Pagbabalik-loob ang Ating Mithiin

Ang layunin ng lahat ng pag-aaral at pagtuturo ng ebanghelyo ay para palalimin ang ating pagbabalik-loob sa Ama sa Langit at kay Jesucristo at tulungan tayong maging lalong katulad Nila. Dahil dito, habang pinag-aaralan natin ang ebanghelyo, hindi lamang tayo naghahanap ng bagong impormasyon; nais nating maging isang “bagong nilalang” (2 Corinto 5:17). Ang ibig sabihin nito ay umaasa tayo na tutulungan tayo ng Ama sa Langit at ni Jesucristo na baguhin ang ating puso, pananaw, kilos, at likas na pagkatao mismo.

Ngunit ang uri ng pag-aaral ng ebanghelyo na nagpapalakas sa ating pananampalataya at humahantong sa himala ng pagbabalik-loob ay hindi nangyayari nang biglaan. Hindi lamang sa isang silid-aralan ito nangyayari kundi maging sa ating puso at tahanan. Nangangailangan ito ng palagian at araw-araw na pagsisikap na maunawaan at maipamuhay ang ebanghelyo. Ang pag-aaral ng ebanghelyo na humahantong sa tunay na pagbabalik-loob ay nangangailangan ng impluwensya ng Espiritu Santo.

Ang Espiritu Santo ang gumagabay sa atin tungo sa katotohanan at nagpapatunay sa katotohanang iyon (tingnan sa Juan 16:13). Nililiwanagan Niya ang ating isipan, pinasisigla ang ating pang-unawa, at inaantig ang ating puso sa paghahayag na mula sa Diyos, ang pinagmumulan ng lahat ng katotohanan. Pinapadalisay ng Espiritu Santo ang ating puso. Pinupukaw Niya sa atin ang hangaring mamuhay ayon sa katotohanan, at ibinubulong Niya sa atin ang mga paraan para magawa ito. Tunay ngang “ang Espiritu Santo … ang magtuturo sa [atin] ng lahat ng mga bagay” (Juan 14:26).

Dahil dito, sa mga pagsisikap nating ipamuhay, matutuhan, at ituro ang ebanghelyo, dapat muna nating hangarin una at higit sa lahat ang patnubay ng Espiritu. Ang mithiing ito ang dapat mangibabaw sa ating mga pagpili at gumabay sa ating mga iniisip at ikinikilos. Dapat nating hangarin ang anumang nag-aanyaya sa impluwensya ng Espiritu at iwaksi ang anumang nagtataboy sa impluwensyang iyon—sapagkat alam natin na kung magiging karapat-dapat tayo sa presensya ng Espiritu Santo, magiging karapat-dapat din tayong mamuhay sa presensya ng Ama sa Langit at ng Kanyang Anak na si Jesucristo.