Koteya Bilenge Bana

Soki ozali na bilenge bana kati na libota na yo, oyo ezali mwa ndambo ya mateya oyo ekoki kosunga bango bayekola:

• Koyemba Nzembo mpe miziki uta na Chants pour les enfants ezali koteya malongi na nguya mpenza. Salela Bobakisi mpo na masolo na nsima ya Chants pour les enfants mpo na kozwa nzembo oyo etali mabongi ya nsango malamu oyo ozali koteya. Sunga bana na yo bakokisa maloba ya nzembo na bomoi na bango. (Tala lisusu “Kotisaka mpe Miziki ya Bule na Boyekoli na Yo Ya Nsango Malamu” na nzela oyo.)

• Boyoka to Bosala lisano ya lisolo. Bilenge bana balingaka masolo—uta na makomi, uta na bomoi na bino, uta na mambi ya kala ya Eklezia, mpe uta na bazulunale ya Eklezia. Luka ndenge ya kokotisa bango na kati ya lisolo. Bakoki kosimba bililingi to biloko, koyema bililingi ya oyo bazali koyoka, kosala lisano uta na lisolo, to kutu kosalisa bango kobeta lisolo. Sunga bana na yo bayaba bosolo ya nsango malamu kati na masolo bazali kokabola.

• Botanga makomi. Bilenge bana bakoki te kozala na makoki ya kotanga malamu mpenza, kasi okoki kosalisa bango na koyekolaka uta na makomi. Okoki kozala na mposa ya kotalela bobele molongo moko, esakola to liloba moko. Bana bakoki kutu kozala na makoki ya kokanga na moto maloba mokuse uta na makomi soki babandeli yango mwa ntango moke. Ntango bazali koyoka liloba ya Nzambe, bakoyoka Molimo.

• Botala elilingi to botala video moko. Ntango olakisi bana na yo elilingi to video etali mabongi ya nsango malamu to lisolo ya makomi, tuna bango mituna miye mikosunga bango bayekola uta na maye bazali komona. Ndakisa, okoki kotuna, “Nini ezali kosalema na kati ya elilingi to video oyo? Oyoki yango ndenge nini?” Aplikasio ya Etando ya Nsango Malamu, GospelMedia.ChurchofJesusChrist.org, mpe children.ChurchofJesusChrist.org ezali bisika malamu mpo na koluka bililingi mpe bavideo.

• Kela. Bana bakoki kotonga, koyema to kopakola langi na eloko moko ekokani na lisolo to libongi oyo bazali koyekola.

• Bosala elongo na mateya ya biloko. Liteya ya pete ya biloko ekoki kosalisa bana na yo basosola libongi ya nsango malamu oyo ezali mpasi mpo na kososola. Ntango osaleli mateya ya biloko, luka banzela otika bana na yo bazala kati ya lisano. Bakoyekola mingi uta na likambo oyo bazali kosala elongo na basusu koleka bobele kotalaka elakiseli moko.

• Lisano ya kokabola mikumba. Ntango bana bazali kosala lisano na kokabolaka mikumba ya likambo oyo bakoki kokutana na yango na bomoi ya solo, bazali na bososoli malamu koleka ya koyeba lolenge nini kosalela libongi ya nsango malamu na bomoi na bango.

• Bozongela masano. Bilenge bana bakoki kozala na mposa ya koyoka makanisi mbala na mbala mpo na kososola yango. Bobanga te na kozongela masolo to misala mbala na mbala. Ndakisa, bokoki kokabola lisolo ya makomi mbala na mbala na ndenge ebele—kotangaka uta na makomi, kolobaka na bokuse na maloba na binomei, kolakisaka video, kotikaka bana na yo basunga yo obeta lisolo, kobengisaka bango babeta lisolo, mpe bongo na bongo.

Libota ezali koyekola makomi