“ວັນທີ 7–13 ເດືອນກຸມພາ. ປະຖົມມະການ 12–17; ອັບຣາຮາມ 1–2: ‘ເປັນຜູ້ຕິດຕາມຄວາມຊອບທຳຫລາຍຂຶ້ນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 7–13 ເດືອນກຸມພາ. ປະຖົມມະການ 12–17; ອັບຣາຮາມ 1–2,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ຮູບພາບອັບຣາຮາມ ແລະ ນາງຊາຣາ, ໂດຍ ດຽວລີນ ມາສ໌
ວັນທີ 7–13 ເດືອນກຸມພາ
ປະຖົມມະການ 12–17; ອັບຣາຮາມ 1–2
“ເປັນຜູ້ຕິດຕາມຄວາມຊອບທຳຫລາຍຂຶ້ນ”
ຂະນະທີ່ທ່ານອ່ານກ່ຽວກັບອັບຣາມ ແລະ ນາງຊາຣາຍ (ຕໍ່ມາຖືກເອີ້ນວ່າ ອັບຣາຮາມ ແລະ ນາງຊາຣາ) ແລະ ຄອບຄົວຂອງພວກເພິ່ນ, ໃຫ້ໄຕ່ຕອງເຖິງວິທີທີ່ຕົວຢ່າງຂອງພວກເພິ່ນດົນໃຈທ່ານແນວໃດ. ໃຫ້ບັນທຶກຄວາມປະທັບໃຈກ່ຽວກັບສິ່ງທີ່ທ່ານສາມາດເຮັດ ເພື່ອຈະໄດ້ “ເປັນຜູ້ຕິດຕາມຄວາມຊອບທຳຫລາຍຂຶ້ນ” (ອັບຣາຮາມ 1:2).
ບັນທຶກຄວາມປະທັບໃຈຂອງທ່ານ
ເປັນເພາະພັນທະສັນຍາທີ່ພຣະເຈົ້າໄດ້ເຮັດໄວ້ກັບເພິ່ນ, ອັບຣາຮາມຈຶ່ງໄດ້ຖືກເອີ້ນວ່າ “ບິດາຂອງຄົນຊື່ສັດ” (ຄຳສອນ ແລະ ພັນທະສັນຍາ 138:41) ແລະ “ສະຫາຍຂອງພຣະເຈົ້າ” (ຢາໂກໂບ 2:23). ຫລາຍລ້ານຄົນໃນທຸກວັນນີ້ເຄົາລົບເພິ່ນ ວ່າເປັນບັນພະບຸລຸດໂດຍກົງຂອງເຂົາເຈົ້າ, ແລະ ຫລາຍຄົນກໍໄດ້ຖືກຮັບເຂົ້າໃນຄອບຄົວຂອງເພິ່ນ ເປັນລູກບຸນທຳ ຜ່ານທາງການປ່ຽນໃຈເຫລື້ອມໃສພຣະກິດຕິຄຸນຂອງພຣະເຢຊູຄຣິດ. ແຕ່ອັບຣາຮາມເອງກໍມາຈາກຄອບຄົວທີ່ເຕັມໄປດ້ວຍບັນຫາ—ບິດາຂອງເພິ່ນ, ຜູ້ໄດ້ປະຖິ້ມການນະມັດສະການພຣະເຈົ້າທີ່ແທ້ຈິງ, ໄດ້ພະຍາຍາມຖວາຍອັບຣາຮາມໃຫ້ພຣະເຈົ້າປອມ. ເຖິງແມ່ນຈະເປັນແນວນັ້ນ, ແຕ່ຄວາມປາດຖະໜາຂອງອັບຣາຮາມແມ່ນທີ່ຈະ “ເປັນຜູ້ຕິດຕາມຄວາມຊອບທຳຫລາຍຂຶ້ນ” (ອັບຣາຮາມ 1:2), ແລະ ເລື່ອງລາວກ່ຽວກັບຊີວິດຂອງເພິ່ນທີ່ພຣະເຈົ້າໄດ້ກະທຳຕາມຄວາມປາດຖະໜາຂອງເພິ່ນ. ຊີວິດຂອງອັບຣາຮາມເປັນແບບຢ່າງຂອງປະຈັກພະຍານ ທີ່ບໍ່ວ່າປະຫວັດຂອງບຸກຄົນເຄີຍເປັນແນວໃດກໍຕາມ, ແຕ່ອະນາຄົດສາມາດເຕັມໄປດ້ວຍຄວາມຫວັງໄດ້.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຈົ້າຈະປະທານພອນໃຫ້ເຮົາສຳລັບສັດທາ ແລະ ຄວາມປາດຖະໜາທີ່ຊອບທຳຂອງເຮົາ.
ຄືກັນກັບເຮົາຫລາຍຄົນ, ອັບຣາຮາມໄດ້ມີຊີວິດຢູ່ໃນສະພາບແວດລ້ອມທີ່ຊົ່ວຮ້າຍ, ແຕ່ເພິ່ນກໍຍັງປາດຖະໜາທີ່ຈະເປັນຄົນຊອບທຳຢູ່. ປະທານດາລິນ ເອັຈ ໂອກສ໌ ໄດ້ສິດສອນເຖິງຄວາມສຳຄັນຂອງການມີຄວາມປາດຖະໜາທີ່ຊອບທຳ: “ເຖິງແມ່ນການປະຖິ້ມຄວາມປາດຖະໜາທີ່ຈະເຮັດຄວາມຜິດບາບກໍສຳຄັນພໍໆກັນ, ແຕ່ຊີວິດນິລັນດອນຮຽກຮ້ອງຫລາຍກວ່ານັ້ນ. ເພື່ອບັນລຸຈຸດໝາຍປາຍທາງນິລັນດອນຂອງເຮົາ, ເຮົາຈະປາດຖະໜາ ແລະ ທຳງານເພື່ອຄວາມເໝາະສົມທີ່ຈະກາຍເປັນບຸກຄົນນິລັນດອນ. … ຖ້າສິ່ງນີ້ເບິ່ງຄືວ່າຫຍຸ້ງຍາກຫລາຍ—ແລະ ແນ່ນອນ ມັນຈະບໍ່ເປັນສິ່ງງ່າຍສຳລັບໃຜໆໃນພວກເຮົາ—ແລ້ວ ເຮົາຄວນເລີ່ມຕົ້ນດ້ວຍຄວາມປາດຖະໜາສຳລັບຄຸນສົມບັດເຊັ່ນນັ້ນ ແລະ ທູນຂໍໃຫ້ພຣະບິດາເທິງສະຫວັນຊ່ວຍເຫລືອເຮົາກັບຄວາມຮູ້ສຶກຂອງເຮົາ [ເບິ່ງ ໂມໂຣໄນ 7:48]” (“Desire,” Liahona, May 2011, 44–45). ຂະນະທີ່ທ່ານອ່ານ ອັບຣາຮາມ 1:1–19, ໃຫ້ພິຈາລະນາເຖິງວິທີທີ່ຂໍ້ເຫລົ່ານີ້ສະແດງໃຫ້ເຫັນສິ່ງທີ່ປະທານໂອກສ໌ ໄດ້ສິດສອນ. ຄຳຖາມເຊັ່ນດັ່ງຕໍ່ໄປນີ້ອາດຊ່ວຍໄດ້:
-
ອັບຣາຮາມໄດ້ປາດຖະໜາ ແລະ ສະແຫວງຫາສິ່ງໃດ? ເພິ່ນໄດ້ເຮັດສິ່ງໃດເພື່ອສະແດງເຖິງສັດທາຂອງເພິ່ນ?
-
ທ່ານປາດຖະໜາສິ່ງໃດ? ມີຫຍັງບໍ່ທີ່ທ່ານຮູ້ສຶກວ່າ ທ່ານຄວນເຮັດເພື່ອເຮັດໃຫ້ຄວາມປາດຖະໜາຂອງທ່ານບໍລິສຸດ?
-
ມີການທ້າທາຍຢ່າງໃດແດ່ທີ່ອັບຣາຮາມໄດ້ປະເຊີນ ເພາະຄວາມປາດຖະໜາທີ່ຊື່ສັດຂອງເພິ່ນ? ພຣະເຈົ້າໄດ້ຊ່ວຍເພິ່ນແນວໃດ?
-
ຂໍ້ເຫລົ່ານີ້ມີຂ່າວສານໃດແດ່ສຳລັບຜູ້ທີ່ມີສະມາຊິກໃນຄອບຄົວທີ່ບໍ່ມີຄວາມປາດຖະໜາຢາກມີຄວາມຊອບທຳ?
ເບິ່ງ ມັດທາຍ 7:7; ວິດີໂອ “Deliverance of Abraham”, ChurchofJesusChrist.org; “Educate Your Desires, Elder Andersen Counsels” (ChurchofJesusChrist.org ນຳອີກ).
ມີໃຜແດ່ທີ່ລວມຢູ່ໃນພັນທະສັນຍາຂອງອັບຣາຮາມ?
ເມື່ອພຣະຜູ້ເປັນເຈົ້າໄດ້ເຮັດພັນທະສັນຍາຂອງພຣະອົງກັບອັບຣາຮາມ, ພຣະອົງໄດ້ສັນຍາວ່າ ພັນທະສັນຍານີ້ຈະສືບຕໍ່ໃນເຊື້ອສາຍ, ຫລື “ລູກຫລານ,” ຂອງອັບຣາຮາມ ແລະ ວ່າ “ຫລາຍຕໍ່ຫລາຍຄົນທີ່ຮັບເອົາພຣະກິດຕິຄຸນຈະຖືກ … ນັບໄວ້ເປັນລູກຫລານຂອງເຈົ້າ” (ອັບຣາຮາມ 2:10–11). ນີ້ໝາຍຄວາມວ່າ ຄຳສັນຍາແຫ່ງພັນທະສັນຍາຂອງອັບຣາຮາມແມ່ນກ່ຽວຂ້ອງກັບສະມາຊິກຂອງສາດສະໜາຈັກໃນປະຈຸບັນນີ້, ບໍ່ວ່າເຂົາເຈົ້າເປັນລູກຫລານໂດຍກົງຂອງອັບຣາຮາມ ຫລື ຖືກຮັບເຂົ້າເປັນລູກບຸນທຳໃນຄອບຄົວຂອງເພິ່ນຫລືບໍ່ກໍຕາມ ຜ່ານທາງການບັບຕິສະມາ ແລະ ພັນທະສັນຍາຕໍ່ພຣະກິດຕິຄຸນຂອງພຣະເຢຊູຄຣິດ (ເບິ່ງ ຄາລາເຕຍ 3:26–29; ຄຳສອນ ແລະ ພັນທະສັນຍາ 132:30–32). ເພື່ອສືບຕໍ່ເປັນລູກຫລານຂອງອັບຣາຮາມ, ບຸກຄົນຈະຕ້ອງເຊື່ອຟັງກົດ ແລະ ພິທີການຂອງພຣະກິດຕິຄຸນ.
ປະຖົມມະການ 12:1–3; 13:15–16; 15:1–6; 17:1–8, 15–22; ອັບຣາຮາມ 2:8–11
ພັນທະສັນຍາຂອງອັບຣາຮາມເປັນພອນໃຫ້ແກ່ເຮົາ ແລະ ຄອບຄົວຂອງເຮົາ.
ເພາະສະມາຊິກຂອງສາດສະໜາຈັກທຸກຄົນຖືກລວມເຂົ້າໃນພັນທະສັນຍາຂອງອັບຣາຮາມ, ທ່ານອາດຢາກໃຊ້ບາງເວລາເພື່ອໄຕ່ຕອງກ່ຽວກັບຄວາມໝາຍຂອງພັນທະສັນຍານີ້ ໃນຊີວິດຂອງທ່ານ. ບັນທຶກຄວາມນຶກຄິດຂອງທ່ານກ່ຽວກັບຄຳຖາມດັ່ງຕໍ່ໄປນີ້:
ຄຳສັນຍາທີ່ພົບເຫັນຢູ່ໃນ ອັບຣາຮາມ 2:8–11 ສາມາດເປັນພອນໃຫ້ແກ່ເຮົາ ແລະ ຄອບຄົວຂອງເຮົາແນວໃດ? (ເບິ່ງ ປະຖົມມະການ 12:1–3; 13:15–16 ນຳອີກ).
ເຮົາຮຽນຮູ້ຫຍັງແດ່ກ່ຽວກັບພັນທະສັນຍາຂອງອັບຣາຮາມຈາກ ປະຖົມມະການ 15:1–6; 17:1–8, 15–22?
ເຮົາຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພື່ອຊ່ວຍບັນລຸຄຳສັນຍາທີ່ “ຄອບຄົວທັງໝົດຂອງແຜ່ນດິນໂລກຈະໄດ້ຮັບພອນ”? (ອັບຣາຮາມ 2:11).
ທ່ານອາດພິຈາລະນາພອນຝ່າຍໂລກບາງຢ່າງທີ່ໄດ້ສັນຍາກັບອັບຣາຮາມ ແລະ ນາງຊາຣາ, ດັ່ງເຊັ່ນການໄດ້ຮັບແຜ່ນດິນແຫ່ງຄຳສັນຍາເປັນມູນມໍລະດົກ ແລະ ການເປັນບັນພະບຸລຸດຂອງເຊື້ອສາຍທີ່ຍິ່ງໃຫຍ່, ມີຄວາມເທົ່າທຽມນິລັນດອນແນວໃດ. ສິ່ງເຫລົ່ານີ້ແມ່ນລວມທັງມູນມໍລະດົກຢູ່ໃນອານາຈັກຊັ້ນສູງ (ເບິ່ງ ຄຳສອນ ແລະ ພັນທະສັນຍາ 132:29) ແລະ ການແຕ່ງງານນິລັນດອນພ້ອມດ້ວຍເຊື້ອສາຍນິລັນດອນ (ເບິ່ງ ຄຳສອນ ແລະ ພັນທະສັນຍາ 131:1–4; 132:20–24, 28–32). ມັນແມ່ນ “ໃນພຣະວິຫານ,” ປະທານຣະໂຊ ເອັມ ແນວສັນ ໄດ້ສິດສອນ, ທີ່ “ເຮົາໄດ້ຮັບພອນອັນສູງສຸດຂອງເຮົາ, ໃນຖານະລູກຫລານຂອງອັບຣາຮາມ, ອີຊາກ, ແລະ ຢາໂຄບ” (“The Gathering of Scattered Israel,” Liahona, Nov. 2006, 80).
ເບິ່ງ ການແປຂອງໂຈເຊັບ ສະມິດ, ປະຖົມມະການ 15:9–12; 17:3–12 (ໃນ ພຣະຄຣິສຕະທຳຄຳພີ ພາກຫ້ອຍທ້າຍ); Bible Dictionary,“Abraham, covenant of”; “ຄວາມຄິດທີ່ໃຫ້ເກັບໄວ້ໃນໃຈ: ພັນທະສັນຍາ,” ໃນແຫລ່ງນີ້.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ປະຖົມມະການ 13:5–12.ອັບຣາຮາມໄດ້ເຮັດຫຍັງເພື່ອສ້າງຄວາມສະຫງົບຢູ່ໃນຄອບຄົວຂອງເພິ່ນ? ບາງທີສະມາຊິກໃນຄອບຄົວຂອງທ່ານສາມາດຝຶກການເປັນຄົນມັກຄວາມສະຫງົບ ຄືກັນກັບອັບຣາຮາມ ໂດຍການຫລິ້ນລະຄອນກ້ອມ ເຖິງວິທີທີ່ຈະແກ້ໄຂການຂັດແຍ້ງກັນ ຊຶ່ງອາດເກີດຂຶ້ນຢູ່ໃນຄອບຄົວຂອງທ່ານ.
-
ປະຖົມມະການ 13:16; 15:2–6; 17:15–19.ທ່ານຈະຊ່ວຍຄອບຄົວຂອງທ່ານໃຫ້ເຂົ້າໃຈຄຳສັນຍາຂອງພຣະຜູ້ເປັນເຈົ້າຢູ່ໃນຂໍ້ເຫລົ່ານີ້ແນວໃດ—ເຖິງແມ່ນວ່າອັບຣາຮາມ ແລະ ນາງຊາຣາຍັງບໍ່ມີລູກເທື່ອ, ເຊື້ອສາຍຂອງເຂົາເຈົ້າຈະມີຢູ່ຢ່າງຫລວງຫລາຍຄືກັນກັບຝຸ່ນດິນ, ດວງດາວຢູ່ໃນທ້ອງຟ້າ, ຫລື ເມັດດິນຊາຍຢູ່ແຄມທະເລ? (ເບິ່ງ ປະຖົມມະການ 22:17 ນຳອີກ). ບາງທີທ່ານສາມາດເອົາດິນຊາຍມາໃຫ້ສະມາຊິກໃນຄອບຄົວເບິ່ງ, ຫລຽວເບິ່ງດວງດາວ, ຫລື ໃຊ້ຮູບພາບທີ່ມາກັບໂຄງຮ່າງນີ້. ເຮົາຈະໄວ້ວາງໃຈໃນຄຳສັນຍາຂອງພຣະເຈົ້າແນວໃດ ແມ່ນແຕ່ເມື່ອມັນເບິ່ງຄືວ່າເປັນໄປບໍ່ໄດ້?
-
ປະຖົມມະການ 14:18–20.ເຮົາຮຽນຮູ້ຫຍັງແດ່ກ່ຽວກັບເມນຄີເສເດັກ ຈາກ ການແປຂອງໂຈເຊັບ ສະມິດ, ປະຖົມມະການ 14:25–40? (ໃນ ພຣະຄຣິສຕະທຳຄຳພີ ພາກຫ້ອຍທ້າຍ; ເບິ່ງ ແອວມາ 13:13–19). ເຮົາຈະ “[ສະຖາປະນາ] ຄວາມຊອບທຳ” ຄືກັນກັບເມນຄີເສເດັກໄດ້ເຮັດ ໄດ້ແນວໃດ? (ຂໍ້ທີ 36). ມີຫຍັງຕື່ມອີກແດ່ກ່ຽວກັບການປະຕິບັດສາດສະໜາກິດຂອງເມນຄີເສເດັກ ທີ່ດົນໃຈເຮົາ?
Melchizedek Blesses Abram [ເມນຄີເສເດັກອວຍພອນອັບຣາຮາມ], ໂດຍ ວາວເຕີ ເຣນ
-
ປະຖົມມະການ 16.ການອ່ານກ່ຽວກັບນາງຮາກາສາມາດເປັນໂອກາດເພື່ອສົນທະນາເຖິງວິທີທີ່ພຣະຜູ້ເປັນເຈົ້າຊ່ວຍເຮົາ ເມື່ອເຮົາຮູ້ສຶກວ່າຖືກເຮັດຜິດຕໍ່ແນວໃດ. ທ່ານອາດຊີ້ບອກວ່າ “ອິດຊະມາເອນ” ໝາຍຄວາມວ່າ “ພຣະເຈົ້າໄດ້ຍິນ.” ເມື່ອໃດທີ່ເຮົາເຄີຍຮູ້ສຶກວ່າພຣະຜູ້ເປັນເຈົ້າໄດ້ຍິນ ແລະ ໄດ້ຊ່ວຍເຫລືອເຮົາ ເມື່ອເຮົາຮູ້ສຶກວ່າຖືກເຮັດຜິດຕໍ່? (ເບິ່ງ ປະຖົມມະການ 16:11).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68.
ການປັບປຸງການສິດສອນຂອງເຮົາ
ມີເວລາ ແລະ ສາມາດເຂົ້າຫາໄດ້. ບາງເທື່ອເວລາສິດສອນທີ່ດີທີ່ສຸດແມ່ນ ເລີ່ມຕົ້ນດ້ວຍຄຳຖາມ ຫລື ຄວາມເປັນຫ່ວງເປັນໃຍໃນໃຈຂອງສະມາຊິກໃນຄອບຄົວ. ໃຫ້ສະມາຊິກໃນຄອບຄົວຂອງທ່ານຮູ້ຜ່ານທາງຄຳເວົ້າ ແລະ ການກະທຳຂອງທ່ານວ່າ ທ່ານພ້ອມທີ່ຈະຮັບຟັງເຂົາເຈົ້າ. (ເບິ່ງ Teaching in the Savior’s Way, 16.)
ພຣະເຈົ້າໄດ້ສັນຍາວ່າເຊື້ອສາຍຂອງອັບຣາຮາມກັບນາງຊາຣາຈະມີຢ່າງຫລວງຫລາຍ “ດັ່ງດວງດາວໃນທ້ອງຟ້າ” (ປະຖົມມະການ 22:17). Pondering God’s Promise [ການໄຕ່ຕອງຄຳສັນຍາຂອງພຣະເຈົ້າ], ໂດຍ ຄອດນີ ແມັດສ໌.