Te mau mana’o e tāpe’a noa i roto i te ferurira’a

Te fafaura’a

I roto i te roara’a o te Faufa’a Tahito, e tai’o pinepine ’outou i te ta’o ra fafaura’a. I teie mahana, i te rahira’a o te taime, tē feruri nei tātou i te mau fafaura’a ’ei mau parau fafau mo’a ’e te Atua, i roto rā i te ao i mūta’a iho ra, ’ua riro ato’a te mau fafaura’a ’ei tuha’a faufa’a roa i roto i te mau aura’a ta’ata te tahi ’e te tahi. Nō tō rātou pārurura’a ’e tō rātou ora, ’ua tītauhia i te mau ta’ata ’ia ti’aturi i te tahi ’e te tahi, ’e ’ua riro te mau fafaura’a ’ei rāve’a nō te ha’apāpū i te reira ti’aturira’a.

Nō reira, i te paraparaura’a te Atua ia Noa, ia Aberahama, ’aore rā ia Mose nō ni’a i te mau fafaura’a, ’ua ani ’oia ia rātou ’ia tomo i roto i te hō’ē auta’atira’a nō te ti’aturira’a ’e ’ōna. Hō’ē o te mau hi’ora’a e ’ite-maita’i-hia a’e o te hō’ē fafaura’a i roto i te Faufa’a Tahito, ’o te hō’ē ïa fafaura’a tā te Atua i rave ’e ’o Aberahama ’e o Sara—’e i muri iho ’ua fa’a’āpīhia ’e tō rāua mau huā’ai ’o Isaaka ’e ’o Iakoba (tei parau-ato’a-hia o ’Īsera’ela). Tē parau pinepine nei tātou i te reira te fafaura’a a Aberahama, noa atu ē, i roto i te Faufa’a Tahito ’ua mātau-noa-hia « te fafaura’a ». E ’ite mai ’outou ē, te Faufa’a Tahito o te ’ā’amu tumu ïa o te mau ta’ata ’o tei fa’ariro ia rātou iho ’ei mau ta’ata mono faufa’a nō teie fafaura’a—te nūna’a o te fafaura’a.

Tē tāmau noa nei te fafaura’a a Aberahama i te riro ’ei mea faufa’a roa i teie mahana, nō te Feiā Mo’a i te mau Mahana Hope’a nei iho ā rā. Nō te aha ? Nō te mea e nūna’a nō te fafaura’a ato’a tātou, e huā’ai ’āfaro ti’a ānei tātou ’aore rā ’aita nō Aberahama, Isaaka, ’e Iakoba (hi’o Galatia 3:27–29). Nō reira, e mea faufa’a roa ’ia hāro’aro’a e aha mau te fafaura’a a Aberahama, ’e e nāhea te reira e tano ai nō tātou i teie mahana.

E aha te fafaura’a a Aberahama ?

’Ua hina’aro ’o Aberahama « ’ia riro ’ei ta’ata pe’e mau i te parauti’a » (Aberahama 1:2), nō reira, ’ua ani te Atua iāna ’ia tomo i roto i te hō’ē auta’atira’a. E ’ere ’o Aberahama te ta’ata mātāmua tei roa’a teie hina’aro, ’e e ’ere ato’a ’oia te ta’ata mātāmua tei fāri’i i te hō’ē fafaura’a. ’Ua ’imi ’oia i « te mau ha’amaita’ira’a a te mau metua » (Aberahama 1:2)—te mau ha’amaita’ira’a tei pūpūhia nā roto i te fafaura’a ia Adamu ’e ’ia Eva, ’e i muri iho, i te feiā tei ’imi i teie mau ha’amaita’ira’a ma te itoito.

E mau ha’amaita’ira’a nehenehe tei fafauhia mai i roto i te fafaura’a a te Atua ia Aberahama : hō’ē tufa’a ai’a nō te fenua, hō’ē huā’ai rahi, ’ia fāri’i i te mau ’ōro’a o te autahu’ara’a, ’e hō’ē i’oa ’o tē fa’aturahia nō te mau u’i i muri nei. Terā rā, e ’ere te fa’atumura’a o teie fafaura’a nō ni’a noa i te mau ha’amaita’ira’a tā Aberahama ’e tōna ’utuāfare e fāri’i, nō ni’a ato’a rā i te rirora’a rātou ’ei ha’amaita’ira’a nō te toe’a o te mau tamari’i a te Atua. « E riro ’oe ’ei maita’i » te parau ïa a te Atua, « ’e ’ei ia ’oe e maita’i ai te mau fēti’i ato’a o te ao nei » (Genese 12:2–3).

’Ua hōro’a ānei teie fafaura’a ia Aberahama, ia Sara ’e i tō rāua huā’ai i te hō’ē ti’ara’a ta’a ’ē i rotopū i te mau tamari’i a te Atua ? I roto noa i te aura’a parau ē, e fāna’ora’a nō te ha’amaita’i ia vetahi ’ē. ’Ua tītauhia i te ’utuāfare o Aberahama « ’ia hōpoi i teie nei tōro’a ’e teie nei autahu’ara’a i te mau nūna’a ato’a », te fa’a’itera’a i « te mau ha’amaita’ira’a o te ’evanelia, ’oia ho’i te mau ha’amaita’ira’a o te ora, ’oia te ora mure ’ore » (Aberahama 2:9, 11).

Teie fafaura’a ’o te ha’amaita’ira’a ïa tā Aberahama i hina’aro maoro noa na. I muri a’e i tōna fāri’ira’a i te reira, nā ’ō a’era Aberahama i roto i tōna ’ā’au, « ’ua ’imi māite tō tāvini ia ’oe, ’e i teienei ’ua ’iteā ’oe iā’u » (Aberahama 2:12).

’Ua tupu te reira e rave rahi tauatini matahiti i teienei, terā rā ’ua fa’aho’i-fa’ahou-hia mai te reira fafaura’a i tō tātou nei ’anotau (hi’o 1 Nephi 22:8–12). ’E tē tupu nei te reira i roto i te orara’a o te mau ta’ata o te Atua. ’Oia mau, e rahi atu ā te tupura’a o te fafaura’a i te mau mahana hope’a nei, ’a haere noa ai te ’ohipa a te Atua i mua, ma te ha’amaita’i i te mau ’utuāfare ’ati a’e te ao nei. E te ta’ata ē mai ia Aberahama, e hina’aro ’ia riro ’ei ta’ata pe’e rahi mau i te parauti’a, te ta’ata ē e ’imi tu’utu’u ’ore i te Fatu, e riro ’oia ’ei tuha’a nō te reira.

E aha te aura’a te fafaura’a a Aberahama nō’u ?

E tamari’i ’oe nō te fafaura’a. ’Ua rave ’oe i te hō’ē fafaura’a ’e te Atua i te taime ’a bāpetizohia ai ’oe. E fa’a’āpī ’oe i te reira fafaura’a i te mau taime ato’a ’a rave ai ’oe i te ’ōro’a mo’a. ’E e rave ’oe i te mau fafaura’a mo’a i roto i te hiero. Nā teie mau fafaura’a tā’āto’a e fa’ariro ia ’oe ’ei ti’a i roto i te fafaura’a a Aberahama, ’o tē ’itehia te ’īra’a i roto i te mau ’ōro’a o te hiero. Mai tā te peresideni Russell M. Nelson i ha’api’i, « i te pae hope’a, i roto i te hiero mo’a, e nehenehe tātou e riro ’ei feiā tufa’a nō te mau ha’amaita’ira’a o te hō’ē ’utuāfare mure ’ore, mai tei fafauhia, i te hō’ē taime, ia Aberahama, Isaaka, Iakoba, ’e tō rātou huā’ai ».¹

Nā roto i teie mau fafaura’a ’e te mau ’ōro’a, e riro mai tātou ’ei mau ta’ata nō te Atua (hi’o Exodo 6:7 ; Deuteronomi 7:6 ; 26:18 ; Ezekiela 11:20). E riro tātou ’ei feiā ta’a ’ē i tō te ao ’ati a’e ia tātou. Nā tā tātou mau fafaura’a e fa’ati’a ia tātou ’ia riro ’ei mau pipi mau nā Iesu Mesia. ’Ua fa’ata’a mai te peresideni Nelson ē, « e tā’ati tā tātou mau fafaura’a ia tātou i ni’a iāna, ma tē hōro’a mai ia tātou i te mana Atua ».² ’E ’ia ha’amaita’i ana’e te Atua i tōna mau ta’ata i tōna mana, e mea nā roto ïa i te anira’a ’e te tīa’ira’a ’ia ha’amaita’i rātou ia vetahi ’ē—’ia « riro rātou ’ei ha’amaita’ira’a » nō « te mau ’utuāfare ato’a o te fenua nei » (Aberahama 2:9, 11).

Teie te ’itera’a faufa’a mau i hōro’ahia mai ia tātou nā roto i te fa’aho’i-fa’ahou-ra’a-hia mai te fafaura’a a Aberahama nā roto i te peropheta Iosepha Semita. Nō reira, ia tai’o ana’e ’outou nō ni’a i te mau parau fafau i roto i te Faufa’a Tahito, ’eiaha e mana’o noa i te auta’atira’a i rotopū i te Atua ’e ’o Aberahama, Isaaka ’e ’o Iakoba. ’A feruri ato’a i te auta’atira’a i rotopū iāna ’e ’o ’outou. ’Ia tai’o ana’a ’outou nō ni’a i te parau fafau nō te huā’ai rahi (hi’o Genese 28:14), ’eiaha e feruri noa i te rahira’a milioni ’o tē parau nei ia Aberahama i teie mahana, tō rātou metua tāne. ’A feruri ato’a i te parau fafau a te Atua ia ’outou nō ni’a i te mau ’utuāfare mure ’ore ’e te tupura’a mure ’ore (hi’o Te Parau Ha’api’ira’a ’e te mau Parau Fafau 131:1–4 ; 132:20–24). ’Ia tai’o ana’e ’outou nō ni’a i te parau fafau nō te hō’ē tufa’a fenua, ’eiaha e feruri noa i te fenua i fafauhia ia Aberahama. ’A feruri ato’a i te hope’ara’a tīrētiēra o te fenua iho— e tuha’a āi’a fafauhia nō te « ’ā’au marū » ’o tē « ti’aturi ia Iehova » (Mataio 5:5 ; Salamo 37:9, 11 ; hi’o ato’a Te Parau Ha’api’ira’a ’e te mau Parau Fafau 88:17–20). ’E ’ia tai’o ana’e ’outou nō ni’a i te parau fafau ē, e ha’amaita’i te nūna’a fafauhia a te Atua i « te mau ’utuāfare ato’a o te fenua nei » (Aberahama 2:11), ’eiaha e feruri noa i te tau fa’aterera’a o Aberahama ’aore rā, o te mau peropheta ’o tei pou mai nā roto iāna. ’A feruri ato’a i te mea tā ’outou e nehenehe e rave—’ei pipi fafau nā Iesu Mesia—’ia riro ’ei ha’amaita’ira’a nō te mau ’utuāfare ’ati a’e ia ’outou.

Fa’ata’ara’a

1. Russell M. Nelson, « Te mau fafaura’a », Liahona, Novema 2011, 88.

2. Russell M. Nelson, « Te hutiraʼa mai i te mana o Iesu Mesia i roto i tō tātou oraraʼa », Liahona, Mē 2017, 41. ’Ua parau Linda K. Burton, peresideni rahi nō te Sōtaiete Tauturu ē, « te ravera’a ’e te ha’apa’ora’a i te mau fafaura’a, te aura’a, e mā’iti tātou ’ia tā’amu ia tātou i tō tātou ra Metua i te raʻi ’e ia Iesu Mesia. ’O te fafaura’a ’ia pe’e i te Fa’aora » (« Te mana, te ’oa’oa ’e te here i roto i te ha’apa’ora’a i te fafaura’a », Liahona, Novema 2013, 111).