៉ុន និងក្រុមយុវនារី ធ្វើតាមកាលវិភាគដូចគ្នានេះដែរ ។ ដើម្បីគាំទ្រដល់កិច្ចខិតខំរបស់បងប្អូនដើម្បីរៀនសូត្រ ហើយរស់នៅតាមដំណឹងល្អនៅក្នុងគេហដ្ឋាន គ្រូបង្រៀនរបស់បងប្អូននៅក្នុងសាសនាចក្រ នឹងផ្ដល់ឱកាសដល់បងប្អូនដើម្បីចែកចាយបទពិសោធន៍ គំនិត និងសំណួរអំពីវគ្គបទគម្ពីរ ដែលបងប្អូនកំពុងសិក្សានៅគេហដ្ឋាន ។
ដោយសារតែសាលាថ្ងៃអាទិត្យ ត្រូវបានបង្រៀនតែពីរដងក្នុងមួយខែ នោះគ្រូបង្រៀនសាលាថ្ងៃអាទិត្យ អាចជ្រើសរើសរំលង ឬដាក់បញ្ចូលគម្រោងមេរៀនជាមួយគ្នាដើម្បីឲ្យទាន់តាមកាលវិភាគប្រចាំសប្ដាហ៍ ។ ការណ៍នេះក៏អាចជារឿងចាំបាច់ផងដែរ ( សម្រាប់ទាំងសាលាថ្ងៃអាទិត្យ និងអង្គការបឋមសិក្សា ) នៅសប្ដាហ៍ដែលការប្រជុំធម្មតានៅក្នុងសាសនាចក្រពុំត្រូវបានធ្វើឡើង ដោយសារតែសន្និសីទស្ដេក ឬហេតុផលមួយណាផ្សេងទៀត ។ អំឡុងសប្ដាហ៍ទាំងនេះ បងប្អូនត្រូវបានអញ្ជើញឲ្យបន្ដសិក្សាព្រះគម្ពីរសញ្ញាថ្មីនៅផ្ទះ ។
តើខ្ញុំចាំបាច់ត្រូវធ្វើតាមកាលវិភាគឬ ?
កាលវិភាគនឹងជួយបងប្អូនឲ្យបញ្ចប់ការអានព្រះគម្ពីរសញ្ញាថ្មីនៅត្រឹមចុងឆ្នាំ ។ បន្ថែមពីលើនោះ ការធ្វើតាមកាលវិភាគដូចគ្នានឹងអ្នកដទៃទៀតអាចដឹកនាំឲ្យមានបទពិសោធន៍កាន់តែមានអត្ថន័យនៅឯគេហដ្ឋាន សាសនាចក្រ និងនៅកន្លែងផ្សេងទៀត ។ ប៉ុន្តែសូមកុំឲ្យមានអារម្មណ៍ថាត្រូវតែធ្វើតាមកាលវិភាគ ឬបង្ខំអានគ្រប់ខគម្ពីរនោះឡើយ កាលវិភាគគឺគ្រាន់តែជាការណែនាំមួយដើម្បីជួយបងប្អូនឲ្យកំណត់ល្បឿនអានរបស់ខ្លួនឯងប៉ុណ្ណោះ ។ រឿងសំខាន់គឺថា បងប្អូនកំពុងរៀនដំណឹងល្អដោយផ្ទាល់ខ្លួន និងជាគ្រួសារ ។