“ວັນທີ 21–27 ເດືອນກຸມພາ. ປະຖົມມະການ 24–27: ພັນທະສັນຍາຖືກມອບໃຫ້ຕໍ່,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 21–27 ເດືອນກຸມພາ. ປະຖົມມະການ 24–27,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ເຣເບກາ

ຮູບພາບນາງເຣເບກາ ໂດຍ ດຽວລີນ ມາສ໌

ວັນທີ 21–27 ເດືອນກຸມພາ

ປະຖົມມະການ 24–27

ພັນທະສັນຍາຖືກມອບໃຫ້ຕໍ່

ຂະນະທີ່ທ່ານອ່ານ ປະຖົມມະການ 24–27, ໃຫ້ເອົາໃຈໃສ່ຕໍ່ຄວາມຮູ້ທາງວິນຍານທີ່ທ່ານໄດ້ຮັບ. ໃຫ້ອະທິຖານເພື່ອຈະໄດ້ຮູ້ຈັກວ່າຫລັກທຳທີ່ທ່ານພົບເຫັນ ກ່ຽວຂ້ອງກັບຊີວິດຂອງທ່ານແນວໃດ.

ບັນທຶກຄວາມປະທັບໃຈຂອງທ່ານ

ພັນທະສັນຍາຂອງພຣະເຈົ້າກັບອັບຣາຮາມ ແມ່ນລວມທັງຄຳສັນຍາວ່າ ຜ່ານທາງອັບຣາຮາມ ແລະ ລູກຫລານຂອງເພິ່ນ “ຄອບຄົວທັງໝົດຂອງແຜ່ນດິນໂລກຈະໄດ້ຮັບພອນ” (ອັບຣາຮາມ 2:11). ນັ້ນບໍ່ແມ່ນຄຳສັນຍາທີ່ສາມາດບັນລຸໄດ້ພຽງໃນໜຶ່ງລຸ້ນຄົນ: ໃນຫລາຍວິທີທາງ, ພຣະຄຣິສຕະທຳຄຳພີເປັນເລື່ອງລາວຂອງພຣະເຈົ້າ ເຖິງການບັນລຸຄຳສັນຍາອັນຕໍ່ເນື່ອງຂອງພຣະອົງ. ແລະ ພຣະອົງໄດ້ເລີ່ມຕົ້ນໂດຍການຕໍ່ພັນທະສັນຍາກັບຄອບຄົວຂອງອີຊາກ ແລະ ເຣເບກາ. ຜ່ານທາງປະສົບການຂອງເຂົາເຈົ້າ, ເຮົາຮຽນຮູ້ບາງຢ່າງກ່ຽວກັບການເປັນພາກສ່ວນຂອງພັນທະສັນຍາ. ຕົວຢ່າງຂອງເຂົາເຈົ້າສິດສອນເຮົາກ່ຽວກັບຄວາມເມດຕາ, ຄວາມອົດທົນ, ແລະ ຄວາມໄວ້ວາງໃຈໃນພອນທີ່ສັນຍາໄວ້ຂອງພຣະເຈົ້າ. ແລະ ເຮົາຮຽນຮູ້ວ່າ ມັນກຸ້ມຄ່າທີ່ຈະປະຖິ້ມ “ແກງ” ທີ່ເປັນຂອງໂລກ (ປະຖົມມະການ 25:30) ເພື່ອຈະໄດ້ຮັບພອນຂອງພຣະເຈົ້າສຳລັບຕົວເຮົາເອງ ແລະ ລູກຫລານຂອງເຮົາ ໃນຫລາຍລຸ້ນຄົນ ໃນພາຍຂ້າງໜ້າ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ປະຖົມມະການ 24

ການແຕ່ງງານເປັນສິ່ງທີ່ຈຳເປັນຕໍ່ແຜນນິລັນດອນຂອງພຣະເຈົ້າ.

ທຸກວັນນີ້ຫລາຍຄົນນັບຖືການແຕ່ງງານເປັນຄວາມສຳຄັນອັນດັບຕ່ຳ ຫລື ແມ່ນແຕ່ຄິດວ່າເປັນພາລະໜັກ. ອັບຣາຮາມມີທັດສະນະທີ່ແຕກຕ່າງ—ສຳລັບເພິ່ນແລ້ວ, ການແຕ່ງງານຂອງອີຊາກ ລູກຊາຍຂອງເພິ່ນ ເປັນສິ່ງສຳຄັນອັນສູງສຸດ. ທ່ານຄິດວ່າ ເປັນຫຍັງມັນຈຶ່ງສຳຄັນຫລາຍແທ້ໆຕໍ່ເພິ່ນ? ຂະນະທີ່ທ່ານອ່ານ ປະຖົມມະການ 24, ໃຫ້ຄິດເຖິງຄວາມສຳຄັນຂອງການແຕ່ງງານ ໃນແຜນແຫ່ງຄວາມລອດຂອງພຣະເຈົ້າ. ທ່ານກໍສາມາດອ່ານຂ່າວສານຂອງແອວເດີ ດີ ທອດ ຄຣິສໂຕເຟີສັນ ນຳອີກ “Why Marriage, Why Family” (Liahona, May 2015, 50–53) ແລະ ພິຈາລະນາວ່າ ເປັນຫຍັງ “ຄອບຄົວທີ່ສ້າງຂຶ້ນດ້ວຍການແຕ່ງງານຂອງຊາຍ ແລະ ຍິງ ຈຶ່ງຈັດໃຫ້ມີບັນຍາກາດທີ່ດີທີ່ສຸດ ເພື່ອແຜນຂອງພຣະເຈົ້າຈະ ຈະເລີນກ້າວໜ້າ” (ໜ້າທີ 52).

ຄຳຖາມດັ່ງຕໍ່ໄປນີ້ ອາດຊ່ວຍທ່ານພິຈາລະນາຫລັກທຳທີ່ສຳຄັນຢ່າງອື່ນໆ ຢູ່ໃນບົດນີ້:

ປະຖົມມະການ 24:1–14. ອັບຣາຮາມ ແລະ ຄົນຮັບໃຊ້ຂອງເພິ່ນໄດ້ເຮັດຫຍັງ ເພື່ອໃຫ້ພຣະຜູ້ເປັນເຈົ້າມີພາກສ່ວນໃນຄວາມພະຍາຍາມຂອງພວກເພິ່ນ ເພື່ອຊອກຫາເມຍໃຫ້ອີຊາກ?

ປະຖົມມະການ 24:15–28, 55–60. ທ່ານພົບເຫັນຄວາມດີງາມຢ່າງໃດແດ່ ໃນຕົວນາງເຣເບກາ ທີ່ທ່ານຢາກເຮັດຕາມ?

ມີຄວາມຮູ້ອື່ນໃດອີກແດ່ທີ່ທ່ານພົບເຫັນ?

ເບິ່ງ ຄຳສອນ ແລະ ພັນທະສັນຍາ 131:1–4; “ຄອບຄົວ: ການປະກາດຕໍ່ໂລກ,” ChurchofJesusChrist.org ນຳອີກ.

ປະຖົມມະການ 25:29–34

ເຮົາສາມາດເລືອກລະຫວ່າງຄວາມເພິ່ງພໍໃຈໃນທັນທີ ແລະ ສິ່ງທີ່ມີຄ່າຫລາຍກວ່າ.

ໃນວັດທະນະທຳຂອງອັບຣາຮາມ, ຕາມປົກກະຕິແລ້ວ ລູກຊາຍກົກໃນຄອບຄົວຈະໄດ້ຮັບຕຳແໜ່ງຂອງການເປັນຜູ້ນຳ ແລະ ສິດທິພິເສດ, ເອີ້ນວ່າ ສິດທິອ້າຍກົກ. ລູກຊາຍຄົນນີ້ຈະໄດ້ຮັບຊັບສົມບັດຫລາຍກວ່າໝູ່ ຈາກພໍ່ແມ່ຂອງລາວ, ພ້ອມທັງມີໜ້າທີ່ຮັບຜິດຊອບຫລາຍກວ່າ ໃນການດູແລທຸກຄົນໃນຄອບຄົວ.

ຂະນະທີ່ທ່ານອ່ານ ປະຖົມມະການ 25:29–34, ໃຫ້ພິຈາລະນາວ່າ ເປັນຫຍັງເອຊາວຈຶ່ງເຕັມໃຈທີ່ຈະສະລະ ສິດທິອ້າຍກົກຂອງລາວ ເພື່ອແລກປ່ຽນກັບອາຫານຄາບດຽວ. ບົດຮຽນໃດແດ່ທີ່ທ່ານພົບເຫັນສຳລັບຕົວທ່ານເອງ ຢູ່ໃນເລື່ອງນີ້? ຍົກຕົວຢ່າງ, ມີ “ແກງ” ຢ່າງໃດແດ່ທີ່ກີດກັນທ່ານຈາກພອນ ທີ່ມີຄ່າຫລາຍທີ່ສຸດຕໍ່ທ່ານ? ທ່ານເຮັດຫຍັງແດ່ເພື່ອເອົາໃຈໃສ່ ແລະ ຮູ້ບຸນຄຸນຕໍ່ພອນເຫລົ່ານີ້?

ເບິ່ງ ມັດທາຍ 6:19–33; 2 ນີໄຟ 9:51; M. Russell Ballard, “What Matters Most Is What Lasts Longest,” Liahona, Nov. 2005, 41–44 ນຳອີກ.

ປະຖົມມະການ 26:1–5

ພັນທະສັນຍາຂອງອັບຣາຮາມໄດ້ຖືກມອບໃຫ້ຕໍ່ຜ່ານທາງອີຊາກ.

ພັນທະສັນຍາທີ່ພຣະເຈົ້າໄດ້ເຮັດໄວ້ກັບອັບຣາຮາມ ມີເຈດຕະນາເພື່ອໃຫ້ສືບຕໍ່ໄປຫາຫລາຍລຸ້ນຄົນ, ເພື່ອວ່າ ມໍລະດົກຂອງການຮັກສາພັນທະສັນຍາຂອງອັບຣາຮາມ ແລະ ນາງຊາຣາຈະຖືກສົ່ງຕໍ່ໄປຫາ ອີຊາກ, ຢາໂຄບ, ແລະ ຜູ້ຍິງ ແລະ ຜູ້ຊາຍທີ່ຊື່ສັດຄົນອື່ນໆ ໃນບັນດາລູກຫລານຂອງພວກເພິ່ນ. ຂະນະທີ່ທ່ານອ່ານ ປະຖົມມະການ 26:1–5, ໃຫ້ຊອກຫາພອນບາງຢ່າງຂອງພັນທະສັນຍາທີ່ພຣະເຈົ້າໄດ້ກ່າວເຖິງ. ເຮົາຮຽນຮູ້ຫຍັງແດ່ກ່ຽວກັບພຣະເຈົ້າ ຈາກຂໍ້ເຫລົ່ານີ້?

ປະຖົມມະການ 26:18–25, 32–33

ພຣະເຢຊູຄຣິດຄືນ້ຳສ້າງຂອງນ້ຳທີ່ປະກອບດ້ວຍຊີວິດ.

ທ່ານອາດສັງເກດເຫັນວ່າ ນ້ຳສ້າງ ແລະ ນ້ຳພຸ ແລະ ແຫລ່ງນ້ຳອື່ນໆ ມີບົດບາດທີ່ສຳຄັນໃນເລື່ອງລາວຫລາຍໆເລື່ອງ ຢູ່ໃນພຣະຄຳພີເດີມ. ສິ່ງນີ້ບໍ່ເປັນເລື່ອງແປກ, ເພາະເລື່ອງລາວສ່ວນຫລາຍໄດ້ເກີດຂຶ້ນຢູ່ໃນສະຖານທີ່ ທີ່ແຫ້ງແລ້ງ. ຂະນະທີ່ທ່ານອ່ານໃນ ປະຖົມມະການ 26 ກ່ຽວກັບນ້ຳສ້າງຂອງອີຊາກ, ໃຫ້ໄຕ່ຕອງກ່ຽວກັບສິ່ງທີ່ນ້ຳເປັນຕົວແທນໃຫ້ສິ່ງໃດ ຢູ່ໃນພຣະຄຳພີ. ຄວາມຮູ້ໃດແດ່ທີ່ທ່ານພົບເຫັນກ່ຽວກັບນ້ຳສ້າງທາງວິນຍານ “ນ້ຳທີ່ປະກອບດ້ວຍຊີວິດ”? (ເບິ່ງ ໂຢຮັນ 4:10–15). ທ່ານກຳລັງຂຸດນ້ຳສ້າງທາງວິນຍານໃນຊີວິດຂອງທ່ານແນວໃດ? ພຣະຜູ້ຊ່ວຍໃຫ້ລອດເປັນເໝືອນດັ່ງນ້ຳທີ່ປະກອບດ້ວຍຊີວິດຕໍ່ທ່ານແນວໃດ? ໃຫ້ຮູ້ໄວ້ວ່າຊາວຟີລິດສະຕິນໄດ້ “ຖົມ” ນ້ຳສ້າງ (ເບິ່ງ ປະຖົມມະການ 26:18). ມີສິ່ງໃດບໍຢູ່ໃນຊີວິດຂອງທ່ານ ທີ່ຖົມນ້ຳສ້າງຊຶ່ງເປັນນ້ຳທີ່ປະກອບດ້ວຍຊີວິດຂອງທ່ານ?

ນ້ຳສ້າງເມືອງ ເບເອນເຊບາ ໃນສະໄໝບູຮານ, ບ່ອນທີ່ອັບຣາຮາມ ແລະ ອີຊາກໄດ້ຂຸດນ້ຳສ້າງຫລາຍບ່ອນ.

ປະຖົມມະການ 27

ເຣເບກາ ແລະ ຢາໂຄບໄດ້ເຮັດຜິດບໍ ທີ່ໄດ້ຫລອກລວງອີຊາກ?

ເຮົາບໍ່ຮູ້ຈັກເຖິງເຫດຜົນຂອງການເຂົ້າຫາ ທີ່ເຣເບກາ ແລະ ຢາໂຄບໄດ້ໃຊ້ ເພື່ອຮັບເອົາພອນສຳລັບຢາໂຄບ. ມັນຊ່ວຍໄດ້ຫລາຍ ທີ່ຈະຈື່ຈຳວ່າພຣະຄຳພີເດີມ ດັ່ງທີ່ເຮົາຮູ້ໃນເວລານີ້ ບໍ່ຄົບຖ້ວນ (ເບິ່ງ ໂມເຊ 1:23, 41). ອາດມີຂໍ້ມູນບາງຢ່າງທີ່ຂາດໄປຈາກບັນທຶກຕົ້ນສະບັບ ທີ່ອະທິບາຍສິ່ງທີ່ເຮົາຂ້ອງໃຈ. ເຖິງຢ່າງໃດກໍຕາມ, ເຮົາຮູ້ວ່າ ມັນແມ່ນພຣະປະສົງຂອງພຣະເຈົ້າ ເພື່ອໃຫ້ຢາໂຄບໄດ້ຮັບພອນຈາກອີຊາກ ເພາະນາງເຣເບກາໄດ້ຮັບການເປີດເຜີຍວ່າ ຢາໂຄບຈະເປັນຜູ້ປົກຄອງ ເອຊາວ (ເບິ່ງ ປະຖົມມະການ 25:23). ຫລັງຈາກອີຊາກຮັບຮູ້ວ່າ ເພິ່ນໄດ້ມອບພອນໃຫ້ຢາໂຄບ ແທນທີ່ຈະໃຫ້ເອຊາວ, ເພິ່ນໄດ້ຢືນຢັນວ່າ “ພອນນັ້ນຈະເປັນຂອງ” ຢາໂຄບ (ປະຖົມມະການ 27:33)—ແນະນຳວ່າ ພຣະປະສົງຂອງພຣະເຈົ້າບັນລຸຄົບຖ້ວນແລ້ວ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ປະຖົມມະການ 24:2–4, 32–48.ອັບຣາຮາມໄດ້ຂໍໃຫ້ຜູ້ຮັບໃຊ້ໄປຊອກຫາເມຍໃຫ້ອີຊາກ, ແລະ ຜູ້ຮັບໃຊ້ໄດ້ເຮັດພັນທະສັນຍາກັບອັບຣາຮາມວ່າ ລາວຈະເຮັດຕາມນັ້ນ. ຜູ້ຮັບໃຊ້ຂອງອັບຣາຮາມໄດ້ສະແດງຄວາມຊື່ສັດໃນການຮັກສາພັນທະສັນຍາຂອງລາວແນວໃດ? ເຮົາຈະເຮັດຕາມຕົວຢ່າງຂອງລາວແນວໃດ?

ປະຖົມມະການ 24:15–28, 55–60.ຄອບຄົວຂອງທ່ານສາມາດເບິ່ງຂໍ້ເຫລົ່ານີ້ ເພື່ອຊອກຫາຄຸນລັກສະນະທີ່ເຮັດໃຫ້ນາງເຣເບກາມີຄ່າຄວນພໍທີ່ຈະເປັນຄູ່ຄອງນິລັນດອນຂອງອີຊາກ. ຊຸກຍູ້ສະມາຊິກໃນຄອບຄົວໃຫ້ເລືອກເອົາຄຸນລັກສະນະຢ່າງໜຶ່ງເຫລົ່ານີ້ ທີ່ເຂົາເຈົ້າຮູ້ສຶກວ່າຄວນພັດທະນາ.

ປະຖົມມະການ 25:19–34; 27.ເພື່ອທົບທວນເລື່ອງລາວເຖິງວິທີທີ່ຢາໂຄບໄດ້ຮັບສິດທິອ້າຍກົກ ແລະ ພອນຂອງເອຊາວ, ພວກທ່ານສາມາດຂຽນປະໂຫຍກຈາກ “ຢາໂຄບ ແລະ ເອຊາວ” (ໃນ ນິທານພຣະສັນຍາເດີມ) ໃສ່ໃນເຈ້ຍຫລາຍໆຕ່ອນ. ສະມາຊິກໃນຄອບຄົວສາມາດຊ່ວຍກັນລຽງປະໂຫຍກເຫລົ່ານັ້ນເຂົ້າກັນຕາມລຳດັບ.

ຂະນະທີ່ພວກທ່ານສົນທະນາກ່ຽວກັບເອຊາວຂາຍສິດທິອ້າຍກົກຂອງລາວ, ພວກທ່ານກໍສາມາດເວົ້າລົມກັນກ່ຽວກັບສິ່ງທີ່ສຳຄັນທີ່ສຸດຕໍ່ຄອບຄົວຂອງທ່ານ, ດັ່ງເຊັ່ນ ຄວາມສຳພັນຂອງພວກທ່ານກັບພຣະບິດາເທິງສະຫວັນ ແລະ ພຣະເຢຊູຄຣິດ. ບາງທີສະມາຊິກໃນຄອບຄົວສາມາດຊອກຫາສິ່ງຂອງ ຫລື ຮູບພາບທີ່ເປັນຕົວແທນໃຫ້ແກ່ສິ່ງທີ່ເຂົາເຈົ້າຄິດວ່າມີຄ່ານິລັນດອນ. ໃຫ້ເວລາເຂົາເຈົ້າອະທິບາຍເຫດຜົນທີ່ເຂົາເຈົ້າເລືອກເອົາສິ່ງເຫລົ່ານັ້ນ.

ປະຖົມມະການ 26:3–5.ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈພັນທະສັນຍາຂອງອັບຣາຮາມ, ທ່ານສາມາດເຊື້ອເຊີນເຂົາເຈົ້າໃຫ້ຊອກຫາຄຳສັນຍາທີ່ບັນຍາຍຢູ່ໃນຂໍ້ເຫລົ່ານີ້. ເປັນຫຍັງມັນຈຶ່ງສຳຄັນຕໍ່ເຮົາທີ່ຈະຮູ້ຈັກກ່ຽວກັບຄຳສັນຍາເຫລົ່ານີ້ ໃນທຸກວັນນີ້? (ເບິ່ງ “ຄວາມຄິດທີ່ໃຫ້ເກັບໄວ້ໃນໃຈ: ພັນທະສັນຍາ,” ຢູ່ໃນແຫລ່ງນີ້).

ປະຖົມມະການ 26:18–25, 32–33.ເປັນຫຍັງນ້ຳສ້າງຈຶ່ງສຳຄັນ? ພຣະເຢຊູຄຣິດເປັນເໝືອນດັ່ງນ້ຳສ້າງແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສຶກສາສ່ວນຕົວ

ທ່ອງຈຳຂໍ້ພຣະຄຳພີ. ແອວເດີ ຣິເຈີດ ຈີ ສະກາດ ໄດ້ສິດສອນວ່າ, “ຂໍ້ພຣະຄຳພີໃດທີ່ເຮົາທ່ອງຈຳ ຈະກາຍເປັນເພື່ອນທີ່ຍືນຍົງ ຊຶ່ງບໍ່ອ່ອນແອເມື່ອເວລາຜ່ານໄປ” (“The Power of Scripture,” Liahona, Nov. 2011, 6).